Babehlanganiswe Uthando—Umbiko Womhlangano Waminyaka Yonke

INJABULO yayichichima kubo bonke ababekhona eHholo LoMhlangano loFakazi BakaJehova laseJersey City, eNew Jersey, e-U.S.A. Ekuseni ngo-October 3, 2009, kwakunabantu abangaphezu kuka-5 000 emhlanganweni waminyaka yonke we-125 we-Watch Tower Bible and Tract Society of Pennsylvania. Ezinye izinkulungwane zazilalele futhi zibukele isimiso esasixhunywe ngezingcingo nangama-video zisezakhiweni ezintathu zaseBethel yase-United States naseBethel yaseCanada. Sebebonke ababelalele bangu-13 235, behlanganiswe uthando lwabo ngoJehova futhi bawujabulela lo mhlangano owathatha amahora amathathu.

Usihlalo kwakunguGeoffrey Jackson oyilungu leNdikimba Ebusayo. Waqala isimiso ngokwethula ikwaya yaseBethel eyacula izingoma ezithathwe eculweni lethu elisha. Yayiqondiswa uDavid Splane, naye oyilungu leNdikimba Ebusayo, owachaza kafushane ngendima ebalulekile yomculo ekukhulekeleni okuhlanzekile. Ababekhona kulowo mhlangano bacelwa ukuba bacule izingoma ezintsha ezintathu; ikwaya yacula yodwa kuqala kwabe sekungena izilaleli, bacula ndawonye. Ukuba nekwaya kwakwenzelwa lo mbuthano okhethekile kuphela; akukhona ukuthi sekuyinqubo okufanele ilandelwe emabandleni, emihlanganweni yesifunda nakweyesigodi.

Imibiko Evela Emagatsheni

Amalungu amaKomiti Amagatsha ayehambele lo mhlangano anikeza imibiko ngamagatsha amahlanu. UKenneth Little waphawula ukuthi maduze iCanada izoqala ukunyathelisa abaningi bomagazini abadingwa i-United States neCanada, okwenza ukuba umsebenzi wegatsha lakhona wande ngokuphindwe kashumi. Ukuze ikwazi ukuwenza wonke lo msebenzi, kuzodingeka ukuba umshini wokunyathelisa esanda kuwuthola usebenze amashifu amabili, amahora angu-16 ngosuku.

UReiner Thompson wabika ngomsebenzi woMbuso eDominican Republic, u-Albert Olih wakhuluma ngomsebenzi wethu eNigeria. U-Emile Kritzinger ovela egatsheni laseMozambique wachaza ukuthi ngemva kwamashumi eminyaka kunoshushiso, oFakazi BakaJehova babhaliswa ngokomthetho ngo-1992. Muva nje kube nokwanda okukhulu kwabamemezeli kula mazwe amathathu. UViv Mouritz ovela egatsheni lase-Australia wakhuluma ngentuthuko eyenzeka ezweni lase-East Timor, elinakekelwa abazalwane base-Australia.

Amakomiti ENdikimba Ebusayo

Ngo-1976, kwahlelwa ukuba yonke imisebenzi yoFakazi BakaJehova iqondiswe amakomiti ayisithupha eNdikimba Ebusayo. Kamuva, kwanezelwa abasizi abangamalungu esigaba sezinye izimvu. Manje sekunabasizi abangu-23 kulawo makomiti. Kwaxoxwa nabayisithupha. Sebebonke baneminyaka engu-341 besenkonzweni yesikhathi esigcwele—okuyisilinganiso seminyaka engu-57 umuntu ngamunye.

UDon Adams, owafika eBethel ngo-1943, wachaza ukuthi iKomiti Yabaxhumanisi yakhiwa abaxhumanisi abahlanu bamanye amakomiti, iqinisekisa ukuthi wonke la makomiti amahlanu asebenza ngokushelela. Le komiti isingatha izindaba eziphathelene nezimo eziphuthumayo ezinkulu, ushushiso, amacala asezinkantolo, izinhlekelele nezinye izindaba eziphuthumayo ezithinta oFakazi BakaJehova emhlabeni wonke.

