Indaba Yokuphila
Ukulindela UMbuso ‘Ongeyona Ingxenye Yaleli Zwe’
ILANDISWA UNIKOLAI GUTSULYAK
Kwase kuyizinsuku ezingu-41 nobusuku obungu-41 ngisesijwini sezibhelu zasejele. Kungazelelwe, ngavuswa ukuqhuma kukambayimbayi. Amasosha atheleka kanye nezinqola zempi ekamu lasejele, ahlasela iziboshwa. Ngangilengela egodini.
KWENZEKA kanjani ukuba ngibe kulesi simo? Ake ngichaze. Lokhu kwenzeka ngo-1954. Ngaleso sikhathi, ngangineminyaka engu-30 ubudala. Njengoba kwenzeka koFakazi BakaJehova abaningi ababephila ngesikhathi kubusa iSoviet, ngangiboshiwe ngenxa yokungathathi hlangothi ezindabeni zezombusazwe nangenxa yokushumayela kwabanye ngoMbuso kaNkulunkulu. Iqembu lethu loFakazi ababeboshiwe lalinamadoda angu-46 nabesifazane abangu-34. Sasigcinwe ekamu lokusebenza kanzima eliseduze komuzi waseKengir maphakathi neKazakhstan. Lapho sasihlala phakathi kwezinkulungwane zezinye iziboshwa.
UJoseph Stalin, umbusi waseSoviet Union, wayeshone ngonyaka owandulele. Iziboshwa eziningi zazinethemba lokuthi umbuso omusha eMoscow wawungase ulalele izikhalo zazo ngezimo ezinzima zasejele. Ekugcineni ukunganeliseki kweziboshwa kwaqhubeka kwaba ukuvukela. Phakathi nezingxoxo ezalandela, thina boFakazi kwadingeka sikwenze kucace ukuma kwethu kubavukeli abathukuthele futhi sichazele amasosha angonogada. Kwakudingeka ukholo kuNkulunkulu ukuze singathathi uhlangothi.
Ukuvukela!
Ngo-May 16 kwaqala ukuvukela ekamu. Ngemva kwezinsuku ezimbili, iziboshwa ezingaphezu kuka-3 200 zenqaba ukuya emsebenzini, zifuna ngenkani ukuba kuthuthukiswe ukuphila kwasekamu nokuba kubonelelwe iziboshwa zezombusazwe. Izinto zashintsha ngokushesha. Okokuqala, iziboshwa zaphoqa onogada ukuba baphume baphele ekamu. Zase zivula izimbobo ocingweni olubiyele. Ngemva kwalokho, zabhidliza udonga olwaluhlukanisa izakhiwo zabesilisa nabesifazane, zenza ukuba iziboshwa zihlale ndawonye. Ngemva kwalokho kwalandela izinsuku ezimnandi, ngoba ezinye iziboshwa zaze zashada, zishadiswa abefundisi nabo ababeboshiwe. Ezakhiweni ezintathu lapho ukuvukela kwakuqale khona, iningi leziboshwa kwezingu-14 000 lahlanganyela ekuvukeleni.
Abavukeli bahlela ikomiti yasekamu ukuze ixoxe namasosha. Nokho, ngokushesha kwavuka impikiswano phakathi kwamalungu aleli komiti, futhi ekugcineni ikamu lalawulwa izishoshovu. Umoya washuba ngokwengeziwe. Ukuze kube ‘nokuhleleka,’ abaholi babavukeli bahlela umnyango wezokuphepha, umnyango wezempi nomnyango wezokusakaza. Abaholi babesebenzisa imibhobho eyayixhunywe ezigxotsheni ezazikulo lonke ikamu ukuze basakaze imibiko evuthayo, bevusa usinga. Abavukeli babevimba abanye ukuba bangeqi, bejezisa labo ababemelene nabo, futhi besho ukuthi bazimisele ukubulala noma ubani ongabalaleli. Kwakunamahemuhemu okuthi kunezinye iziboshwa ezase zibulewe.
