Yandisa Ulwazi Olunembile “Ngengqondo Enokulangazela”

ZONKE izinceku zikaJehova zifuna ukuba azamukele. Njengoba sifuna ukuba asamukele, silangazelela ukuthuthukisa izinga lokholo lwethu nokunikela inkonzo engcwele ngentshiseko. Nokho, umphostoli uPawulu, usiqaphelisa ngengozi engaba khona, eyathinta amaJuda athile osukwini lwakhe: “Banentshiseko ngoNkulunkulu; kodwa hhayi ngokolwazi olunembile.” (Roma 10:2) Ngokusobala, ukholo nokukhulekela kwethu uJehova akufanele kusekelwe emzwelweni nje kuphela. Sidinga ulwazi olunembile ngoMdali wethu nangentando yakhe.

Kwenye yezincwadi zakhe, uPawulu wahlobanisa ukuziphatha uNkulunkulu akwamukelayo nokulangazela kwethu ukuzuza ulwazi. Wathandazela abalandeli bakaKristu ‘ukuba bagcwale ulwazi olunembile’ ngentando kaNkulunkulu ‘ukuze bahambe ngokufanele uJehova ngenjongo yokumjabulisa ngokugcwele njengoba beqhubeka bethela izithelo kuyo yonke imisebenzi emihle futhi lwanda ulwazi lwabo olunembile ngoNkulunkulu.’ (Kol. 1:9, 10) Kungani kudingeka kangaka ukuba sibe ‘nolwazi olunembile’? Khona-ke, kungani kufanele silwandise lolo lwazi?

Isihluthulelo Sokholo

Ulwazi olunembile ngoNkulunkulu nangentando yakhe eyembulwe eBhayibhelini luyisisekelo sokholo lwethu. Ngaphandle kolwazi olunjalo esingalwethemba, ukholo lwethu kuJehova lungaba njengendlwana yokudlala yezingane eyenziwa ngamakhadi, engawiswa ngisho nawumoya omncane. UPawulu usikhuthaza ukuba sinikele inkonzo engcwele kuNkulunkulu ‘ngamandla ethu okucabanga futhi sishintshe ingqondo yethu.’ (Roma 12:1, 2) Ukutadisha iBhayibheli njalo kungasisiza kule ndaba.

U-Ewa oyiphayona elivamile ePoland, uyavuma: “Ukube bengingalitadishi njalo iZwi likaNkulunkulu, ngabe ulwazi lwami olunembile ngoJehova lwama ndawonye. Masinyane kwakungeke kusabonakala ukuthi ngingumKristu, nokholo lwami kuNkulunkulu lwaluyoba buthaka—ngangiyogcina ngifile ngokomoya.” Kwangathi kungelokothe kwenzeke kithi lokho! Cabanga ngesibonelo somuntu wasendulo owandisa ulwazi olunembile ngoJehova futhi ngenxa yalokho wamukelwa nguYe.

“Yeka Indlela Engiwuthanda Ngayo Umthetho Wakho!”

Ingoma esankondlo eyiHubo 119 emaBhayibhelini ethu ibonisa indlela umhubi ayezizwa ngayo ngemithetho, izikhumbuzo, imiyalo nezinqumo zokwahlulela zikaJehova. Umhubi wabhala: “Ngizobonisa ukuba nothando ngezimiso zakho. . . . Ngiyazithanda izikhumbuzo zakho.” Waphinde wabhala: “Yeka indlela engiwuthanda ngayo umthetho wakho! Uyinto engiyikhathalela usuku lonke.”—IHu. 119:16, 24, 47, 48, 77, 97.

Igama elithi, ‘uthando’ nelithi ‘ukukhathalela’ asikisela ukuzindla ngeZwi likaNkulunkulu, empeleni ukuthola injabulo kulokho kuzindla. Lezi zinkulumo zigcizelela uthando olusobala umhubi ayenalo lokutadisha umthetho kaNkulunkulu. Lolo thando lwalungashukunyiswa umzwelo owawusenhliziyweni yomhubi kuphela. Kunalokho, wayenesifiso esiqotho ‘sokukhathalela’ umthetho nesokuzuza ukuqondisisa amazwi kaJehova. Singabona esimweni sakhe sengqondo ukuthi wayefuna ukwazi uNkulunkulu nentando yaKhe ngokunembe ngangokunokwenzeka.

