Umkhaya KaJehova ujabulela Ubunye Obuyigugu
“Bheka, kuhle, kumnandi kangaka ukuba abazalwane bahlalisane ndawonye bemunye.”—IHUBO 133:1.
1. Siyini isimo semikhaya eminingi namuhla?
UMKHAYA usesimweni esibucayi namuhla. Emikhayeni eminingi, izibopho zomshado ziyagqashuka. Isehlukaniso siba yinto evama ngokwandayo, futhi izingane eziningi zemibhangqwana ehlukanisile zibhekana nosizi olukhulu. Izigidi zemikhaya azijabuli futhi azinabo ubunye. Nokho, kunomkhaya owodwa owazi injabulo yeqiniso nobunye bangempela. Umkhaya kaJehova uNkulunkulu wembulunga yonke. Kuwo, izingelosi eziningi ezingabonakali zenza imisebenzi yazo eziyabelwe ngokuvumelana nentando yaphezulu. (IHubo 103:20, 21) Kodwa ingabe ukhona umkhaya emhlabeni ojabulela ubunye obunjalo?
2, 3. (a) Obani manje abayingxenye yomkhaya kaNkulunkulu wendawo yonke, futhi singabafanisa nani bonke oFakazi BakaJehova namuhla? (b) Yimiphi imibuzo esizoxoxa ngayo?
2 Umphostoli uPawulu wabhala: “Ngiguqa kuBaba, eqanjwe ngaye yonke imikhaya yasezulwini neyasemhlabeni.” (Efesu 3:14, 15) Yonke imindeni emhlabeni iqanjwe ngoNkulunkulu ngoba unguMdali. Nakuba ingekho imikhaya yabantu ezulwini, ngomqondo ongokomfanekiso uNkulunkulu ushade nenhlangano yakhe yasezulwini, futhi uJesu uyohlanganiswa nomlobokazi ongokomoya emazulwini. (Isaya 54:5; Luka 20:34, 35; 1 Korinte 15:50; 2 Korinte 11:2) Abagcotshiwe abathembekile abasemhlabeni manje bayingxenye yomkhaya kaNkulunkulu wendawo yonke, futhi ‘ezinye izimvu’ zikaJesu, ezinamathemba asemhlabeni, zingamalungu esikhathi esizayo. (Johane 10:16; Roma 8:14-17; INqabayokulinda, January 15, 1996, ikhasi 31) Nokho, bonke oFakazi BakaJehova namuhla bangafaniswa nomkhaya womhlaba wonke onobunye.
3 Ingabe uyingxenye yomkhaya omuhle womhlaba wonke wezinceku zikaNkulunkulu? Uma uyiyo, ujabulela esinye sezibusiso ezinkulu kunazo zonke umuntu angaba nazo. Izigidi zingakufakazela ukuthi umkhaya kaJehova wembulunga yonke—inhlangano yakhe ebonakalayo—uyindawo enokuthula nobunye ogwadule lwezwe elinempi nokungabi nabunye. Bungachazwa kanjani ubunye bomkhaya kaJehova womhlaba wonke? Futhi yiziphi izinto ezithuthukisa ubunye obunjalo?
Yeka Indlela Okuhle Nokumnandi Ngayo!
4. Ngamazwi akho siqu, ungakuchaza kanjani lokho okushiwo iHubo 133 ngobunye bobuzalwane?
4 Umhubi uDavide wayebazisa ngokujulile ubunye bobuzalwane. Waze waphefumulelwa nokuba acule ngabo! Mcabange ephethe ihabhu lakhe njengoba ecula: “Bheka, kuhle, kumnandi kangaka ukuba abazalwane bahlalisane ndawonye bemunye. Kufana namafutha amahle ekhanda ehlela esilevini, isilevu sika-Aroni, ehlela nasemphethweni wezambatho zakhe. Kufana namazolo aseHermoni ehlela ezintabeni zaseSiyoni. Ngokuba uJehova wayaleza khona isibusiso, yebo, ukuphila kuze kube-phakade.”—IHubo 133:1-3.
