Ikhaya Elisha Lesikole SaseGileyadi Sezithunywa Zevangeli
NGOFEBRUARY 1, 1943, uNathan H. Knorr, owayengumongameli weWatchtower Bible and Tract Society, wanikeza inkulumo yokuvula ekilasini lokuqala lesikole esisha. Wachazela labobafundi abayikhulu ukuthi “akuyona injongo [yalesikole] ukunihlomisela ukuba nibe izikhonzi ezimisiwe. Kakade niyizikhonzi futhi benilokhu nikhuthele enkonzweni iminyaka eminingi. . . . Uhlelo lwezifundo . . . lwenzelwe injongo ekhethekile yokunilungiselela ukuba nibe izikhonzi ezinekhono ngokwengeziwe.” Kuze kube namuhla iWatchtower Bible School of Gilead iyaqhubeka iqeqeshela izikhonzi umsebenzi wezithunywa zevangeli wakwamanye amazwe.
Emuva ngo-1943, iSikole SaseGileyadi sasisesifundeni saseFinger Lakes eDolobheni laseNew York. IGileyadi yaqhubeka ilapho iminyaka eyi-17. Khona-ke, ngo-1961, yathuthela eBrooklyn. Ngayiphi injongo? Uhlelo lwezifundo lwaseGileyadi ngaso sonke isikhathi belulokhu luklanyelwe ukuhlangabezana nezidingo zeNhlangano. Isidingo sokwandisa nokuhlela kangconywana izindawo zegatsha kuwo wonke umhlaba sabizela ukufundiswa okubanzi ngokwengeziwe kwabafundi ngamalungu ezisebenzi zasendlunkulu yoFakazi BakaJehova, eseBrooklyn. Ngakho eminyakeni eminingana, kwakugcizelelwa ukuqeqeshwa kwezisebenzi zegatsha. Ngemva kwalokho, kwagcizelelwa futhi nomsebenzi wezithunywa zevangeli.
Eminyakeni engama-27 eyalandela, kusukela ngo-1961 kuya ku-1988, abafundi beSikole SaseGileyadi bajabulela ilungelo lokuhlala nelokufunda khona kanye phakathi kwezisebenzi zasendlunkulu eBrooklyn. Lapho abafundi bazuza ebuhlotsheni obuseduze namalungu eNdikimba Ebusayo yoFakazi BakaJehova kanye nezinye izikhonzi ezingomakad’ ebona. Iyiphi indlela engcono yokufunda indlela igatsha leWatch Tower Society elisebenza ngayo? Abafundi abazuzanga kuphela ngokuqeqeshwa ekilasini kodwa futhi nangokubona izisebenzi zasendlunkulu zisebenza usuku ngalunye.
Yiliphi ithonya iSikole SaseGileyadi esibe nalo emsebenzini wokushumayela wezizwe zonke? Kubaxhumanisi bamakomiti amagatsha abangama-93 abasebenzela ukugcina umsebenzi uhlelekile kuwo wonke umhlaba, abangama-74 bathola iziqu eSikoleni SaseGileyadi. Lokhu kukufakazela kahle ukuqeqeshwa okuhle ngokukhethekile okutholwa yilamadoda kokusingatha umthwalo wemfanelo onzima wokwalusa abantu bakaNkulunkulu namuhla. Ababonisi abajikelezayo abangenakubalwa abakhonza izidingo zeNhlangano manje nabo bathola iziqu eSikoleni SaseGileyadi. Yebo, isimiso sokuqeqesha eSikoleni SaseGileyadi siye sahambisana nezidingo zeNhlangano.
IGileyadi Iyathutha EBrooklyn
Nokho, kwaphindwa kwenziwa isinqumo sokuthutha iSikole SaseGileyadi. Ngakho ekwindla ka-1988, kwafika amaloli amane ethwele ifenisha nezinto ezisetshenziswa ehhovisi ekhaya lesithathu laseGileyadi—iWatchtower Farm, eWallkill, eNew York. Phakathi nezinyanga ezimbili nje kuphela, izisebenzi ezinakekelayo zeWatchtower Farm zalungiselela amakilasi amahle, umtapo wezincwadi, namahhovisi alesikole. Ezinye zasebenza imini nobusuku ukuze zilungiselele izindawo ezizotshenziswa ilesikole ukuba zilungele ikilasi elalizoqala ukuqeqeshwa.
Ngo-October 17, 1988, ikilasi lama-86 laseGileyadi laqala. Ngaphandle kokuphazamiseka nokuncane, isikole saqhubeka nenjongo yaso ‘yokuqeqesha amadoda nabesifazane ukuba babe izikhonzi ezinekhono ngokwengeziwe.’ Njengoba sisendaweni entsha enhle eseWatchtower Farm, kwabuyiselwa okunye kwemithonseyana yesikole sokuqala esasisesifundeni saseFinger Lakes.
