Yini Engenziwa Ngokudumazeka?

UMUNTU angalwisana kanjani nokudumazeka? Lona umbuzo obuzwa ababonisi abajikelezayo abaningi, abavame ukuhambela amabandla oFakazi BakaJehova. Izimpendulo zabo zingasisiza ukuba sihlaziye izimbangela zokudumazeka namakhambi alesi simo esingahlasela noma imuphi umKristu.

Kudingeka okungaphezu kokuhlaziya ukuze kusingathwe ukudumazeka, kodwa izinkomba zingase zihlanganise ukuphelelwa isithakazelo sokuthandaza noma sokuba nesifundo somuntu siqu, ukudebeselela ukuya emihlanganweni, ukuphelelwa intshiseko, ngisho nokungasakunambithisisi ukuba namaKristu. Nokho, olunye lwezimpawu eziyinkomba enkulu yalokho ukuncipha kwentshiseko yokushumayela ivangeli. Ake sihlole lezi zinkomba bese sicabangela amanye amakhambi.

Ukudumazeka Emsebenzini Wethu Wokushumayela Ivangeli

UJesu Kristu wayebuqaphela ubunzima obuhambisana nomsebenzi wokwenza abafundi. (Mathewu 28:19, 20) Wathuma abalandeli bakhe “njengezimvu phakathi kwezimpisi,” azi ukuthi umsebenzi wabo wokushumayela wawuyokwenza babhekane noshushiso. (Mathewu 10:16-23) Nokho, lesi kwakungesona isizathu sokuba badumale. Eqinisweni, ngokuvamile ushushiso luye lwaziqinisa izinceku zikaNkulunkulu eziye zancika kuJehova ngomthandazo.—IzEnzo 4:29-31; 5:41, 42.

Ngisho nalapho abafundi bakaKristu babengabhekene nokushushiswa okukhulu, babengamukelwa kahle njalo. (Mathewu 10:11-15) Ngokufanayo nanamuhla, umsebenzi wokushumayela woFakazi BakaJehova awubi lula ngaso sonke isikhathi.a Kwabaningi, ukukholelwa kuNkulunkulu indaba yomuntu siqu abangathandi ukuxoxa ngayo. Abanye abafuni kuzwa lutho ngenhlangano yenkolo abayibandlululayo ngandlela-thile. Akungabazeki ukuthi ukunganaki, ukungatholi miphumela noma ezinye izinkinga ezihlukahlukene kungaba izimbangela ezinkulu zokudumazeka. Zinganqotshwa kanjani lezi zithiyo?

Ukuthola Imiphumela Engcono

Injabulo esiba nayo enkonzweni yethu ngokwengxenye ibangelwa yimiphumela esiyitholayo. Khona-ke, singaba kanjani nenkonzo ekhiqiza kakhudlwana? ‘Singabadobi babantu.’ (Marku 1:16-18) Abadobi kwa-Israyeli wasendulo babedoba ebusuku lapho babengakwazi ukubamba izinhlanzi eziningi. Nathi kudingeka sihlaziye insimu yethu ukuze “siyodoba” lapho iningi labantu lisekhaya futhi lisesimweni esingcono sokulalela isigijimi sethu. Kungase kube kusihlwa, ngezimpelasonto noma ngesinye isikhathi. Ngokomunye umbonisi ojikelezayo, lokhu kuyasebenza ezindaweni lapho abantu besebenza khona usuku lonke. Uphawula ukuthi ukufakaza kusihlwa kuvame ukuba nemiphumela emihle kakhulu. Ukufakaza ngocingo noma ngokwethukela nakho kusenza sikwazi ukufinyelela abantu abengeziwe.

