IBhayibheli Lishintsha Ukuphila
YINI eyashukumisela umlimi wogwayi ukuba ashintshe umsebenzi nezinkolelo zakhe ezingokwenkolo ezijulile? Kwenzeka kanjani ukuba umuntu owayeyisidakwa athole amandla okushintsha indlela yakhe yokuphila? Funda njengoba bechaza.
“Ngiyathanda Ukuba Ilungu Lalo Mkhaya Omkhulu.”—UDINO ALI
UNYAKA AZALWA NGAWO: 1949
IZWE AZALELWA KULO: I-AUSTRALIA
UMLANDO: WAYENGUMLIMI WOGWAYI
UKUPHILA KWAMI: Abazali bami bathutha e-Albania ngo-1939 bayohlala eMareeba, idolobhana laseQueensland, e-Australia. Iningi lamaBosnia, amaGreki, amaNtaliyane namaSerbia liphakathi kwabanye abathuthela kule ndawo, lafika nezindlela zalo zokwenza izinto, izinkolelo namasiko. IMareeba kwakuyindawo ekahle yokulima ugwayi futhi nabazali bami baqala ukuwulima.
Ngokushesha, kwazalwa udadewethu omdala, kwalandela abafowethu ababili kwase kuba yimina. Ngokudabukisayo, ubaba wabulawa isifo senhliziyo nginonyaka owodwa ubudala. Umama waphinde washada wayesethola amanye amadodana amane. Sonke sakhulela epulazini likagwayi likababa wethu wokutholwa.
Lapho sengiyibhungu ngahamba ekhaya. Kwathi lapho ngisanda kweva eminyakeni engu-20 ngashada noSaime, sashadela esontweni lamaSulumane lasendaweni, kwazise sobabili sasingamaSulumane. Zonke izihlobo zami zaba amaSulumane. Ngafunda iKoran nencwadi yomlando womprofethi uMuhammad. Ngesikhathi esifanayo ngangifunda iBhayibheli elincane. IKoran ikhuluma ngabaprofethi okukhulunywa ngabo eBhayibhelini futhi ukufunda iBhayibheli kwangisiza ngaqonda ukuthi babephila nini.
Savakashelwa oFakazi BakaJehova emzini wami futhi babevame ukusishiyela omagazini nezincwadi esasikujabulela ukuzifunda sinoSaime. Ngisazikhumbula izingxoxo eziningi ezithakazelisayo noFakazi ngezihloko ezihlukahlukene. Isikhathi ngasinye, babephendula imibuzo yami ngeBhayibheli kunokuba basho imibono yabo. Lokho kwangihlaba umxhwele ngempela.
OFakazi bacela ukufunda nami iBhayibheli futhi bangimemela nasemihlanganweni yabo kodwa ngangihlale ngenqaba. Into eyayibaluleke kakhulu kimi kwakuwukuba nepulazi elithi mina futhi ngibe nomkhaya omkhulu. Angizange ngibe nalo ipulazi elithi mina kodwa ngiyajabula ngokuthi ekugcineni ngaba nezingane ezinhlanu.
INDLELA IBHAYIBHELI ELAKUSHINTSHA NGAYO UKUPHILA KWAMI: Nakuba kwase kudlule iminyaka engu-9 ngaqala ukuxhumana noFakazi BakaJehova, ngangingakazishintshi izinkolelo zami. Nokho, ngangizamukela futhi ngizifunda ngenjabulo izincwadi zabo. Njalo ngamaSonto mina noSaime sasizinika isikhathi sokuzifunda. Sabagcina bonke omagazini esasibathole eminyakeni eyedlule. Baba usizo olukhulu lapho abanye bevivinya ukholo olwalukhula enhliziyweni yami.
Ngokwesibonelo, ngahlangana nomshumayeli ongumvangeli owazama ukungiphoqa ukuba ngamukele uJesu njengoMsindisi wami. Wayekwazile ukudonsela umfowabo kaSaime nomfowethu ngamzali-munye esontweni lakhe. Ngokushesha, abantu engibajwayele abasonta emasontweni ahlukahlukene baqala ukuzama ukuhehela emasontweni abo. Abanye babenginikeza izincwadi ezazinyembenya oFakazi BakaJehova. Ngacela laba bagxeki ukuba bangibonise eBhayibhelini izimfundiso ababezifundisa kodwa behluleka.
Konke lokhu kuphikiswa kwangenza ngemba ngajula eBhayibhelini futhi ngacwaninga ngokwengeziwe ngisebenzisa omagazini engibathole koFakazi. Ekugcineni, ngabona ukuthi sekuyisikhathi sokuthatha isinyathelo ngenze lokho engangikufunda.