5. Ngesisekelo seHubo 133:1, 2, yikuphi ukuqhathanisa okungenziwa phakathi kwama-Israyeli nezinceku zikaNkulunkulu zanamuhla?
5 Lawo mazwi ayesebenza ebunyeni bobuzalwane obabujatshulelwa abantu bakaNkulunkulu basendulo, ama-Israyeli. Lapho beseJerusalema beyele imikhosi yabo emithathu yaminyaka yonke, babehlala ndawonye ngobunye. Nakuba babevela ezizwaneni ezihlukahlukene, babewumkhaya owodwa. Ukuba ndawonye kwakuba nomphumela omuhle kubo, njengamafutha okugcoba aqabulayo anephunga elimnandi. Lapho amafutha anjalo ethelwa ekhanda lika-Aroni, ehlela esilevwini sakhe aze ayofika emphethweni wentamo yengubo yakhe. Kuma-Israyeli, ukuba ndawonye kwakunethonya elihle elalithinta bonke abantu ababebuthene. Ukungezwani kwakuxazululwa, futhi kwakuthuthukiswa ubunye. Ubunye obufanayo bukhona emkhayeni kaJehova wembulunga yonke namuhla. Ukuhlangana njalo kunomphumela omuhle ongokomoya emalungwini awo. Noma yikuphi ukungezwani noma izinkinga ziyaqedwa njengoba kusetshenziswa iseluleko seZwi likaNkulunkulu. (Mathewu 5:23, 24; 18:15-17) Abantu bakaJehova bakwazisa kakhulu ukukhuthazana okubangelwa ubunye babo bobuzalwane.
6, 7. Ubunye buka-Israyeli babufana kanjani namazolo eNtaba iHermoni, futhi isibusiso sikaNkulunkulu singatholakalaphi namuhla?
6 Ukuhlala kuka-Israyeli ngokuthula kwakufana kanjani namazolo eNtaba iHermoni? Njengoba isiqongo salentaba singamamitha angaphezu kuka-2 800 ngaphezu kogu lolwandle, sihlale simbozwe yiqhwa cishe unyaka wonke. Isiqongo seHermoni esineqhwa sibangela ukujiya kwemihwamuko yasebusuku futhi ngenxa yalokho kube namazolo amaningi avikela izitshalo phakathi nenkathi ende engenazimvula. Umoya obandayo oheleza njalo usuka okhahlambeni lweHermoni uhamba nemihwamuko enjalo uze uyofika phansi eJerusalema, lapho ifike ijiye khona ibe amazolo. Ngakho umhubi wayenembile lapho ethi ‘amazolo eHermoni ehlela eNtabeni yaseSiyoni.’ Yeka isikhumbuzo esihle sethonya eliqabulayo elithuthukisa ubunye bomkhaya kaJehova wabakhulekeli!
7 Ngaphambi kokuba kumiswe ibandla lobuKristu, iSiyoni, noma iJerusalema, laliyisikhungo sokukhulekela kweqiniso. Ngakho, yilapho lapho uNkulunkulu ayeyale ukuba isibusiso sibe khona. Njengoba lowo onguMthombo wazo zonke izibusiso ayehlala ngokomfanekiso ethempelini eJerusalema, izibusiso zaziyokuza zisuka khona. Ngenxa yokuthi ukukhulekela kweqiniso akusagxilisiwe endaweni eyodwa, isibusiso, nothando, ubunye bezinceku zikaNkulunkulu kutholakala emhlabeni wonke namuhla. (Johane 13:34, 35) Yiziphi ezinye izici ezithuthukisa lobu bunye?
