Ukulindela ‘Ngokulangazela’

“Ukulangazela kwendalo kulindele ukwambulwa kwamadodana kaNkulunkulu.”—ROMA 8:19.

1. Isimo samaKristu namuhla sifana ngani nesamaKristu ekhulu lokuqala?

ISIMO samaKristu eqiniso namuhla sifana nesamaKristu ekhulu lokuqala. Isiprofetho sasiza izinceku zikaJehova zangaleso sikhathi ukuba zibone ukuthi uMesiya kwakufanele abonakale nini. (Daniyeli 9:24-26) Sona leso siprofetho sabikezela ukubhujiswa kweJerusalema kodwa sasingenazici ezaziyokwenza amaKristu azi kusengaphambili ukuthi wawuyobhujiswa nini lowo muzi. (Daniyeli 9:26b, 27) Ngokufanayo, ngosizo lwaphezulu isiprofetho sabangela abafundi beBhayibheli abaqotho bekhulu le-19 ukuba balindele okuthile. Ngokuhlobanisa “izikhathi eziyisikhombisa” zikaDaniyeli 4:25 ‘nezikhathi zabezizwe,’ balindela ukuthi uKristu wayeyokwamukela amandla oMbuso ngo-1914. (Luka 21:24, IBhayibheli lesiZulu elivamile; Hezekeli 21:25-27) Nakuba incwadi kaDaniyeli ineziprofetho eziningi, asikho kuzo esenza abafundi beBhayibheli banamuhla bakwazi ukubala ngokuqondile ukuthi sonke isimiso sezinto sikaSathane siyobhujiswa nini. (Daniyeli 2:31-44; 8:23-25; 11:36, 44, 45) Nokho, lokhu kuzokwenzeka ngokushesha, ngoba siphila “esikhathini sokugcina.”—Daniyeli 12:4.a

Ukuqapha Phakathi Nokuba Khona KukaKristu

2, 3. (a) Yini ewubufakazi obuyinhloko bokuthi siphila phakathi nokuba kukaKristu emandleni obukhosi? (b) Yini ebonisa ukuthi amaKristu kwakufanele ahlale elindile phakathi nokuba khona kukaJesu Kristu?

² Yiqiniso, isiprofetho senza amaKristu aba sesimweni sokulindela okuthile ngaphambi kokuba uKristu anikwe amandla oMbuso ngo-1914. Kodwa “isibonakaliso” esanikezwa nguKristu sokuba khona kwakhe nesesiphelo sesimiso sezinto sasihlanganisa izenzakalo. Futhi eziningi zazo zaziyobonakala ngemva kokuqala kokuba khona kwakhe. Lezo zenzakalo—izimpi, ukuswelakala kokudla, ukuzamazama komhlaba, izifo eziwumshayabhuqe, ukungabi namthetho okwandile, ukushushiswa kwamaKristu, nokushunyayelwa kwezindaba ezinhle zoMbuso emhlabeni wonke—ziwubufakazi obuyinhloko bokuthi manje siphila phakathi nokuba khona kukaKristu emandleni obukhosi.—Mathewu 24:3-14; Luka 21:10, 11.

³ Nokho, umnyombo weseluleko sikaJesu sokuvalelisa wawuwukuthi: “Hlalani nibhekile, nihlale niphapheme, . . . hlalani nilindile.” (Marku 13:33, 37; Luka 21:36) Ukufunda ngokucophelela umongo walezi zikhuthazo zokulinda kuveza ukuthi uKristu wayengakhulumi ngokuyinhloko ngokulinda isibonakaliso sokuqala kokuba khona kwakhe. Kunalokho, wayeyala abafundi bakhe beqiniso ukuba bahlale belindile phakathi nokuba khona kwakhe. Yini amaKristu eqiniso okwakufanele ahlale eyilindele?

4. Isibonakaliso esanikezwa nguJesu sasiyofeza yiphi injongo?

⁴ UJesu wanikeza isiprofetho sakhe esikhulu lapho ephendula umbuzo othi: “Ziyokwenzeka nini lezizinto [izenzakalo eziholela ekubhujisweni kwesimiso sezinto samaJuda], futhi siyoba yini isibonakaliso sokuba khona kwakho nesesiphelo sesimiso sezinto?” (Mathewu 24:3) Isibonakaliso esabikezelwa sasingeke nje sibonise ukuba khona kukaKristu kodwa sasiyobonisa nezenzakalo ezaziyoholela ekupheleni kwalesi simiso sezinto esibi.