Ukukhuthazela enkonzweni nakho kuletha imiphumela emihle. EMpumalanga Yurophu nakwamanye amazwe ase-Afrika, umsebenzi wokushumayela ngoMbuso uqhubeka kahle, futhi lokhu kuye kwaphumela ekwandeni okuhle. Ngokufanayo, kuye kwamiswa amabandla amaningi ezindaweni osekuyisikhathi eside zibhekwa njengezingakhiqizi noma ngisho nasemasimini ahlanganiswa njalo. Nokho, kuthiwani uma insimu oyisebenzayo ingenayo imiphumela enjalo?

Ukulondoloza Isimo Sengqondo Esihle

Ukugcina imigomo eyabekwa uJesu icacile engqondweni kuyosisiza ukuba singadumazeki lapho sibhekene nokunganakwa enkonzweni. UKristu wayefuna abafundi bakhe bafune abafanelekayo, hhayi ukuba baguqule abantu ngobuningi. Ezikhathini eziningana wabonisa ukuthi iningi ngeke lizamukele izindaba ezinhle, njengoba nje nama-Israyeli amaningi engazange abalalele abaprofethi basendulo.—Hezekeli 9:4; Mathewu 10:11-15; Marku 4:14-20.

“Izindaba ezinhle zombuso” zamukelwa ngesasasa abantu “abaqaphela isidingo sabo esingokomoya.” (Mathewu 5:3; 24:14) Bafuna ukukhonza uNkulunkulu ngendlela ayishoyo. Ngakho, imiphumela yomsebenzi wethu ihlobene kakhulu nesimo senhliziyo sabantu kunasekhonweni lethu lokwethula isigijimi. Yiqiniso, kudingeka senze konke okusemandleni ethu ukwenza izindaba ezinhle zikhange. Nokho, imiphumela ixhomeke kuNkulunkulu, ngoba uJesu wathi: “Akekho umuntu ongeza kimi ngaphandle kokuba uBaba ongithumile, emdonsa.”—Johane 6:44.

Umsebenzi wethu wokushumayela ivangeli wenza igama likaJehova laziwe. Kungakhathaliseki ukuthi abantu bayalalela noma cha, umsebenzi wethu wokushumayela unengxenye ekungcwelisweni kwegama likaJehova elingcwele. Ngaphezu kwalokho, ngomsebenzi wethu wokushumayela ivangeli, sifakazela ukuthi singabafundi bakaKristu, futhi sinelungelo lokuhlanganyela emsebenzini obaluleke kunayo yonke eyenziwa osukwini lwethu.—Mathewu 6:9; Johane 15:8.

Ukudumazeka Nobuhlobo Nabanye

Ukusebenzelana kwethu nabanye, kungaba abasekhaya noma abasebandleni, kungabangela ukudumazeka. Ngokwesibonelo, kuba nomuzwa wokungaqondwa. Ukungapheleli kwesikholwa nabo nakho kungase kusidumaze. Nalapho, imiBhalo ingasisiza kakhulu.

“Yonke inhlangano yabafowethu” emhlabeni wonke yakha umkhaya omkhulu ongokomoya. (1 Petru 2:17) Kodwa umuzwa wokuba ingxenye yabantu abanobunye ungase ushabalale lapho kuphakama izinkinga ezibangelwa ukungqubuzana kobuntu. Ngokusobala, amaKristu ekhulu lokuqala aba nazo izinkinga ezinjalo, ngoba umphostoli uPawulu kwadingeka awakhumbuze ngokuphindaphindiwe ukuba ahlale ndawonye ngobunye. Ngokwesibonelo, wakhuthaza abesifazane ababili abangamaKristu—u-Evodiya noSintike—ukuba baxazulule ukungezwani kwabo.—1 Korinte 1:10; Efesu 4:1-3; Filipi 4:2, 3.

Uma kuyileyo inkinga, singaluvuselela kanjani uthando oluqotho ngabafowethu nodadewethu? Ngokuzikhumbuza ukuthi uKristu wabafela nokuthi nabo baye babonisa ukholo emhlatshelweni wakhe wesihlengo njengathi. Kufanele sikhumbule nokuthi abaningi babafowethu bazimisele ukulingisa uJesu Kristu ngokufaka ukuphila kwabo engozini ngenxa yethu.