Abathweswe Iziqu Bekilasi Lama-86
NgoMarch 5, 1989, zonke izisebenzi zasendlunkulu yeWatchtower eBrooklyn naseWatchtower Farm zahlangana eHholo LoMhlangano eliseDolobheni laseJersey ukuze zihlanganyele emkhosini wokuthweswa iziqu kwekilasi lama-86. UDaniel Sydlik, ilungu leNdikimba Ebusayo, wavula isimiso ngomthandazo. UKarl Klein weNdikimba Ebusayo wakhonza njengosihlalo. Esethulweni sakhe, waveza umahluko phakathi kwezithunywa zevangeli zeLobukholwa zakwamanye amazwe nalezo zoFakazi BakaJehova. Yeka ukuthi izithunywa zevangeli eziqeqeshwe eGileyadi ziye zaba eziphumelela kangakanani ekufundiseni iqiniso leZwi likaNkulunkulu emazweni anjengeJapane, lapho manje kunoFakazi abangaphezu kwezi-131 000 abahlanganyela ngenkuthalo enkonzweni yasensimini!
Ngesihloko esithi “Imisebenzi Emihle Mayibe Isici Esinenza Nihluke,” uDonald Krebs wachaza indima ebaluleke kakhulu eye yafezwa izithunywa zevangeli zaseGileyadi ekwandeni komhlaba wonke kwenhlangano kaJehova. “Imisebenzi yenu emihle enkonzweni yezithunywa zevangeli njengabafundisi beZwi likaNkulunkulu iyokuba . . . isici esinenza nihluke. Sinikhuthaza ukuba nisebenze kanzima. UJehova uyoyibusisa ngokucebile imizamo yenu.”
UGeorge Gangas, ilungu leNdikimba Ebusayo, wanikeza inkulumo enomdlandla ngesihloko esithi “IBhayibheli Liyincwadi Engcono Kakhulu Phansi Kwelanga.” Weluleka abazothweswa iziqu: “Ningakhohlwa ukutadisha iBhayibheli. IBhayibheli ligcwele amagugu angokomoya . . . acwebezelayo nabenyezelayo. Umuntu owazisayo ufuna ukuwabheka ngokuphindaphindiwe futhi ajabulele izimfanelo zawo ezibenyezelayo.”
Isihloko sikaRichard Eldred sasithi “Ningawenza Umehluko.” Njengoba izithunywa zevangeli ezintsha zinambitha ukuphila kwabanye abantu, zingawenza umehluko omuhle. Amadoda nabesifazane bezikhathi zasendulo njengoDavide, uNehemiya, uDebora, noAbigayili baba nethonya elihle kwabanye ngokubakhathalela ngokujulile, belondoloza ukholo olunesibindi, futhi bebonisa isimo sengqondo esimnene nesingokomoya.
“Bukezani Izibusiso Zenu” kwaba amazwi kaLyman Swingle, ilungu leNdikimba Ebusayo, awasho ekilasini elalizothweswa iziqu. Ngemva kokubukeza ezimbalwa zezibusiso ikilasi elaba nazo, njengokukwazi ukusebenzisa izinyanga eziyisihlanu ekutadisheni okujiyile kweBhayibheli, walikhuthaza: “Njengoba isiphelo sisondela, ningase nithole ukuthi ijubane lingase lisheshe, umgwaqo ungase ube nezikhisi ngokwandayo, nendlela ingase yewukele ngokwengeziwe. Kodwa qinisekani ukuba ningalokothi nikhathale, ukuba ningalokothi niyeke, ukuba ningalokothi nibe abantu abashiya phakathi.”
Omunye wabaqeqeshi, uJack Redford, wanikeza isihloko esithi “Ningavumeli Amandla Enu Abe Ubuthakathaka.” Ngokusekelwe eselulekweni sikaSolomoni, “Ungabi-ngolungileyo ngokudluleleyo,” waxwayisa ngokuncika ngokweqile engcebweni yomuntu siqu kunokuncika kuJehova. (UmShumayeli 7:16, 17) “Izici ezinhle ezisetshenziswa ngokweqile zingaba isihibe.” Ngokwesibonelo, umuntu onamandla emthethweni nasekuhlelekeni angase asebenzise isici esinjalo ngokweqile ngokuba oqine kakhulu. Ngakho, wanikeza ikilasi leseluleko: “Sonke kufanele siqaphele ubuthakathaka bethu, kodwa kufanele siqaphele namandla ethu. Yibani ngabalungile kodwa ningabi abazisholo ukuthi balungile. Yencikani kuJehova. Yenzani uJehova abe amandla enu.”
