Ukukhonza Nenhlangano KaJehova Ngokwethembeka

“Kothembekileyo uyazibonakalisa ethembekile.”—2 SAMUWELI 22:26.

1, 2. Yiziphi ezinye zezibonelo zokwethembeka sonke esingase sizibone ebandleni?

NGOLUNYE usuku ebusuku, umdala ulungiselela inkulumo yomhlangano wobuKristu. Angathanda ukuyeka aphumule; kunalokho, uyaqhubeka esebenza, efuna izibonelo ezingokomBhalo nemifanekiso ezofinyelela izinhliziyo futhi ikhuthaze umhlambi. Ngobusuku bomhlangano, abazali ababili abatubekile kuleli bandla bangakujabulela ukuba sekhaya kusihlwa; kunalokho, balungisa izingane zabo ngesineke baye emhlanganweni. Ngemva komhlangano, iqembu lamaKristu lixoxa ngenkulumo yalomdala. Omunye udade kuthi akakhulume ngokuthi lomzalwane wake walimaza imizwa yakhe; kunalokho, ukhuluma ngentshiseko ngelinye lamaphuzu lomzalwane alivezile. Uyasibona yini isici esifanayo kuzo zonke lezi zimo?

² Leso sici ukwethembeka. Umdala usebenza ngokwethembeka ukuze akhonze umhlambi kaNkulunkulu; abazali baya emihlanganweni yebandla ngokwethembeka; udade usekela abadala ngokwethembeka. (Heberu 10:24, 25; 13:17; 1 Petru 5:2) Yebo, kuzo zonke izici zokuphila, sibona abantu bakaNkulunkulu bezimisele ukukhonza nenhlangano kaJehova ngokwethembeka.

3. Kungani kubaluleke kangaka ukuba sihlale sithembekile enhlanganweni kaJehova yasemhlabeni?

³ Uma uJehova ebuka phansi kulelizwe elonakele, kuncane kakhulu ukwethembeka akubonayo. (Mika 7:2) Yeka indlela okumelwe ukuba inhliziyo yakhe ijabula ngayo lapho ebuka ukwethembeka kwabantu bakhe! Yebo, ukwethembeka kwakho siqu kuyamjabulisa. Nokho, kuyamthukuthelisa uSathane, isihlubuki sokuqala, futhi kufakazela ukuthi ungumqambimanga. (IzAga 27:11; Johane 8:44) Kulindele ukuthi uSathane uyozama ukukwenza ungathembeki kuJehova nasenhlanganweni yaKhe yasemhlabeni. Ake sicabangele ezinye izindlela uSathane akwenza ngazo lokhu. Ngaleyo ndlela singase siyibone kangcono indlela esingahlala ngayo sithembekile kuze kube sekupheleni.—2 Korinte 2:11.

Ukugxila Ekungaphelelini Kungalimaza Ukwethembeka

4. (a) Kungani kulula ukuba nombono wokugxeka ngalabo abanegunya? (b) UKora waba kanjani ongathembekile enhlanganweni kaJehova?

⁴ Lapho umzalwane esesikhundleni somthwalo wemfanelo, amaphutha akhe angase abe sobala nakakhulu. Yeka indlela okulula ngayo ukubona ‘umucu wotshani osesweni lomfowethu sibe sishalazela umshayo okwelethu’! (Mathewu 7:1-5) Nokho, ukugxila emaphutheni kungabangela ukungathembeki. Ngokwesibonelo, cabangela umehluko phakathi kukaKora noDavide. UKora wayenomthwalo omkhulu, futhi cishe wayeseneminyaka eminingi ethembekile, kodwa waba nesifiso sokuvelela. Waqala ukucasulwa yigunya likaMose no-Aroni, abazala bakhe. Nakuba uMose ayengumuntu omnene kunabo bonke, ngokusobala uKora waqala ukumbheka ngeso eligxekayo. Kungenzeka wabona amaphutha kuMose. Nokho, lawo maphutha awazange enze ukungathembeki kukaKora enhlanganweni kaJehova kufaneleke. Wabhujiswa phakathi kwebandla.—Numeri 12:3; 16:11, 31-33.

