Wasiza Ekusakazeni Ukukhanya “Kuze Kube Semkhawulweni Womhlaba”
UMPHOSTOLI UPAWULU wasetshenziswa ekusakazeni ukukhanya okungokomoya “kuze kube semkhawulweni womhlaba.” Ngenxa yalokho, abaningi “ababethambekele ngokufanele ekuphileni okumi phakade baba amakholwa.”—IzEnzo 13:47, 48; Isaya 49:6.
Isifiso esijulile sokusakaza ukukhanya okungokomoya besibonakala nasekuphileni kokuzinikela kanye nasemizamweni ephikelelayo yomKristu onguWilliam Lloyd Barry, ilungu leNdikimba Ebusayo YoFakazi BakaJehova. UMfoweth’ uBarry ushone ngo-July 2, 1999, ekhonza ngokuqondile umhlangano wesigodi eHawaii.
ULloyd Barry wazalelwa eNew Zealand ngo-December 20, 1916. Ngaphambili, unina noyise babeye baba nesithakazelo esinamandla emaqinisweni eBhayibheli ayesezincwadini zikaC. T. Russell, ezazisakazwa yi-Watch Tower Bible and Tract Society. Ngakho, uMfoweth’ uBarry wakhulela emkhayeni wamaKristu azinikele.
Nakuba ayenesithakazelo kwezemidlalo nasemfundweni, waze wathola neziqu zesayensi, uMfoweth’ uBarry wahlala njalo egxile kakhulu ezintweni ezingokomoya. Ngakho, ngo-January 1, 1939, wangenela inkonzo yesikhathi esigcwele, waba yilungu lomkhaya waseBethel ehhovisi leNhlangano e-Australia. Ngemva kokuba uhulumeni uvimbele iNhlangano ngo-1941, uMfoweth’ uBarry waqhubeka ematasa emsebenzini wakuleli hhovisi, ngezinye izikhathi abelwa ukuba abhale ukwaziswa kokukhuthaza akholwa nabo. Wayehola ngendlela eyisibonelo nasenkonzweni yasobala.
Ngo-February 1942, uMfoweth’ uBarry washada nesinye isikhonzi sesikhathi esigcwele. Umkakhe onothando, uMelba, uye wasebenza kanye naye ngokwethembeka yonke le minyaka ezingxenyeni eziningi zomhlaba. Bathatha igxathu elikhulu lokukhonza emasimini akwamanye amazwe ngokuya ekilasini le-11 leWatchtower Bible School of Gilead e-United States. Babelwa kulokho abaningi abangakubheka ‘njengomkhawulo womhlaba’—iJapane. Ngemva kokufika khona ngo-November 1949, baqala ukukhonza njengezithunywa zevangeli edolobheni eliyichweba, laseKobe. Ngaleso sikhathi, kwakunabantu abangu-12 kuphela ababeshumayela izindaba ezinhle eJapane. UMfoweth’ uBarry wafunda ulimi nemikhuba yasekhaya lakhe elisha futhi wabathanda kakhulu abantu baseJapane, akhonza kanye nabo iminyaka engu-25 eyalandela. Uthando lwakhe ngalabo “ababethambekele ngokufanele ekuphileni okumi phakade” lwalusobala kubazalwane abangamaKristu ababanda eJapane, lwamsiza ukuba aphumelele ekwengameleni igatsha lakhona amashumi eminyaka.
Phakathi no-1975, lapho kwakunoFakazi abangaba ngu-30 000 eJapane, abakwaBarry bathunyelwa eBrooklyn, eNew York. NjengomKristu ogcotshwe ngomoya, uMfoweth’ uBarry wayemenywe ukuba ayokhonza njengelungu leNdikimba Ebusayo YoFakazi BakaJehova. (Roma 8:16, 17) Ulwazi lwakhe lokubhala lwaba usizo olukhulu endimeni yakhe entsha eMnyangweni Wokubhala. Okuningi ayekufunde egatsheni nasemhlabeni wonke kwamenza waba usizo olukhulu njengelungu leKomiti Yokunyathelisa yeNdikimba Ebusayo.
UMfoweth’ uBarry waqhubeka eyithanda iMpumalanga nabantu bakhona kuyo yonke iminyaka edlule. Abafundi baseSikoleni SaseGileyadi kanye namalungu omkhaya waseBethel babazi ukuthi nakanjani ezinkulumweni zakhe nasekukhulumeleni kwakhe wayezolandisa ngezindaba ezijabulisayo eziphathelene nabaningi ababekhonza emsebenzini wezithunywa zevangeli. Umsebenzi wokushumayela ngoMbuso “emkhawulweni womhlaba” wawuwubona ngokucacile ngempela lapho uMfoweth’ uBarry elandisa ngentshiseko okuhlangenwe nakho kwakhe uqobo. Okunye kwakho kuyatholakala endabeni yokuphila kwakhe ekuyi-Nqabayokulinda ka-September 15, 1960.
Siyaqiniseka ukuthi njengoba ‘eseyindlalifa ekanye noKristu’ isithakazelo sikaMfoweth’ uBarry kulabo ‘abathambekele ngokufanele ekuphileni okumi phakade’ sizoqhubeka. Yiqiniso, bazomkhumbula kakhulu bonke abebemazi futhi bemthanda njengendoda engokomoya, ezinikele ngokuphelele kuJehova futhi ebathanda kakhulu abantu bakaNkulunkulu. Nokho, siyajabula ngokuthi uMfoweth’ uBarry ukhuthazele ngokwethembeka kwaze kwaba sekupheleni kwenkambo yakhe yasemhlabeni.—IsAmbulo 2:10.
[Isithombe ekhasini 16]
ULloyd Barry noJohn Barr lapho kukhululwa i-“Insight on the Scriptures” ngo-1988
[Isithombe ekhasini 16]
Abathweswa iziqu ekilasini le-11 laseGileyadi, behlangene eJapane ngemva kweminyaka engu-40