Isibusiso SikaJehova Siyasicebisa
“Isibusiso sikaJehova siyacebisa; akenezeli usizi kuso.”—IZAGA 10:22.
1, 2. Kungani injabulo ingahlobene nengcebo yezinto ezibonakalayo?
UKUPHILA kwezigidi zabantu namuhla kulawulwa yiminako yezinto ezibonakalayo. Kodwa ingabe izinto ezibonakalayo zibenza bajabule? “Angikhumbuli abantu belusizi kangaka ngokuphila kwabo,” kusho i-Australian Women’s Weekly. Iyanezela: “Kuyadida. Sitshelwa ukuthi elase-Australia limi kahle kakhulu ngokwezomnotho, kuthiwa ukuphila kungcono kunanini ngaphambili. . . . Yize kunjalo, umbono wokulindela okubi udlangile kulo lonke leli zwe. Abesilisa nabesifazane bayezwa ukuthi kukhona okuntulekayo ekuphileni kwabo kodwa abakwazi ukukuchaza ukuthi kuyini.” Yeka ukuthi imiBhalo iyiqiniso kanjani lapho iveza ukuthi injabulo nokuphila akuveli ezintweni esinazo!—UmShumayeli 5:10; Luka 12:15.
2 IBhayibheli lifundisa ukuthi injabulo enkulu itholakala esibusisweni sikaNkulunkulu. Mayelana nalokhu, izAga 10:22 zithi: “Isibusiso sikaJehova siyacebisa; akenezeli usizi kuso.” Usizi ngokuvamile lubangelwa ukuzibuthela ingcebo yezinto ezibonakalayo ngobugovu. Ngokufanelekayo, umphostoli uPawulu waxwayisa: “Labo abazimisele ngokuceba bawela esilingweni nasogibeni nasezifisweni eziningi ezingenangqondo nezilimazayo, eziphonsa abantu embubhisweni nasencithakalweni. Ngoba uthando lwemali luyimpande yazo zonke izinhlobo zezinto ezilimazayo, futhi ngokuzama ukufinyelela loluthando abanye baye badukiswa okholweni futhi bazigwaza yonke indawo ngobuhlungu obuningi.”—1 Thimothewu 6:9, 10.
3. Kungani izinceku zikaNkulunkulu zibhekana nokulingwa?
3 Ngakolunye uhlangothi, bonke ‘abaqhubeka belalela izwi likaJehova’ baficwa yizibusiso ezingenalusizi. (Duteronomi 28:2, NW) Nokho, abanye bangase babuze, ‘Uma kungekho lusizi olwenezelwa esibusisweni sikaJehova, kungani izinceku zikaNkulunkulu eziningi zihlupheka?’ IBhayibheli lembula ukuthi uNkulunkulu uyakuvumela ukulingwa kwethu kodwa empeleni kuvela kuSathane, esimisweni sakhe esibi nasesimweni sethu sokungapheleli. (Genesise 6:5; Duteronomi 32:4, 5; Johane 15:19; Jakobe 1:14, 15) UJehova ungumthombo wazo “zonke izipho ezinhle nazo zonke izipho eziphelele.” (Jakobe 1:17) Ngakho, izibusiso zakhe azilokothi zibangele usizi. Ngakho-ke, ake sihlole ezinye zezipho zikaNkulunkulu eziphelele.