5. UJesu wabonisa kanjani ukuthi nakuba ekhona ngokomoya, wayeyobe ‘eseza’?

⁵ UJesu wabonisa ukuthi phakathi ‘nokuba khona’ kwakhe (ngesiGreki, pa·rou·siʹa) wayeyokuza enamandla nenkazimulo. Ngokuphathelene nalokho ‘kuza’ (okuboniswa izimo zegama lesiGreki elithi erʹkho·mai), wathi: “Khona-ke isibonakaliso seNdodana yomuntu siyobonakala ezulwini, khona-ke zonke izizwana zomhlaba ziyozishaya zilila, futhi ziyobona iNdodana yomuntu iza iphezu kwamafu ezulu inamandla nenkazimulo enkulu. . . . Manje fundani leliphuzu emkhiwaneni njengomfanekiso: Ngokushesha nje lapho igatsha lawo elisha lithamba futhi liveza amaqabunga, niyazi ukuthi ihlobo liseduze. Ngokufanayo nani, lapho nibona zonke lezizinto, yazini ukuthi [uKristu] [u]seduze, eminyango. . . . Ngakho-ke, hlalani nilindile ngoba anazi ukuthi iNkosi yenu iza ngaluphi usuku. . . . Zibonakaliseni nikulungele, ngoba iNdodana yomuntu iza ngehora eningacabangi ukuthi iyoza ngalo.”—Mathewu 24:30, 32, 33, 42, 44.

Kungani UJesu Kristu Eza?

6. Kuyokwenzeka kanjani ukubhujiswa ‘kweBabiloni Elikhulu’?

⁶ Nakuba ebelokhu ekhona njengeNkosi kusukela ngo-1914, uJesu Kristu kusamelwe ahlulele izimiso nabantu ngaphambi kokuba akhiphe isahlulelo kulabo athola ukuthi babi. (Qhathanisa neyesi-2 Korinte 5:10.) Ngokushesha uJehova uzokufaka ezingqondweni zababusi bezombangazwe ukubhubhisa “iBabiloni Elikhulu,” umbuso wezwe wenkolo yamanga. (IsAmbulo 17:4, 5, 16, 17) Umphostoli uPawulu walimisa ngesihloko elokuthi uJesu Kristu uyobhubhisa “umuntu ongenamthetho”—abefundisi abahlubukile beLobukholwa, ingxenye eyinhloko ‘yeBabiloni Elikhulu.’ UPawulu wabhala: “Ongenamthetho uyokwambulwa, iNkosi uJesu eyomqeda ngomoya womlomo wayo futhi imenze ize ngokubonakaliswa kokuba khona kwayo.”—2 Thesalonika 2:3, 8.

7. Lapho iNdodana yomuntu ifika enkazimulweni yayo, yisiphi isahlulelo eyosikhipha?

⁷ Esikhathini esiseduze esizayo, uKristu uzokwahlulela abantu bezizwe ngesisekelo sendlela abaye benza ngayo kubafowabo abasesemhlabeni. Siyafunda: “Lapho iNdodana yomuntu ifika enkazimulweni yayo, nazo zonke izingelosi kanye nayo, khona-ke iyohlala phansi esihlalweni sayo esikhazimulayo. Futhi zonke izizwe ziyobuthelwa phambi kwayo, futhi iyohlukanisa abantu omunye komunye, njengoba nje umalusi ehlukanisa izimvu ezimbuzini. Futhi iyobeka izimvu ngakwesokunene sayo, kodwa izimbuzi ngakwesobunxele sayo. . . . Inkosi . . . iyothi [ezimvwini], ‘Ngiqinisile ngithi kini, Ngezinga enikwenze ngalo komunye wabancane kunabo bonke lababafowethu, nikwenzile nakimi.’ . . . Futhi [abayizimbuzi] bayomuka baye ekunqunyweni okumi phakade, kodwa abalungileyo baye ekuphileni okumi phakade.”—Mathewu 25:31-46.