Akekho uFakazi owayengiqhubela isifundo seBhayibheli; ngavele ngaqala ukuya emihlanganweni yabo. Ekuqaleni ngangethukile futhi nginamahloni kodwa ngahlangana nabantu abaningi abanobungane kuleyo mihlangano futhi ngangikujabulela engangikufunda. Nganquma ukuba omunye woFakazi BakaJehova, ngo-1981 ngabonisa ukuzinikezela kwami kuNkulunkulu ngokubhapathizwa.
Umkami akazange amelane nesinqumo sami yize ngezinye izikhathi ayezibuza ukuthi angidukisiwe yini. Noma kunjalo, waba khona lapho ngibhapathizwa. Ngaqhubeka ngixoxa naye ngamaqiniso amaningi engangiwafunda. Cishe ngemva konyaka ngibhapathiziwe, sihamba ngemoto siya ekhaya sibuya ukuyovakasha, uSaime wangitshela ukuthi usefuna ukuba uFakazi. Angikholwanga, kwakungathi ngiyaphupha! Wabhapathizwa ngo-1982.
Ukwenza izinguquko ezidingekayo ekuphileni kwethu kwakungelula. Ngayeka ukulima ugwayi ngoba kuphambene nalokho okufundiswa iBhayibheli. (2 Korinte 7:1; Jakobe 2:8) Kwathatha isikhathi ngaphambi kokuba sithole umsebenzi ofanelekayo owawuzosinikeza imali ekahle. Kwadlula neminyaka eminingi ezinye izihlobo zethu zisidubile zingafuni ukusivakashela. Sazama ukuziphatha ngothando njengoba kusho iBhayibheli. Ekugcineni, isimo saba ngcono futhi manje izihlobo zethu eziseduze azisasigwemi.
INDLELA ENGIYE NGAZUZA NGAYO: Ukudlula ekuvivinyweni okuningi kungakhathaliseki ukuthi okokunqoba amahloni ami, ukubhekana nezinkinga zezimali noma ukuphikiswa izihlobo kungifundise ukuthi uJehova uNkulunkulu unesineke kangakanani ekungisizeni ngibhekane nezinkinga zami. Ngokwesibonelo, manje ngikhonza njengomdala webandla futhi kumelwe ngifundise obala. Lokhu kuseyinselele kimi ngoba nginenkinga yamalimi abangelwa ukwethuka. Kodwa ngenxa yokuthandaza njalo nangosizo lukaJehova, ngiyakwazi ukufeza leli lungelo.
Mina nomkami siye sasondelana futhi ubuhlobo esinabo abunakuqhathaniswa. Akhona amaphutha esawenza lapho sikhulisa izingane zethu kodwa sikwenze konke ukuze sigxilise kuzo amaqiniso eBhayibheli esawafunda. (Duteronomi 6:6-9) Empeleni indodana yami endala nomkayo bakhonza njengezithunywa zevangeli.
Ngikhumbula ngesinye isikhathi sisanda kuqala ukuya emihlanganweni yoFakazi njengomkhaya. Ngapaka imoto ngase ngilunguza isixuku esasihlangene ehholo. Ngabuza umkhaya wami, “Niyabona yini?” Ngaphakathi kwakukhona abantu bezizwe, izizinda nezilimi ezahlukahlukene—aboMdabu, abase-Albania, abase-Australia nabaseCroatia—kodwa babehlangene ndawonye bejabule. Ngiyathanda ukuba ilungu lalo mkhaya omkhulu wabafowethu nodadewethu abangokomoya, ongagcini nje ngokuba se-Australia kodwa emhlabeni wonke.—1 Petru 5:9.
“Udadewethu Akazange Angidele.”—UYELENA VLADIMIROVNA SYOMINA
UNYAKA AZALWA NGAWO: 1952
IZWE AZALELWA KULO: IRUSSIA
UMLANDO: WAYEYISIDAKWA, WAZAMA NOKUZIBULALA
UKUPHILA KWAMI: Ngazalelwa eKrasnogorsk idolobhana elinokuthula eliseduze kwaseMoscow. Ngakhulela emkhayeni wothisha. Ngangikhaliphile esikoleni futhi ngaqeqeshelwa umculo. Ikusasa lami lalibukeka liqhakazile.