IZwi LikaNkulunkulu—Isipho Esiyigugu Kakhulu
4. Yisiphi isibusiso nesipho esiyigugu abantu bakaJehova abasijabulelayo kulesi ‘sikhathi sokugcina’?
4 Mayelana ‘nesikhathi sokugcina,’ isiprofetho sikaDaniyeli sithi: “Ukwazi [kuyakuba] kuningi.” Nokho, le nkulumo yacaciswa yila mazwi: “Akayikuqonda noyedwa omubi; nokho abahlakaniphileyo bayakuqonda.” (Daniyeli 12:4, 10) Cabanga nje! IZwi likaNkulunkulu—ngokukhethekile iziprofetho—libekwe ngokuhlakanipha kwaphezulu kangangokuthi ababi abakwazi ukuthola umqondo walo wangempela, kodwa abantu bakaJehova bayakwazi. INdodana kaNkulunkulu yathandaza yathi: “Ngikudumisa obala, Baba, Nkosi yezulu nomhlaba, ngoba uzifihle ngokucophelela lezizinto kwabahlakaniphileyo nabanengqondo, futhi uzambulele izingane.” (Luka 10:21) Yeka ukuthi kuyisibusiso kanjani ukuba nesipho esiyigugu kakhulu esiyiZwi likaNkulunkulu elilotshiwe, iBhayibheli, nokuba phakathi kwalabo uJehova abanike ukuqonda okungokomoya!—1 Korinte 1:21, 27, 28; 2:14, 15.
5. Kuyini ukuhlakanipha, futhi singakuthola kanjani?
5 Ukube bekungengenxa ‘yokuhlakanipha okuvela phezulu’ besingeke sibe nako nhlobo ukuqonda okungokomoya. (Jakobe 3:17) Ukuhlakanipha yikhono lokusebenzisa ulwazi nokuqonda ukuze uxazulule izinkinga, ugweme noma uphebeze izingozi, ufinyelele imigomo, noma unikeze iseluleko esinengqondo. Sikuthola kanjani ukuhlakanipha kokuhlonipha uNkulunkulu? IzAga 2:6 zithi: “UJehova uyanika ukuhlakanipha; emlonyeni wakhe kuphuma ukwazi nokuqonda.” Yebo, uJehova uyosibusisa ngokuhlakanipha uma singayeki ukukuthandazela, njengoba nje anika iNkosi uSolomoni “inhliziyo enokuhlakanipha nokuqonda.” (1 AmaKhosi 3:11, 12; Jakobe 1:5-8) Ukuze sithole ukuhlakanipha, kumelwe futhi siqhubeke silalela uJehova ngokutadisha nokusebenzisa njalo iZwi lakhe.
6. Kungani kuhlakaniphile ukusebenzisa imithetho nezimiso zikaNkulunkulu ekuphileni kwethu?
6 Izibonelo ezivelele zokuhlakanipha kokuhlonipha uNkulunkulu zitholakala emithethweni nasezimisweni zeBhayibheli. Le mithetho isizuzisa ngazo zonke izindlela—ngokomzimba, ngokwengqondo, ngokomzwelo nangokomoya. Umhubi wahlabelela kufanele ethi: “Umthetho kaJehova uphelele, uvusa umphefumulo; ukufakaza kukaJehova kuqinisile, kuhlakaniphisa oyisiwula. Imiyalo kaJehova ilungile, ijabulisa inhliziyo; umyalezo kaJehova uhlanzekile, ukhanyisa amehlo. Ukumesaba uJehova kuhlanzekile, kumi kuze kube phakade; imithetho kaJehova iyiqiniso, ilungile yonke. Inxanelekile kunegolide, kunegolide elihlanzekileyo eliningi.”—IHubo 19:7-10; 119:72.
7. Uba yini umphumela wokungazinaki izindinganiso zikaNkulunkulu zokulunga?
7 Ngakolunye uhlangothi, labo abangazinaki izindinganiso zikaNkulunkulu zokulunga abayitholi injabulo nenkululeko abasuke beyifuna. Bagcina bethole ukuthi uNkulunkulu akahlekwa, ngoba umuntu uyovuna lokho akuhlwanyelayo. (Galathiya 6:7) Izigidi ezingazinaki izimiso zeBhayibheli zivuna imiphumela edabukisayo njengokukhulelwa okungafunwa, izifo ezenyanyekayo, noma ukulutheka okulimazayo. Ngaphandle kokuba baphenduke, bashintshe inkambo yokuphila kwabo, indlela abahamba ngayo iyogcina ibaholele ekufeni, mhlawumbe nasekubhujisweni nguNkulunkulu.—Mathewu 7:13, 14.
