Badala, Thathani Umthwalo Wenu Wokwelusa Ngokungathi Sína
“Yalusani umhlambi kaNkulunkulu ophakathi kwenu.”—1 PETRU 5:2.
1. Kungani kungokufanelekile ukuba izimvu zisetshenziselwe ukumelela abantu abavunyelwa uNkulunkulu?
YEKA ukuthi kufaneleke kanjani ukusetshenziswa kwezimvu ukuba zimelele abantu abavunyelwa uNkulunkulu! Izimvu ziyizidalwa ezithobekile ezilizwayo izwi lomalusi wazo futhi zimlandele. Abantu bakaNkulunkulu abanjengezimvu ngokufanayo bayakuvuma ukuholwa nguMalusi Omuhle, uJesu Kristu. Bayamazi, bayalizwa izwi lakhe, futhi ngenjabulo bamukela ukuhola kwakhe. (Johane 10:11-16) Yebo, ngaphandle komalusi omuhle, izimvu ezingokoqobo zisheshe zesabe futhi zithothongane. Akumangalisi-ke, ukuthi uJesu Kristu waba nesihe ngabantu ‘ababekhathazekile, behlakazekile njengezimvu ezingenamalusi.’—Mathewu 9:36.
2. UJehova wababheka kanjani abanjengezimvu ababehlupheka ngaphansi ‘kwabelusi bakwaIsrayeli’ abangenaluthando?
2 UJehova uNkulunkulu unesithakazelo esijulile enhlala-kahleni engokomoya yabantu abanezinhliziyo eziqotho abafaniswa ngokomBhalo ‘nezimvu.’ Ngokwesibonelo, ngomprofethi uHezekeli, uNkulunkulu wazwakalisa umaye “kubelusi bakwaIsrayeli,” amadoda anomthwalo wemfanelo ayezondla wona ekhohlwa izimvu. Kodwa uJehova wayengeke avumele abanjengezimvu ukuba bahlupheke ngaphandle kokukhululwa, ngoba wathi: “Ngiyakufuna ezilahlekileyo, ngibuyise ezixoshiweyo, ngibophe ezaphukileyo, ngiqinise ezigulayo.”—Hezekeli 34:2-16.
3. UJesu wakubonisa kanjani ukukhathalela izimvu?
3 UMalusi Omuhle, uJesu Kristu, unokukhathalela okufanayo ngabanjengezimvu. Ngakho-ke, ngaphambi kokwenyukela ezulwini, uJesu wabonisa isifiso sakhe sokuba izimvu zithole ukunakekelwa okuhle. Watshela umphostoli uPetru, ‘Yipha amawundlu ami, yalusa izimvu zami, yipha izimvu zami.’ (Johane 21:15-17) Futhi ukuze aqinisekise ukunakekelwa kothando okuqhubekayo kwezimvu, uJesu wanika ‘abanye ukuba babe abelusi’ bakhe “umzimba kaKristu.”—Efesu 4:11, 12.
4. Umphostoli uPawulu wanxusa “amalunga” akhethwe umoya ukuba enzeni?
4 Njengoba bobabili uNkulunkulu noKristu benothando lokukhathalela okujule kanjalo ngabanjengezimvu, ukuba umalusi ongaphansi kwakhe wezimvu zikaNkulunkulu kuyisabelo esibaluleke kakhulu. Kanjalo umphostoli uPawulu wakhuthaza “amalunga” ase-Efesu ayekhethwe ngumoya ukuba ‘eluse ibandla likaNkulunkulu,’ alethe ukunakekela okukhulu kulo. (IzEnzo 20:17, 28) Ngakho abadala abamisiwe bangawunakekela kanjani kahle lomthwalo wemfanelo?
Abelusi Bamukela Isiqondiso
5. Isiphi iseluleko uPetru asinikeza ababonisi ayenabo?
5 Umphostoli uPetru, owayelindeleke ukuba ondle izimvu zikaJesu, watshela ababonisi ayenabo: “Yalusani umhlambi kaNkulunkulu ophakathi kwenu, kungabi-ngokucindezelwa kodwa ngokwentando kaNkulunkulu, kungabi-ngenxa yenzuzo eyihlazo kodwa ngenhliziyo evumayo, kungabi-njengabazenza amakhosi phezu kwamabandla enabelwa wona, kodwa nibe-yizibonelo zomhlambi.” (1 Petru 5:1-3) Ake sibone indlela abadala, abakhethwe umoya ongcwele, abangahambisana ngayo ngokwanelisayo naleseluleko.
