Ukufuna Kwesintu UNkulunkulu

KUNGANI thina, njengoFakazi BakaJehova, siye sanikezwa “ulimi oluhlanzekile”? Ngokuqinisekile, akukhona ukuba silugcine kithina. Futhi akukhona ukuba sijabulele indlela yokuphila yokunethezeka efana nenkambo yeLobukholwa entofontofo, yokuyekelela. Kunalokho, kuwukuba “bonke babize igama likaJehova, bamkhonze nganhliziyonye.” (Zefaniya 3:9) Yebo, ulimi oluhlanzekile luhilela ukusebenza ngokubambisana nezigidi zabafowethu nodadewethu abangamaKristu—abavela kuzo zonke izinhlanga, izizwe, nezilimi—abashumayela ngokwethembeka izindaba ezinhle ngaphambi kokuba ukuphela kufike.—Marku 13:10; Roma 13:11; IsAmbulo 14:6, 7.

Ukushumayela kwethu namuhla ngezinye izikhathi kuletha izinselele ezingavamile. Kungani kunjalo? Phakathi nalelikhulu lama-20 leminyaka, kuye kwaba nemibhidlango yabantu ebangelwa izimpi, ukucindezeleka, ukucindezela kwezomnotho, nangezinye izizathu. Ngenxa yalokho, abantu bezilimi eziningi nezinkolo baye bathuthelekela emasikweni angewona awabo. Ngaleyondlela, imiphakathi emikhulu yamaHindu, amaBuddha, namaMuslim iye yathuthelekela ezweni laseNtshonalanga. Njengoba sihlanganyela ulimi oluhlanzekile endlini ngendlu, sihlangana nabo labantu. Ngezinye izikhathi siyakhungatheka ngenxa yokuthi sazi okuncane kakhulu ngesizinda sabo esingokwenkolo. Yini esingayenza ngakho?—Qhathanisa nezEnzo 2:5-11.

Silihlanganyela kanjani iqiniso nomMuslim noma umJuda? Bahluke kanjani omunye komunye? Yini umHindu ayikholelwayo ngempela? Kungani amaSikh ethwala imishuqulo? Iyiphi incwadi yawo engcwele? UmBuddha uhluke kanjani kumHindu? Yini amaShinto aseJapane ayikholelwayo? Ingabe amaTao aseChina noma amaConfucian ayakholelwa kuNkulunkulu?a UmJuda ongumOrthodox uhluke kanjani kumJuda Oguquliwe noma umJuda Osabambelele Emasikweni? Ukuze sifinyelele labantu abehlukene kangaka, okokuqala kumelwe siqonde umbono wabo bese sazi ukuthi siyobaqondisa kanjani ngendlela enomusa nenokuhlakanipha kuNkulunkulu weqiniso, uJehova.—IzEnzo 17:22, 23; 1 Korinte 9:19-23; Kolose 4:6.

Ukuze isisize sibe nokuqonda okukhanya ngokwengeziwe ngezinye izinkolo, izimfundiso zazo, nesizinda sazo esingokomlando, iWatch Tower Society yakhulula emhlabeni wonke phakathi neMihlangano Yesigodi ka-1990 “Yolimi Oluhlanzekile” incwadi entsha enesihloko esithi Ukufuna Kwesintu UNkulunkulu. Sihlonyisiwe ngalelithuluzi, siyokwazi kangcono ukushumayela kubantu basezweni elingelona elobuKristu kuhlanganise nakulabo beLobukholwa.

Ithuluzi Elinosizo

Lencwadi enamakhasi angu-384 iqukethe izahluko ezingu-16 ezikhuluma ngomlando wokufuna kwesintu uNkulunkulu eminyakeni eyizinkulungwane eziyisithupha edlule. Iphendula amakhulu emibuzo ngezinkolo zezwe. Nasi isibonelo seminye yayo: Yiziphi izici ngokuvamile ezibonakalisa inkolo yomuntu? Kungani kungekhona okungalungile ukuhlola ezinye izinkolo? Yikuphi ukufana okukhona phakathi kobuRoma Katolika nobuBuddha? Iyiphi indima efezwa izinganekwane ezinkolweni eziningi? Kungani abantu abaningi bekholelwa emilingweni, emimoyeni, nasekufundweni kwezinkanyezi? Kungani amaHindu enonkulunkulu nonkulunkulukazi abaningi kangaka? AmaSikh ahluke kanjani kumaHindu? Wayengubani uBuddha, futhi yini ayifundisa? Kungani ubuShinto ngokuyinhloko buyinkolo yaseJapane? Kungani amaJuda enomthetho odluliselwa ngomlomo kuhlanganise nomthetho olotshiwe? Sazi kanjani ukuthi uKristu akayona inganekwane? IKoran ihluke kanjani eBhayibhelini? Kungani amaKatolika ethi uPetru wayengupapa wokuqala? Kungani umpristi ongumKatolika uLuther aqembuka eSontweni LamaRoma Katolika?