Izici Ezithuthukisa Ubunye
8. Yini esiyifundayo ngobunye kuJohane 17:20, 21?
8 Ubunye babakhulekeli bakaJehova busekelwe ekulaleleni iZwi likaNkulunkulu eliqondwa ngokunembile, kuhlanganise nezimfundiso zikaJesu Kristu. Ngokuthumela kukaJehova iNdodana yakhe emhlabeni ukuba ifakazele iqiniso futhi ife ukufa okuwumhlatshelo, kwavulwa indlela yokwakhiwa kwebandla lobuKristu elinobunye. (Johane 3:16; 18:37) Ukuthi kwakuyoba nobunye bangempela phakathi kwamalungu alo kwacaca lapho uJesu ethandaza: “Angenzi isicelo ngokuphathelene nalaba kuphela, kodwa nangokuphathelene nalabo ababeka ukholo kimi ngezwi labo; ukuze bonke babe munye, njengoba nje wena, Baba, usebunyeni nami futhi nami ngisebunyeni nawe, ukuba nabo babe sebunyeni nathi, ukuze izwe likholelwe ukuthi ungithumile.” (Johane 17:20, 21) Abalandeli bakaJesu babufinyelela ubunye obufana nalobo obukhona phakathi kukaNkulunkulu neNdodana yakhe. Lokhu kwenzeka ngenxa yokuthi balalela iZwi likaNkulunkulu nezimfundiso zikaJesu. Isimo sengqondo esifanayo siyisici esiyinhloko ebunyeni bomkhaya kaJehova womhlaba wonke namuhla.
9. Iyiphi indima umoya ongcwele onayo ebunyeni babantu bakaJehova?
9 Esinye isici esenza abantu bakaJehova babe nobunye ukuthi sinomoya ongcwele kaNkulunkulu, noma amandla asebenzayo. Usenza siqonde iqiniso elambuliwe leZwi likaJehova ngalokho simkhonze ngobunye. (Johane 16:12, 13) Umoya usisiza ukuba sigweme imisebenzi yenyama ehlukanisayo enjengezingxabano, umhawu, isifuthefuthe sentukuthelo, nombango. Kunalokho, umoya kaNkulunkulu usenza sibe nezithelo eziletha ubunye zothando, injabulo, ukuthula, ukubhekakade, umusa, ubuhle, ukholo, ubumnene, nokuzithiba.—Galathiya 5:19-23.
10. (a) Uthando olukhona emkhayeni wabantu onobunye lungafaniswa kanjani nothando olukhona phakathi kwalabo abazinikele kuJehova? (b) Elinye ilungu leNdikimba Ebusayo layiveza kanjani imizwa yalo ngokuhlangana nabafowabo abangokomoya?
10 Amalungu omkhaya onobunye ayathandana futhi ayajabula ngokuba ndawonye. Ngokufanayo, labo abasemkhayeni onobunye wabakhulekeli bakaJehova, bathanda yena, iNdodana yakhe, nabakholwa nabo. (Marku 12:30; Johane 21:15-17; 1 Johane 4:21) Njengoba nje umkhaya onothando ujabulela ukudla ndawonye, labo abazinikezele kuNkulunkulu bayakujabulela ukuba khona emihlanganweni yobuKristu, emihlanganweni yesifunda, neyesigodi ukuze bazuze ebudlelwaneni obuhle nasekudleni okuhle okungokomoya. (Mathewu 24:45-47; Heberu 10:24, 25) Ilungu leNdikimba Ebusayo yoFakazi BakaJehova lake lakubeka ngalendlela: “Kimina, ukuhlangana nabazalwane kungenye yezinto ezijabulisa kunazo zonke ekuphileni futhi kuwumthombo wesikhuthazo. Ngiyakuthanda ukuba phakathi kwabokuqala ukufika eHholo LoMbuso, futhi ngibe kwabokugcina ukuhamba, uma kwenzeka. Ngizizwa nginenjabulo yangaphakathi lapho ngikhuluma nabantu bakaNkulunkulu. Uma ngiphakathi kwabo ngizizwa ngikhululekile nginomkhaya wakithi.” Ingabe uzizwa ngaleyo ndlela?—IHubo 27:4.
11. Yimuphi umsebenzi oFakazi BakaJehova abathola injabulo ekhethekile kuwo, futhi uba yini umphumela wokwenza inkonzo kaNkulunkulu ibe yinto eyinhloko ekuphileni kwethu?