UDan Molchan wakhuluma ngomsebenzi weKomiti Yezisebenzi enakekela inhlalakahle engokomoya nengokwenyama yamalungu angu-19 851 emikhaya yaseBethel emhlabeni wonke. UDavid Sinclair wakhuluma ngendlela iKomiti Yokunyathelisa eyengamela ngayo ukuthengwa kwezinto nemishini esetshenziswa emagatsheni. Kwabe sekulandela uRobert Wallen, osekhonze eBethel iminyaka engaba ngu-60, owakhuluma ngendlela iKomiti Yenkonzo eqondisa ngayo umsebenzi wabantu bakaJehova ensimini nasemabandleni. UWilliam Malenfant wakhuluma kafushane ngomsebenzi onzima owenziwa iKomiti Yokufundisa lapho ilungiselela isimiso somhlangano wesigodi. Ekugcineni, uJohn Wischuk wachaza umsebenzi weKomiti Yokubhala wokwengamela ukulungiselelwa nokuhlaziywa ngokucophelela kwalokho okunyatheliswa ezincwadini zethu.a

Isihloko Sonyaka Ka-2010 Sigxile Othandweni

Izinkulumo ezintathu ezalandela zanikezwa amalungu eNdikimba Ebusayo. UGerrit Lösch waqala inkulumo yakhe ngalo mbuzo, “Ingabe uyafuna ukuthandwa abanye?” Wachaza ukuthi uthando luyisidingo esiyisisekelo sabantu, futhi sonke siyajabula lapho siluthola. Sikhona nje kungenxa yothando ngoba uJehova wasidala eshukunyiswa uthando olungenabugovu. Uthando ngoJehova luyisisusa esiyinhloko sokushumayela nokufundisa kwethu.

Asigcini nje ngokubonisa omakhelwane bethu uthando olusekelwe ezimisweni kodwa silubonisa nezitha zethu. (Math. 5:43-45) Ababekhona bakhuthazwa ukuba bacabange ngalokho uJesu abhekana nakho ngenxa yethu, ukushaywa, ukwedelelwa, ukukhafulelwa nokuhlatshwa. Noma kunjalo, wawathandazela amasosha ambethela. Lokhu akusenzi yini ukuba simthande nakakhulu? UMfoweth’ uLösch wabe esememezela ukuthi isihloko sonyaka ka-2010 sisekelwe kweyoku-1 Korinte 13:7, 8: ‘Uthando lukhuthazelela zonke izinto. Uthando alusoze lwaphela nanini.’ Akukhona nje ukuthi sinethuba lokuphila phakade kodwa nelokuthanda nokuthandwa phakade.

Ingabe Usuzophelelwa Uphethiloli?

USamuel Herd waqala inkulumo yakhe ngomfanekiso. Wathi, ake sithi umngane wakho ukulanda ngemoto, nizothatha uhambo lwamakhilomitha angu-50. Lapho usungaphakathi uqaphela ukuthi igeji kaphethiloli ibonisa ukuthi usuphelile. Uyamtshela umngane wakho ukuthi uphethiloli usuyaphela. Athi ungakhathazeki; cishe kusenamalitha amane ethangini. Kuthi kungakabiphi, uphele uphethiloli. Kuwukuhlakanipha yini ukuhamba ‘ngophethiloli osuzophela’ ube wazi ukuthi ungahle ukuphelele esithubeni? Yeka ukuthi kungcono kanjani ukuba uhlale unophethiloli ogcwele! Ngokomfanekiso, kudingeka sihlale sinophethiloli ogcwele, owulwazi lwethu ngoJehova.

Ukuze lokhu kwenzeke, kudingeka siwethe njalo. Singawugcwalisa ngezindlela ezine. Eyokuqala, isifundo somuntu siqu esisenza sijwayelane neBhayibheli ngokulifunda nsuku zonke. Kumelwe singabi ukufunda amagama nje, kunalokho kumelwe sikuqonde lokho esikufundayo. Eyesibili, ukulisebenzisa kahle ilungiselelo lokuKhulekela Komkhaya kwakusihlwa. Ingabe siyama masonto onke sigcwalise uphethiloli noma setha inkeshezana nje emathangini ethu? Eyesithathu, ukuba khona nokuhlanganyela emihlanganweni yebandla. Eyesine, ukuzindla endaweni ethule, engenaziphazamiso, sicabange ngezindlela zikaJehova. IHubo 143:5 lithi: “Ngikhumbulé izinsuku zakudala; ngizindlé ngawo wonke umsebenzi wakho.”

