Sondela KuNkulunkulu
Lapho Abagugile Bebuyela Ebusheni
UBANI kithi othanda ukuguga—isikhumba esishwabene, ukungaboni kahle, ukungezwa kahle nemilenze exegezelayo? Ungase uzibuze, ‘Kungani uNkulunkulu asidala sinamandla okujabulela ubungqabavu bobusha kanti kamuva sizobhekana nemiphumela yokuguga?’ Izindaba ezinhle ziwukuthi uNkulunkulu wayengahlosile ukuba siguge. Kunalokho, injongo yakhe yothando iwukusikhulula enqubweni yokuguga! Phawula amazwi atshelwa inzalamizi uJobe, kuJobe 33:24, 25.
Cabanga ngesimo sikaJobe, indoda eqotho uJehova ayeyithanda. Engazi, uSathane wasola ubuqotho bakhe, ethi ukhonza uNkulunkulu ngezizathu zobugovu. Ngenxa yokuthi uJehova wayemethemba uJobe futhi ewazi amandla aKhe okuqeda ububi, wavumela uSathane ukuba amvivinye. USathane wabe ‘eseshaya uJobe ngamathumba abulalayo kusukela ematheni onyawo kwaze kwaba sokhakhayini.’ (Jobe 2:7) Inyama kaJobe yagcwala izimpethu, isikhumba sakhe soma, saba mnyama futhi saxebuka. (Jobe 7:5; 30:17, 30) Cabanga ngobuhlungu ayebuzwa! Nokho, uJobe waqhubeka ethembekile, ethi: “Ngeke ngiziphuce ubuqotho bami ngize ngiphangalale!”—Jobe 27:5.
Noma kunjalo, wenza iphutha elikhulu. Ecabanga ukuthi usezokufa, wakhathazeka ngokweqile ngokubonisa ukuthi ulungile, ‘ethi umphefumulo wakhe ulungile kunokuba athi nguNkulunkulu olungile.’ (Jobe 32:2) Umkhulumeli kaNkulunkulu u-Elihu wamsola uJobe kodwa wadlulisela nomyalezo oqinisayo kuJobe uvela kuNkulunkulu: “Mkhulule [uJobe] ukuze angehleli egodini [ithuna elivamile]! Ngitholé isihlengo! Inyama yakhe mayibe ntsha kunasebusheni; makabuyele ezinsukwini zobungqabavu bobusha bakhe.” (Jobe 33:24, 25) Kumelwe ukuba lawo mazwi amqinisa idolo. Wayengeke aqhubeke ezwa ubuhlungu aze afe. Uma uJobe ayephenduka, uNkulunkulu wayengakujabulela ukwamukela isihlengo futhi amkhulule osizini.a
UJobe wakwamukela ngokuthobeka ukusolwa futhi waphenduka. (Jobe 42:6) Ngokusobala, uJehova wasamukela isihlengo esenziwa ngenxa kaJobe, wasivumela ukuba semboze isiphambeko sakhe futhi sivule indlela yokuba uNkulunkulu amenze alulame futhi ambusise. UJehova “wabusisa isiphetho sikaJobe kamuva ngaphezu kwesiqalo sakhe.” (Jobe 42:12-17) Cabanga ngempumuzo uJobe ayithola lapho isifo sakhe esibi siphela, inyama yakhe iba ‘yintsha kunasebusheni,’ futhi ethola ezinye izibusiso!
Isihlengo uNkulunkulu asamukela ngenxa kaJobe sasinenani elilinganiselwe ngoba le ndoda yaqhubeka ingaphelele futhi kamuva yafa. Thina sinesihlengo esingcono kakhulu. Ngothando, uJehova wanikela ngeNdodana yakhe, uJesu, yaba isihlengo sethu. (Mathewu 20:28; Johane 3:16) Bonke ababonisa ukholo kuleso sihlengo banethemba lokuphila phakade emhlabeni oyipharadesi. Kulelo zwe elisha elizayo, uNkulunkulu uyokhulula abantu abathembekile ekugugeni. Sikukhuthaza ukuba ufunde okwengeziwe ngokuthi yini ongayenza ukuze uphile uze ubone isikhathi lapho abagugile beyobona inyama yabo iba ‘yintsha kunasebusheni.’
Izahluko zeBhayibheli ongazifunda ngo-April:
[Umbhalo waphansi]
a Igama elithi “isihlengo” elisetshenziswe lapha lisho “ukwemboza.” (Jobe 33:24) Endabeni kaJobe, isihlengo kwakungaba umhlatshelo wesilwane uNkulunkulu ayengawamukela ukuze wemboze noma uhlawulele isiphambeko sikaJobe.—Jobe 1:5.