11 Umkhaya onobunye ujabulela ukwenza izinto ndawonye. Ngokufanayo, labo abasemkhayeni wabakhulekeli bakaJehova bathola injabulo ngokwenza umsebenzi wabo wokushumayela ngoMbuso nokwenza abafundi ngobunye. (Mathewu 24:14; 28:19, 20) Ukuhlanganyela kuwo njalo kusenza sisondelane nabanye oFakazi BakaJehova. Ukwenza inkonzo kaNkulunkulu ibe yinto eyinhloko ekuphileni kwethu nokusekela yonke imisebenzi yabantu bakhe nakho kuthuthukisa umoya womkhaya phakathi kwethu.
Ukuhleleka Okungokwasezulwini Kubalulekile
12. Ziyini izici zomkhaya ojabulayo nonobunye, futhi yiliphi ilungiselelo elalithuthukisa ubunye emabandleni obuKristu ekhulu lokuqala?
12 Umkhaya onokuhola okuqinile kodwa okunothando futhi ohlelekile cishe uyoba nobunye nenjabulo. (Efesu 5:22, 33; 6:1) UJehova unguNkulunkulu wokuhleleka okunokuthula, futhi bonke abasemkhayeni wakhe bambheka ‘njengoPhezukonke.’ (Daniyeli 7:18, 22, 25, 27; 1 Korinte 14:33) Bayaqaphela futhi ukuthi umise iNdodana yakhe, uJesu Kristu, yaba indlalifa yazo zonke izinto nokuthi uyiphathise lonke igunya ezulwini nasemhlabeni. (Mathewu 28:18; Heberu 1:1, 2) LinoKristu njengeNhloko yalo, ibandla lobuKristu liyinhlangano ehlelekile, enobunye. (Efesu 5:23) Ukuze kuqondiswe imisebenzi yamabandla ekhulu lokuqala, kwakunendikimba ebusayo eyayakhiwa abaphostoli namanye “amadoda amadala” avuthiwe ngokomoya. Amabandla ngamanye ayenababonisi abamisiwe, noma abadala, nezinceku ezikhonzayo. (IzEnzo 15:6; Filipi 1:1) Ukulalela ababehola kwakuthuthukisa ubunye.—Heberu 13:17.
13. UJehova ubadonsa kanjani abantu, futhi uba yini umphumela walokhu?
13 Kodwa ingabe konke lokhu kuhleleka kusikisela ukuthi ubunye babakhulekeli bakaJehova bungabangelwa ukuhola okuqinile, okungenakucabangela? Lutho neze! Akukho lutho oluwukungabi naluthando kuNkulunkulu noma enhlanganweni yakhe. UJehova udonsa abantu ngokubonisa uthando, futhi unyaka ngamunye, ngokuzithandela nangenjabulo, amakhulu ezinkulungwane aba ingxenye yenhlangano kaJehova ngokubhapathizwa ebonakalisa ukuzinikezela kwawo ngenhliziyo ephelele kuNkulunkulu. Umoya wawo unjengokaJoshuwa, owanxusa ama-Israyeli akubo: “Khethani namuhla ukuthi ngubani eniyakumkhonza . . . Kepha mina nendlu yami siyakumkhonza uJehova.”—Joshuwa 24:15.
14. Kungani singase sithi inhlangano kaJehova ingokwasezulwini?
14 Njengengxenye yomkhaya kaJehova, asigcini nje ngokujabula kodwa futhi silondekile. Lokhu kubangelwa ukuthi inhlangano yakhe ingokwasezulwini. UMbuso kaNkulunkulu ungumbuso ongokwasezulwini (inkulumo evela egameni lesiGreki elithi the·osʹ, unkulunkulu, nelithi kraʹtos, ukubusa). Uwukubusa kukaNkulunkulu, ugcotshwé futhi wamiswa nguye. “Isizwe esingcwele” sikaJehova esigcotshiwe siyazithoba ekubuseni kwakhe futhi ngenxa yalokho naso singokwasezulwini. (1 Petru 2:9) Njengoba sinoMbusi Omkhulu, uJehova, njengoMahluleli wethu, uMniki-mthetho, neNkosi, sinesizathu esihle zokuzizwa silondekile. (Isaya 33:22) Nokho, kuthiwani uma kungaphakama impikiswano futhi isongele injabulo yethu, ukulondeka, nobunye?
INdikimba Ebusayo Ithatha Isinyathelo
15, 16. Yikuphi ukuphikisana okwaba khona ekhulwini lokuqala, futhi ngani?