Imibuzo icishe ingabi nasiphelo, futhi lencwadi igcwele izimpendulo ukuze sikwazi ukushumayela ngokuphumelela ngokwengeziwe kubantu abanalezizinda ezihlukahlukene ezingokwenkolo. Lencwadi iyakuqaphela ukuthi abantu abaningi banenkolo yabo siqu nokuthi inkolo iyindaba yomuntu siqu kakhulu. Nokho, ekhasini 8, iyaphawula: “Cishe kusukela lapho sizalwa imiqondo engokwenkolo noma yezimiso zokuhle ifakwa ezingqondweni zethu abazali bethu nezihlobo. Ngenxa yalokho, ngokuvamile silandela izibonelo ezingokwenkolo zabazali bethu nawokhulu.” Lokho kusho ukuthi “ezimweni eziningi siye sakhethelwa inkolo yethu ngabanye. Kuye kwamane kwaba yindaba yokuthi sazalelwa kuphi futhi nini.”—Qhathanisa nabaseFilipi 3:4-6.

Lencwadi ibe isiphakamisa umbuzo onengqondo. “Ingabe kunengqondo ukuthatha ngokuthi inkolo owayifunzwa ekuzalweni kwakho nakanjani iyiqiniso eliphelele?” Ngaleyondlela, umuntu ngamunye ukhuthazwa ukuba ahlole ezinye izinkolo ngomqondo ovulekile. Njengoba kuphawulwe ekhasini 10: “Ukuqonda umbono womunye nomunye kungaholela ekukhulumisaneni nasengxoxweni enengqondo phakathi kwabantu bezinkolelo ezihlukene.” Iyaqhubeka: “Yiqiniso, abantu bangase bangavumelani ngokunamandla ngezinkolelo zabo ezingokwenkolo, kodwa asikho isizathu sokuzonda umuntu ngenxa yokuthi nje unombono ohlukile.”—Mathewu 5:43, 44.

Omunye umbuzo oyinhloko ophakama kuyo yonke lencwadi uthi, Ingabe umuntu unomphefumulo ongafi osindayo ekufeni kwakhe futhi ohambayo uye ekuphileni kwangemva kokufa? Ngandlela-thile, cishe zonke izinkolo ziyawufundisa lowomqondo. Njengoba ethi Ukufuna Kwesintu UNkulunkulu iphawula (ikhasi 52): “Ekufuneni kwakhe uNkulunkulu, umuntu uye wabamba utalagu, ekhohliswe umbono wamanga wokungafi. . . . Ukukholelwa emphefumulweni ongafi noma ezinhlotsheni ezihlukahlukene zalokho kuyifa eliye leza kithina livela ezinkulungwaneni zeminyaka.” Eminye imibuzo ithi: Ingabe ikhona indawo enjengesihogo lapho imiphefumulo ihlushwa khona? Liyini ithemba langempela ngabafile? Ingabe kunoNkulunkulu oyedwa, noma kunonkulunkulu abaningi?—Genesise 2:7; Hezekeli 18:4.

Isisekelo Sezifundo ZeBhayibheli

Lencwadi ikhuluma ngokuthuthuka kwezinkolo eziyinhloko zesintu, cishe ngokulandelana kwazo ngokwesikhathi lapho zivela emhlabeni—ubuHindu, ubuBuddha, ubuTao, ubuConfucian, ubuShinto, ubuJuda, ubuKristu, eLobukholwa, nobuIslam. Esihlokweni ngasinye izincwadi ezingcwele zalezinkolo ziyacashunwa ukuze noma yimuphi okholwayo othembekile engazihlolela izingcaphuno ngokwakhe. Ngokuqondene nesihloko esikhuluma ngobuIslam, kusetshenziswe izinguqulo ezintathu ezihlukene zesiNgisi zeKoran. Inguqulo yamuva yeJewish Publication Society yeTanakh—A New Translation of the Holy Scriptures icashuniwe esahlukweni esikhuluma ngobuJuda.—Qhathanisa nezEnzo 17:28; Thithu 1:12.

