Kungani Siqhubeka Sishumayela?
1 Ingabe umsebenzi wokushumayela ngoMbuso usuqhutshwe isikhathi eside endaweni yakini? (Math. 24:14) Uma kunjalo, ungase ube nomuzwa wokuthi insimu yebandla isihlanganiswe ngokwanele. Manje lapho ushumayela, mhlawumbe abantu abaningi ohlangana nabo babonakala bengasigqizi qakala isigijimi soMbuso. Noma kunjalo, phawula lokho okuvunywayo ngabafundi bakaJesu beqiniso ekhasini 141 lencwadi Isiprofetho Sika-Isaya II: “Ezindaweni ezithile imiphumela yenkonzo yabo ingase ibonakale iwubala uma iqhathaniswa nobungako bomsebenzi nomzamo owenziwe. Noma kunjalo bayakhuthazela.” Kodwa kungani siqhubeka sishumayela?
2 Khumbula UJeremiya: Ukukhuthazela kwethu ngokwethembeka emsebenzini wokushumayela akufanele kuncike ekutheni abantu bayasilalela yini noma cha. UJeremiya washumayela iminyaka engu-40 ensimini efanayo nakuba babembalwa kakhulu ababemlalela kuyilapho abaningi babemelene nesigijimi sakhe. Kungani uJeremiya aphikelela? Ngoba wayenza umsebenzi ayeyalwe nguNkulunkulu ukuba awenze futhi ulwazi lwakhe ngokuphathelene nalokho okwakuzokwenzeka esikhathini esizayo lwamshukumisela ukuba aqhubeke ekhuluma ngesibindi.—Jer. 1:17; 20:9.
3 Isimo sethu siyafana. UJesu “wasiyala ukuba sishumayele kubantu futhi sinikeze ubufakazi obuphelele bokuthi lona nguYe uNkulunkulu anquma ukuba abe umahluleli wabaphilayo nabafileyo.” (IzE. 10:42) Isigijimi esisiphethe siyindaba yokufa nokuphila kulabo abasizwayo. Abantu bayokwahlulelwa ngokwendlela abasabela ngayo ezindabeni ezinhle. Ngenxa yalokho, umthwalo wethu wemfanelo uwukwenza njengoba nje siyaliwe. Ngisho noma abantu benqaba ukulalela, lokhu kusinika ithuba lokubonisa ukujula kothando lwethu ngabo nokuzinikela kwethu kuJehova ngokuphikelela senza okumelwe sikwenze. Kodwa kunokwengeziwe.
4 Siyazuza: Ukwenza intando kaNkulunkulu, kungakhathaliseki ukuthi abantu basabela kanjani ensimini, kusenza sibe nokuthula kwangaphakathi, sibe nokwaneliseka, nenjabulo, okungenakutholakala nganoma iyiphi enye indlela. (IHu. 40:8) Ukuphila kwethu kuba nenjongo yangempela. Lapho sihlanganyela ngokwengeziwe enkonzweni, yilapho izinhliziyo nezingqondo zethu nazo zigxila ngokwengeziwe ethembeni nasenjabulweni yokuphila ezweni elisha likaNkulunkulu. Ukuzindla ngalezi zithembiso ezingokomBhalo kukhulisa ingokomoya lethu futhi kuqinise ubuhlobo bethu noJehova.
5 Ngisho noma singayiboni imiphumela esheshayo emsebenzini wethu wokushumayela, kungenzeka ukuthi imbewu yeqiniso ezohluma ngesikhathi sikaJehova esifanele iye yatshalwa enhliziyweni yomuntu. (Joh. 6:44; 1 Kor. 3:6) Akekho kithi owaziyo ukuthi kusenabaningi kangakanani abasazofunda ngoMbuso ngemizamo yabantu bakaJehova, kungaba sendaweni yakini noma emhlabeni wonke.
6 Kufanele silalele lesi siyalo sikaJesu ukwedlula noma yinini ngaphambili: “Hlalani nibhekile, nihlale niphapheme, ngoba anazi ukuthi sinini isikhathi esimisiwe. Kodwa lokho engikusho kini ngikusho kubo bonke, Hlalani nilindile.” (Marku 13:33, 37) Khona-ke, kwangathi sonke singaqhubeka simemezela izindaba ezinhle zoMbuso, sijabulise inhliziyo kaJehova njengoba sihlanganyela ekungcweliseni igama lakhe elikhulu nelingcwele.