Izithelo—Ezinhle Nezimbi
“UJehova wangibonisa amaqoma amabili amakhiwane . . . Elinye iqoma lalinamakhiwane amahle kakhulu, enjengamakhiwane ayingqalabutho; elinye iqoma lalinamakhiwane amabi kakhulu, engenakudliwa ngobubi bawo.”—JEREMIYA 24:1, 2.
1 .UJehova wabubonisa kanjani ububele kubantu bakhe, u-Israyeli, kodwa basabela kanjani?
KWAKUNGUNYAKA ka-617 B.C.E. Kwakusele iminyaka eyishumi ngaphambi kokuba uJehova akhiphe isahlulelo sakhe esifanele eJerusalema nakubantu balo. Kakade uJeremiya wayeseshumayele ngokuzikhandla iminyaka engu-30. Lalela incazelo ka-Ezra ecacile ngalesisimo, njengoba itholakala encwadini yesi-2 IziKronike 36:15: “UJehova uNkulunkulu wawoyise wathuma kubo ngezandla zezithunywa zakhe, ethuma njalonjalo, ngokuba wahawukela abantu bakhe nendawo yakhe yokuhlala.” Waba yini umphumela wayo yonke lemizamo? Ngokudabukisayo, u-Ezra uyaqhubeka elandisa evesini 16: “Kepha baziklolodela izithunywa zikaNkulunkulu, bawadelela amazwi akhe, babaphatha kabi abaprofethi bakhe, yaze yavuka intukuthelo kaJehova ngabantu bakhe, kwaze kwangabakho ukwelashwa.”
2, 3. Chaza umbono omangalisayo uJehova awubonisa uJeremiya.
2 Ingabe lokhu kwakusho ukuthi kwakuyoqothwa imbokodo nesisekelo esizweni sakwaJuda? Ukuze sithole impendulo, ake sicabangele umbono obalulekile owanikezwa uJeremiya olotshwe esahlukweni 24 sencwadi ebizwa ngegama lakhe. UNkulunkulu wasebenzisa amaqoma amabili amakhiwane kulombono ukuze afanekisele izenzakalo ezazizokwenzeka phakathi kwabantu bakhe besivumelwano. Lokhu kwakuyomelelwa izinhlobo ezimbili ezingafani zezithelo, ezinhle nezimbi.
3 UJeremiya isahluko 24, amavesi 1 no-2, uchaza lokho okwabonwa umprofethi kaNkulunkulu: “UJehova wangibonisa amaqoma amabili amakhiwane ebekwé phambi kwethempeli likaJehova, uNebukadiresari inkosi yaseBabele esethumbile uJekoniya indodana kaJehoyakimi, inkosi yakwaJuda, nezikhulu zakwaJuda, nezinyanga zomsebenzi, nabakhandi, wabasusa eJerusalema, wabayisa eBabele. Elinye iqoma lalinamakhiwane amahle kakhulu, enjengamakhiwane ayingqalabutho; elinye iqoma lalinamakhiwane amabi kakhulu, engenakudliwa ngobubi bawo.”
Amakhiwane Amahle Ombono
4. Yisiphi isigijimi esiduduzayo umbono wamakhiwane owawusiphathele ama-Israyeli athembekile?
4 Ngemva kokubuza uJeremiya ngalokho ayekubona, emavesini 5 kuya ku-7 uJehova wathi: “Njengalawamakhiwane amahle ngiyakubheka kanjalo abathunjiweyo bakwaJuda, engibamukisile kulendawo baya ezweni lamaKaledi, kube-kuhle. Ngiyakuwabhekisa amehlo ami kubo, kube-kuhle, ngibabuyisele kulelizwe, ngibakhe ngingabadilizi, ngibatshale ngingabasiphuli. Ngiyakubanika inhliziyo yokungazi ukuthi nginguJehova; bayakuba-ngabantu bami, mina ngibe-nguNkulunkulu wabo, ngokuba bayakubuyela kimi ngenhliziyo yabo yonke.”
5, 6. (a) Amanye ama-Israyeli ‘amukiswa kanjani kahle’ ukuya ezweni lamaKaledi? (b) UJehova ‘wawabhekisa kanjani amehlo akhe, kwaba kuhle’ kuma-Israyeli athembekile ayesekuthunjweni?