Kuthiwani ngongakholelwa kuNkulunkulu nothi uNkulunkulu akaziwa? Isahluko 14 sikhuluma ngokungakholelwa kwanamuhla kuNkulunkulu nokuthi kungani oFakazi BakaJehova bazi ukuthi uNkulunkulu ukhona. Esahlukweni ngasinye, umfundi uqondiswa eBhayibhelini. Ngaleyondlela, sisebenzisa lencwadi ethi, Ukufuna Kwesintu UNkulunkulu, sihlonyiswa kangcono ukuba siqalise izifundo zeBhayibheli nabantu banoma yiluphi ukholo noma labo abathi abakholwa kwanhlobo. Ixoxa ngenkolo ngayinye ngenhlonipho nangokuhlakanipha, kodwa iphakamisa imibuzo engaholela umuntu kuJehova naseqinisweni. Ngalabo abafuna uNkulunkulu ngobuqotho, lencwadi iyoba isibusiso sangempela.—IHubo 83:18; Johane 8:31, 32; 2 Thimothewu 3:16, 17.

Amabhokisi aneziyalezo ezifundisayo afakiwe esahlukweni ngasinye. Ngokwesibonelo, emakhasini 226 no-227, kunebhokisi elithi “UbuJuda—Inkolo Enezici Eziningi” elichaza ukwehlukana okuyinhloko okutholakala enkolweni yobuJuda. Ngaphansi kwesithi “UbuHindu—Ukufuna Inkululeko,” kunebhokisi emakhasini 116 no-117, elithi “UbuHindu—Abanye Bonkulunkulu Nonkulunkulukazi.” Lelibhokisi linikeza uhlu lonkulunkulu abambalwa kuphela kwabangaphezu kwezigidi ezingu-330 abakhulekelwa amaHindu. Ingabe amaBuddha akholelwa kuNkulunkulu ngendlela abaseNtshonalanga abaliqonda ngayo lelogama? Ibhokisi elithi “UbuBuddha NoNkulunkulu” elisekhasini 145 liyawuphendula lowombuzo. Lencwadi futhi inezikhombo eziwusizo ukuze ukwazi ukuthola izihlokwana eziyinhloko ngokushesha. Uhlu lwezincwadi zemithombo eyinhloko ezisetshenzisiwe ekucwaningeni ziyisisekelo futhi sokufunda okwengeziwe uma umuntu efuna imininingwane eyengeziwe.

Lencwadi inezithombe nemifanekiso engaphezu kuka-200, kodwa ayifakelwanga nje lapho ukuba ihlobise. Umfanekiso ngamunye unephuzu elithile elifundisayo elicacisa ngokwengeziwe leyonkolo okuxoxwa ngayo. Ngokwesibonelo, ekhasini 238 kunochungechunge lwezithombe ezibonisa eminye yemifanekiso uJesu Kristu ayifundisa. Kwenye indawo, kunochungechunge lwemifanekiso ebonisa futhi izici ezihlukahlukene zenkonzo kaKristu—izimangaliso zakhe, ukuguquka kwakhe isimo, ukufa kwakhe komhlatshelo, nokuthuma kwakhe abafundi bakhe ukuba bashumayele kuwo wonke umhlaba.

Ekhasini 289 kunochungechunge lwezithombe eziyothakazelisa kumaMuslim. Luthatha isibukeli lusiyise eMecca, endlini enkulu yokukhulekela lapho iKaaba ikhona bese lumuyisa etsheni elimnyama langempela elihlonishwa amaMuslim. Ukukhulekela okuhlukahlukene kobuBuddha kuboniswe ekhasini 157. AmaHindu ayothakazeliswa ukubona izithombe zonkulunkulu bawo abadumile oGanesa noKrishna emakhasini 96 no-117.

