Zinikele Ekufundeni
“Lapho ngiseza, qhubeka uzimisela ekufundeleni iningi, ekukhuthazeni, ekufundiseni.”—1 THIMOTHEWU 4:13.
1. Singazuza kanjani ekufundeni iBhayibheli?
UJEHOVA UNKULUNKULU unikeze isintu ikhono elimangalisayo lokufunda ukuzifundela nokubhala. Futhi ulungiselele iZwi lakhe, iBhayibheli, ukuze sikwazi ukufundiswa kahle. (Isaya 30:20, 21) Eqinisweni, amakhasi alo asenza sikwazi ‘ukuhamba’ nezinzalamizi ezazesaba uNkulunkulu njengo-Abrahama, u-Isaka, noJakobe. Singakwazi ‘ukubona’ abesifazane abahlonipha uNkulunkulu abanjengoSara, uRebeka, nomMowabikazi owayethembekile uRuthe. Yebo, ‘singamuzwa’ noJesu Kristu enikeza iNtshumayelo yakhe yaseNtabeni. Yonke lenjabulo nemfundo enhle evela emiBhalweni Engcwele singayithola uma singabafundi abakhuthele.
2. Yini ebonisa ukuthi uJesu nabaphostoli bakhe babekwazi ukufunda kahle?
2 Ngokungangabazeki, umuntu ophelele uJesu Kristu wayenekhono elihle kakhulu lokufunda, futhi ngokuqinisekile wayeyazi kahle imiBhalo yesiHeberu. Ngakho-ke, lapho elingwa uDeveli, uJesu ngokuphindaphindiwe wabhekisela kuyo, ethi, “Kulotshiwe.” (Mathewu 4:4, 7, 10) Ngesinye isikhathi esesinagogeni eNazaretha, wafunda ingxenye yesiprofetho sika-Isaya obala futhi wayisebenzisa kuye. (Luka 4:16-21) Kuthiwani ngabaphostoli bakaJesu? Ezincwadini zabo, babecaphuna kaningi imiBhalo yesiHeberu. Nakuba ababusi bamaJuda babebheka uPetru noJohane njengabangafundile nabavamile ngoba bengafundanga ezikoleni zesiHeberu zemfundo ephakeme, izincwadi zabo eziphefumulelwe ngokwaphezulu zikufakazela ngokucacile ukuthi babekwazi kahle ukufunda nokubhala. (IzEnzo 4:13) Kodwa ingabe ikhono lokufunda libaluleke ngempela?
“Uyajabula Lowo Ofunda Ngokuzwakalayo”
3. Kungani kubaluleke kangaka ukufunda imiBhalo nezincwadi zobuKristu?
3 Ukungenisa ulwazi olunembile lwemiBhalo nokulusebenzisa kungaphumela ekuphileni okuphakade. (Johane 17:3) Ngakho-ke oFakazi BakaJehova bayaqaphela ukuthi kubaluleke impela ukufunda nokutadisha imiBhalo Engcwele nezincwadi zobuKristu ezilungiselelwe uNkulunkulu ngesigaba sesigqila esikholekile nesiqondayo samaKristu agcotshiwe. (Mathewu 24:45-47) Eqinisweni, ngokusebenzisa izincwadi ze-Watch Tower ezihlelwe ngokukhethekile, izinkulungwane ziye zafundiswa ukufunda futhi ngalokho zithola ulwazi lweZwi likaNkulunkulu olunikeza ukuphila.
4. (a) Kungani injabulo ilethwa ukufunda, ukutadisha, nokusebenzisa iZwi likaNkulunkulu? (b) Ngokuqondene nokufunda, yini uPawulu ayitshela uThimothewu?