5 Ngakho kuyabonakala kulokho uJehova akusho lapha ukuthi babelindelwe yizikhathi ezinhle ngaphambili, ukuthi kwakungeke kuqothwe imbokodo nesisekelo esizweni sakwaJuda. Kodwa libaluleke ngani leliqoma lamakhiwane amahle?
6 Kwase kuyizinyanga ezintathu nezinsuku eziyishumi kuphela uJekoniya, noma uJehoyakini, eyinkosi yakwaJuda ngaphambi kokuba anikele iJerusalema ngokuzithandela eNkosini uNebukadinesari. Phakathi kwabantu ayethunjwe nabo kwakunoDaniyeli nabangane bakhe abathathu abangamaHeberu, uHananiya, uMishayeli, no-Azariya, kanye noHezekeli. Ukuphila kwabo kwalondolozwa inkosi yaseBabiloni, ngakho kwakungase kushiwo ukuthi uJehova wabheka ukuthi bonke labathunjwa bamukiswa kahle ukuya ezweni lamaKaledi. Ingabe uye waqaphela ukuthi uJehova wathembisa futhi ‘ukubhekisa amehlo akhe kubo, kube-kuhle’? Kwagcwaliseka kanjani lokhu? Ngo-537 B.C.E., eminyakeni engu-80 kamuva, uJehova wabangela iNkosi uKoresi ukuba ikhiphe isimemezelo esivumela insali yenzalo yabo ukuba iphindele ezweni lakwaJuda. LamaJuda athembekile avuselela umuzi waseJerusalema; akha ithempeli elisha lokukhulekela uNkulunkulu wawo, uJehova; futhi abuyela kuye ngayo yonke inhliziyo yawo. Ngakho kukho konke lokhu, labathunjwa nenzalo yabo babefana namakhiwane amahle ayingqalabutho [“awulibo,” NW] kuJehova.
7. Kunini lapho amehlo kaJehova ayebhekiswe khona esigabeni sikaJeremiya sosuku lwanamuhla ‘kwaba kuhle’ futhi kanjani?
7 Uzokhumbula ukuthi esihlokweni esandulelayo esiphathelene namazwi esiprofetho sikaJeremiya, sifunde ukuthi asho okuthile kulelikhulu lethu lama-20. Kungokufanayo-ke nangesahluko 24. Phakathi neminyaka yosizi yeMpi Yezwe I, eziningi zezinceku zikaJehova ezizinikezele zazithonywe iBabiloni Elikhulu ngandlela-thile. Kodwa iso likaJehova eliqaphile ‘lalizibheke kahle.’ Ngakho esebenzisa uKoresi Omkhulu, uKristu Jesu, uJehova wazophula izinceku zakhe emandleni eBabiloni Elikhulu futhi kancane kancane waziletha epharadesi elingokomoya. Lama-Israyeli angokomoya asabela futhi abuyela kuJehova ngayo yonke inhliziyo yawo. Khona-ke, ngo-1931, akujabulela ukwamukela igama elithi oFakazi BakaJehova. Ngempela, manje kwakungase kushiwo ukuthi ayefana neqoma lamakhiwane amahle kakhulu emehlweni kaJehova.
8. Kungayiphi indlela oFakazi BakaJehova abamemezele ngayo kabanzi ubumnandi obunjengobamakhiwane besigijimi soMbuso?
8 Futhi oFakazi BakaJehova abazange balahlekelwe injongo yomusa kaNkulunkulu ongafanelwe yokubakhulula eBabiloni Elikhulu. Abazange bagodle ubumnandi obunjengobamakhiwane besigijimi sezindaba ezinhle zoMbuso, kodwa baye babumemezela kabanzi bevumelana namazwi kaJesu kuMathewu 24:14: “Lelivangeli lombuso liyakushunyayelwa ezweni lonke, kube-ngubufakazi ezizweni zonke.” Uye waba yini umphumela? Abanjengezimvu abangaphezu kuka-4 700 000 abangewona ama-Israyeli angokomoya baye bagqashula eBabiloni Elikhulu!