Njengoba abavukeli babekulindele ukuhlaselwa amasosha, bazilungiselela ngokucophelela ukuze bazivikele. Abaholi bayala zonke iziboshwa ukuba zihlome ukuze baqiniseke ukuthi iziboshwa eziningi ziyobe zikulungele ukuvikela ikamu. Ukuze kuhlonywe, iziboshwa zakhipha izinsimbi zamafasitela futhi zenza ngazo imimese nezinye izikhali zensimbi. Zakwazi ngisho nokuthola izibhamu neziqhumane.
Sacindezelwa Ukuba Sijoyine
Ngaleso sikhathi, kweza kimi abavukeli ababili. Omunye wayephethe ummese osanda kulolwa. Wathi: “Wuthathe! Uzowudinga ukuze uzivikele.” Ngenhliziyo, ngacela uJehova ukuba angisize ngihlale ngizolile. Ngaphendula: “NgingumKristu futhi ngingomunye woFakazi BakaJehova. Mina nabanye oFakazi silapha ejele ngenxa yokuthi asilwi nabantu, kodwa namandla emimoya engabonakali. Izikhali zethu ukholo nethemba lethu eMbusweni kaNkulunkulu.”—Efesu 6:12.
Okwangimangaza ukuthi le ndoda yavuma ngekhanda ibonisa ukuthi iyakuqonda engikushoyo. Nokho, lena enye yangishaya kabuhlungu ngemva kwalokho bahamba. Abavukeli babengena igumbi negumbi, bezama ukuphoqa oFakazi ukuba babajoyine. Kodwa bonke abafowethu nodadewethu abangamaKristu benqaba.
Ukungathathi-hlangothi koFakazi BakaJehova kwaxoxwa ngakho emhlanganweni wekomiti labavukeli. Baphawula: “Amalungu azo zonke izinkolo—awesonto likaMoya, amaSabatha, amaBaptist nawo wonke umuntu—amdibi munye nathi. OFakazi BakaJehova kuphela abenqabayo. Sibenzeni?” Othile wasikisela ukuba kuphonswe uFakazi oyedwa kuhhavini wasejele ukuze basethuse. Kodwa owayeyisikhulu sezempi, isiboshwa esihlonishwayo, wasukuma sathi: “Lokho akukhona ukuhlakanipha. Kufanele sibafake bonke egumbini elilodwa elisemaphethelweni ekamu, eduze kwesango. Ngaleyo ndlela, uma amasosha esihlasela ngezinqola zempi, kuzobulawa oFakazi kuqala. Futhi ngeke sibe necala lokubabulala.” Bakwamukela ukusikisela kwakhe.
Ukubekwa Endaweni Eyingozi
Ngokushesha, iziboshwa zalizungeza lonke ikamu zimemeza, “OFakazi BakaJehova mabaphume!” Base besiqhuba sonke esingu-80 bayosifaka egumbini elisekugcineni kwekamu. Kulelo gumbi bakhipha imibhede eyizitezi ukuze kube nendawo enkudlwana futhi basiyala ukuba singene. Lelo gumbi laba ijele lethu, ijele eliphakathi kwelinye.
Ukuze kube nendawo esithekile, odade ababeseqenjini lethu bahlanganisa amashidi, futhi sahlukanisa ngawo igumbi kabili—enye ingxenye kwaba eyabesilisa enye eyabesifazane. (Kamuva, omunye uFakazi eRussia wenza umdwebo waleli gumbi, oboniswe ngezansi.) Ngenkathi sisahlala kuleyo ndawo eminyene, sasivame ukuthandaza ndawonye, ngobuqotho sicela ukuba uJehova asiphe ukuhlakanipha ‘namandla angaphezu kwavamile.’—2 Korinte 4:7.
Phakathi naso sonke leso sikhathi sasisengozini phakathi kwabavukeli namasosha aseSoviet. Akekho kithi owayazi okwakungase kwenziwe elinye lala maqembu. Umzalwane othembekile futhi osekhulile wasinxusa: “Ningalokhu nizama ukuqagela. UJehova ngeke asilahle.”