4 Ukufunda, ukutadisha, nokusebenzisa iZwi likaNkulunkulu kuletha injabulo. Lokhu kubangelwa ukuthi ngokwenza lokho sijabulisa futhi sidumisa uNkulunkulu, sithola isibusiso sakhe, futhi sibe nenjabulo. UJehova ufuna ukuba izinceku zakhe zijabule. Ngakho, wayala abapristi ukuba bafundele abantu bakwa-Israyeli wasendulo uMthetho wakhe. (Duteronomi 31:9-12) Lapho u-Ezra umkopishi nabanye befundela abantu ababebuthene eJerusalema uMthetho, kwacaciswa ukuthi wawusho ukuthini, umphumela waba ‘yinjabulo enkulu.’ (Nehemiya 8:6-8, 12) Umphostoli uPawulu ongumKristu kamuva watshela isisebenzi ayekanye naso uThimothewu: “Lapho ngiseza, qhubeka uzimisela ekufundeleni iningi, ekukhuthazeni, ekufundiseni.” (1 Thimothewu 4:13) Enye inguqulo ifundeka kanje: “Zinikele ekufundeni umBhalo obala.”—New International Version.
5. IsAmbulo 1:3 siyihlobanisa kanjani injabulo nokufunda?
5 Ukuthi injabulo yethu ixhomeke ekufundeni nasekusebenziseni iZwi likaNkulunkulu kuvezwe ngokucacile kusAmbulo 1:3. Lapho siyatshelwa: “Uyajabula lowo ofunda ngokuzwakalayo nalabo abezwa amazwi alesisiprofetho, futhi abagcina izinto ezilotshwe kuso; ngoba isikhathi esimisiwe siseduze.” Yebo, kudingeka sifunde ngokuzwakalayo futhi sizwe amazwi kaNkulunkulu esiprofetho asencwadini yesAmbulo nakuyo yonke imiBhalo. Umuntu ojabula ngempela yilowo “okuthokoza kwakhe kusemthethweni kaJehova, ozindla ngomthetho wakhe imini nobusuku.” Umphumela? “Konke akwenzayo uyakuba-nenhlanhla kukho.” (IHubo 1:1-3) Ngakho-ke, ngezizathu ezinhle inhlangano kaJehova inxusa ngamunye wethu ukuba afunde futhi atadishe iZwi lakhe eyedwa, njengemikhaya, kanye nabangane.
Cabanga Futhi Uzindle
6. Yini uJoshuwa ayalezwa ukuba ayifunde, futhi lokhu kwaba kanjani yinzuzo?
6 Ungazuza kanjani ngokugcwele ekufundeni kwakho iZwi likaNkulunkulu nezincwadi zobuKristu? Cishe uyokuthola kuyinzuzo ukwenza lokho okwenziwa uJoshuwa, umholi owayesaba uNkulunkulu, wakwa-Israyeli wasendulo. Wayalwa: “Lencwadi yomthetho mayingasuki emlonyeni wakho, kepha wozindla ngayo [“uyoyifunda ngokunyenyeza,” NW] imini nobusuku ukuba uqaphele ukwenza njengakho konke okulotshwé kuyo, ngokuba lapho uyakuhlahlamelisa indlela yakho, uphumelele kahle.” (Joshuwa 1:8) ‘Ukufunda ngokunyenyeza’ kusho ukuzifundela amagama ngezwi eliphansi. Lokhu kusiza inkumbulo, ngoba kugxilisa ukwaziswa engqondweni. UJoshuwa kwakumelwe afunde uMthetho kaNkulunkulu “imini nobusuku,” noma njalo. Leyo kwakuyindlela yokuphumelela nokwenza ngokuhlakanipha ekufezeni imithwalo yemfanelo ayeyinikezwe uNkulunkulu. Ukufunda iZwi likaNkulunkulu okunjalo sikhathi sonke kungakusiza ngendlela efanayo.
7. Kungani kungafanele sivumele ukubuswa umqondo wokujaha lapho sifunda iZwi likaNkulunkulu?
7 Ungavumeli ukubuswa umqondo wokujaha lapho ufunda iZwi likaNkulunkulu. Uma uhlele ukusebenzisa isikhathi esithile ufunda iBhayibheli noma incwadi yobuKristu, ungase ufune ukufunda ungajahi. Lokhu kubaluleke kakhulu lapho utadisha unomgomo wokukhumbula amaphuzu abalulekile. Futhi lapho ufunda, cabanga. Hlaziya amazwi omlobi weBhayibheli. Zibuze, ‘Yiliphi iphuzu alivezayo? Yini okufanele ngiyenze ngalokhu kwaziswa?’
