Sondela KuNkulunkulu
‘UNkulunkulu Wenduduzo Yonke’
KUNEZINTO eziningi ekuphileni—ukuhlupheka, ukudumazeka nesizungu—ezingabangela ukudumala, ngisho nokuphelelwa ithemba. Ngalezi zikhathi ungase uzibuze, ‘Ngingalutholaphi usizo?’ Amazwi omphostoli uPawulu akweyesi-2 Korinte 1:3, 4 aveza umthombo wenduduzo ongeke uhluleke—uJehova uNkulunkulu.
Evesini 3, uNkulunkulu ubizwa ngokuthi “uYise wesihe.” Kusho ukuthini lokho? Igama lesiGreki elihunyushwe ngokuthi “isihe” lingadlulisela umqondo wokuzwelana nabantu ekuhluphekeni kwabo.a Incwadi ethile yezikhombo zeBhayibheli ithi leli gama lingase lihunyushwe ngokuthi “ukuba nesihawu” noma “ukukhathalela kakhulu.” “Isihe” sikaNkulunkulu simshukumisela ukuba athathe isinyathelo. Ukwazi lokhu ngobuntu bukaNkulunkulu kusenza sifune ukusondela kuye, akunjalo?
UPawulu ubiza uJehova nangokuthi “uNkulunkulu wenduduzo yonke.” Lapha uPawulu usebenzisa igama okuthiwa lihlanganisa “umqondo wokududuza othile osenkingeni noma ososizini kanye nomqondo wokunikeza usizo olungokoqobo noma isikhuthazo.” I-Interpreter’s Bible iyachaza: “Siduduza ohluphekayo uma simnika isibindi sokuba akhuthazelele ubuhlungu.”
Ungase ubuze, ‘UNkulunkulu usiduduza kanjani futhi asikhuthaze ukuba sikhuthazelele ubuhlungu?’ Lokhu ukwenza ngokuyinhloko ngeZwi lakhe iBhayibheli, nangesipho somthandazo. UPawulu usitshela ukuthi uNkulunkulu ngothando usinika iZwi laKhe ukuze ‘ngenduduzo evela emiBhalweni sibe nethemba.’ Ngaphezu kwalokho, ngemithandazo esuka enhliziyweni, singathola “ukuthula kukaNkulunkulu okudlula konke ukucabanga.”—Roma 15:4; Filipi 4:7.
UJehova ubaduduza ngezinga elingakanani abantu bakhe? UPawulu uthi uNkulunkulu ‘usiduduza osizini lwethu lonke.’ (2 Korinte 1:4) Kungakhathaliseki ukuthi sibhekana nokucindezeleka, ukuhlukumezeka noma ukuhlupheka okungakanani, uNkulunkulu angasinika isibindi namandla esiwadingayo ukuze sikhuthazele. Ingabe lokho akusiniki isiqinisekiso?
Induduzo esiyinikwa uNkulunkulu ayigcini nje kulowo oyitholayo. UPawulu uyaqhubeka ethi uNkulunkulu uyasiduduza ukuze “sikwazi ukududuza labo abakunoma yiluphi uhlobo losizi ngenduduzo nathi ngokwethu esiduduzwa ngayo uNkulunkulu.” Lapho sesithole induduzo osizini lwethu, sisizwa ukuba sibe nozwela ngabanye futhi sishukumiseleka ukuba sisize labo abanesidingo.
Njengoba ‘enguNkulunkulu wenduduzo yonke,’ uJehova akaziqedi izinkinga noma ubuhlungu esinabo. Kodwa, singaqiniseka ngalokhu: Uma siya kuye ukuze sithole induduzo, angasiqinisa ukuba sikhuthazelele noma iluphi usizi noma izinkinga esibhekana nazo ekuphileni. UNkulunkulu onozwela ngaleyo ndlela ngokuqinisekile uyakufanelekela ukuba simkhulekele futhi simdumise.
[Umbhalo waphansi]
a UNkulunkulu ubizwa ngokuthi “uYise [noma, umthombo] wesihe,” ngoba uzwela luvela kuye futhi luyingxenye yobuntu bakhe.