Odadewethu abangamaKristu abathandekayo—abasha nabadala—babonisa ukukhuthazela okukhulu. Omunye wayeneminyaka engaba ngu-80 ubudala futhi edinga usizo olukhulu. Abanye babegula futhi bedinga ukwelashwa. Phakathi naleso sikhathi, iminyango yegumbi lethu kwakufanele ihlale ivuliwe ukuze abavukeli bahlale besigadile. Ebusuku kwakuza iziboshwa ezihlomile egumbini lethu. Ngezinye izikhathi sasizizwa zithi, “UMbuso kaNkulunkulu uzumekile.” Emini lapho besivumela ukuba siye ehholo lokudlela, sasihlala ndawonye futhi sithandazela ukuba uJehova asivikele kubantu abanobudlova.
Kuleli gumbi, sasizama ukusekelana ngokomoya. Ngokwesibonelo, kwakuvame ukuba omunye umzalwane alandise indaba eseBhayibhelini ngezwi eliphakeme ukuze sonke sizwe, abese ebonisa ukuthi isebenza kanjani esimweni esibhekene naso. Omunye umzalwane osekhulile wayethanda kakhulu ukuxoxa ngebutho likaGideyoni. Wasikhumbuza: “Ngegama likaJehova, amadoda angu-300 ayephethe izinsimbi zomculo alwa namabutho ahlomile angu-135 000. Wonke la madoda angu-300 abuya engenamyocu.” (AbaHluleli 7:16, 22; 8:10) Lesi sibonelo nezinye eziseBhayibhelini zasiqinisa ngokomoya. Ngangingakabi nesikhathi eside nginguFakazi kodwa ukubona ukholo oluqinile lwabafowethu nodadewethu abanokuhlangenwe nakho okuningi kwangikhuthaza kakhulu. Ngabona ukuthi ngempela uJehova wayenathi.
Ukuqala Kwempi
Kwadlula amasonto, futhi isimo saba manzonzo ekamu. Izingxoxo phakathi kwabavukeli nezikhulu zasejele zashuba ngokwengeziwe. Abaholi babavukeli baphikelela ngokuthi uhulumeni waseMoscow kumelwe athumele inxusa lizoxoxa nabo. Izikhulu zasejele zatshela abavukeli ukuba bayeke, babeke phansi izikhali futhi babuyele emsebenzini. Zombili izinhlangothi zenqaba ukugoba uphondo. Ngaleso sikhathi, ikamu lalizungezwe amasosha elindele ukuhlasela nje lapho kuphuma umyalo. Nabavukeli babemi ngomumo, sebemise imigoqo futhi sebeqoqe inqwaba yezikhali. Wonke umuntu wayelindele ukuba isuke noma nini phakathi kwamasosha neziboshwa.
Ngo-June 26 savuswa umsindo ovala izindlebe wokudubula kukambayimbayi. Izinqola zamasosha zafohla ocingweni futhi zatheleka ekamu. Zazilandelwa ifu lamasosha elalidubula ngontuluntulu bezibhamu. Iziboshwa—amadoda nabesifazane—zazihlangabeza izinqola zamasosha, zimemeza futhi zijikijela amatshe, amabhomu okuzenzela nanoma yini ezaziyithola. Kwalandela impi okwaphalala kuyo igazi, thina boFakazi sivaleleke phakathi nendawo. UJehova wayezoyiphendula kanjani imithandazo yethu yokucela usizo?
Ngokushesha kwangena amasosha egumbini lethu. Amemeza: “Phumani, nina bangcwele! Phumelani ngaphandle kwekamu ngokushesha!” Isikhulu esiphethe sayala amasosha ukuba angasidubuli kodwa ahlale nathi asivikele. Njengoba yayibambana ngezihluthu, sahlala otshanini kude nekamu. Kwaphela amahora amane sizwa iziqhumane, ukudubulana, ukumemeza nokukhala okwakuvela phakathi ekamu. Ngemva kwalokho kwathi cwaka. Kamuva, ekuseni sabona amasosha ekhipha izidumbu ekamu. Sathola ukuthi abaningi babelimele noma beshonile.
