‘Nikeza Ubufakazi Obuphelele’ Ngenkuthalo
1, 2. Yini ekuhlaba umxhwele ngombono kaPawulu ngokushumayela izindaba ezinhle, futhi singasilingisa kanjani isibonelo sakhe ‘sokunikeza ubufakazi obuphelele’?
1 NjengoJesu nezinye izinceku eziningi ezithembekile zakudala, umphostoli uPawulu wayengumshumayeli wezindaba ezinhle oshisekayo, ‘enikeza ubufakazi obuphelele’ kungakhathaliseki ukuthi isimo sinjani. Ngisho nalapho eboshelwe endlini, “wayebamukela ngomusa bonke ababengena beze kuye, eshumayela kubo ngoMbuso kaNkulunkulu futhi efundisa izinto ngeNkosi uJesu Kristu ngenkululeko yokukhuluma enkulu kakhulu.”—IzE. 28:16-31.
2 Nathi ‘singabunikeza ubufakazi obuphelele’ ngenkuthalo ngazo zonke izikhathi. Lokho kuhlanganisa nokufakaza kubantu esihlangana nabo lapho siyothenga, sisemsebenzini, esikoleni, nalapho sisendleleni siya noma sivela emihlanganweni yesifunda neyesigodi.—IzE. 28:23; IHu. 145:10-13.
3. Singakugwema kanjani ukuba ukufakaza kwethu ngokwethukela kuphenduke kube into eyenziwa kungahleliwe?
3 Kuyini Ukufakaza Ngokwethukela? Ukufakaza ngokwethukela akuyona into eyenzeka ngengozi nje noma kungahlosiwe, njengokungathi bekungahleliwe noma kuyinto engabalulekile. Leyo akuyona neze indlela yokuchaza inkonzo yethu. NjengakuPawulu, kubalulekile kithi ukukhazimulisa uNkulunkulu ngokufakaza kwethu, futhi kufanele kube yinhloso yethu ukufakaza nomaphi lapho kufaneleka khona. Nokho, indlela esikhuluma ngayo nabanye ingachazwa ngokufanele ngokuthi ukwethukela—okungukuthi, esimweni esikhululekile, sobungane nesingalandeli izimiso ezithile. Le ndlela ingaba nemiphumela emihle.
4. Yini eyenza uPawulu wakwazi ukufakaza esendlini ayehlala kuyo?
4 Kulungiselele Ukunikeza Ubufakazi: UPawulu kwadingeka awakhe amathuba okufakaza ngesikhathi eboshelwe endlini eRoma. Ekuleyo ndlu ayehlala kuyo, wathatha isinyathelo kuqala sokubamemela endlini yakhe abaholi bamaJuda bakuleyo ndawo. (IzE. 28:17) Ngisho noma lalikhona ibandla lamaKristu eRoma, uPawulu wathola ukuthi umphakathi wamaJuda kulowo muzi wawuzwa ngenzwabethi nje ngokholo lobuKristu. (IzE. 28:22; Roma 1:7) Akakugwemanga ‘ukunikeza ubufakazi obuphelele’ ngoJesu Kristu nangoMbuso kaNkulunkulu.
5, 6. Imaphi amathuba esingaba nawo okufakaza ngokwethukela, futhi singakulungiselela kanjani ukufakaza ngokwethukela okuphumelelayo?
5 Cabanga ngabo bonke abantu abanolwazi olungatheni ngoFakazi BakaJehova ongase uhlangane nabo lapho usohambweni. Kungenzeka nokuthi abazi ukuthi siqhuba izifundo zeBhayibheli zasemakhaya zamahhala. Waphaphamele amathuba okufakaza kulabo ohlangana nabo lapho usohambweni, umi endleleni ezindaweni zokuphumula, uthela uphethiloli, uthenga, uhlezi ehhotela, udla esitolo sokudlela, usezintweni zokuhamba zomphakathi, njalonjalo. Hlela ukuthi yini ozoyisho ukuze uqale ingxoxo futhi ufakaze kafushane. Mhlawumbe ezinsukwini ezingaphambi kokuba uthathe uhambo ungazijwayeza ngokufakaza ngokwethukela komakhelwane bakho, ezihlotsheni, kosebenza nabo nakwabanye obajwayele.
6 Uzodinga ukuba nezincwadi ozozisebenzisa lapho ufakaza ngokwethukela. Ziphi? Ungase usebenzise ipheshana elithi Ungathanda Yini Ukwazi Okwengeziwe NgeBhayibheli? Bonisa umuntu izigaba ezinhlanu zokuqala, lapho kunikezwa khona izizathu ezihlukahlukene zokufunda iBhayibheli. Mtshengise isigqebhezana esingemuva sokucela isifundo seBhayibheli sasekhaya samahhala. Lapho uthola umuntu olalelayo, mhambisele incwajana ethi Yini UNkulunkulu Ayifunayo? Uma kungenzeka uhlangane nabantu abakhuluma olunye ulimi, phatha incwajana ethi Good News for All Nations. Ekhasini 2 ichaza indlela esetshenziswa ngayo ekunikezeni ubufakazi. Uma uzohamba ngemoto, ungakwazi ukuthatha ezinye izincwadi ezimbalwa eziyisisekelo ongazihambisa kwababonisa isithakazelo sangempela esigijimini soMbuso.
7, 8. Isiphi isixwayiso okufanele sisilalele mayelana nokubukeka nokuziphatha kwethu lapho sisohambweni nalapho siphumule?
