Qhubeka Ushumayela!
1 Kuyintando kaNkulunkulu ukuba “zonke izinhlobo zabantu zisindiswe futhi zifinyelele olwazini olunembile lweqiniso.” (1 Thim. 2:4) Ngenxa yalokhu, uye wasinikeza isabelo sokushumayela izindaba ezinhle. (Math. 24:14) Uma sibona ukuthi kungani kufanele siqhubeke sishumayela, ngeke sithiywe yizinto ezidumazayo noma ezingase zisiphazamise.
2 Kungani Siphikelela? Kuneziphazamiso eziningi emhlabeni ezibangela abantu ukuba bakukhohlwe noma bakuthathe kalula esibatshela kona. Ngakho kufanele sihlale sibakhumbuza isigijimi sikaNkulunkulu sensindiso. (Math. 24:38, 39) Ngaphezu kwalokho, izimo ekuphileni kwabantu ziyashintshashintsha. Ngisho nezimo zomhlaba zingashintsha ngokuphazima kweso. (1 Kor. 7:31) Kusasa, ngesonto elizayo noma ngenyanga ezayo abantu esishumayela kubo bangase babhekane nezinkinga ezintsha noma ukukhathazeka okubenza bacabange ngokungathi sína ngezindaba ezinhle esibalethela zona. Awubongi yini wena ngokuthi uFakazi owakulethela iqiniso waphikelela?
3 Ukulingisa Umusa KaNkulunkulu: Ngesineke uJehova uye wavumela ukuba kudlule isikhathi eside ngaphambi kokuba alethe isahlulelo kwababi. Esebenzisa thina, uye waqhubeka enxusa abanezinhliziyo ezilungile ukuba baphendukele kuye futhi basindiswe. (2 Pet. 3:9) Besiyoba necala legazi ukube besingasimemezeli isigijimi sikaNkulunkulu somusa kubantu futhi sibaxwayise ngokukhishwa kwesahlulelo sikaNkulunkulu kubo bonke abangaphenduki ezindleleni zabo ezimbi. (Hez. 33:1-11) Nakuba ukushumayela kwethu kungamukelwa kahle ngaso sonke isikhathi, akufanele neze siyekethise ekwenzeni umzamo wokusiza abaqotho ukuba bazise umusa omkhulu kaNkulunkulu.—IzE. 20:26, 27; Roma 12:11.
4 Ukubonisa Uthando Lwethu: NguJehova uNkulunkulu, ngoJesu Kristu, owakhipha umyalo wokuba izindaba ezinhle zishunyayelwe emhlabeni wonke. (Math. 28:19, 20) Ngisho nalapho abantu benqaba ukulalela, sinethuba lokubonisa uthando lwethu nokuzinikela kwethu kuNkulunkulu ngokuphikelela senza okulungile.—1 Joh. 5:3.
5 Kwangathi singazimisela ukuqhubeka sishumayela! Masikwenze ngentshiseko lungakadluli ‘usuku lukaJehova lwensindiso.’—2 Kor. 6:2.