8. Kungani kuyinzuzo ukuzindla lapho ufunda imiBhalo?
8 Yiba nesikhathi sokuzindla lapho ufunda imiBhalo Engcwele. Lokhu kuyokusiza ukuba ukhumbule ukulandisa kweBhayibheli futhi usebenzise izimiso ezingokomBhalo. Ukuzindla ngeZwi likaNkulunkulu futhi ngalokho ugxilise amaphuzu engqondweni yakho kuyokwenza ukwazi nokukhuluma ngokusuka enhliziyweni, unikeze abantu ababuza ngobuqotho izimpendulo ezinhle esikhundleni sokusho into ongase uzisole ngayo kamuva. Isaga esiphefumulelwe ngokwaphezulu sithi: “Inhliziyo yolungileyo iyacabanga [ukuze iphendule, NW].”—IzAga 15:28.
Hlobanisa Amaphuzu Amasha Namadala
9, 10. Ukufunda kwakho iBhayibheli kungathuthukiswa kanjani ukuhlobanisa amaphuzu amasha angokomBhalo nalawo osuwazi kakade?
9 AmaKristu amaningi kumelwe avume ukuthi ngesinye isikhathi kuncane ayekwazi ngoNkulunkulu, iZwi lakhe, nezinjongo zakhe. Nokho, namuhla lezi zikhonzi ezingamaKristu, ziqala ngendalo nangokuwela komuntu esonweni, zingayichaza injongo yomhlatshelo kaKristu, zingalandisa ngokubhujiswa kwalesi simiso sezinto esibi, futhi zingabonisa indlela isintu esilalelayo esiyobusiswa ngayo ngokuphila okuphakade emhlabeni oyipharadesi. Lokhu kwenzeka ikakhulukazi ngenxa yokuthi lezi zinceku zikaJehova ziye zangenisa ‘ulwazi ngoNkulunkulu’ ngokutadisha iBhayibheli nezincwadi zobuKristu. (IzAga 2:1-5) Kancane kancane ziye zahlobanisa amaphuzu amasha eziwafundile namadala eseziwaqonda kakade.
10 Ukuhlobanisa amaphuzu amasha angokomBhalo nalawo osuwazi kakade kuyazuzisa futhi kuyavuza. (Isaya 48:17) Lapho kuvezwa imithetho yeBhayibheli, izimiso, noma ngisho nemiqondo engaqondakali ngokushesha, yihlobanise naleyo osuyazi kakade. Vumelanisa lokho kwaziswa nalokho osukufundile mayelana ‘nesibonelo samazwi amahle.’ (2 Thimothewu 1:13) Funa ukwaziswa okungakusiza ukuba uqinise ubuhlobo bakho noNkulunkulu, uthuthukise ubuntu bakho bobuKristu, noma okungakusiza ukuba uhlanganyele amaqiniso eBhayibheli nabanye.
11. Yini ongase uyenze lapho ufunda ngalokho iBhayibheli elikushoyo ngokuziphatha? Bonisa.
11 Lapho ufunda ngalokho iBhayibheli elikushoyo ngokuziphatha, zama ukubona isimiso esihilelekile. Zindla ngaso, futhi unqume ukuthi ubungenzani uma ungaphansi kwezimo ezifanayo. Indodana kaJakobe uJosefa yenqaba ngokungaguquki ukuhileleka ekuziphatheni okubi kobulili nomkaPotifari, ibuza: “Ngingenza kanjani lobobubi obungaka, ngone kuNkulunkulu, na?” (Genesise 39:7-9) Kulendaba ethinta inhliziyo, uthola isimiso esiyisisekelo—ukuziphatha okubi kobulili kuyisono kuNkulunkulu. Engqondweni ungahlobanisa lesi simiso namanye amazwi aseZwini likaNkulunkulu, futhi ungasikhumbula ngokunenzuzo lapho ulingwa ukuba uhlanganyele ekuziphatheni okubi okunjalo, futhi sikusize.—1 Korinte 6:9-11.