7 Qaphela Ukubukeka Nokuziphatha Kwakho: Kumelwe siqiniseke ukuthi ukuziphatha, ukugqoka nokuzilungisa kwethu ngeke kunikeze abantu umbono okungeyiwo noma kubenze ‘bakhulume kabi’ ngenhlangano kaJehova. (IzE. 28:22) Lokhu akusebenzi nje kuphela lapho siya emihlanganweni yebandla, yesifunda noma yesigodi, kodwa nalapho sisohambweni nalapho siphumule. INqabayokulinda ka-August 1, 2002, ikhasi 18, isigaba 14, yaxwayisa yathi: “Ukubukeka kwethu akufanele kube okokubukisa, kube yinqaba, kuvuse inkanuko, kuveze umzimba noma kugxile emfashinini. Ngaphezu kwalokho, kufanele sigqoke ngendlela ebonisa ‘ukuhlonipha uNkulunkulu.’ Lokho kusenza sicabange, akunjalo? Asigcini ngokugqoka ngokufanelekayo lapho siya emihlanganweni yebandla bese sibonisa ukungabi nandaba ngezinye izikhathi. Ukubukeka kwethu kufanele ngaso sonke isikhathi kubonise isimo sengqondo senhlonipho nesihloniphekile ngoba singamaKristu nezikhonzi usuku lonke.”—1 Thim. 2:9, 10.
8 Kufanele sigqoke ngesizotha nangendlela enesithunzi. Uma ukubukeka kwethu nokuziphatha kwethu ngaso sonke isikhathi kubonisa ukukholelwa kwethu kuNkulunkulu, asisoze sazizwa siphoqeleke ukuba sigweme ukufakaza ngokwethukela ngenxa yokuthi ukubukeka kwethu akumfanele umuntu oyisikhonzi.—1 Pet. 3:15.
9. Waba yini umphumela omuhle wokufakaza kukaPawulu eRoma?
9 Ukufakaza Ngokwethukela Kunezithelo: Kuleyo minyaka emibili eboshelwe endlini eRoma, uPawulu wabona imiphumela emihle yemizamo yakhe yokufakaza ngokwethukela. ULuka wabika ukuthi “abanye baqala ukuzikholwa izinto ezazishiwo.” (IzE. 28:24) UPawulu ngokwakhe waveza izinga okwakuphumelele ngalo ‘ukunikeza’ kwakhe “ubufakazi obuphelele” lapho ebhala ethi: “Izindaba zami ziye zaphumela ekuqhubekeleni phambili kwezindaba ezinhle kunokuba kube ngenye indlela, kangangokuthi ukuboshwa kwami sekwaziwa obala ebuhlotsheni noKristu phakathi kwabo bonke abaQaphi Bombusi nabo bonke abanye; futhi iningi labazalwane eNkosini, njengoba lizizwa linesibindi ngenxa yokuboshwa kwami etilongweni, libonisa isibindi esikhulu nangokwengeziwe sokukhuluma izwi likaNkulunkulu ngokungesabi.”—Fil. 1:12-14.
10. Imuphi umphumela omuhle omunye umbhangqwana owaba nawo ngonyaka odlule?
10 Ngonyaka odlule, ngemva kokuchitha usuku emhlanganweni wesigodi, umbhangqwana othile wathola imiphumela emihle lapho ufakaza ngokwethukela kowesifazane onguweta owawubuza ngamabheji awo omhlangano. Wamtshela ngomhlangano nangethemba iBhayibheli elilinikezayo ngekusasa lesintu. Wamnika ipheshana elithi Ungathanda Yini Ukwazi Okwengeziwe NgeBhayibheli? wamchazela nangelungiselelo lesifundo seBhayibheli sasekhaya samahhala. Lona wesifazane wathi uyafuna ukuvakashelwa, wabhala igama nekheli lakhe ngemuva epheshaneni, wayesecela ukuba lo mbhangqwana wenze amalungiselelo. Imiphi imiphumela emihle wena ongayithola “ngokunikeza ubufakazi obuphelele” ngenkuthalo?
11. Iziphi izimfanelo okufanele sizihlakulele ukuze siqhubekisele phambili izindaba ezinhle “ngokunikeza ubufakazi obuphelele”?
11 Ziqhubekisele Phambili Ngokuphelele Izindaba Ezinhle: Cabanga nje ukuthi uPawulu wajabula kanjani lapho ezwa ukuthi amaKristu akanye nawo ayelingisa isibonelo sakhe sokushiseka! Kwangathi singenza konke okusemandleni ethu ukuqhubekisela phambili izindaba ezinhle ngokufakaza ngokwethukela ngezinkolelo zethu ezisekelwe eBhayibhelini.
[Ibhokisi ekhasini 3]
Izincwadi Ezidingekayo Ekufakazeni Ngokwethukela
■ Ungathanda Yini Ukwazi Okwengeziwe NgeBhayibheli? (ipheshana)
■ Yini UNkulunkulu Ayifunayo Kithi? (incwajana)
■ Good News for All Nations (incwajana)
■ Ezinye izincwadi eziyisisekelo
[Ibhokisi ekhasini 4]
Ungabakhohlwa!
Obani? Bonke abathakazelayo ababekhona eSikhumbuzweni sokufa kukaKristu noma enkulumweni ekhethekile. Ingabe sesibamemile emihlanganweni eHholo LoMbuso? Cishe abaningi babo bangeza uma bekhuthazwa ngomusa. Njengoba bejabulela ubungane obakhayo emihlanganweni yebandla nesimiso esikhuthazayo esingokomoya, bayosondela kuJehova nasenhlanganweni yakhe. Kunganjani ubameme ubone ukuthi kwenzekani? Batshele yonke imininingwane abayidingayo, kuhlanganise nezikhathi zemihlangano nendlela imihlangano ehlukahlukene eqhutshwa ngayo.