Kusobala ukuthi uthando lomhubi ngeZwi likaNkulunkulu lwaluvela ekujuleni kwenhliziyo yakhe. Singazibuza: ‘Ingabe kunjalo nangami? Ingabe ngithola injabulo ngokufunda nangokuhlaziya ingxenye ethile yeBhayibheli nsuku zonke? Ingabe ngikukhuthalele ukufunda iZwi likaNkulunkulu futhi ngiqala ngokuthandaza?’ Uma sikwazi ukuyiphendula ngoyebo le mibuzo, cishe ‘luyanda ulwazi lwethu olunembile ngoNkulunkulu.’

U-Ewa uthi: “Ngizama njalo ukuthuthukisa izinga lesifundo sami somuntu siqu. Kusukela sathola incwajana ethi ‘Bona Izwe Elihle,’ bengilokhu ngiyisebenzisa cishe zikhathi zonke lapho ngitadisha. Ngizama njalo ukuba ngicwaninge izinto emiqulwini ye-Insight on the Scriptures nakwezinye izincwadi zezikhombo kuye ngokwesidingo.”

Cabanga futhi nangezibonelo zikaWojciech noMałgorzata, abanemithwalo emikhulu yemfanelo yomkhaya. Benza kanjani ukuze bakwazi ukuba nesifundo somuntu siqu seBhayibheli? Bathi: “Ngamunye uzama ngangokunokwenzeka ukuzinika isikhathi sokutadisha iZwi likaNkulunkulu eyedwa. Phakathi nesifundo sethu somkhaya nasezingxoxweni zethu zansuku zonke sibe sesixoxa ngamaphuzu esiwathole ethakazelisa noma ekhuthaza.” Isifundo esijulile somuntu siqu sibalethela injabulo enkulu futhi sibasiza ukuba ‘bandise ulwazi lwabo olunembile.’

Lungisa Ingqondo Yakho Ukuze Yamukele Okutadishayo

NjengamaKristu, siyakholelwa ukuthi kuyintando kaNkulunkulu “ukuba zonke izinhlobo zabantu zisindiswe futhi zifinyelele olwazini olunembile lweqiniso.” (1 Thim. 2:3, 4) Lokhu kugcizelela ukubaluleka kokufunda iBhayibheli nokulwela ‘ukuthola umqondo walo.’ (Math. 15:10) Enye into eyosisiza ukuba senze kanjalo, ukutadisha sinengqondo ekulungele ukwamukela lokho esikutadishayo. Lesi isimo sengqondo abaseBhereya lasendulo abasibonisa lapho uPawulu ebashumayeza izindaba ezinhle: “Bamukela izwi ngengqondo enokulangazela okukhulu, behlola ngokucophelela imiBhalo nsuku zonke ukuthi zinjalo yini lezi zinto.”—IzE. 17:11.

Ingabe ulandela isibonelo sabaseBhereya sokuba nengqondo elangazelelayo nokuyigcina ingaphazanyiswa ngokungadingekile ngesikhathi utadisha iBhayibheli? UmKristu angasebenzela ekulingiseni abaseBhereya, ngisho noma esikhathini esidlule ayengabheki ukutadisha njengento ejabulisayo. Ngaphezu kwalokho, lapho abanye abantu sebekhulile ababe besafunda noma besatadisha kangako, kodwa akumelwe kube njalo ngomKristu. Kungakhathaliseki ukuthi umuntu ungakanani, angakwazi ukusebenzela ekugwemeni izithikamezo. Njengoba ufunda, ungawafuna ngokulangazela amaphuzu ongawaxoxela abanye. Ngokwesibonelo, ungakwazi yini ukuxoxela umuntu oshade naye noma umngane wakho ongumKristu izinto ozifundile lapho utadisha? Ukwenza kanjalo kungasiza ekuzigxiliseni engqondweni nasenhliziyweni yakho lezo zinto kuyilapho ziba usizo nakwabanye.