“Abalungileyo Bayokhanya”

UJohn Barr, wanikeza inkulumo yesithathu engeyokugcina, eyachaza umfanekiso kaJesu kakolweni nokhula. (Math. 13:24-30, 38, 43) Lo mfanekiso ukhuluma ‘ngokuvuna’ okuyothi phakathi nako “abantwana bombuso” babuthelwe ndawonye nokhula luhlukaniswe ukuze lushiswe.

UMfoweth’ uBarr wacacisa ukuthi ukubuthwa kwakungeke kuqhubeke phakade. Wabhekisela kuMathewu 24:34 othi: “Lesi sizukulwane asisoze sadlula zingakenzeki zonke lezi zinto.” Wawafunda kabili la mazwi: “Ngokusobala uJesu wayesho ukuthi ukuphila kwabagcotshiweyo ababekhona lapho isibonakaliso siqala ukubonakala ngo-1914 kwakuyokwelekela kokwabanye abagcotshiweyo ababeyobona ukuqala kosizi olukhulu.” Asazi ngokuthé ngqo ukuthi “lesi sizukulwane” side kangakanani kodwa sihlanganisa la maqembu amabili abantu, okuphila kwawo kwelekela kokwelinye nelinye. Nakuba abagcotshiwe bengalingani ngeminyaka, abakula maqembu amabili akha lesi sizukulwane baphila ngesikhathi esifanayo, engxenyeni ethile yezinsuku zokugcina. Yeka ukuthi kududuza kanjani ukwazi ukuthi amaKristu agcotshiwe asemancane aphila ngasikhathi sinye nalawo asekhulile aqonda isibonakaliso lapho siqala ukuvela ngo-1914, ngeke afe aphele ngaphambi kokuba usizi olukhulu luqale!

“Abantwana bombuso” bawulinde ngokulangazela okukhulu umvuzo wabo wasezulwini, kodwa sonke kumelwe sihlale sithembekile, sikhanya kuze kube sekugcineni. Yeka ilungelo esinalo lokubona ukubuthwa “kukakolweni” esikhathini sethu!

Ngemva kwengoma yokuphetha, uTheodore Jaracz, oyilungu leNdikimba Ebusayo waphetha ngomkhuleko. Yeka isimiso esikhuthazayo umhlangano waminyaka yonke owaba yiso!

[Umbhalo waphansi]

[Ibhokisi ekhasini 5]

ISIKOLE SABADALA

Kulo mhlangano waminyaka yonke, u-Anthony Morris oyilungu leNdikimba Ebusayo wamemezela ukuthi kuzoqeqeshwa abadala bamabandla ngokuqhubekayo. Isikole sabadala base-United States saqala ekuqaleni kuka-2008 esikhungweni semfundo ePatterson, eNew York. Kusanda kuphela ikilasi lama-72 futhi sekuqeqeshwe abadala abangu-6 720. Luselude ukhalo. E-United States nje kuphela, kunabadala abangaphezu kuka-86- 000. Ngakho, iNdikimba Ebusayo yagunyaza ukuba kube nesinye isikole eBrooklyn, eNew York, esiqale ngo-December 7, 2009.

Kuzoqeqeshwa ababonisi abajikelezayo abane izinyanga ezimbili ePatterson abazofundisa kulezi zikole. Bazobe sebeyiswa eBrooklyn ukuze bayofundisa, bese kuqeqeshwa abanye abane. Bazofundisa esikoleni esizobe siseBrooklyn bese kuthi laba abane bokuqala bafundise ezikoleni eziyobe zisemaHholo OMhlangano nasemaHholo OMbuso. Lokhu kuzokwenziwa kuze kube yilapho sekunabafundisi abangu-12 abafundisa izikole eziyisithupha masonto onke ngesiNgisi e-United States. Abafundisi abane bazobe sebeqeqeshelwa ukufundisa ngeSpanishi. Lesi sikole ngeke sithathe indawo yeSikole Senkonzo SoMbuso esikhona; injongo yaso iwukuba kuthuthukiswe ingokomoya labadala. Emhlabeni wonke, amagatsha ayoqala ukuqhuba lezi zikole emaHholo OMhlangano nasemaHholo OMbuso phakathi nonyaka wenkonzo ka-2011.

[Izithombe ekhasini 4]

Umhlangano waminyaka yonke wavulwa ngezingoma eziseculweni lethu elisha elithi, “Hubelani UJehova”