8. Kungani abathandi beZwi likaNkulunkulu bejabula?
8 Nokho, labo abalithandayo iZwi likaNkulunkulu futhi abalisebenzisayo bayothola izibusiso ezicebile manje nasesikhathini esizayo. Banesizathu sokuzizwa bekhululiwe umthetho kaNkulunkulu, bajabula ngempela futhi basilindele ngokulangazela isikhathi lapho beyokhululwa esonweni nemiphumela yaso ebulalayo. (Roma 8:20, 21; Jakobe 1:25) Leli themba liqinisekile ngoba lisekelwe esiphweni esinothando kunazo zonke uNkulunkulu asinike isintu—umhlatshelo wesihlengo weNdodana yakhe ezelwe yodwa, uJesu Kristu. (Mathewu 20:28; Johane 3:16; Roma 6:23) Isipho esizidlula zonke njengalesi siqinisekisa ukujula kothando uNkulunkulu analo ngesintu, siqinisekise nokuthi bonke abaqhubeka belalela uJehova bayothola izibusiso ezingenamkhawulo.—Roma 8:32.
Siyabonga Ngesipho Somoya Ongcwele
9, 10. Sizuza kanjani esiphweni sikaJehova somoya ongcwele? Nikeza isibonelo.
9 Esinye isipho sikaNkulunkulu sothando okufanele sibonge ngaso umoya wakhe ongcwele. Ngosuku lwePhentekoste lika-33 C.E., umphostoli uPetru wanxusa isixuku esasiseJerusalema: “Phendukani, futhi yilowo nalowo kini abhapathizwe egameni likaJesu Kristu ngenjongo yokuthethelelwa kwezono zenu, futhi niyokwamukela isipho samahhala somoya ongcwele.” (IzEnzo 2:38) Namuhla, uJehova uzinika umoya ongcwele izinceku zakhe ezizinikezele eziwuthandazelayo futhi ezifuna ukwenza intando yakhe. (Luka 11:9-13) Endulo, la mandla amakhulu kunawo wonke endaweni yonke—umoya ongcwele noma amandla kaNkulunkulu asebenzayo—enza abesilisa nabesifazane bokholo baba namandla, kuhlanganise namaKristu okuqala. (Zakariya 4:6; IzEnzo 4:31) Angakwenza okufanayo nakithi, yize kungenzeka sibhekene nezithiyo nezinselele ezinkulu njengabantu bakaJehova.—Joweli 2:28, 29.
10 Cabanga ngesibonelo sikaLaurel, owayenovendle, ehlala esemshinini wokumphefumulisa iminyaka engu-37.a Naphezu kwezimo zakhe ezivivinya kakhulu, wakhonza uNkulunkulu ngentshiseko kwaze kwaba sekufeni kwakhe. Phakathi neminyaka eyadlula, isibusiso sikaJehova esicebile samfica uLaurel. Ngokwesibonelo, wakwazi ukusiza abantu abangu-17 ukuba bafinyelele olwazini olunembile lweqiniso leBhayibheli, yize ayehlala esemshinini wakhe usuku lonke! Isimo sakhe sikwenza ukhumbule amazwi omphostoli uPawulu: “Lapho ngibuthakathaka, kulapho-ke nginamandla.” (2 Korinte 12:10) Yebo, noma yikuphi ukuphumelela esingase sibe nako ekushumayeleni izindaba ezinhle akubangelwa amakhono namandla ethu, kodwa kubangelwa usizo lukaNkulunkulu ngomoya ongcwele, awunika labo abalalela izwi lakhe njalo.—Isaya 40:29-31.