Ngokuphathelene nezikhathi otadisha ngazo, landela isibonelo sika-Ezra, inceku kaNkulunkulu yasendulo ‘owalungisa inhliziyo yakhe ukuba ahlole umthetho kaJehova.’ (Ezra 7:10) Ungakwenza kanjani lokhu? Ungaqinisekisa ukuthi indawo otadishela kuyo ikuvumela ukuba ugxilise ingqondo. Yibe usuhlala phansi futhi uthandaze kuJehova ucele isiqondiso nokuhlakanipha kwakhe. (Jak. 1:5) Zibuze, ‘Yini engilindele ukuyithola kulesi sifundo?’ Njengoba ufunda, bheka amaphuzu ayisihluthulelo. Ungase uthande ukuwabhala kafushane noma ukuphawula izingxenye ofuna ukuzikhumbula ngokukhethekile. Cabanga ngendlela ongasebenzisa ngayo lokho kwaziswa lapho ushumayela, wenza izinqumo, noma ukhuthaza okholwa nabo. Lapho usungasemaphethelweni esifundo sakho, bukeza kafushane izinto ozifundile. Lokho kuyokusiza ukuba uzikhumbule izinto ozifundile.

U-Ewa uchaza indlela atadisha ngayo: “Lapho ngifunda iBhayibheli, ngisebenzisa izikhombo ezisemavesini, i-Watch Tower Publications Index ne-Watchtower Library ekuyi-CD-ROM. Ngizibhalela amaphuzu engihlose ukuwasebenzisa enkonzweni yami.”

Sekuyiminyaka eminingi abanye bekujabulela ukutadisha ngokujulile, begxila ezintweni ezingokomoya. (IzAga 2:1-5) Noma kunjalo, banemithwalo yemfanelo eminingi futhi bakuthola kunzima ukubekela eceleni isikhathi sesifundo somuntu siqu. Uma kunjalo ngawe, ikuphi ukulungisa ongase ukwenze esimisweni sakho?

Ngingasithola Kanjani Isikhathi?

Cishe uyovuma ukuthi kulula ukwenza isikhathi sokwenza izinto ozijabulelayo. Abaningi baye bathola ukuthi into ebasizayo ukuba bagxile esifundweni somuntu siqu ukuba nomgomo ofinyelelekayo, njengokufunda iBhayibheli lonke. Kuyavunywa ukuthi kungase kubonakale kuyinselele ukufunda izinhlu ezinde zozalo, izincazelo eziningilizayo zethempeli lasendulo noma iziprofetho eziyinkimbinkimbi ezibonakala zingahlobene nokuphila kwethu kwansuku zonke. Zama ukuthatha izinyathelo ezingokoqobo zokufinyelela umgomo wakho. Ngokwesibonelo, ngaphambi kokuba ufunde ingxenye ethile yeBhayibheli ebonakala ilukhuni, ungase ufunde ngomlando ophathelene naleyo ndaba noma ngokuthi isebenza kanjani ekuphileni okungokoqobo. Ukwaziswa okunjalo kungatholakala encwadini ethi “Yonke ImiBhalo Iphefumlelwe Futhi Inenzuzo,” etholakala cishe ngezilimi ezingu-50.

Kuyaqabula ukusebenzisa iso lakho lengqondo lapho ufunda iBhayibheli. Lokhu kungakusiza ukuba uzakhele engqondweni izithombe zabantu nezenzakalo okukhulunywa ngazo. Ukusebenzisa la macebiso ambalwa cishe kuyokwenza izikhathi zakho zokutadisha zijabulise futhi zizuzise ngokwengeziwe. Khona-ke, uyokulangazelela ngokwengeziwe ukubekela eceleni isikhathi sokutadisha. Kuyoba lula ukulondoloza umkhuba wokufunda iBhayibheli nsuku zonke.