8. UPawulu ukuchaza kanjani ukuza kukaKristu ezokhipha isahlulelo kwabangamhloniphi uNkulunkulu?

⁸ Njengoba kuboniswe emfanekisweni wezimvu nezimbuzi, uJesu ukhipha isahlulelo sokugcina kubo bonke abangamhloniphi uNkulunkulu. UPawulu waqinisekisa amakholwa ayekanye nawo ayehlupheka ukuthi ayeyothola “impumuzo kanye nathi ekwambulweni kweNkosi uJesu ivela ezulwini ikanye nezingelosi zayo ezinamandla emlilweni ovutha amalangabi, njengoba iletha impindiselo phezu kwalabo abangamazi uNkulunkulu nakulabo abangazilaleli izindaba ezinhle ezimayelana neNkosi yethu uJesu. Bona kanye laba bayothola isijeziso sokwahlulelwa esiwukubhujiswa okumi phakade basuke phambi kweNkosi nasenkazimulweni yamandla ayo, ngesikhathi ifika izokhazinyuliswa mayelana nabangcwele bayo.” (2 Thesalonika 1:7-10) Njengoba sisabheke phambili kuzo zonke lezi zenzakalo ezithakazelisayo, akufanele yini sibonise ukholo futhi sihlale sikulinde ngokulangazela ukuza kukaKristu?

Ukulangazela Ukwambulwa KukaKristu

9, 10. Kungani abagcotshiwe abasesemhlabeni bekulindele ngokulangazela ukwambulwa kukaJesu Kristu?

⁹ ‘Ukwambulwa kweNkosi uJesu ivela ezulwini’ ngeke nje kube ngenjongo yokubhubhisa ababi kodwa kuyoba nangenjongo yokuvuza abalungileyo. Abaseleyo babafowabo bakaKristu abagcotshiwe abasesemhlabeni kusengenzeka bahlupheke ngaphambi kokwambulwa kukaKristu, kodwa bayajabula ngethemba labo elikhazimulayo lasezulwini. Umphostoli uPetru wabhalela amaKristu agcotshiwe: “Qhubekani nijabula njengoba nje ningabahlanganyeli ezinhluphekweni zikaKristu, ukuze nijabule futhi nichichime injabulo naphakathi nokwambulwa kwenkazimulo yakhe.”—1 Petru 4:13.

¹⁰ Abagcotshiwe bazimisele ukuhlala bethembekile kuze kube yilapho uKristu ‘ebabuthela ndawonye kuye’ ukuze “isimo esivivinyiwe” sokholo lwabo “sitholakale siyisizathu sendumiso nenkazimulo nokwazisa ekwambulweni kukaJesu Kristu.” (2 Thesalonika 2:1; 1 Petru 1:7) Ngokuphathelene nalawo maKristu athembekile azelwe ngomoya, kungathiwa: “Ubufakazi obumayelana noKristu benziwe baqina phakathi kwenu, kangangokuthi anisilele nakancane kunoma isiphi isipho, kuyilapho nilindele ngokulangazela ukwambulwa kweNkosi yethu uJesu Kristu.”—1 Korinte 1:6, 7.

11. Lapho esalinde ukwambulwa kukaJesu Kristu, yini amaKristu agcotshiwe abe eyenza?

¹¹ Insali egcotshiwe inemizwa efana nekaPawulu, owabhala: “Ngicabanga ukuthi izinhlupheko zenkathi yamanje azilutho uma ziqhathaniswa nenkazimulo ezokwambulwa kithi.” (Roma 8:18) Ukholo lwayo aludingi ukuphaswa ngokubala izikhathi. Izigcina imatasa enkonzweni kaJehova, ibanikeza isibonelo esihle abangane bayo, “ezinye izimvu.” (Johane 10:16) Laba abagcotshiwe bayazi ukuthi kuseduze ukuphela kwalesi simiso esibi, futhi balalela isikhuthazo sikaPetru: “Bhukulani izingqondo zenu ngenjongo yokusebenza, hlalani nisanguluke ngokuphelele; bekani ithemba lenu emseni ongafanelwe oyolethwa kini ekwambulweni kukaJesu Kristu.”—1 Petru 1:13.

“Ukulangazela Kwendalo”

12, 13. Indalo engabantu ‘yabekwa’ kanjani “ngaphansi kweze,” futhi yini ezinye izimvu eziyilangazelelayo?

¹² Ingabe ezinye izimvu nazo zinakho okuthile ezikulinde ngokulangazela? Ngokuqinisekile zinakho. Ngemva kokukhuluma ngethemba elikhazimulayo lalabo abamukelwa nguJehova ‘njengamadodana’ akhe azelwe ngomoya ‘nezindlalifa ezikanye noKristu’ eMbusweni wasezulwini, uPawulu wathi: “Ukulangazela kwendalo kulindele ukwambulwa kwamadodana kaNkulunkulu. Ngoba indalo yabekwa ngaphansi kobuze, hhayi ngentando yayo siqu kodwa ngalowo owayibeka ngaphansi kwabo, ngesisekelo sethemba lokuthi indalo ngokwayo nayo iyokhululwa ekugqilazweni ukonakala futhi ibe nenkululeko ekhazimulayo yabantwana bakaNkulunkulu.”—Roma 8:14-21; 2 Thimothewu 2:10-12.