Phakathi nalolo suku, isikhulu engisaziyo seza kithi futhi ngeqholo sabuza: “Awusho-ke Nikolai, ubani onisindisile? Yithi noma uJehova?” Sasibonga ngokusuka ezinhliziyweni ngokusisindisa, sanezela, “Sikholelwa ukuthi uNkulunkulu wethu, onguMninimandla onke, uJehova, unishukumisele ukuba nisisindise, njengoba ashukumisa abanye ezikhathini zeBhayibheli ukuba bakhulule izinceku zakhe.”—Ezra 1:1, 2.
Leso sikhulu sasichazela ukuthi amasosha azi kanjani ngathi nokuthi sasikuphi. Sathi ngesikhathi kuqhubeka izingxoxo phakathi kwamasosha nabavukeli, amasosha agxeka abavukeli ngokuthi babebulala iziboshwa ezazingabasekeli. Bezivikela, abavukeli baphendula ngokuthi oFakazi BakaJehova abahambisani nokuvukela kodwa abazange bababulale. Kunalokho, babajezise ngokubafaka bonke egumbini elilodwa. Izikhulu zamasosha zawagcina lawo mazwi.
Sawumelela Ngokuqinile UMbuso
Encwadini yakhe ethi The Gulag Archipelago, umbhali waseRussia odumile u-Aleksandr Solzhenitsyn, ukhuluma ngokuvukela kwasejele esakubona. Maqondana naleso senzakalo, uthi ukuvukela kuqale ngoba “empeleni, sifuna inkululeko, . . . kodwa ubani ongasinika yona?” NjengoFakazi BakaJehova ababekulelo kamu, nathi sasiyilangazelela inkululeko, hhayi nje ukukhululwa ejele kodwa ukuthola inkululeko eyayingalethwa uMbuso kaNkulunkulu kuphela. Ngesikhathi sisejele, sasazi ukuthi sidinga amandla avela kuNkulunkulu ukuze siwumelele ngokuqinile uMbuso wakhe. Futhi uJehova wasinika konke esasikudinga. Wasenza sanqoba ngaphandle kwemimese noma amabhomu esandla.—2 Korinte 10:3.
UJesu Kristu watshela uPilatu: “Umbuso wami awuyona ingxenye yaleli zwe. Ukube umbuso wami ubuyingxenye yaleli zwe, izikhonzi zami ngabe zilwile.” (Johane 18:36) Ngakho, njengabalandeli bakaKristu, asihlanganyelanga ezingxabanweni zezombusazwe. Sajabula ngokuthi phakathi nokuvukela nangemva kwako, ubuqotho bethu eMbusweni kaNkulunkulu baba sobala kwabanye. Mayelana nokuziphatha kwethu ngaleso sikhathi, uSolzhenitsyn wabhala: “OFakazi BakaJehova abesabanga ukunamathela ngokuqinile emithethweni yabo futhi benqaba ukwakha izinqaba noma ukuba onogada.”
Sekuphele iminyaka engaphezu kwengu-50 kwadlula lezo ziyaluyalu. Nokho, ngiye ngicabange ngalezo zikhathi futhi ngibonge ngoba ngafunda izifundo engiyozisebenzisa ukuphila kwami konke, ezinjengokulinda uJehova futhi ngithembele ngokuphelele esandleni sakhe esinamandla. Yebo, njengabanye oFakazi abaningi abathandekayo ezweni elaliyiSoviet Union, ngiye ngabona ukuthi ngempela uJehova uyakhulula, avikele futhi abasindise labo abalindele uMbuso ‘ongeyona ingxenye yaleli zwe.’
[Izithombe ekhasini 8, 9]
Ikamu lokusebenza kanzima eKazakhstan lapho sasiboshwe khona
[Isithombe ekhasini 10]
Umdwebo wegumbi loFakazi, ingxenye yabesifazane
[Isithombe ekhasini 11]
Nginabafowethu abangamaKristu lapho siphuma ejele