5. Kungani uDavide ayengase azizwe elingeka ukuba avukele uSawule?

⁵ Ngakolunye uhlangothi, uDavide wayekhonza ngaphansi kweNkosi uSawule. Nakuba ayeke waba yinkosi enhle, empeleni uSawule wayesemubi. UDavide wayedinga ukholo, ukukhuthazela, ngisho nokukhalipha okuthile ukuze asinde ekuhlaseleni kukaSawule onomhawu. Nokho, lapho uDavide enethuba lokuziphindiselela, wathi “uJehova makenqabe” ukuba enze isenzo sokungathembeki kumuntu owayegcotshwe nguJehova.—1 Samuweli 26:11.

6. Yini okungamelwe siyenze yize sibona ubuthakathaka namaphutha kubadala?

⁶ Lapho abathile abaholayo phakathi kwethu bebonakala bephazama ekwahluleleni, bekhuluma ngamazwi anokhahlo, noma bebonakala bekhetha abantu, ingabe siyokhononda ngabo, mhlawumbe sibe nengxenye ekubangeleni umoya wokugxeka ebandleni? Ingabe siyoduba imihlangano yobuKristu ukuze sibonise ukungavumelani nabo? Ngokuqinisekile ngeke! NjengoDavide, asisoze savumela amaphutha omunye asishukumisele ukuba singathembeki kuJehova nenhlangano yakhe!—IHubo 119:165.

7. Yimiphi eminye yemikhuba eyonakele eyavela ngokuphathelene nethempeli laseJerusalema, futhi uJesu wazizwa kanjani ngalokhu?

⁷ Umuntu oyisibonelo sokwethembeka esikhulu kunazo zonke kwakunguJesu Kristu, ochazwa ngokwesiprofetho ngokuthi “othembekileyo” kaJehova. (IHubo 16:10, NW) Kumelwe ukuba ukusetshenziswa ngenkohlakalo kwethempeli laseJerusalema kwenza ukwethembeka kwaba yinselele. UJesu wayazi ukuthi umsebenzi wompristi ophakeme nemihlatshelo kwakufanekisela inkonzo nokufa kwakhe siqu okuwumhlatshelo, futhi wayazi ukuthi kwakubaluleke kangakanani ukuba abantu bafunde kukho. Ngakho wagcwala intukuthelo efanelekile lapho ebona ukuthi ithempeli lase ‘liwumhume wabaphangi.’ Enegunya ayelinikwe uNkulunkulu, kabili wathatha izinyathelo zokulihlanza.a—Mathewu 21:12, 13; Johane 2:15-17.

8. (a) UJesu wakubonisa kanjani ukwethembeka elungiselelweni lethempeli? (b) Singabonisa kanjani ukuthi siyakwazisa ukukhulekela uJehova enhlanganweni yakhe ehlanzekile?

⁸ Noma kunjalo, uJesu wayelisekela ngokwethembeka ilungiselelo lethempeli. Kusukela eseyingane, wayeya emikhosini ethempelini futhi evame ukufundisela khona. Wakhokha ngisho nentela yethempeli—nakuba ayengabophekile ngempela ukuyikhokha. (Mathewu 17:24-27) UJesu wancoma umfelokazi ompofu ngokufaka “okokuziphilisa kwakhe konke” ebhokisini lomcebo lethempeli. Ngokushesha ngemva kwalokho, uJehova walilahla phakade lelo thempeli. Kodwa ngaphambi kwaleso sikhathi, uJesu wayethembekile kulo. (Marku 12:41-44; Mathewu 23:38) Inhlangano kaNkulunkulu yasemhlabeni namuhla isidlula kude isimiso samaJuda nethempeli laso. Kuyavunywa, ayiphelele; yingakho ngezinye izikhathi kwenziwa ukulungisa. Kodwa futhi ayigcwele ukukhohlakala, futhi ayizulelwa amanqe okugudluzwa nguJehova uNkulunkulu. Masingalokothi sivumele noma yikuphi esikubona kuwukungapheleli kuyo kusidangalise noma kusishukumisele ukuba sibe nomoya wokugxeka nophambene. Kunalokho, masilingise ukwethembeka kukaJesu Kristu.—1 Petru 2:21.

