Ungayandisa Yini Inkonzo Yakho?
1. Ikuphi ukuphuthuma okukhona enkonzweni yokushumayela futhi kungani?
1 Ebona isithakazelo abantu abaningi ababenaso ezindabeni ezinhle zoMbuso, uJesu wayala abafundi bakhe ukuba ‘bancenge iNkosi yokuvuna ukuba ithumele izisebenzi ekuvuneni kwayo.’ (Math. 9:37, 38) Njengoba sisemahoreni okugcina esikhathi sokuvuna, umsebenzi wethu usuphuthuma kakhulu kunakuqala. Lokhu kusho ukuthi kufanele siyicabangele ngomthandazo indlela esingaba ngayo nengxenye enkudlwana emsebenzini wokushumayela.—Joh. 14:13, 14.
2. Abanye basabele kanjani esimemweni sezisebenzi ezengeziwe ensimini?
2 Inkonzo Eyandisiwe: Ngesiqondiso nangosizo lukaJehova, abaningi bakwazile ukuthatha inkonzo yokuphayona. (IHu. 26:2, 3; Fil. 4:6) Abanye benze imizamo ekhethekile yokuba amaphayona asizayo inyanga eyodwa noma ngaphezulu phakathi nonyaka. Lokhu kube yindlela enhle kakhulu yokwandisa inkonzo yabo. Injabulo etholakala ngokuhlanganyela kuleli lungelo yenze abaningi babo bacabangela ukuba amaphayona avamile.—IzE. 20:35.
3. Uma uke waphayona ngaphambili, yini manje ongathanda ukuyicabangela?
3 Ingabe Ungaphinde Uphayone?: Uma uke wakhonza njengephayona ngaphambili, akungabazeki ukuthi unezinkumbulo eziyigugu zangaleso sikhathi. Ingabe uke wakucabangela ngomthandazo ukubuyela ezinhlwini zamaphayona? Izimo ezakubangela ukuba uyeke ukuphayona kungenzeka azisekho. Mhlawumbe sekuyisikhathi sokuphinde ujabulele leli lungelo eliyingqayizivele.—1 Joh. 5:14, 15.
4. Iliphi ilungelo eliyingqayizivele elisivulekele sonke?
4 Umsebenzi wokuvuna uyaqhubeka njengamanje futhi uzophothulwa ngokushesha. (Joh. 4:35, 36) Sengathi sonke singahlola izimo zethu zamanje, sibone ukuthi singakwazi yini ukwenza izinguquko ekuphileni kwethu ukuze sandise inkonzo yethu ensimini. Noma, uma ngobuqotho sithola ukuthi asikwazi ukwandisa inkonzo yethu, singazithola yini ezinye izindlela zokwenza okwengeziwe? (Marku 12:41-44) Yeka ilungelo elibekwe phambi kwabo bonke abavunyelwa yizimo zabo manje ukuba basetshenziswe uJehova kulo msebenzi oyingqayizivele!—IHu. 110:3.