Yakha Umbono Wezenzakalo EzingokomBhalo
12. Kungani kufanele wakhe umbono wokulandisa kweBhayibheli njengoba ukufunda?
12 Ukuze ugxilise amaphuzu engqondweni yakho njengoba ufunda, yakha umbono wokwenzekayo. Kubone ngeso lengqondo ukuma kwezwe, imizi, abantu. Yizwa amazwi abo. Yizwa iphunga lesinkwa esibhakwa kuhhavini. Yenza izenzakalo ziphile. Khona-ke ukufunda kwakho kuyoba okuhlangenwe nakho okuthinta inhliziyo, ngoba ungase ubone umuzi wasendulo, ukhuphuke intaba ephakeme, umangaliswe yizimangaliso zendalo, noma ube kanye nabesilisa nabesifazane ababenokholo olukhulu.
13. Ungakuchaza kanjani okulotshwe kubAhluleli 7:19-22?
13 Ake sithi ufunda abAhluleli 7:19-22. Yiba nombono wokwenzekayo. UMahluleli uGideyoni namadoda akwa-Israyeli angamakhulu amathathu anesibindi sebemi ezindaweni zabo emaphethelweni ekamu labakwaMidiyani. Cishe yihora leshumi ebusuku, ekuqaleni “komlindo ophakathi.” Abalindi bakwaMidiyani basanda kubekwa, futhi ubumnyama bumboze ikamu lezitha zika-Israyeli ezilele. Bheka! UGideyoni namadoda anawo bahlome ngamacilongo. Baphethe izitsha zamanzi ezinkulu ezimboze izimbaqa ezisezandleni zawo zesobunxele. Kungazelelwe, amaqembu amathathu ngalinye elinabantu abayikhulu akhalisa amacilongo, aphahlaze izitsha, aphakamisele phezulu izimbaqa, amemeze: “Inkemba kaJehova nekaGideyoni.” Ubheka ikamu. Nabaya abakwaMidiyani bebaleka futhi beqala ukumemeza! Njengoba abangamakhulu amathathu beqhubeka beshaya amacilongo abo, uNkulunkulu wenza ukuba abakwaMidiyani babhokoxane bodwa. UMidiyani ubalekile, futhi uJehova unikeze u-Israyeli ukunqoba.
Ukufunda Izifundo Ezibalulekile
14. Incwadi yabAhluleli isahluko 9 ingasetshenziswa kanjani ekufundiseni umntwana ngesidingo sokuthobeka?
14 Ngokufunda iZwi likaNkulunkulu, singafunda izifundo eziningi. Ngokwesibonelo, ake sithi ufuna ukugcizelela kubantwana bakho isidingo sokuthobeka. Kufanele kube lula ukwakha umbono nokuthola iphuzu lalokho okwashiwo esiprofethweni sikaJothamu indodana kaGideyoni. Qalani ukufunda kubAhluleli 9:8. UJothamu wathi: “Imithi yake yaya ukuzigcobela inkosi.” Umuthi womnqumo, umkhiwane, nomvini yenqaba ukubusa. Kodwa isihlahla somkhaya esingelutho sakujabulela ukuba umbusi. Ngemva kokufundela abantwana bakho ngokuzwakalayo lokhu kulandisa, ungase uchaze ukuthi lezi zitshalo ezibalulekile zazimelela abantu ababalulekile abangafunanga isikhundla sobubusi phezu kwama-Israyeli akubo. Isihlahla somkhaya esasingase sisetshenziselwe ukubasa kuphela, sasimelela ukubusa kuka-Abimeleki owayeqhosha, umbulali owayefuna ukubusa abanye kodwa wahlangana nezimbila zithutha, kugcwaliseka isiprofetho sikaJothamu. (AbAhluleli, isahluko 9) Umntwana onjani ongathanda ukukhula afane nesihlahla somkhaya?