Ukungapheleli Kwethu Siqu

9, 10. (a) Isimiso sezinto sikaSathane sikusebenzisa kanjani ukungapheleli kwethu ukuze sisinxenxele ekuziphatheni kokungathembeki? (b) Kufanele enzeni umuntu oye wenza isono esibi?

⁹ USathane uzama ukukhuthaza ukungathembeki nangokusebenzisa ukungapheleli kwethu. Isimiso sakhe sezinto sisizakala ngobuthakathaka bethu, sisilingele ukuba senze okungalungile emehlweni kaJehova. Ngokudabukisayo, minyaka yonke izinkulungwane zivumela ukunqotshwa ukuziphatha okubi. Abanye bayanezela kulokhu kungathembeki ngokuphila ukuphila okumbaxa-mbili, beqhubeka nenkambo yokona bebe benza sengathi basalokhu bengamaKristu akholekile. Esabela ezihlokweni ezimayelana nalendaba, zochungechunge oluthi, “Intsha Iyabuza . . .” lukamagazini i-Phaphama!, omunye wesifazane osemusha wabhala: “Lezi zihloko zazichaza ukuphila kwami.” Ngasese, wayehlakulele ubuhlobo nentsha engamthandi uJehova. Waba yini umphumela? Uyabhala: “Izinga lokuphila kwami lawohloka, futhi ngahileleka ekuziphatheni okubi kwadingeka ngisolwe. Ubuhlobo bami noJehova balimala, futhi ngalahlekelwa ukwethenjwa abazali bami nabadala.”b

¹⁰ Lentokazi yathola usizo kubadala futhi yabuyela ekukhonzeni uJehova ngokwethembeka. Nokho, kuyadabukisa ukuthi abaningi babhekana nemiphumela emibi kakhulu, futhi abanye ababe besabuyela esibayeni. Yeka ukuthi kungcono kanjani ukwethembeka futhi umelane nokulingwa kulelizwe elibi! Lalela izixwayiso zomagazini INqabayokulinda ne-Phaphama! mayelana nezinto ezinjengokuzihlanganisa nezwe nokuzijabulisa okonakalisayo. Kwangathi ungelokothe uwele ekuziphatheni kokungathembeki. Kodwa uma uwela kukho, ungazenzi into ongeyona. (IHubo 26:4) Kunalokho, thola usizo. Abazali nabadala abangamaKristu bakhona ngaleyo njongo.—Jakobe 5:14.

11. Kungani kungaba okungalungile ukuzibheka njengababi ngendlela engathembisi, futhi isiphi isibonelo seBhayibheli esingasisiza ukuba silungise umbono wethu?

¹¹ Ukungapheleli kwethu kungase kusibeke engozini nangenye indlela. Abanye abenza isenzo sokungathembeki bayayeka ukuzama ukujabulisa uJehova. Khumbula, uDavide wenza izono ezimbi kakhulu. Nokho, uJehova wamkhumbula njengenceku ekholekile, sekukudala uDavide afa. (Heberu 11:32; 12:1) Ngani? Ngoba akazange ayeke ukuzama ukujabulisa uJehova. IzAga 24:16 zithi: “Olungileyo angawa kasikhombisa, abesebuye avuke.” Ngokuqinisekile, uma siwela ezonweni ezingatheni—yebo ngokuphindaphindiwe—ngenxa yobuthakathaka obuthile esilwa nabo, sisengaba abalungile emehlweni kaJehova uma siqhubeka ‘sivuka’—okungukuthi, siphenduka ngobuqotho futhi siphinde siqale inkambo yenkonzo yokwethembeka.—Qhathanisa neyesi-2 Korinte 2:7.

Qaphela Izinhlobo Ezicashile Zokungathembeki!