Amakhiwane Amabi Ombono
9. Obani ababemelelwa amakhiwane amabi ombono kaJeremiya, futhi kwakuzokwenzekani kubo?
9 Kodwa kuthiwani ngaleloqoma lamakhiwane amabi elalisembonweni kaJeremiya? UJeremiya manje uletha ukunakekela kwakhe emazwini kaJehova atholakala kuJeremiya emavesini 8 kuya ku-10: “Njengamakhiwane amabi engenakudliwa ngobubi bawo, impela kanjalo—usho kanje uJehova—ngiyakwenza kuSedekiya inkosi yakwaJuda, nasezikhulwini zakhe, nakuyo insali yaseJerusalema, abasele kulelizwe nabakhile ezweni laseGibithe. Ngiyakubenza babe-yingebhe nokubi emibusweni yonke yomhlaba, babe-yihlazo nesaga, isifenqo nesiqalekiso ezindaweni zonke engiyakubaxoshela kuzo. Ngiyakuthuma kubo inkemba, nendlala, nesifo, baze baphele ezweni engalinika bona nawoyise.”
10. Kungani uJehova abheka uSedekiya ‘njengekhiwane elibi’?
10 Ngempela uSedekiya wabonakala ‘eyikhiwane elibi’ emehlweni kaJehova. Akazange nje kuphela ahlubuke eNkosini uNebukadinesari ngokwephula isifungo sokwethembeka ayesenze kuleyonkosi egameni likaJehova kodwa futhi wabenqaba ngokuphelele ububele bukaJehova ambonisa bona ngoJeremiya. Eqinisweni, waze wavalela noJeremiya etilongweni! Akumangalisi ukuthi u-Ezra uchaza kafushane isimo sengqondo senkosi njengoba enza kweyesi-2 IziKronike 36:12: “Wenza okubi emehlweni kaJehova uNkulunkulu wakhe; akazithobanga.” Phambi kukaJehova uSedekiya nalabo ababesele eJerusalema babefana neqoma lamakhiwane amabi, abolile!
Amakhiwane Abolile Angokomfanekiso Osukwini Lwethu
11, 12. Obani ababhekwa njengamakhiwane amabi namuhla, futhi kuyokwenzekani kubo?
11 Manje ake ubheke ezweni lonke namuhla. Ingabe ucabanga ukuthi singalithola iqoma lamakhiwane amabi angokomfanekiso? Ake sicabangele amaqiniso ngokuqhathanisa usuku lwethu nolukaJeremiya. Kulelikhulu lama-20, uJehova uye wasebenzisa isigaba sikaJeremiya, insali egcotshiwe, ukuze axwayise izizwe ngokuqhubekayo ngentukuthelo yakhe ezayo osizini olukhulu. Uye wanxusa amaqembu ezizwe ukuba amnike inkazimulo efanele igama lakhe, amkhulekele ngomoya nangeqiniso, futhi aqaphele iNdodana yakhe ebusayo, uKristu Jesu, njengoMbusi ofanelekayo womhlaba. Aye asabela kanjani? Ngendlela efana ncamashí neyangosuku lukaJeremiya. Izizwe ziyaqhubeka zenza okubi emehlweni kaJehova.
12 Obani laba abagqugquzela lesisimo sengqondo sokuhlubuka? Obani abaqhubeka beklolodela lezizithunywa zikaNkulunkulu ezinjengoJeremiya bengabaza igunya lazo lokusebenza njengezikhonzi zikaNkulunkulu? Obani abaqhubeka bedelela iZwi likaNkulunkulu? Ubani namuhla obelokhu ebangela ukushushiswa koFakazi BakaJehova? Sonke siyazi ngokucacile impendulo—eLobukholwa, ikakhulukazi abefundisi! Futhi ake ubheke zonke izithelo zeLobukholwa ezibolile, ezimbi okukhulunywe ngazo esihlokweni sethu esandulelayo. Oh, yebo, likhona ngempela iqoma elingokomfanekiso lamakhiwane amabi emhlabeni namuhla. Eqinisweni, uJehova uthi ‘awanakudliwa ngenxa yobubi bawo.’ Amazwi kaJehova adluliselwa ngoJeremiya asankeneneza kuze kube sosukwini lwethu: ‘Bayakuphela’! Ukuthukuthelela kukaJehova eLobukholwa akunakwelapheka.
Isifundo Esiyisixwayiso Kithi
13. Ngokwamazwi kaPawulu atholakala kweyoku-1 Korinte 10:11, kufanele siwuqonde kanjani umbono wamaqoma amabili amakhiwane?