11. Yiziphi izimfanelo ezakhiwa umoya kaNkulunkulu kulabo abagqoka “ubuntu obusha”?
11 Uma simlalela ngokuthobeka uNkulunkulu, umoya wakhe wakha kithi izimfanelo eziwuthando, injabulo, ukuthula, ukubhekakade, umusa, ubuhle, ukholo, ubumnene nokuzithiba. (Galathiya 5:22, 23) Lezi “zithelo zomoya” ziyingxenye ‘yobuntu obusha’ amaKristu abugqokayo esikhundleni sanoma yiziphi izici ezinobudlova nobulwane okungenzeka ayezibonisa ngaphambili. (Efesu 4:20-24; Isaya 11:6-9) Esibaluleke kakhulu kulezi zithelo uthando, “isibopho esiphelele sobunye.”—Kolose 3:14.
Uthando LobuKristu—Isipho Esidinga Ukwaziswa
12. UThabitha namanye amaKristu ekhulu lokuqala balubonisa kanjani uthando?
12 Uthando lobuKristu lungesinye sezipho ezibusisekile ezivela kuJehova—isipho esisazisa kufanele. Lulawulwa yizimiso, kodwa lunamandla kangangokuthi lwenza abakholwayo basondelane eduze nangaphezu kwalokho okungenziwa yizibopho zenyama. (Johane 15:12, 13; 1 Petru 1:22) Ngokwesibonelo, cabanga ngoThabitha, owesifazane okahle owayengumKristu ekhulwini lokuqala. “Wayevamile ezenzweni ezinhle naseziphweni zesihe,” ikakhulu kubafelokazi ebandleni. (IzEnzo 9:36) Kungenzeka laba besifazane babenazo izihlobo zegazi, kodwa uThabitha wayefuna ukwenza lokho ayengakwenza ukuze abasize futhi abakhuthaze. (1 Johane 3:18) Yeka isibonelo esihle uThabitha asibeka! Uthando lobuzalwane lwashukumisela uPriska no-Akwila ukuba ‘bafake engozini izintamo zabo siqu’ ngenxa kaPawulu. Uthando lwashukumisa no-Ephafra, uLuka, u-Onesiforu nabanye ukuba basize lo mphostoli lapho eboshiwe eRoma. (Roma 16:3, 4; 2 Thimothewu 1:16; 4:11; Filemoni 23, 24) Yebo, amaKristu anjalo namuhla ‘anothando phakathi kwawo,’ isipho esibusisekile esivela kuNkulunkulu esiwaveza njengabafundi bakaJesu beqiniso.—Johane 13:34, 35.
13. Singabonisa kanjani ukuthi sibazisa ngokujulile ubuzalwane bethu bobuKristu?
13 Ingabe uyalwazisa uthando oluboniswa ebandleni lobuKristu? Uyabonga yini ngobuzalwane bethu obungokomoya obuhlanganisa umhlaba wonke? Nalezi yizipho ezibusisekile nezicebisayo ezivela phezulu. Singabonisa kanjani ukuthi siyazazisa? Ngokunikela inkonzo engcwele kuNkulunkulu, ngokuhlanganyela emihlanganweni yobuKristu nangokubonisa uthando nezinye izithelo zomoya kaNkulunkulu.—Filipi 1:9; Heberu 10:24, 25.
“Izipho Ezingabantu”
14. Yini edingekayo kumKristu ukuze akhonze njengomdala noma inceku ekhonzayo?
14 Amadoda angamaKristu afisa ukukhonza abakhulekeli akanye nabo njengabadala noma izinceku ezikhonzayo anomgomo omuhle. (1 Thimothewu 3:1, 8) Ukuze afanelekele la malungelo, umzalwane kumelwe abe ngumuntu ongokomoya, ojwayelene kahle nemiBhalo futhi oshisekayo enkonzweni yasensimini. (IzEnzo 18:24; 1 Thimothewu 4:15; 2 Thimothewu 4:5) Kumelwe abonise ukuthobeka, isizotha nesineke, ngoba izibusiso zaphezulu azibafici abantu abagabadelayo, abaqhoshayo nabafuna ukuvelela. (IzAga 11:2; Heberu 6:15; 3 Johane 9, 10) Uma eshadile, kumelwe abe yinhloko yomkhaya enothando nekwaziyo ukwengamela kahle yonke indlu yayo. (1 Thimothewu 3:4, 5, 12) Ngenxa yokuthi iyayazisa ingcebo engokomoya, indoda enjalo izibizela isibusiso sikaJehova.—Mathewu 6:19-21.