12. KubaFarisi, umbono ongaboneleli, wokuthanda imithetho waholela kanjani ekungathembekini?

¹² Kukhona nokungathembeki okucashile. Kungase kuzishaye sakwethembeka imbala! Ngokwesibonelo, cishe abaFarisi bosuku lukaJesu babecabanga ukuthi bathembeke ngokuphawulekayo.c Kodwa bahluleka ukubona umehluko phakathi kokwethembeka nokuba umuntu onamathela ngokungaguquki emithethweni emiswe ngabantu, ngoba babengaboneleli futhi bahlulela ngokhahlo. (Qhathanisa nomShumayeli 7:16.) Kulokhu, empeleni babengathembekile—kubantu okwakufanele ngabe bayabakhonza, emongweni woMthetho ababethi bayawufundisa, nakuJehova ngokwakhe. Ngokuphambene, uJesu wayethembeke emongweni woMthetho, owawusekelwe othandweni. Ngakho wabakha futhi wabakhuthaza abantu, njengoba nje iziprofetho zobuMesiya zazibikezele.—Isaya 42:3; 50:4; 61:1, 2.

13. (a) Abazali abangamaKristu bangaba kanjani abangathembekile? (b) Kungani abazali kufanele bagweme ukuba nokhahlo ngokweqile, ukugxeka, noma ukuba nesimo sokufuna amaphutha lapho beyala izingane zabo?

¹³ AmaKristu anesilinganiso esithile segunya azuza kakhulu esibonelweni sikaJesu esiphathelene nalokhu. Ngokwesibonelo, abazali abathembekile bayazi ukuthi kumelwe bayale izingane zabo. (IzAga 13:24) Nokho bayaqikelela ukuthi abazithukuthelisi izingane zabo ngesiyalo esinokhahlo esinikezwa ngolaka noma ngokuzigxeka okungapheli. Izingane ezinomuzwa wokuthi azisoze zakwazi ukujabulisa abazali bazo noma ezinomuzwa wokuthi inkolo yabazali bazo ivele ibenze bazibone zinamaphutha noma bazigxeke, zingase zidangale, futhi ngenxa yalokho, zigcine ziqhelelene nenkolo yeqiniso.—Kolose 3:21.

14. Abelusi abangamaKristu bangaba kanjani abathembekile emhlanjini abawukhonzayo?

¹⁴ Ngokufanayo, abadala abangamaKristu nababonisi abajikelezayo banakekela izinkinga nezingozi umhlambi obhekana nazo. Njengabelusi abathembekile, banikeza iseluleko lapho sidingeka, beqikelela ukuthi banawo wonke amaqiniso kuqala bese ngokucophelela besekela abakushoyo eBhayibhelini nasezincwadini zeNhlangano. (IHubo 119:105; IzAga 18:13) Bayazi futhi ukuthi izimvu zithembele kubo ngokwakhiwa nokondliwa okungokomoya. Ngakho bafuna ukulingisa uJesu Kristu, uMalusi Omuhle. Bakhonza izimvu ngokwethembeka isonto ngalinye emihlanganweni yobuKristu—bengazinikizi, kodwa kunalokho bezakha futhi beqinisa ukholo lwazo.—Mathewu 20:28; Efesu 4:11, 12; Heberu 13:20, 21.

15. Abathile ekhulwini lokuqala babonisa kanjani ukuthi ukuthembeka kwabo kwakudukile?

¹⁵ Olunye uhlobo olucashile lokungathembeki luwukwethembeka okudukile. Ngokomqondo weBhayibheli ukwethembeka kweqiniso akusivumeli ukuba sizibophe kunoma yini ukudlula ukwethembeka kwethu kuJehova uNkulunkulu. AmaJuda amaningi ekhulwini lokuqala anamathela ngokuphikelelayo eMthethweni kaMose nasesimisweni sezinto sobuJuda. Nokho, sase sifikile isikhathi sikaJehova sokuba agudluze isibusiso sakhe kuleso sizwe esivukelayo, asinikeze isizwe sika-Israyeli ongokomoya. Aba mbalwa kuphela, uma kuqhathaniswa, athembeka kuJehova futhi azivumelanisa nalolu shintsho olukhulu. Ngisho naphakathi kwamaKristu eqiniso, abathile ababeshisekela amasiko obuJuda baphikelela ekubuyeleni kulezo ‘zinto zokucathula ezibuthakathaka neziwubala’ zoMthetho kaMose, owawusugcwalisekile kuKristu.—Galathiya 4:9; 5:6-12; Filipi 3:2, 3.