Lapho sishada, mina nomyeni wami sathuthela endaweni lapho ukuthuka inhlamba, ukudakwa nokubhema kwakuyizinto ezivamile. Angizange nginake ngaleso sikhathi kodwa leyo ndawo yaba nethonya elibi kimi. Ekuqaleni ngangiya emaphathini ukuze nje ngiyocula ngidlale nesiginci. Nokho, kwakuthi uma ngilapho abantu banginikeze ugwayi notshwala. Kungakabiphi ngase ngingene shí otshwaleni.
Ukuphuza ngokweqile kwaqala ukonakalisa impilo yami. Kwathatha isikhathi ukuba ngikubone lokho, kodwa kwathi lapho ngisanguluka angibange ngisakwazi ngisho ukudla. Ngangifuna ukufa futhi ngazama nokuzibulala. Ngiyajabula ngokuthi angizange ngiphumelele.
Kukho konke lokhu, udadewethu wayelokhu engivakashela. Wayesengomunye woFakazi BakaJehova futhi wazama ukungichazela ukuthi iBhayibheli lingangisiza kanjani. Ngangingalifuni iBhayibheli, ngakho ngaqale ngenqaba ukuba angichazele. Kodwa akazange angidele. Wangibekezelela futhi wangibonisa uthando kangangokuba ekugcineni ngavuma ukufunda iBhayibheli.
INDLELA IBHAYIBHELI ELAKUSHINTSHA NGAYO UKUPHILA KWAMI: Ngemva kokuba sengiqale ukufunda iBhayibheli ngenza isinqumo esiqinile sokuyeka utshwala. Phakathi naleso sikhathi, ngahlaselwa futhi ngashaywa umakhelwane wami owayedakiwe. Ngayiswa esibhedlela ngisesimweni esibucayi. Ngaphuka izimbambo ezine, ngalimala neso. Nokho, ukuhlala kwami esibhedlela kwangisiza ngabhekana nezimpawu eziyimiphumela yokuyeka utshwala.
Phakathi nalesi sikhathi ngangithandaza ngingaphezi. UmBhalo weBhayibheli owawungiduduza kakhulu isiLilo 3:55, 56, othi: “Ngimemezé igama lakho ngisemgodini wohlobo oluphansi impela. Izwi lami kumelwe ulizwe. Ungayifihli indlebe yakho ekungiphumuzeni, ekukhaleleni kwami usizo.”
Ngiqiniseka ngempela ukuthi uJehova wayiphendula imithandazo yami. Wanginikeza amandla okungalokhu ngibuyela emuva. Kunezikhathi lapho ngangilingeka ukuba ngibuyele otshwaleni kodwa ngiyajabula ngoba angizange ngisivumele leso silingo.
Njengoba ngiqhubeka ngifunda iBhayibheli, ngathola ukuthi kudingeka ngisekele umyeni wami endimeni yakhe yokuba inhloko yekhaya. (1 Petru 3:1, 2) Kwakungelula ukukwenza lokho ngoba ngase ngijwayele ukumdonsa ngekhala. Ngathandazela usizo lukaJehova. Angizange ngishintshe ngelanga elilodwa kodwa kancane kancane ngaba inkosikazi ongcono esekelayo.
Lapho ebona lolu shintsho, umyeni wami wamangala. Kuze kube yileso sikhathi wayengalithandi iBhayibheli. Kodwa lapho nginquma ukuthi ngifuna ukuyeka ukubhema, wathi: “Mhla wayeka ukubhema, nami ngiyoqala ukufunda iBhayibheli!” Sobabili sayeka ukubhema ngelanga elilodwa.
INDLELA ENGIYE NGAZUZA NGAYO: Umyeni wami wasigcina isithembiso sakhe waqala ukufunda iBhayibheli. Manje sifunda iBhayibheli ndawonye nsuku zonke, sizindle ngalokho esikufundayo futhi sisebenzise iseluleko salo ekuphileni kwethu.
Ngeke ngikwazi ukuchaza indlela umkhaya wethu osuthuthuke ngayo—ingasaphathwa eyokuthi mina ngokwami ngizuze kanjani. Ngiyambonga uJehova ngokungidonsela kuye. (Johane 6:44) Angive ngimbonga nodadewethu ongazange angidele. Ngenxa yalokhu, ngiye ngazibonela mathupha ukuthi iBhayibheli liyakushintsha ngempela ukuphila kwabantu.
[Amazwi acashunwe esihlokweni ekhasini 11]
Ngabona ukuthi sekuyisikhathi sokuba ngithathe isinyathelo
[Amazwi acashunwe esihlokweni ekhasini 13]
Udadewethu wangibekezelela futhi wangibonisa uthando kangangokuba ekugcineni ngavuma ukufunda iBhayibheli