15 Ukuze kulondolozwe ubunye bomkhaya, ngezinye izikhathi kungase kudingeke kuxazululwe ukuphikisana okuthile. Ake sithi, kwakudingeka kuxazululwe inkinga engokomoya ukuze kulondolozwe ubunye bomkhaya kaNkulunkulu wabakhulekeli ekhulwini lokuqala C.E. Kwakwenziwani? Indikimba ebusayo yayithatha isinyathelo, yenze izinqumo ezindabeni ezingokomoya. Sinomlando ongokomBhalo wesinyathelo esinjalo.
16 Cishe ngo-49 C.E., indikimba ebusayo yahlangana eJerusalema ukuze ixazulule inkinga engathi sína futhi ngalokho ilondoloze ubunye ‘bendlu kaNkulunkulu.’ (Efesu 2:19) Eminyakeni engu-13 ngaphambili, umphostoli uPetru wayeshumayeze uKorneliyu, futhi abeZizwe bokuqala, baba amakholwa abhapathiziwe. (IzEnzo, isahluko 10) Phakathi nohambo lukaPawulu lokuqala eyisithunywa sevangeli, abeZizwe abaningi bamukela ubuKristu. (IzEnzo 13:1–14:28) Eqinisweni, kwakumiswe ibandla lamaKristu abeZizwe e-Antiyokiya, eSiriya. Amanye amaJuda angamaKristu aba nomuzwa wokuthi abeZizwe abaguqukile kwakufanele basokwe futhi bagcine uMthetho kaMose, kodwa amanye ayengavumi. (IzEnzo 15:1-5) Lempikiswano yayingaholela ekushabalaleni kobunye, ngisho nasekumisweni kwamabandla ahlukene amaJuda nawabeZizwe. Ngakho-ke, indikimba ebusayo yathatha isinyathelo ngokushesha ukuze ilondoloze ubunye bobuKristu.
17. Iyiphi inqubo engokwasezulwini enokuvumelana, echazwe kuzEnzo isahluko 15?
17 NgokwezEnzo 15:6-22, “abaphostoli namadoda amadala babuthana ndawonye ukuze bayihlole lendaba.” Kwakukhona nabanye, kuhlanganise nababevela e-Antiyokiya. UPetru waqale wachaza ukuthi ‘abantu bezizwe babezwe izindaba ezinhle ngomlomo wakhe futhi bakholwa.’ Ngemva kwalokho “lonke uquqaba” lwalalela njengoba uBarnaba noPawulu babelandisa “izibonakaliso nemihlola eminingi uNkulunkulu ayenza ngabo phakathi kwezizwe,” noma abeZizwe. UJakobe wabe esesikisela indlela lenkinga engase ixazululwe ngayo. Ngemva kokuba indikimba ebusayo yenze isinqumo, siyatshelwa: “Abaphostoli namadoda amadala kanye nalo lonke ibandla bakubona kukuhle ukuthuma amadoda akhethiwe phakathi kwabo ukuba aye e-Antiyokiya kanye noPawulu noBarnaba.” Lawo “madoda akhethiwe”—uJuda noSila—ahamba nencwadi ekhuthazayo eya kwayekholwa nabo.
18. Indikimba ebusayo yenza siphi isinqumo mayelana noMthetho kaMose, futhi sawathinta kanjani amaKristu amaJuda nawabeZizwe?