16. Izinceku zikaJehova ezithembekile zisabela kanjani ekulungiseni?

¹⁶ Ngokuphambene, abantu bakaJehova ezikhathini zanamuhla baye bazibonakalisa bethembekile phakathi nezikhathi zezinguquko. Njengoba ukukhanya kweqiniso elambuliwe kuya kukhanya, kwenziwa ukulungisa. (IzAga 4:18) Muva nje, “isigqila esikholekile nesiqondayo” siye sasisiza ukuba silungise ukuqonda kwethu igama elithi “isizukulwane” elisetshenziswe kuMathewu 24:34 nesikhathi sokwahlulelwa ‘kwezimvu nezimbuzi’ okukhulunywe ngakho kuMathewu 25:31-46, kanye nombono wethu ngezinhlobo ezithile zenkonzo yokusebenzela uhulumeni. (Mathewu 24:45) Akungabazeki ukuthi izihlubuki ezithile beziyojabula ukube oFakazi BakaJehova abaningi bebenamathele ngokuqinile ekuqondweni okudlule kwalezi zindaba futhi benqaba ukuthuthuka. Ayizange yenzeke into enjalo. Ngani? Abantu bakaJehova bathembekile.

17. Esibathandayo bangakuvivinya kanjani ukwethembeka kwethu ngezinye izikhathi?

¹⁷ Nokho, indaba yokwethembeka okudukile ingase isithinte ngokomuntu siqu. Lapho umngane esimthandayo noma ngisho ilungu lomkhaya likhetha inkambo ephula izimiso zeBhayibheli, singase sibe nomuzwa wokuthi ukwethembeka kwethu kuhlukana kabili. Ngokwemvelo, sizizwa simelwe ukwethembeka emalungwini omkhaya. Kodwa akufanele neze isibopho esinaso kuwo sisenze sidlule ukwethembeka kwethu kuJehova! (Qhathanisa no-1 Samuweli 23:16-18.) Ngeke sisize abenzi bokubi ukuba bafihle isono esibi, futhi ngeke sivumelane nabo ekumelaneni nabadala abazama ‘ukubalungisa ngomoya wobumnene.’ (Galathiya 6:1) Ukwenza kanjalo kungaba ukungathembeki kuJehova, inhlangano yakhe, nakulowo esimthandayo. Ukuvimbela isoni ekutholeni isiyalo esisidingayo, empeleni kuwukuvimba ukubonakaliswa kothando lukaJehova ukuba kungafinyeleli kuso. (Heberu 12:5-7) Khumbula futhi ukuthi “amanxeba othandayo athembekile.” (IzAga 27:6) Iseluleko sothando esingagwegwesi, esisekelwe eZwini likaNkulunkulu singase simehlise umuntu owonile esimthandayo, kodwa singase sikusindise ukuphila ekugcineni!

Ukwethembeka Kumelana Noshushiso

18, 19. (a) U-Ahabi wayefunani kaNaboti, futhi kungani uNaboti enqaba? (b) Ingabe ukwethembeka kukaNaboti kwakuwufanele umphumela? Chaza.

¹⁸ Ngezinye izikhathi uSathane ukuhlasela ngokuqondile ukwethembeka kwethu. Cabangela indaba kaNaboti. Lapho iNkosi u-Ahabi imcindezela ukuba athengise isivini sakhe, waphendula: “Makube-kude nami ngenxa kaJehova ukuba ngikunike ifa lawobaba.” (1 AmaKhosi 21:3) UNaboti wayengabonisi inkani; wayebonisa ukwethembeka. UMthetho kaMose wayala ukuba umIsrayeli angathengisi ifa eliwumhlaba phakade. (Levitikusi 25:23-28) Ngokuqinisekile uNaboti wayazi ukuthi lenkosi enonya yayingambulala, ngoba kakade u-Ahabi wayeseyeke umkakhe, uJezebeli, wabulala abaprofethi bakaJehova abaningi! Noma kunjalo uNaboti wama eqinile.—1 AmaKhosi 18:4.