6. Abadala kumelwe bakhonze “umhlambi kaNkulunkulu” benasiphi isimo sengqondo?
6 UPetru wanxusa abadala ayenabo: “Yalusani umhlambi kaNkulunkulu ophakathi kwenu, kungabi ngokucindezelwa kodwa ngokwentando kaNkulunkulu [“ngokuzithandela,” NW].” Labo abanelungelo lokukhonza njengabelusi abangokomoya kumelwe bangakwenzi lokho ngokwenqena, bazizwe bephoqelekile ukunakekela izimvu. Akumelwe bazizwe becindezelekile, ngokungathi lokhu kuwukufukuziswa noma ngokungathi baqhutshwa abanye ukuba beluse umhlambi. Kunalokho, abadala kumelwe bakhonze ngomoya wokuzithandela. (Qhathanisa neHubo 110:3.) Uma umuntu ethanda ukwenzela abanye okuhle, ngokuvamile ukwenza lokho ngenhliziyo ephelele, ezikhandla futhi enza imizamo ekhethekile ukuze anakekele izithakazelo zabo. Umdala onothando unikela ngesikhathi nangamandla akhe ngokukhululeka. Uyazi ukuthi ngezinye izikhathi izimvu zingaduka, futhi unesifiso sokuzisiza, elingisa ukukhathalela kukaNkulunkulu ngabanjengezimvu. Phela, ukukhathalela kukaJehova amaIsrayeli ayedukile kwakukukhulu kangangokuthi amazwi akhe ayethi: “Ngathi: Ngibhekeni, ngibhekeni, kuso isizwe esingabizwanga ngegama lami.”—Isaya 65:1.
7, 8. (a) Kusho ukuthini ukufeza umsebenzi wokwalusa ngaphandle kokuthanda inzuzo embi? (b) Kusho ukwenzani ukukhonza ngentshiseko?
7 UPetru wathi umsebenzi wokwalusa kumelwe wenziwe “kungabi-ngenxa yenzuzo eyihlazo kodwa ngenhliziyo evumayo.” Abadala abamisiwe abafisi ukuba umthwalo ezimvwini. Leso kwakuyisimo somphostoli uPawulu, ngoba watshela amaKristu aseThesalonika: “Ngokuba niyakhumbula, bazalwane, ukukhandleka nokushikashikeka kwethu; sisebenza ubusuku nemini, ukuze singasindi noyedwa kinina. Sanishumayeza ivangeli likaNkulunkulu.” Futhi wabakhumbuza: “Asihambanga ngokungafanele phakathi kwenu, asidlanga-sinkwa samuntu ngesihle, kodwa sadla ngokukhandleka nangokukhathazeka, sisebenza ubusuku nemini ukuba singasindi-muntu kini.”—1 Thesalonika 2:9; 2 Thesalonika 3:7, 8.
8 Ngokufanayo, abelusi abathembekile bomhlambi kaNkulunkulu namuhla abafisi ngokuhaha lokho izimvu ezinakho noma bazame ukuzuza ngokungafanele ngazo. (Luka 12:13-15; IzEnzo 20:33-35) UPawulu wabonisa ukuthi labo abafanelekela ukuba ngababonisi ‘akumelwe babe ngabahahela inzuzo embi.’ (Thithu 1:7) Kunalokho, kumelwe bakhonze ngenkuthalo, babe nesithakazelo esibukhali emsebenzini wabo futhi babheke lokho okungasiza izimvu abaphathiswe zona ukuba bazinakekele. (Filipi 2:4) Ngalendlela, labelusi babonisa ukukhathalela okungenabugovu ngezimvu okufana nalokho okwaboniswa uJehova uNkulunkulu neNdodana yakhe, uJesu Kristu.
9. Kungani umalusi ongumKristu ‘kungamelwe azenze inkosi phezu kwebandla’?
9 UPetru wathi futhi abadala kwakumelwe beluse abantu bakaJehova ‘kungabi njengabazenza amakhosi phezu kwamabandla ababelwe wona, kodwa babe yizibonelo zomhlambi.” Umalusi onothando uyaqaphela ukuthi akalisebenzisi kabi igunya lakhe ngokuba nomuzwa wokuba-mkhulu nokuba yinkosi phezu kwezimvu. Umoya wokuqhosha akuwona owobuKristu futhi kumelwe ugwenywe yibo bonke abathanda ukuthokozisa uJehova. IzAga 21:4 zithi: ‘Ukuzidla kwamehlo nokuziqhenya kwenhliziyo, isibani sababi, kuyisono.” Futhi uJesu watshela abalandeli bakhe: “Niyazi ukuthi ababusi bezizwe bazenza amakhosi phezu kwazo, nezikhulu zazo ziphethe amandla phezu kwazo. Akunjalo phakathi kwenu, kodwa yilowo nalowo ofuna ukuba-mkhulu phakathi kwenu makabe-yisikhonzi senu; nalowo ofuna ukuba-ngowokuqala phakathi kwenu makabe-yinceku yenu.” (Mathewu 20:25-27) Ngempela, abadala kumelwe bakhumbule ukuthi labo abenza umhlambi bayizimvu zikaNkulunkulu futhi akumelwe baphathwe ngonya.