U-Ulysses Glass, umqeqeshi nonobhala wesikole, wachaza lamazwi kaJesu, “Bekani ijoka lami phezu kwenu.” (Mathewu 11:29, 30) Lapha uJesu umema abafundi bakhe ukuba ‘bangene phansi kwejoka lakhe’ kanye naye. Akazange afune ukubathwesa umthwalo. Wayekhathalela kuqala izidingo zabanye engqondweni yakhe. Wabonisa intobeko. Akazange akhahlameze abafundi bakhe. UJesu wathi, “Nifunde kimi.” Isithunywa sevangeli kumelwe sibe nomqondo kaKristu. Lesikhulumi sancoma ikilasi ngomoya walo wokuphana futhi salikhuthaza ukuba liqhubeke libonisa lowomoya ofanayo ezabelweni zalo zakwamanye amazwe.
Njengoba ingxenye yasekuseni yayisondela esiphelweni, ilungu leNdikimba Ebusayo uCarey Barber, lanikeza inkulumo enomdlandla ngesihloko esithi “Ukuvuna Kuwukuphela Kwesimiso Sezinto.” Wadonsela ukunakekela ekugcwalisekeni kosuku lwanamuhla komfanekiso kaJesu wamabele nokhula. (Mathewu, isahluko 13) Okokuqala, kuqoqwa abagcotshiweyo bakaKristu. Khona-ke, ikakhulukazi kusukela ngonyaka ka-1935, ezinye izimvu ziye zahlanganyela ‘ekubeni ezivunwayo.’ ISikole SaseGileyadi siye safeza umsebenzi omangalisayo ngokusiza ekuvuneni abafundi bakaKristu.
Ngemva kokuba abazothweswa iziqu sebenikezwe amadiploma abo, omunye wabo wafunda incwadi efudumele ebonisa imizwa yabo ngokuqeqeshwa nangokunakekelwa abakuthola kubaqeqeshi nasemkhayeni waseBethel. Ngokwengxenye, lencwadi yathi: “Ukuba kwenu nesithakazelo kithina hhayi kuphela njengekilasi laseGileyadi kodwa njengabantu ngabanye kuye kwasihlaba umxhwele futhi kuyinkambo efanele ukulingiswa. Sehlukana nani ngemizwa exubile—kuyadabukisa ukuhamba ngoba siyonikhumbula kodwa siyajabula futhi sithakasile ngesabelo sethu esisha.”
Esimisweni santambama, abathweswe iziqu bahlanganyela eSifundweni SeNqabayokulinda esaqhutshwa uRalph Walls. Khona-ke ikilasi lenza imiboniso yezinye izici ezivelele zokuhlangenwe nakho eliye laba nakho enkonzweni yasensimini phakathi nokuhlala kwalo eWatchtower Farm. IKomiti Efundisayo yeNdikimba Ebusayo yanikeza isimiso semidlalo emifushane enesihloko esithi “Ukuhlonipha Igunya Kuthuthukisa Ubunye” nenkulumo yamaslide ebonisa injabulo izithunywa zevangeli emazweni amaningi eziye zahlanganyela kuyo phakathi neminyaka eminingi. Isimiso saphetha ngomthandazo osuka enhliziyweni owenziwa uFrederick Franz, umongameli oneminyaka engama-95 ubudala weWatchtower Bible School of Gilead.
Ngokusabela kwabo ngentshiseko esimisweni, labo ababekhona babonakalisa ukusekela kwabo labo ababezoba izithunywa zevangeli nokwazisa ngesimiso. Akungabazeki ukuthi abathole iziqu abangama-24 bekilasi lama-86 laseGileyadi bazimisele ukwenza uJehova abe amandla abo njengoba beya ezabelweni zabo ababelwe zona ensimini yezithunywa zevangeli.
[Ibhokisi ekhasini 21]
UKUHLAZIYWA KWABAFUNDI
Inani lemibhangqwana eshadile: 12
Inani labafundi: 24
Inani lamazwe abafundi abavela kuwo: 6
Inani lamazwe ababelwe kuwo: 12
Isilinganiso sobudala: 32,3
Isilinganiso seminyaka beseqinisweni: 14,1
Isilinganiso seminyaka besenkonzweni yesikhathi esigcwele: 9,1
[Isithombe ekhasini 23]
Ikilasi Lama-86 Elithweswe Iziqu LeWatchtower Bible School of Gilead
Ohlwini olungezansi, izinombolo zezinhlu zisuka phambili ziye emuva, futhi amagama ahlelwe kusukela ngakwesobunxele kuya ngakwesokudla ohlwini ngalunye.
(1) Parrott, R.; Imig, E.; Benig, G.; Bengtsson, E.; Baart, W.; Ihander, K. (2) Lewis, J.; Hilario, L.; Lindmark, A.; Antoncich, C.; Agurs, C. (3) Bengtsson, R.; Parrott, J.; Benig, J.; Imig, J.; Baart, A.; Rissell, S. (4) Rissell, M.; Lewis, L.; Antoncich, M.; Hilario, R.; Agurs, H.; Lindmark, L.; Ihander, J.