¹³ Ngenxa yesono sika-Adamu, yonke inzalo yakhe “yabekwa ngaphansi kobuze,” yazalelwa ebugqilini besono nokufa. Ayizange ikwazi ukuzikhulula ebugqilini obunjalo. (IHubo 49:7; Roma 5:12, 21) Yeka indlela ezinye izimvu ezilangazelela ngayo ‘ukukhululwa ekugqilazweni ukonakala’! Kodwa ngaphambi kokuba kwenzeke lokho, kumelwe kwenzeke izinto ezithile ngokuvumelana nezikhathi nezinkathi zikaJehova.

14. Yini eyobe ihilelekile ‘ekwambulweni kwamadodana kaNkulunkulu,’ futhi lokhu kuyophumela kanjani ‘ekukhululweni’ kwesintu “ekugqilazweni ukonakala”?

¹⁴ Insali ‘yamadodana kaNkulunkulu’ agcotshiwe kumelwe ‘yambulwe’ kuqala. Kuyohilelani lokhu? Ngesikhathi sikaNkulunkulu esifanele, kuyoba sobala kwezinye izimvu ukuthi ekugcineni abagcotshiwe baye ‘babekwa uphawu’ futhi bakhazinyuliswa ukuze babuse noKristu. (IsAmbulo 7:2-4) “Amadodana kaNkulunkulu” avusiwe ‘ayokwambulwa’ futhi lapho ehlanganyela noKristu ekubhubhiseni isimiso sezinto esibi sikaSathane. (IsAmbulo 2:26, 27; 19:14, 15) Khona-ke, phakathi nokuBusa KukaKristu Kweminyaka Eyinkulungwane, ‘ayokwambulwa’ ngokwengeziwe njengabapristi abayimizila yokwabela “indalo” engabantu izinzuzo zomhlatshelo kaJesu wesihlengo. Lokhu kuyophumela ‘ekukhululweni’ kwesintu “ekugqilazweni ukonakala” futhi ekugcineni ‘singene enkululekweni ekhazimulayo yabantwana bakaNkulunkulu.’ (Roma 8:21; IsAmbulo 20:5; 22:1, 2) Njengoba ezinye izimvu zinalawa mathemba amahle, ingabe kukhona okumangazayo ngokuthi ‘zilindele ukwambulwa kwamadodana kaNkulunkulu ngokulangazela’?—Roma 8:19.

Ukubekezela KukaJehova Kusho Insindiso

15. Yini okungamelwe nanini siyikhohlwe ngokuphathelene nokumisa kukaJehova izikhathi zezenzakalo?

¹⁵ UJehova unguMgcini-sikhathi Omkhulu. Uhlelo lwakhe lwezikhathi zezenzakalo luyobonakala ukuthi luphelele. Izinto zingase zingabonakali ngaso sonke isikhathi zenzeka ngendlela thina ebesiyilindele. Nokho, singaba nokholo olugcwele lokuthi zonke izithembiso zikaNkulunkulu ziyogcwaliseka. (Joshuwa 23:14) Kungenzeka ukuthi uvumela izinto ziqhubeke isikhathi eside kunalokho abaningi abebekulindele. Kodwa masifune ukuqonda izindlela zakhe futhi situse ukuhlakanipha kwakhe. UPawulu wabhala: “O ukujula kwengcebo nokuhlakanipha nolwazi lukaNkulunkulu! Yeka ukuthi zingezingaphenyeki kanjani izahlulelo zakhe nokuthi zingezingenakuthungathwa kanjani izindlela zakhe! Ngoba ‘ubani osewazi umqondo kaJehova, noma ubani oye waba umeluleki wakhe?’”—Roma 11:33, 34.