15, 16. Obani abazibonakalisa ‘beyizipho ezingabantu’? Nikeza izibonelo.
15 Uma labo abakhonza njengabadala ebandleni bezikhandla njengabashumayeli bevangeli, abelusi nabafundisi, basinika izizathu eziqinile zokwazisa lezo “zipho ezingabantu.” (Efesu 4:8, 11) Labo abazuzayo enkonzweni yothando yalaba badala bangase bangakuvezi ngaso sonke isikhathi ukwazisa kwabo, kodwa uJehova uyakubona konke lokho abadala abathembekile abakwenzayo. Ngeke alukhohlwe uthando abalubonisa egameni lakhe ngokukhonza abantu bakhe.—1 Thimothewu 5:17; Heberu 6:10.
16 Cabanga ngomdala othile ozikhandlayo owavakashela intombazane engumKristu eyayisizohlinzwa ubuchopho. Umngane womkhaya wabhala: “Wayenomusa, ekhuthaza futhi ekhathalela kakhulu. Wacela ukuthandaza kuJehova kanye nathi. Njengoba ethandaza, uyise wentombazane [ongeyena omunye woFakazi BakaJehova] wachiphiza, kwehla izinyembezi kuwo wonke umuntu owayekulelo gumbi esibhedlela. Yeka indlela owawunesisa ngayo umthandazo walowo mdala, futhi yeka ukuthi kwakuwukubonisa uthando kangakanani ngoJehova ukumthumela ngalesiya sikhathi!” Esinye isiguli esinguFakazi sathi ngabadala ababesivakashele: “Lapho beza embhedeni wami egunjini lababangwa nezibi, ngavele ngazi ukuthi noma yini engenzeka manje, ngizokwazi ukuyibekezelela. Ngaba namandla nokuthula.” Ukhona yini ongakuthenga ukukhathalela kothando okunjalo? Lutho! Kuyisipho esivela kuNkulunkulu, asenza sitholakale ngebandla lobuKristu.—Isaya 32:1, 2.
Isipho Senkonzo Yasensimini
17, 18. (a) Yisiphi isipho senkonzo uJehova aye wasenza satholakala kubo bonke abantu bakhe? (b) Yiluphi usizo uNkulunkulu aye walunikeza ukuze sikwazi ukufeza inkonzo yethu?
17 Alikho ilungelo elinganikwa umuntu elidlula elokukhonza uJehova, oPhezukonke. (Isaya 43:10; 2 Korinte 4:7; 1 Petru 2:9) Nokho, ilungelo lokuhlanganyela enkonzweni yasobala livulekele wonke umuntu onesifiso esiqotho sokukhonza uNkulunkulu—omncane nomdala, owesilisa nowesifazane. Ingabe uyasisebenzisa lesi sipho esiyigugu? Abanye bangase bazigodle ngoba bezizwa bengafaneleki, kodwa khumbula ukuthi uJehova ubanika umoya ongcwele labo abamkhonzayo, futhi wona uyanezela nomaphi lapho kungenzeka siyantula khona.—Jeremiya 1:6-8; 20:11.
18 Umsebenzi wokushumayela ngoMbuso uJehova uwuphathise izinceku zakhe ezithobekile, hhayi abantu abaqhoshayo nabathembe awabo amakhono. (1 Korinte 1:20, 26-29) Abantu abathobekile nabanesizotha bayakuvuma ukulinganiselwa kwabo, bathembele osizweni lukaNkulunkulu njengoba benza inkonzo yasensimini. Bayalwazisa nosizo olungokomoya alunikeza ‘ngomphathi okholekile.’—Luka 12:42-44; IzAga 22:4.