15. Ukubaluleka kokwethembeka kuqokonyiswe kanjani encwadini kaRuthe?
15 Ukubaluleka kokwethembeka kucaciswe encwadini yeBhayibheli kaRuthe. Ake sithi amalungu omkhaya wakho ayashintshana ngokufunda ngokuzwakalayo lokho kulandisa futhi azama ukuthola kahle lokho okukushoyo. Nibona umMowabikazi uRuthe esendleleni eya eBetlehema noninazala ongumfelokazi, uNawomi, futhi nizwa uRuthe ethi: “Abantu bakho bayakuba-ngabantu bami, uNkulunkulu wakho abe-nguNkulunkulu wami.” (Ruthe 1:16) URuthe okhuthele ubonakala ekhothoza ngemva kwabavuni ensimini kaBowazi. Nizwa uBowazi emncoma, ethi: “Wonke umuzi wabantu bakithi uyazi ukuthi ungowesifazane olungileyo.” (Ruthe 3:11) Ngokushesha, uBowazi ushada noRuthe. Ngokuvumelana nelungiselelo lomshado lokungena komuntu umkamfowabo, ngoBowazi uzalela “uNawomi” indodana. URuthe uba ukhokhokazi kaDavide futhi ekugcineni, kaJesu Kristu. Ngaleyo ndlela wamukela “umvuzo opheleleyo.” Ngaphezu kwalokho, labo abafunda lokhu kulandisa okungokomBhalo bafunda isifundo esibalulekile: Thembeka kuJehova, uyobusiswa ngokucebile.—Ruthe 2:12; 4:17-22; IzAga 10:22; Mathewu 1:1, 5, 6.
16. Yiluphi uvivinyo amaHeberu amathathu abhekana nalo, futhi lomlando ungasisiza kanjani?
16 Umlando wamaHeberu okwakuthiwa oShadiraki, uMeshaki, no-Abedi-Nego ungasisiza ukuba sithembeke kuNkulunkulu ezimweni ezilingayo. Yakha umbono walesi senzakalo njengoba uDaniyeli isahluko 3 efundwa ngokuzwakalayo. Umfanekiso omkhulu wemibhoshongo yegolide ngenhla kwethafa laseDura, lapho kubuthene khona izikhulu zaseBabiloni. Lapho kuzwakala izinsimbi zomculo, ziwa phansi futhi zikhulekela lomfanekiso omiswe iNkosi uNebukadinesari. Zonke zenze njalo, ngaphandle kukaShadiraki, uMeshaki, no-Abedi-Nego. Ngenhlonipho, kodwa ngokuqinile, batshela inkosi ukuthi ngeke bakhonze onkulunkulu bayo futhi bakhulekele umfanekiso wegolide. LamaHeberu asemasha aphonswa esithandweni somlilo esishisiswe ngokweqile. Kodwa kwenzekani? Uma ibheka ngaphakathi, inkosi ibona amadoda amane, enye yawo ‘injengendodana yawonkulunkulu.’ (Daniyeli 3:25) LamaHeberu amathathu ayakhishwa esithandweni somlilo, futhi uNebukadinesari udumisa uNkulunkulu wawo. Kuye kwaba yinzuzo ukwakha umbono walokhu kulandisa. Futhi yeka isifundo okusinikezayo ngokwethembeka kuJehova ngaphansi kovivinyo!
Zuzani Ekufundeni IBhayibheli Njengomkhaya
17. Bala kafushane izinto eziyinzuzo umkhaya wakho ongazifunda ngokufunda iBhayibheli ndawonye.
17 Umkhaya wakho ungajabulela izinzuzo eziningi uma ngaso sonke isikhathi niba nesikhathi sokufunda iBhayibheli ndawonye. Kusukela kuGenesise, ningaba nombono wendalo futhi nibone ikhaya lomuntu lokuqala eliyiPharadesi. Ningahlanganyela ezintweni izinzalamizi ezithembekile nemikhaya yazo ezabhekana nazo futhi nilandele ama-Israyeli njengoba ewela uLwandle Olubomvu izinyawo zomile. Ningabona insizwa engumelusi uDavide inqoba umdondoshiya ongumFilisti uGoliyati. Umkhaya wakho ungaphawula ukwakhiwa kwethempeli likaJehova eJerusalema, ungabona ukuchithwa kwalo amabutho aseBabiloni, futhi ungaphinde ubone ukwakhiwa kwalo kabusha ngaphansi koMbusi uZerubabele. Nikanye nabelusi abathobekile ngaseBetlehema, ningasizwa isimemezelo sezingelosi esiphathelene nokuzalwa kukaJesu. Ningathola imininingwane ngokubhapathizwa kwakhe nenkonzo yakhe, ningambona edela ukuphila kwakhe kobuntu njengesihlengo, futhi ningahlanganyela enjabulweni yokuvuswa kwakhe. Ngemva kwalokho, ningahamba nomphostoli uPawulu futhi nibone ukumiswa kwamabandla njengoba ubuKristu busakazeka. Kamuva, encwadini yesAmbulo, umkhaya wakho ungajabulela umbono omuhle womphostoli uJohane ophathelene nesikhathi esizayo, kuhlanganise nokuBusa KukaKristu Kweminyaka Eyinkulungwane.