10. (a) Babenzani abanye abelusi babantu ngosuku lukaHezekeli? (b) Kukanjani ababonisi abaqotho beyisibonelo esihle somhlambi?
10 Kubelusi ababezinaka bona bosuku lukaHezekeli, uJehova wathi: “Ezibuthakathaka aniziqinisanga, negulayo aniyiphilisanga, neyaphukileyo aniyibophanga, nexoshiweyo aniyibuyisanga, nelahlekileyo aniyifunanga, kepha nizibusile ngamandla alukhuni.” UNkulunkulu waqhubeka ethi abelusi abanonya ‘baqhubukusha zonke ezigulayo ngezimpondo zabo, baze bazihlakazela ngaphandle.’ (Hezekeli 34:4, 20, 21) Kodwa akunjalo ngabelusi abanothando ‘bomhlambi kaNkulunkulu’ namuhla. Abagabisi ngegunya labo futhi bayaqaphela ukungakhubekisi nayinye imvu. (Qhathanisa noMarku 9:42.) Kunalokho, abadala abanjalo banikeza usizo lothando nesikhuthazo. Ngaphezu kwalokho, bancika kuJehova ngomkhuleko futhi bayazikhandla ukuze babe izibonelo ezinhle “ngezwi, nangenkambo, nangothando, nangokukholwa, nangokuhlanzeka.” (1 Thimothewu 4:12) Ngokomphumela, izimvu ziyaneliseka futhi zizizwe zilondekile, zazi ukuthi abelusi abanothando abesaba uNkulunkulu bayazinakekela.
Izingozi Ezehlela Izimvu
11. Kungani abelusi banamuhla kumelwe banakekele kahle umhlambi kaNkulunkulu kangangokuthi izimvu zizizwe zilondekile?
11 Abantu abanjengezimvu namuhla kumelwe bazizwe belondekile, beqinisekisiwe ukunakekela okuhle abadala abakunikezayo ekuvikeleni umhlambi. (Isaya 32:1, 2) Lokhu kunjalo ikakhulukazi njengoba amaKristu ebhekene nezingozi eziningi ‘kulezikhathi ezinzima’ eziphawula ‘izinsuku zokugcina.’ (2 Thimothewu 3:1-5) Umhubi uDavide naye wabhekana nezingozi, kodwa wayengathi: “UJehova ungumalusi wami. . . . Noma ngihamba esigodini sethunzi lokufa, angesabi okubi, ngokuba wena unami.” (IHubo 23:1-4) Abelusi banamuhla bomhlambi kaNkulunkulu kumelwe bazinakekele kahle izimvu kangangokuthi, njengoDavide, laba abanjengezimvu bazizwe besondelene kakhulu noJehova. Kumelwe futhi bazizwe belondekile njengengxenye yenhlangano kaNkulunkulu.
12. Yikuphi ukuthambekela kwanamuhla izimvu okudingeka zivikelwe kukho, futhi abadala bangaba usizo kanjani kulokhu?
12 Enye ingozi labo abawumhlambi kaNkulunkulu okudingeka bavikelwe kuyo iwukuthambekela kwanamuhla ekuziphatheni okubi, okungenazimiso. Ngenxa ikakhulukazi yezinhlobo ezikhona zokuzijabulisa, kungaba ngethelevishini noma ngezinye izindlela, abantu abaningi baye baqalisa indlela yokuphila ephambene kakhulu nezindinganiso ezibekwe eZwini likaNkulunkulu. Namuhla, umbono walelizwe wokuthi yonke into ilungile, ohambisana nokuziphatha okubi kakhulu kobulili, kudingeka unqotshwe ngesehileko esiqinile esingokomBhalo esinikezwa ebandleni. Ngakho-ke abelusi bomhlambi kumelwe bakwazi kahle lokho iBhayibheli elikufundisayo ezindabeni zokuziphatha. Ngaphezu kwalokho, kumelwe balondoloze phambi kwezimvu umthwalo wabo wokuhlala behlanzekele inkonzo kaJehova.—Thithu 2:13, 14.
13. (a) Incwadi kaJuda inikeza iseluleko esihle ngokuqondene nayiphi ingozi? (b) Isiphi isinyathelo abadala okumelwe basithathe ngokuqondene nezihlubuki?