Ukuphila Komkhaya Okujabulisayo—Isipho Esihle
19. Yiziphi izici eziholela empumelelweni ekukhuliseni izingane?
19 Umshado nokuphila komkhaya okujabulisayo kuyizipho ezivela kuNkulunkulu. (Ruthe 1:9; Efesu 3:14, 15) Nabantwana ‘bayifa eliyigugu elivela kuJehova,’ eliletha injabulo kubazali abagxilisa izimfanelo zokuhlonipha uNkulunkulu kubo ngokuphumelelayo. (IHubo 127:3) Uma ungumzali, qhubeka ulalela izwi likaJehova ngokuqeqesha izingane zakho ngokweZwi lakhe. Labo abakwenzayo lokho bayothola ukusekela nesibusiso sikaJehova esicebile nakanjani.—IzAga 3:5, 6; 22:6; Efesu 6:1-4.
20. Yini engase isize abazali abanezingane ezishiya ukukhulekela kweqiniso?
20 Naphezu kwemizamo eqotho yabazali abahlonipha uNkulunkulu, mhlawumbe ezinye zezingane zabo zikhetha ukukufulathela ukukhulekela kweqiniso lapho zikhula. (Genesise 26:34, 35) Lokhu kungabangela abazali usizi olukhulu. (IzAga 17:21, 25) Nokho, kunokuba balilahle ngokuphelele ithemba, kungase kubasize ukukhumbula umfanekiso kaJesu wendodana yolahleko. Nakuba leyo ndodana yahamba ekhaya, yaphishekela inkambo yokuhlubuka, kamuva yabuyela emzini kayise, owayamukela ngenjabulo nangothando. (Luka 15:11-32) Kungakhathaliseki ukuthi kwenzekani, abazali abathembekile abangamaKristu bangaqiniseka ukuthi uJehova uyaqonda, ubakhathalela ngothando futhi uyobasekela njalo.—IHubo 145:14.
21. Ubani okufanele simlalele, futhi ngani?
21 Ngakho-ke, ngamunye wethu makanqume ukuthi yini ebaluleke ngempela ekuphileni kwakhe. Ingabe siphishekela ngentshiseko inala yezinto ezibonakalayo, okungase kusilethele usizi thina nemikhaya yethu? Noma ingabe siphishekela ‘izipho ezinhle nezipho eziphelele’ ezivela “kuYise wezinkanyiso zasezulwini”? (Jakobe 1:17) USathane, ‘uyise wamanga,’ ufuna sifukuzele ingcebo yezinto ezibonakalayo bese silahlekelwa yikho kokubili injabulo nokuphila. (Johane 8:44; Luka 12:15) Nokho, uJehova usifunela okungcono kakhulu. (Isaya 48:17, 18) Ngakho-ke, masiqhubeke silalela uBaba wethu osezulwini onothando, ‘sizithokozise’ njalo ngaye. (IHubo 37:4) Uma siphishekela inkambo enjalo, izipho zikaJehova eziyigugu nezibusiso zakhe ezicebile ziyosicebisa—ngaphandle kokunezela noluncane usiziubuhlungu.
[Umbhalo waphansi]
a Bheka i-Phaphama! ka-January 22, 1993, amakhasi 18-21.
Uyakhumbula?
• Ingatholakalaphi injabulo enkulu kunayo yonke?
• Yiziphi ezinye zezipho uJehova azinika abantu bakhe?
• Kungani inkonzo yasensimini iyisipho?
• Yini abazali abangayenza ukuze bathole isibusiso sikaNkulunkulu njengoba bekhulisa izingane zabo?
[Isithombe ekhasini 16]
Uyakubonisa yini ukwazisa isipho sikaNkulunkulu esiyiZwi lakhe elilotshiwe?
[Isithombe ekhasini 17]
Naphezu kwezimo ezinzima kakhulu, uLaurel Nisbet wakhonza uNkulunkulu ngentshiseko
[Izithombe ekhasini 18]
NjengoThabitha, amaKristu anamuhla aziwa kakhulu ngezenzo zawo zothando
[Isithombe ekhasini 19]
Abadala abangamaKristu babakhathalela ngothando abakholwa nabo