18, 19. Yikuphi ukusikisela okunikezwayo ngokuqondene nokufunda iBhayibheli njengomkhaya?
18 Uma nifunda iBhayibheli ngokuzwakalayo njengomkhaya, lifundeni ngokucacile nangentshiseko. Lapho nifunda izingxenye ezithile zemiBhalo, elinye ilungu lomkhaya—ubaba uma kwenzeka—lingase lifunde amazwi alandisa indaba yonke. Abanye kini bangadlala izindima zabantu baseBhayibhelini, befunda izingxenye zabo ngomuzwa ofanelekile.
19 Njengoba nifunda iBhayibheli njengomkhaya, ikhono lenu lokufunda lingathuthuka. Cishe, ulwazi lwenu ngoNkulunkulu luyokwanda, futhi lokhu kufanele kunisondeze kuye. U-Asafa wahlabelela: “Kepha mina kungilungele ukusondela kuNkulunkulu; ngenzile iNkosi uJehova ibe-yisiphephelo sami, ukuze ngishumayele zonke izenzo zakho.” (IHubo 73:28) Lokhu kuyosiza umkhaya wakho ukuba ube njengoMose, ‘owaqhubeka egxilile sengathi uyambona Lowo ongabonakali,’ okungukuthi, uJehova uNkulunkulu.—Heberu 11:27.
Ukufunda Nenkonzo YobuKristu
20, 21. Umsebenzi wethu wokushumayela uhlobene kanjani nekhono lokufundisa?
20 Isifiso sethu sokukhulekela “Lowo ongabonakali” kufanele sisishukumisele ukuba sisebenzele ekubeni abafunda kahle. Ikhono lokufunda kahle lisisiza ukuba sinikeze ubufakazi obuvela eZwini likaNkulunkulu. Ngokuqinisekile lisisiza ukuba siqhube umsebenzi wokushumayela ngoMbuso uJesu athuma abalandeli bakhe ukuba bawenze lapho ethi: “Hambani niyokwenza abantu bazo zonke izizwe babe abafundi, nibabhapathize egameni likaYise neleNdodana nelomoya ongcwele, nibafundise ukugcina zonke izinto enginiyale ngazo.” (Mathewu 28:19, 20; IzEnzo 1:8) Ukufakaza kungumsebenzi oyinhloko wabantu bakaJehova, futhi ikhono lokufunda lisisiza ukuba siwufeze.
21 Kudingeka umzamo ukuze ube umuntu ofunda kahle nomfundisi onekhono weZwi likaNkulunkulu. (Efesu 6:17) Ngakho, ‘yenza konke okusemandleni akho ukuba uzethule wamukeleka kuNkulunkulu, uphathe izwi leqiniso ngokufanele.’ (2 Thimothewu 2:15) Yandisa ulwazi lwakho lweqiniso elingokomBhalo futhi uthuthukise ikhono lakho njengoFakazi kaJehova ngokuzinikela ekufundeni.
Ungaphendula Uthini?
◻ Injabulo ixhomeke kanjani ekufundeni iZwi likaNkulunkulu?
◻ Kungani kudingeka uzindle ngalokho okufunda eBhayibhelini?
◻ Kungani kufanele uhlobanise futhi wakhe umbono wezinto ozifunda emiBhalweni?
◻ Yiziphi ezinye zezifundo ezingafundwa ekufundeni iBhayibheli?
◻ Kungani kufanele nifunde iBhayibheli ngokuzwakalayo njengomkhaya, futhi ukufunda kuhlobene ngani nenkonzo yobuKristu?
[Izithombe ekhasini 13]
Lapho nifunda iBhayibheli njengomkhaya, yibani nombono wendaba futhi nizindle ngokubaluleka kwayo