13 Kukhona futhi izingozi ezibangelwa izihlubuki. Khumbula ukuthi emakhulwini eminyaka ayi-19 edlule, abantu abathile “abangamesabi uNkulunkulu” ababengabafundisi bamanga bangena ngokunyenya ebandleni. ‘Babeyizisihla’ eziyingozi, abelusi bamanga ababezondla bona, abantu abangabenyama abaveza ukwahlukana futhi bentula ingokomoya. Incwadi kaJuda inikeza iseluleko esihle esenza abadala, nabo bonke abathembekile, ukuba ‘balwele inkolo.’ (Juda 3, 4, 12, 19) Ngokungangabazeki, abadala kumelwe bathathe isinyathelo esiqinile nganoma ubani ofuna ukudala ukwahlukana, ngoba uPawulu wabhala: “Niqaphele ababanga ukwahlukana nokukhubekisa, bephambene nesifundiso enafundiswa sona nina, nahlukane nabo.” (Roma 16:17) Ngakho-ke abelusi banomthwalo wemfanelo wokuvikela umhlambi kulaba noma kwezinye ‘izimpisi ezimbathise okwezimvu.’—Mathewu 7:15.
Ukusiza Izimvu Ngezinye Izindlela
14, 15. Abadala bangabasiza kanjani abakholwa nabo abaqala ukukhahlamezana?
14 Ukwalusa “umhlambi kaNkulunkulu” kungase kudinge ukusiza izimvu ngezinkinga ezihlukahlukene ezingaphakama ebandleni. Ngezinye izikhathi, izimvu zingase ziqale ngisho nokuqhubukushana zodwa. Ngenxa yamaphutha amancane, abanye bangase baqale ukukhahlamezana. Labantu bangase baqale ngisho nokuhlebana futhi ekugcineni bayeke ukuhlanganyela nalabo abebehlanganyela nabo enkonzweni kaJehova, kube ngukulimala kwabo okukhulu ngokomoya.—IzAga 18:1.
15 Abelusi abangokomoya kumelwe bakuqaphele kakhulu ukusiza abakholwa nabo abanjalo. Ngokwesibonelo, abadala kungadingeka babonise ukuthi kubi kangakanani ukuhlebana nokuthi onke amaKristu aqotho kumelwe asebenze kanjani ukuze alondoloze ubunye bebandla. (Levitikusi 19:16-18; IHubo 133:1-3; 1 Korinte 1:10) Abadala bangase bakwazi ukusiza ngokubhekisela esixwayisweni sikaPawulu: “Uma nilumana, nidlana, qaphelani ukuba ningaqedani.”—Galathiya 5:13-15; Jakobe 3:13-18.
16. Abadala kumelwe benzeni uma bephawula noma imuphi umkhuba omubi ebandleni?
16 Badala, khumbulani ukuthi uDeveli uyahamba ‘njengebhubesi elibhodlayo ufuna angamgwinya.’ (1 Petru 5:8) Onke amaKristu eqiniso asempini, awalwi negazi nenyama, kodwa nemimoya emibi. (Efesu 6:10-13) Abelusi abathembekile ngokuqinisekile abathandi ukuba izimvu zibhozomelwe uSathane. Ngakho uma abanye abanjengezimvu beqala ukulahlekelwa imihlangano yobuKristu, abadala abanakekelayo kumelwe bazame ukuthola isizathu futhi banikeze usizo olungokomoya olwanele. Abelusi kumelwe bakwazi ukuma komhlambi futhi baqaphele noma imiphi imikhuba engemihle ebandleni. (IzAga 27:23) Uma bephawula ukuthambekela kokungayinaki inkonzo yasensimini, ukungasinaki isifundo somuntu siqu, noma ukuhileleka ngokweqile ekuphishekeleni ukuzijabulisa noma izinto ezibonakalayo, lamadoda anomthwalo wemfanelo kumelwe alwele ukulungisa isimo. Belingisa uJehova noMalusi Omuhle, uJesu Kristu, abadala abanakekela “umhlambi kaNkulunkulu” banikeza ngokufanelekile usizo lomuntu siqu noma, ngezinye izikhathi, banikeze usizo oludingekile emihlanganweni. (Galathiya 6:1) Ngalezindlela noma ngezinye, abadala abanothando banikeza ubufakazi bokuthi bathatha umthwalo wabo wemfanelo wokwalusa ngokungathi sína.—IzEnzo 20:28.