Nakuba ukusikisela okungenhla kungasisiza ngokomuntu siqu, umkhaya omatasa wona ungenzenjani? Kungani ningahlali phansi nixoxe ngokukhululekile ngezinzuzo eningazithola ngesifundo somkhaya? Kuleyo ngxoxo kungase kuvele imibono esebenzisekayo, njengokuvuka imizuzu embalwa kunangokuvamile nsuku zonke noma ngezinsuku ezithile ukuze nifunde ingxenye ethile yeBhayibheli. Noma ingxoxo yenu mhlawumbe iyobonisa ukuthi kudingeka nenze ukulungisa okuthile esimisweni senu somkhaya. Ngokwesibonelo, imikhaya ethile iye yakuthola kuyisebenzela ukuxoxa ngetekisi losuku noma ukufunda ingxenye ethile yeBhayibheli lapho iqeda ukudla. Ngaphambi kokuba noma ubani aqale ukuqoqa izitsha noma asuke eyokwenza omunye umsebenzi, umkhaya usebenzisa imizuzu eyishumi noma engu-15 uxoxa ngemiBhalo noma ufunda imiBhalo ehlelelwe ukufundwa kweBhayibheli. Ekuqaleni, lokhu kungase kubonakale kuyinselele, kodwa kungasheshe kujwayeleke futhi kube into ejabulisayo.

UWojciech noMałgorzata bachaza lokho okwasiza umkhaya wabo: “Esikhathini esidlule, isikhathi sethu sasidliwa imisebenzi engabalulekile, engasho lutho. Sanquma ukunciphisa isikhathi esasisisebenzisa sibhala ama-E-mail. Sinciphisé nesinye sesikhathi sokuzilibazisa sabe sesibekela eceleni usuku nesikhathi sokutadisha ngokujulile.” Ngokuqinisekile lo mkhaya awuzisoli ngokwenza lokho kulungisa esikhathini sawo, futhi kungaba njalo nangomkhaya wakho.

Ukwandisa Ulwazi Olunembile Kuyazuzisa!

Ukutadisha iZwi likaNkulunkulu ngokujulile ‘kungathela izithelo kuyo yonke imisebenzi emihle.’ (Kol. 1:10) Lapho lokhu kwenzeka ekuphileni kwakho, intuthuko yakho iyobonakala kubo bonke. Uyoba umuntu ongokomoya onokuqonda okubanzi kwamaqiniso eBhayibheli. Izinqumo zakho ziyoba ezilinganiselayo futhi uyoba nekhono ngokwengeziwe ekunikezeni usizo kwabanye, ungeqisi njengoba kuvame ukwenza abantu abangenalwazi. Ngaphezu kwalokho, uyosondela kakhudlwana kuJehova. Uyozazisa ngokujule ngokwengeziwe izimfanelo zakhe, futhi lokhu kuyobonakala njengoba utshela abanye ngaye.—1 Thim. 4:15; Jak. 4:8.

Kungakhathaliseki ukuthi uneminyaka emingaki noma unokuhlangenwe nakho okungakanani, yenza wonke umzamo wokuqhubeka uthola injabulo eZwini likaNkulunkulu futhi uzinika isikhathi sokulitadisha ngokujulile unengqondo elungele ukwamukela okufundayo. Ungaqiniseka ukuthi uJehova ngeke ayikhohlwe imizamo yakho. (Heb. 6:10) Uyokuthululela izibusiso zakhe ezicebile.

[Ibhokisi ekhasini 13]

LAPHO ‘LWANDA ULWAZI LWETHU OLUNEMBILE’. . .

Siqinisa ukholo lwethu kuNkulunkulu futhi sihambe ngokufanele uJehova.—Kol. 1:9, 10

Sithola ukuqonda, sikwazi ukukusebenzisa nokwenza izinqumo ezinengqondo.—IHu. 119:99

Sikujabulela ngokwengeziwe ukusiza abanye ukuba basondele kuJehova.—Math. 28:19, 20

[Izithombe ekhasini 14]

Ukuthola indawo efanelekayo yokutadisha kungaba inselele kodwa kuyatuseka

[Isithombe ekhasini 15]

Eminye imikhaya ifunda ingxenye ethile yeBhayibheli ngemva kokudla