18 Incwadi eyayimemezela isinqumo sendikimba ebusayo yayiqala ngalamazwi: “Abaphostoli namadoda amadala, abafowenu, kulabobafowethu e-Antiyokiya naseSiriya naseKhilikhiya abavela ezizweni: Siyanibingelela!” Abanye babekhona kulomhlangano owaba yingqopha-mlando, kodwa ngokusobala indikimba ebusayo yayakhiwa “abaphostoli namadoda amadala.” Umoya kaNkulunkulu wayiqondisa, ngoba incwadi ithi: “Umoya ongcwele nathi ngokwethu sikubone kukuhle ukunganezeli omunye umthwalo osindayo kini, ngaphandle kwalezizinto ezidingekile, ukuba niqhubeke nideda ezintweni ezihlatshelwe izithombe nasegazini nasezintweni eziklinyiwe nasebufebeni.” (IzEnzo 15:23-29) AmaKristu kwakungadingeki asokwe nokuba agcine uMthetho kaMose. Lesi sinqumo sasiza amaKristu amaJuda nawabeZizwe ukuba enze futhi akhulume ngobunye. Amabandla athokoza, futhi ubunye obuyigugu baqhubeka, njengoba nje kunjalo nasemkhayeni kaNkulunkulu womhlaba wonke namuhla ngaphansi kokuqondisa okungokomoya kweNdikimba Ebusayo yoFakazi BakaJehova.—IzEnzo 15:30-35.
Khonza Ngaphansi Kobunye Obungokwasezulwini
19. Kungani ubunye buye bachuma emkhayeni wabakhulekeli bakaJehova?
19 Ubunye buyachuma lapho amalungu omkhaya ebambisana. Kungokufanayo nasemkhayeni wabakhulekeli bakaJehova. Ngenxa yokuba abangokwasezulwini, abadala nabanye ebandleni lekhulu lokuqala bakhonza uNkulunkulu ngokubambisana okugcwele nendikimba ebusayo futhi bamukela izinqumo zayo. Ngosizo lwendikimba ebusayo, abadala ‘bashumayela izwi’ futhi amalungu amabandla ewonke ‘akhuluma ngokuvumelana.’ (2 Thimothewu 4:1, 2; 1 Korinte 1:10) Ngakho amaqiniso afanayo angokomBhalo ayenikezwa enkonzweni nasemihlanganweni yobuKristu, kungakhathaliseki ukuthi kuseJerusalema, e-Antiyokiya, eRoma, eKorinte, noma kwenye indawo. Ubunye obunjalo obungokwasezulwini bukhona nanamuhla.
20. Ukuze silondoloze ubunye bethu bobuKristu, yini okumelwe siyenze?
20 Ukuze silondoloze ubunye bethu, sonke esiyingxenye yomkhaya kaJehova wembulunga yonke kufanele silwele ukubonisa uthando olungokwasezulwini. (1 Johane 4:16) Kudingeka sizithobe entandweni kaNkulunkulu futhi sibonise inhlonipho ejulile ‘ngesigqila esikholekile’ neNdikimba Ebusayo. Njengokuzinikezela kwethu kuNkulunkulu, ukulalela kwethu kungokokuzithandela futhi kuyajabulisa. (1 Johane 5:3) Yeka ukuthi kwakufaneleka kanjani ukuba umhubi ahlobanise injabulo nokulalela! Wacula: “Haleluya! Ubusisiwe [“uyajabula,” NW] umuntu omesaba uJehova, othokoza kakhulu ngemithetho yakhe.”—IHubo 112:1.
21. Singazibonakalisa kanjani singabangokwasezulwini?
21 UJesu, iNhloko yebandla, ungokwasezulwini ngokugcwele futhi wenza intando kaYise njalo. (Johane 5:30) Ngakho-ke, masilandele iSibonelo sethu ngokwenza intando kaJehova ngendlela engokwasezulwini nangobunye sibambisene ngokugcwele nenhlangano yaKhe. Khona-ke ngenjabulo esuka enhliziyweni nangokubonga, singananela ingoma yomhubi: “Bheka, kuhle, kumnandi kangaka ukuba abazalwane bahlalisane ndawonye bemunye.”
Ungaphendula Uthini?
◻ Ubunye bethu bobuKristu bungahlotshaniswa kanjani neHubo 133?
◻ Yiziphi ezinye izici ezithuthukisa ubunye?
◻ Kungani ukuhleleka okungokwasezulwini kubalulekile ebunyeni babantu bakaNkulunkulu?
◻ Indikimba ebusayo yekhulu lokuqala yenzani ukuze igcine ukuthula?
◻ Kusho ukuthini kuwe ukukhonza ebunyeni obungokwasezulwini?
[Isithombe ekhasini 13]
Indikimba ebusayo yathatha isinyathelo ukuze ilondoloze ubunye