Qhubeka Ukhuluma Izwi LikaNkulunkulu Ngesibindi
1 Njengezikhonzi ezingamaKristu, siyazi ukuthi akubona bonke abantu abayosamukela lapho sishumayela. (Math. 10:14) Kodwa asikuvumeli ukungasamukeli kwabo kusivimbe ekumemezeleni izindaba ezinhle. (IzAga 29:25) Yini esisiza ukuba siqhubeke sikhuluma izwi likaNkulunkulu ngesibindi?
2 Umphostoli uPawulu wayeyazisa ‘inzuzo edlula zonke izinto yolwazi ngoKristu Jesu.’ Lokhu kwamshukumisela ukuba akhulume ‘ngokuqiniseka.’ (Fil. 3:8; 1 Thes. 1:5) Nakuba abanye babebheka isigijimi ayesishumayela njengesingenamandla nesiwubuwula, wayazi ukuthi ‘singamandla kaNkulunkulu ensindiso kuwo wonke umuntu onokholo.’ (Roma 1:16) Ngakho-ke, ngisho nalapho ephikiswa, waqhubeka ‘eshumayela ngesibindi ngokugunyazwa uJehova.’—IzE. 14:1-7; 20:18-21, 24.
3 Umthombo Wethu Wamandla: Akuwona amandla kaPawulu amenza wakwazi ukushumayela ngesibindi. Lapho ekhuluma ngaye noSila, uPawulu wabhala: ‘Ngemva kokuba sesihluphekile kuqala futhi seyiswa eFilipi, saqunga isibindi ngoNkulunkulu wethu ukuba sikhulume kini izindaba ezinhle zikaNkulunkulu ngokushikashikeka okukhulu.’ (1 Thes. 2:2; IzE. 16:12, 37) Ngaphezu kwalokho, lapho eboshiwe eRoma, uPawulu wacela abanye ukuba bamthandazele ukuze akwazi ukuqhubeka ememezela izindaba ezinhle ‘ngesibindi njengoba kwakufanele akhulume.’ (Efe. 6:18-20) Ngokuthembela kuJehova kunokuzethemba yena, uPawulu wakwazi ukuqhubeka ekhuluma izwi likaNkulunkulu ngesibindi.—2 Kor. 4:7; Fil. 4:13.
4 Kunjalo nanamuhla. Umzalwane othile owayekuthola kunzima ukutshela abanye emsebenzini ukuthi ungomunye woFakazi BakaJehova futhi esaba ukushumayela ngokwethukela wathandaza ngalolu daba wabe eseqala ukushumayela. Omunye ayesebenza naye waqale wangamlalela, kodwa lapho ezwa ngethemba lovuko wavuma ukuqhutshelwa isifundo seBhayibheli. Kusukela lapho kuqhubeke, lo mzalwane wabamba wonke amathuba ukuze ashumayele. Emsebenzini wakhe omusha, wasiza abantu abangu-34 baze babhapathizwa enkathini eyiminyaka engu-14. Singaqiniseka ngokuthi nathi uJehova uyosiqinisa ‘ukuba siqhubeke sikhuluma izwi lakhe ngaso sonke isibindi.’—IzE. 4:29.