Ukwalusa Kuyindaba Engathi Sína
17. Yini edingekayo ukuze ufaneleke njengomdala?
17 Ukwalusa “umhlambi kaNkulunkulu” njengomdala kuwumsebenzi onzima. Izindinganiso eziphakeme okumelwe uzifinyelele ukuze ufanelekele ilungelo elinjalo zibekwe ngokucacile kweyoku-1 Thimothewu 3:1-7, Thithu 1:5-9, nakweyoku-1 Petru 5:1-4. Akuyena noma imuphi umzalwane ongakhonza kulesikhundla, ngoba amadoda angokomoya kuphela angathwala ngokufanelekile lomthwalo wemfanelo. (1 Korinte 2:6-16) Amadoda amaningi angakhonzi manje njengabadala angalifanelekela lelilungelo, kodwa kumelwe aqale ‘afise isikhundla sombonisi.’ Kumelwe abe ngabafundi abashisekayo beZwi likaNkulunkulu ukuze aliqonde ngokujulile. Ngempela, kumelwe azibonakalise ekufanelekela ukutuswa ngenxa yokuhlangabezana nezimfuneko ezingokomBhalo zokumiswa njengabadala, abelusi abafanelekayo ‘bomhlambi kaNkulunkulu.’
18. UPawulu wayezizwa kanjani ngamabandla, futhi ingabe abanye bazizwa ngendlela efanayo?
18 Okhonza ngaphansi kukaJehova uNkulunkulu inhloko yebandla lobuKristu, enguMalusi Omuhle, uJesu Kristu. (Johane 10:11; 1 Korinte 11:3; Efesu 5:22, 23) Futhi yeka injabulo okumelwe ukuba uJesu unayo ngokuba nabelusi bomhlambi abangaphansi kwakhe abahola ngokufanelekile futhi bavikele izimvu! Lamadoda angokomoya ahlangabezana nezimfanelo eziphakeme ezingokomBhalo ezibekelwe abadala abangamaKristu. Ngaphezu kwalokho, anokukhathalela okujulile ngezimvu okufana nalokho okwaboniswa umphostoli uPawulu, owabhala: “Ngaphandle kwezinye izinto [ubunzima nokuhlupheka] kukhona okungicindezelayo imihla yonke: ukukhathalela onke amabandla. Ngubani obuthakathaka ngingebuthakathaka nami na? Ngubani okhubekiswayo kungavuthi kimi na?” (2 Korinte 11:23-29) UPawulu wayehamba kakhulu, futhi nsuku zonke ‘wayewakhathalela onke amabandla,’ njengoba kwenza ababonisi abajikelezayo namuhla. Ngokufanayo, abadala abamisiwe emabandleni ahlukahlukene bayazikhathalela izimvu ezisemhlambini abaphathiswe wona ukuba bawunakekele njengabelusi abangokomoya.
19. Uyoba yini umphumela njengoba amaHeberu 13:17 esetshenziswa futhi abadala beqhubeka bethatha umthwalo wabo wokwalusa ngokungathi sína?
19 Ukwalusa “umhlambi kaNkulunkulu” kungumsebenzi onzima, kodwa kuvuza kakhulu. Ngakho-ke, nina eningabelusi bomhlambi, liqapheleni ngokunakekela ilungelo lenu eliyigugu. Zinakekeleni kahle izimvu zikaNkulunkulu. Futhi kwangathi bonke abanjengezimvu bangabambisana ngokugcwele nabelusi abamiswe ngumoya ongcwele. UPawulu wanxusa: “Lalelani abaniholayo, nibathobele, ngokuba balinda imiphefumulo yenu njengabazakulandiswa ngayo.” (Heberu 13:17) Njengoba bonke labo abazinikele ngenhliziyo yonke kuJehova besebenza ndawonye ngobunye, izibusiso nezinzuzo ezinkulu ziyoqhubeka zwumphumela wenkonzo yokwethembeka yabadala abangamaKristu abathatha umthwalo wabo wokwalusa ngokungathi sína.
Ungachaza?
◻ Kungani abalusi abangokomoya kumelwe bakhonze ngokuzithandela?
◻ Kungani abadala kumelwe bakhululeke ekuthandeni inzuzo embi?
◻ Kungani kungaba okungalungile ngabadala ukuba bazenze amakhosi phezu komhlambi kaNkulunkulu?
◻ Kungani ababonisi kumelwe babe yizibonelo zomhlambi?
◻ Iziphi ezinye zezingozi abelusi okudingeka bavikele kuzo “umhlambi kaNkulunkulu”?
[Isithombe ekhasini 25]
Njengabelusi abanakekelayo bezikhathi zasendulo, abadala, banamuhla “balusa umhlambi kaNkulunkulu” ngothando