16. Obani abasethubeni lokuzuza ekubekezeleni kukaJehova?

¹⁶ UPetru wabhala: “Bathandekayo, njengoba nilindele lezizinto [ukubhujiswa ‘kwamazulu’ ‘nomhlaba’ okudala nokuthathwa kwendawo yako “amazulu amasha” “nomhlaba omusha” okuthenjiswe nguNkulunkulu], yenzani konke okusemandleni enu ukuba ekugcineni anithole ningenabala, ningenasici futhi nisekuthuleni. Ngaphezu kwalokho, bhekani ukubekezela kweNkosi yethu njengensindiso.” Ngenxa yokubekezela kukaJehova, izigidi ezengeziwe zinikwa ithuba lokusindiswa ‘osukwini lukaJehova,’ oluyofika kungalindelekile “njengesela.” (2 Petru 3:9-15) Ukubekezela kwakhe kuvumela futhi ukuba ngamunye wethu ‘aqhubeke ekhandlekela ukusindiswa kwakhe siqu ngokwesaba nangokuthuthumela.’ (Filipi 2:12) UJesu wathi kumelwe ‘sizinake’ futhi ‘sihlale siphapheme’ uma sifuna ukwamukelwa futhi siphumelele “ekumeni phambi kweNdodana yomuntu” lapho ifika izokwahlulela.—Luka 21:34-36; Mathewu 25:31-33.

Qhubekani Nilinde Ngokukhuthazela

17. Yimaphi amazwi omphostoli uPawulu okufanele siwalalele?

¹⁷ UPawulu wanxusa abafowabo abangokomoya ukuba bagcine amehlo abo “esezintweni ezingabonwayo, hhayi ezintweni ezibonwayo.” (2 Korinte 4:16-18) Wayengafuni lutho ukuba lufiphaze umbono wabo womvuzo wasezulwini obekwe phambi kwabo. Kungakhathaliseki ukuthi singamaKristu agcotshiwe noma singabezinye izimvu, masikhumbule ithemba elimangalisayo elibekwe phambi kwethu futhi singayeki. ‘Masiqhubekeni silinde ngokukhuthazela,’ sibonakalise ukuthi “asilona uhlobo oluhlehlela emuva ekubhujisweni, kodwa siwuhlobo olunokholo kube ukulondolozwa komphefumulo uphila.”—Roma 8:25; Heberu 10:39.

18. Kungani izikhathi nezinkathi singazishiyela ezandleni zikaJehova ngokuqiniseka?

¹⁸ Izikhathi nezinkathi singazishiyela ezandleni zikaJehova ngokuqiniseka. Ukugcwaliseka kwezithembiso zakhe ‘akuyikwephuza’ ngokohlelo lwakhe lwezikhathi. (Habakuki 2:3) Okwamanje, isikhuthazo uPawulu asinika uThimothewu sisho okukhulu ngokwengeziwe kithi. Wathi: “Ngiyakuyala nokukuyala phambi kukaNkulunkulu noKristu Jesu, omiselwe ukwahlulela abaphilayo nabafileyo, nangokubonakaliswa kwakhe nombuso wakhe, shumayela izwi, ube kulo unomuzwa wokuphuthuma ngenkathi evumayo, ngenkathi enzima . . . Wenze umsebenzi womvangeli, uyifeze ngokugcwele inkonzo yakho.”—2 Thimothewu 4:1-5.

19. Kuseyisikhathi sokuba abantu bakaJehova benzeni, futhi ngani?

¹⁹ Ukuphila kusengozini—okwethu nokomakhelwane bethu. UPawulu wabhala: “Zinake njalo wena nokufundisa kwakho. Hlala kulezizinto, ngoba ngokwenza lokhu uyosindisa kokubili wena nabakulalelayo.” (1 Thimothewu 4:16) Isikhathi salesi simiso sezinto esibi sifushane kakhulu. Njengoba silinde ngokulangazela izenzakalo ezithakazelisayo ezisihlalele, masiqaphele njalo ukuthi kuseyisikhathi nenkathi kaJehova yokuba abantu bakhe bashumayele izindaba ezinhle zoMbuso. Lowo msebenzi kumelwe ufezwe ngezinga elimanelisayo. “Khona-ke,” njengoba uJesu asho, “ukuphela kuyofika.”—Mathewu 24:14.

[Umbhalo waphansi]

Ukubukeza

◻ Ngokuqondene nokubala izikhathi, isimo sethu sifana kanjani nesamaKristu ekhulu lokuqala?

◻ Kungani amaKristu kumelwe ‘ahlale elindile,’ ngisho naphakathi kwenkathi yokuba khona kukaKristu?

◻ Kungani indalo engabantu ikulindele ngokulangazela “ukwambulwa kwamadodana kaNkulunkulu”?

◻ Kungani izikhathi nezinkathi singazishiyela ezandleni zikaJehova ngokuqiniseka?

[Isithombe ekhasini 17]

AmaKristu kumelwe ahlale ephapheme elinde ukuza kukaKristu

[Isithombe ekhasini 18]

Insali egcotshiwe ihlala imatasa enkonzweni kaJehova, ingasekele ukholo lwayo ekubaleni izikhathi