Eminyakeni ethile edlule, eParis, eFrance, uFakazi othile osemusha akazange angabaze ukuthatha isikhwama esasinebhomu eyayibekwe ngaphandle kweHholo LoMbuso. Wagijima wehla izitebhisi eziningana wayeseyiphonsa emanzini, lapho yaqhumela khona. Lapho ebuzwa ukuthi yini eyamshukumisela ukuba afake ukuphila kwakhe engozini ngale ndlela, waphendula: “Ngaqaphela ukuthi ukuphila kwethu kusengozini. Ngakho ngacabanga ukuthi kungcono uma kufa mina ngedwa kunokuba sife sonke.”b Yeka ukuthi kuyisibusiso kanjani ukuba phakathi kwabantu abanjalo abazimisele ukulandela isibonelo sikaJesu eduze kangaka!

Ngaphezu kwalokho, singazindla ngomoya wokubambisana owawuphakathi koFakazi BakaJehova ababesemakamu okuhlushwa phakathi neMpi Yezwe II.c Muva nje, abafowethu nodadewethu baseMalawi bama beqinile njengamaKristu eqiniso ngokuthembeka okufanayo. Ingabe umcabango wokuthi abafowethu abasebandleni esikulo bayokwenza okufanayo lapho bengaphansi kwezimo ezinzima awusishukumiseli yini ukuba singakunaki noma okungenani singakushayi-mkhuba ukungezwani nezinkinga zansuku zonke? Uma sihlakulela umqondo kaKristu, ubuhlobo bethu bansuku zonke nesikholwa nabo buyoba umthombo wokuqabuleka, hhayi wokudumazeka.

Imizwa Edumazayo Yomuntu Siqu

“Ithemba elilitshazisiweyo ligulisa inhliziyo; isifiso esigcwalisiweyo singumuthi wokuphila.” (IzAga 13:12) Emehlweni ezinye zezinceku zikaJehova, ukuphela kwalesi simiso sezinto kuyephuza. AmaKristu abona le nkathi esiphila kuyo ‘ibucayi futhi kunzima ukubhekana nayo,’ njengoba kunjalo nakwabaningi abangakholwa.—2 Thimothewu 3:1-5.

Nokho, ngokuphambene nabantu abangakholwa, kulezi zimo ezivivinyayo amaKristu kufanele akujabulele ukubona “isibonakaliso” sokuba khona kukaJesu, esibonisa ukuthi uMbuso kaNkulunkulu maduze nje uzosiqeda lesi simiso sezinto esibi. (Mathewu 24:3-14) Ngisho nalapho isimo siba sibi nakakhulu—njengoba kuzoba njalo ngokuqinisekile phakathi ‘nosizi olukhulu’—lezi zenzakalo ziwumthombo wenjabulo kithi ngoba zimemezela izwe elisha likaNkulunkulu elizayo.—Mathewu 24:21; 2 Petru 3:13.

Ukukuhlehlisa engqondweni ukungenela koMbuso ezindabeni zanamuhla kungabangela umKristu ukuba asebenzise isikhathi esengeziwe ekuphishekeleni izinto ezibonakalayo. Uma ebengavumela izinto ezinjengomsebenzi wokuziphilisa nezokuzijabulisa kuthathe sonke isikhathi namandla akhe, bekuyoba nzima ukuba ayifeze ngokufanele imithwalo yakhe yemfanelo engokomBhalo. (Mathewu 6:24, 33, 34) Isimo sengqondo esinjalo sibangela ukukhungatheka okuholela ekudumazekeni. Omunye umbonisi ojikelezayo waphawula: “Akukhona ukubhekana namaqiniso ukuzama ukwakha isimiso esisha sezinga eliphansi kulesi simiso sezinto.”