13 Njengoba sihlola lokho okushiwo isigijimi sikaJeremiya esiyisixwayiso esiphefumlelwe, amazwi kamphostoli uPawulu kweyoku-1 Korinte 10:11 ankeneneza ezindlebeni zethu: “Kepha lezozinto zabehlela bona kube-yisibonelo; kulotshelwe ukusiyala thina, osekufikile kithi ukugcina kwezikhathi.” Ingabe thina ngabanye siye sasilalela isixwayiso esisinikezwa yilombono wamaqoma amabili amakhiwane? Ebesixoxa ngakho yingxenye ebalulekile yezinto ezehlela u-Israyeli njengesibonelo esiyisixwayiso kithi.
14. U-Israyeli wasabela kanjani ekunakekeleni kukaJehova okunesisa?
14 Ekugcineni, masikhumbule amazwi kaJehova eNkosini uDavide ngokuphathelene no-Israyeli, njengoba etholakala kweyesi-2 Samuweli 7:10: “Ngiyakumisela abantu bami uIsrayeli indawo, ngibatshale.” UJehova wayebanakekela ngesisa abantu bakhe, u-Israyeli, ngazo zonke izindlela. Ama-Israyeli ayengenaso isizathu sokungavezi izithelo ezinhle ekuphileni kwawo. Kwakufanele nje alalele ukufundisa kukaJehova kwaphezulu futhi agcine imiyalo yakhe. Nokho, ambalwa kuphela kuwo akwenza lokho. Amaningi ayenenkani futhi enhlanhlatha kangangokuba aveza izithelo ezimbi, ezibolile.
15. U-Israyeli ongokomoya namuhla nabangane bakhe abanjengezimvu baye basabela kanjani ebubeleni bukaJehova?
15 Khona-ke, kuthiwani ngosuku lwethu? UJehova uye wabonisa ububele obukhulu ensalini yakhe ka-Israyeli ongokomoya nabangane bayo abanjengezimvu. Iso lakhe belilokhu liphezu kwabo kusukela ekukhululweni kwabo okungokomoya ngo-1919. Njengoba abikezela ngo-Isaya, nsuku zonke bathola ukufundisa kwaphezulu kuMfundisi omkhulu kunabo bonke endaweni yonke, uJehova uNkulunkulu. (Isaya 54:13) Lokhu kufundisa kwaphezulu, okuqondiswa yiNdodana yakhe ethandekayo, uJesu Kristu, kuye kwaletha ukuthula okukhulu phakathi kwabo futhi kancane kancane kuye kwabenza baba nobuhlobo obuseduze noJehova. Yeka ukuthi isimo esihle kanjani esingokomoya sonke lokhu okusilungiselela sona sokwazi uJehova, ukumlalela, nokuqhubeka siveza izithelo ezinhle ekuphileni kwethu—izithelo eziletha udumo kuJehova! Kusho khona kanye ukuphila kwethu!
16. Singawusebenzisa kanjani thina ngabanye umbono wamaqoma amabili amakhiwane?
16 Kodwa naphezu kwawo wonke umusa kaNkulunkulu ongafanelwe, kusenabanye abahlubukayo nabantamo-lukhuni, njengoba kwenza abaningi kwaJuda wasendulo, nabaveza izithelo ezimbi, ezibolile ekuphileni kwabo. Yeka ukuthi lokhu kudabukisa kanjani! Kwangathi kungebebikho noyedwa kithi ongasinaki isifundo esiyisixwayiso esisivezelwa ngokucacile ngalamaqoma amabili amakhiwane nezithelo zawo—ezinhle nezimbi. Njengoba isahlulelo sikaJehova esifanele kweLobukholwa elihlubukayo sisondela ngokushesha, kwangathi singalalela iseluleko sikamphostoli uPawulu: “Nihambe ngokufanele iNkosi, niyithokozise ngakho konke, nithela izithelo emisebenzini yonke elungileyo.”—Kolose 1:10.
Ukubukeza “Izithelo—Ezinhle Nezimbi” nezigaba 1-4 zesithi “Impikiswano KaJehova Nezizwe”
◻ Limelelani iqoma lamakhiwane amahle?
◻ Liye laba sobala kanjani iqoma lamakhiwane amabi asembonweni?
◻ Isiphi isifundo esiyisixwayiso isigijimi sikaJeremiya esisinikeza sona?
◻ Yini eyayiphawuleka ngonyaka ka-607 B.C.E.? nango-1914 C.E.?
[Isithombe ekhasini 15]
Njengamakhiwane amahle, abantu bakaNkulunkulu baye bakhiqiza izithelo zoMbuso ezimnandi
[Isithombe ekhasini 15]
ELobukholwa liye lazibonakalisa lifana neqoma lamakhiwane amabi