¹⁹ Ngezinye izikhathi ukwethembeka kusho ukulahlekelwa. Ngosizo ‘lwabantu ababi,’ uJezebeli wahlela ukuba uNaboti asulelwe ngecala angalenzanga. Ngenxa yalokho, wabulawa kanye namadodana akhe. (1 AmaKhosi 21:7-16; 2 AmaKhosi 9:26) Ingabe lokho kusho ukuthi ukwethembeka kukaNaboti kwakuyiphutha? Cha! UNaboti uphakathi kwamadoda nabesifazane abaningi abathembekile “abaphilayo” enkumbulweni kaJehova njengamanje, abalele ngokuphepha ethuneni kuze kube isikhathi sovuko.—Luka 20:38; IzEnzo 24:15.

20. Ithemba lingasisiza kanjani ukuba silondoloze ukwethembeka kwethu?

²⁰ Lesi sithembiso esifanayo siqinisekisa abathembekile bakaJehova namuhla. Siyazi ukuthi ukwethembeka kwethu kungasilahlekisela kakhulu kulelizwe. UJesu Kristu wakukhokhela ngokuphila kwakhe ukwethembeka kwakhe, futhi watshela abalandeli bakhe ukuthi babeyophathwa ngendlela efanayo. (Johane 15:20) Njengoba ithemba lakhe ngekusasa lamsekela, nathi liyasisekela elethu. (Heberu 12:2) Ngakho singahlala sithembekile nalapho sibhekene nazo zonke izinhlobo zokushushiswa.

21. Yiziphi iziqinisekiso uJehova azinikeza abathembekile bakhe?

²¹ Yiqiniso, bambalwa kithi namuhla, uma kuqhathaniswa, ababhekana nokuhlaselwa kokwethembeka kwabo ngokuqondile ngalendlela. Kodwa kungenzeka abantu bakaNkulunkulu babhekane nokushushiswa okwengeziwe ngaphambi kokuba kufike ukuphela. Singaqikelela kanjani ukuthi siyakulondoloza ukwethembeka kwethu? Ngokugcina ukwethembeka kwethu manje. UJehova usinike umsebenzi omkhulu—ukushumayela nokufundisa ngoMbuso wakhe. Masiqhubeke ngokwethembeka nalomsebenzi obalulekile. (1 Korinte 15:58) Uma senqaba ukuvumela ukungapheleli kobuntu kuqede ukwethembeka kwethu enhlanganweni kaJehova futhi uma siqaphela izinhlobo ezicashile zokungathembeki ezinjengokwethembeka okudukile, khona-ke siyokulungela kangcono ukubhekana nokuvivinywa okunzima kokwethembeka kwethu uma kwenzeka. Kunoma yikuphi, singaqiniseka njalo ukuthi uJehova uthembeke ngokuqotho ezincekwini zakhe ezithembekile. (2 Samuweli 22:26) Yebo, uyobaqapha abathembekile bakhe!—IHubo 97:10, NW.

[Imibhalo yaphansi]

Ungaphendula Kanjani?

◻ Singakugwema kanjani ukuvumela ukungapheleli kwabanye kusiholele ekubeni singathembeki?

◻ Ukungapheleli kwethu siqu kungasiholela ngaziphi izindlela ekuziphatheni kokungathembeki?

◻ Singamelana kanjani nokuthambekela kokwethembeka okudukile?

◻ Yini eyosisiza sigcine ukwethembeka kwethu ngisho nasezikhathini zokushushiswa?

[Ibhokisi ekhasini 9]

Ukukhonza Ngokwethembeka EBethel

“Zonke izinto mazenzeke ngokufaneleyo nangohlelo.” Wabhala kanjalo umphostoli uPawulu. (1 Korinte 14:40) UPawulu wayazi ukuthi ukuze ibandla lisebenze, kwakuyoba nesidingo ‘sohlelo,’ noma ukuhleleka. Ngokufanayo namuhla, abadala kudingeka benze izinqumo ezindabeni eziwusizo ebandleni, njengokwabela amalungu ebandla ezindaweni ezihlukahlukene zesifundo sencwadi, ukuhlela imihlangano yenkonzo yasensimini, nokuhlola ukuhlanganiswa kwensimu. Amalungiselelo anjalo angase avivinye ukwethembeka ngezinye izikhathi. Awayona imiyalo ephefumulelwe ngokwaphezulu, futhi ngeke anelise wonke umuntu.