Amakhambi Amabili Kwangcono Kunawo Wonke

Lapho isitholakele inkinga, umuntu angalithola kanjani ikhambi elisebenzayo? Isifundo somuntu siqu singenye yezindlela ezingcono kakhulu kwezikhona. Ngani? “Sisikhumbuza ukuthi kungani kufanele senze lokho esikwenzayo,” kwasho omunye umbonisi ojikelezayo. Omunye wachaza: “Ukushumayela ngenxa nje yesibopho kuba umthwalo ngokuhamba kwesikhathi.” Kodwa isifundo somuntu siqu esikahle sisisiza ukuba siphinde sibe nombono ocacile wendima yethu njengoba sisondela esiphelweni. Ngomqondo ofanayo, imiBhalo isikhumbuza ngokuphindaphindiwe ngesidingo sokuba abondleke kahle ngokomoya ukuze sibe nenjabulo yangempela ekwenzeni intando kaNkulunkulu.—IHubo 1:1-3; 19:7-10; 119:1, 2.

Abadala bangabasiza abanye ukuba banqobe ukudumazeka ngokwenza ukuhambela kokwalusa okukhuthazayo. Phakathi nalokhu kuhambela kwangasese, abadala bangabonisa ukuthi ngamunye wethu waziswa kakhulu futhi unendawo ebalulekile phakathi kwabantu bakaJehova. (1 Korinte 12:20-26) Ebhekisela kumaKristu akanye nawo, omunye umdala wathi: “Ukuze ngigcizelele ukubaluleka kwabo, ngibakhumbuza ngalokho abaye bakufeza esikhathini esidlule. Ngiyakuveza ukuthi bayigugu emehlweni kaJehova nokuthi igazi leNdodana yakhe liye lanikelelwa bona. Le ndlela yokucabanga yamukelwa kahle njalo. Lapho lokhu kuye kwasekelwa ngezikhombo eziqinile ezingokomBhalo, labo abadumele baba sesimweni sokuzibekela imigomo emisha, enjengokuthandaza njengomkhaya, ukufunda kanye nokutadisha iBhayibheli.”—Heberu 6:10.

Phakathi nokuhambela kokwalusa, abadala kudingeka baqaphele ukuba bangenzi kubonakale sengathi akunakwenzeka ukumjabulisa uNkulunkulu. Kunalokho, abadala bangasiza abakhulekeli abakanye nabo abadumele ukuba babone ukuthi ijoka elithweswe abalandeli bakaJesu lilula. Ngenxa yalokho, inkonzo yethu yobuKristu iwumthombo wenjabulo.—Mathewu 11:28-30.

Ukunqoba Ukudumazeka

Kungakhathaliseki ukuthi kubangelwa yini, ukudumazeka kuwuhlupho okumelwe kulwiswane nalo. Nokho, khumbula ukuthi asisodwa kule mpi. Uma sidumazekile, masilwamukele usizo lwamaKristu esikanye nawo, ikakhulukazi abadala. Ngokwenza kanjalo, singase sinciphise imizwa yokudumazeka.

Ngaphezu kwakho konke, kudingeka siphendukele kuNkulunkulu ukuze sithole usizo lokunqoba ukudumazeka. Uma sincika kuJehova ngomthandazo, angase asisize sikunqobe ngokuphelele ukudumazeka. (IHubo 55:22; Filipi 4:6, 7) Kunoma yisiphi isimo, njengabantu bakhe singaba nomuzwa ofanayo nowomhubi owahlabelela: “Sibusisiwe isizwe esikwazi ukuhlabelela ngenjabulo; siyahamba, Jehova, ekukhanyeni kobuso bakho. Egameni lakho siyathokoza usuku lonke; ngokulunga kwakho siyaphakanyiswa. Ngokuba wena uyinkazimulo yamandla abo; ngomusa wakho uphondo lwethu luyaphakama.”—IHubo 89:15-17.

[Imibhalo yaphansi]

[Isithombe ekhasini 31]

Ukuhambela kokwalusa okwakhayo kwabadala abanothando kungawasiza amaKristu anqobe ukudumazeka