Kwathintwana nezikhonzi ezifanelekayo ezingamaKristu emhlabeni wonke ukuze kuxoxwe ngokukhethekile ngenkolo ngayinye eyinhloko. Ngokwesibonelo, ngezihloko eziphathelene nobuJuda nenkolo yobuBaha’i ukwaziswa kwavela eIsrael. OFakazi basemazweni obuMuslim bahlola ngokucophelela okuqukethwe isahluko esikhuluma ngobuIslam. Ukuqondiswa okubalulekile kwavela eNdiya ngokuphathelene namaHindu, amaSikh, namaJain. Izikhonzi eziseMpumalanga zaqiniseka ukuthi isahluko esikhuluma ngobuShinto sasiqondile, futhi banikeza nezeluleko ngobuBuddha, ubuTao, nobuConfucian.

Ngenxa yokuhlanganisa kwalencwadi ngokucophelela inkolo ngayinye, labo abanayo ngolimi lwabo bayokwazi ukuqalisa izifundo zeBhayibheli ngesahluko esiqondene nesizinda somuntu ngamunye esingokwenkolo. Khona-ke bangase bafise ukudlulela esahlukweni esiphathelene nokuqala kobuKristu bokuqala nezizathu zokukholelwa ukuthi uKristu unguMmeleli kaNkulunkulu weqiniso, lowo owasetshenziswa ekudonseleni isintu kuNkulunkulu. Kunezahluko ezichaza indlela ukuhlubuka okwaqala ngayo, kwaphumela ekwahlukaneni okuningi nasemahlelweni eLobukholwa. Izahluko ezimbili zokugcina zibonisa indlela ukukhulekela kweqiniso okuye kwabuyiselwa ngayo kulezinsuku zokugcina nalokho isikhathi esizayo esiseduze esikuphathele iBabiloni Elikhulu, umbuso wezwe kaSathane wenkolo yamanga. Ngemva kwalokho izwe elisha nethemba lovuko eliseBhayibhelini kuyaqokonyiswa.—Johane 5:28, 29; 12:44-46; 14:6; IsAmbulo 21:1-4.

Ngokuqinisekile lena incwadi okufanele isize abaningi emhlabeni wonke ukuba basondele kuNkulunkulu, njengoba uJakobe aphawula esahlukweni 4 sencwadi yakhe, ivesi 8: “Sondelani kuNkulunkulu, khona uyakusondela kinina. Hlanzani izandla nina-zoni, nihlambulule izinhliziyo nina bonhliziyo-mbili.” Yebo, njengoba uIsaya ephawula: “Mfuneni uJehova esenokutholwa, nimbize eseseduze.”—Isaya 55:6; Johane 6:44, 65.

Sonke masiqhubeke sibheke ngasohlangothini oluyilo, eNkosini enguMbusi wendawo yonke, uJehova uNkulunkulu. Futhi ngosizo lwalencwadi ethi, Ukufuna Kwesintu UNkulunkulu, masisize izinkulungwane ezengeziwe ukuba zikhulekele uJehova “ngomoya nangeqiniso.” (Johane 4:23, 24) Kwangathi singakhuthazela ekutholeni abafuni beqiniso futhi sibatshele ngoNkulunkulu weqiniso, ngoba, nembala, angatholakala!

[Umbhalo waphansi]

[Izithombe ekhasini 17]

Umuntu uye wafuna uNkulunkulu ngezindlela eziningi

[Isithombe]

AmaKatolika abheka kuMariya

[Isithombe]

AmaHindu ahlonipha umfula iGanges

[Umthombo]

Harry Burdich, Transglobe Agency, Hamburg

[Isithombe]

Amanye amaJuda azinikele abopha amafilakteriyu

[Umthombo]

GPO, Jerusalem

[Isithombe]

Amadoda angamaMuslim athatha uha-mbo lokuyo-khuleka eMecca

[Umthombo]

Camerapix

[Isithombe]

Abaningi bakhulekela uBuddha

[Izithombe ekhasini 18]

UJesu wasebenzisa imifanekiso ukuze asize abantu ukuba bathole uNkulunkulu weqiniso

[Imithombo]

Pictorial Archive (Near Eastern History) Est.

Pictorial Archive (Near Eastern History) Est.

Pictorial Archive (Near Eastern History) Est.