Ingabe ngezinye izikhathi ukuthola kuyinselele ukwethembeka kwamanye amalungiselelo awusizo enziwa ebandleni lobuKristu? Uma kunjalo, ungase usithole siwusizo isibonelo seBethel. Wonke amagatsha angu-104 e-Watch Tower Society, kuhlanganise nendlunkulu ese-United States, abizwa ngegama elithi Bethel, igama lesiHeberu elisho ukuthi “iNdlu kaNkulunkulu.”d Izisebenzi zokuzithandela ezihlala futhi zisebenze ezakhiweni zaseBethel zifuna ukuba lezi zindawo zibonise inhlonipho nokwesaba uJehova. Lokhu kudinga ukwethembeka kwesinye nesinye sazo.

Izivakashi zaseBethel zivame ukuphawula ngokuhleleka nokuhlanzeka ezikubona khona. Izisebenzi zihlelekile futhi ziyajabula; inkulumo nemikhuba yazo yokuziphatha, ngisho nokubukeka kwazo kubonisa onembeza bamaKristu abavuthiwe, abaqeqeshwe yiBhayibheli. Wonke amalungu omkhaya waseBethel anamathela ngokwethembeka ezindinganisweni zeZwi likaNkulunkulu.

Ngaphezu kwalokho, iNdikimba Ebusayo iwanikeza incwajana enesihloko esithi Dwelling Together in Unity, eveza ngomusa amalungiselelo awusizo adingekayo ukuze umkhaya omkhulu kangaka usebenze kahle ndawonye. (IHubo 133:1) Ngokwesibonelo, ikhuluma ngezindawo zokulala, ukudla, inhlanzeko, ukugqoka nokuzilungisa, nezinto ezinjengalezo. Amalungu omkhaya waseBethel asekela futhi anamathele ngokwethembeka emalungiselelweni anjalo, ngisho nalapho wona ngokwawo ebengase akhethe okuhlukile. Lencwajana awayibheki njengomqulu wemithetho engacabangeli, kodwa ayibheka njengohlu lweziqondiso eziwusizo eziklanyelwe ukukhuthaza ubunye nokuvumelana. Ababonisi bathembekile ekusekeleni lezi zinqubo ezisekelwe eBhayibhelini, futhi bazisebenzisa ngendlela eyakhayo ukuze bakhe futhi bakhuthaze umkhaya waseBethel ukuba uphishekele inkonzo yawo engcwele yaseBethel.

[Umbhalo waphansi]

[Ibhokisi ekhasini 10]

Umuntu Wokwethembeka Nomuntu Wemithetho

Emuva ngo-1916 i-Encyclopædia of Religion and Ethics yaphawula ukuthi “lomehluko phakathi komuntu wokwethembeka nomuntu wemithetho ungatholakala ngazo zonke izikhathi nakuzo zonke izindawo.” Yachaza: “Kunomuntu wemithetho owenza akutshelwayo, angephuli mithetho; uyathembeka ezwini elilotshiwe. Kunomuntu wokwethembeka okwenzayo lokhu kodwa . . . ongathenjelwa nakokwengeziwe, obeka yonke ingqondo yakhe emsebenzini wakhe, ovumelanisa umoya wakhe nomoya wenjongo okumelwe ifezwe.” Kamuva, lencwadi efanayo yaphawula: “Ukwethembeka kusho okungaphezulu kakhulu kokugcina umthetho. . . . Umuntu othembekile uhlukile kumuntu ogcina umthetho njengoba engumuntu okhonza ngenhliziyo nengqondo ephelele . . . Akazivumeli ukuba enze noma iziphi izono zangamabomu ngokwenza okuthile, ngokungakwenzi, noma ngokungazi.”