Ingabe Ukulungele Ukushumayela Ngokwethukela?
1. Yisiphi isibonelo esibonisa ukuthi ukushumayela ngokwethukela kungaphumelela ngempela?
1 Kungaba nemiphumela emihle ngempela ukushumayela ngokwethukela. IBhayibheli linenqwaba yezibonelo zokushumayela ngokwethukela okwaba nemiphumela emihle. (Joh. 4:7-15) Yini esingayenza ukuze silungiselele lolu hlobo lokufakaza?
2. Indlela esigqoka futhi sizilungise ngayo ingasisiza kanjani ukuba sikulungele ukufakaza?
2 Ukugqoka Nokuzilungisa: Ukunaka indlela esigqoka futhi sizilungise ngayo ngaso sonke isikhathi kuyokwenza ukuba sikwazi ukuhlanganyela ukholo lwethu nabanye ngokukhululekile. (1 Thim. 2:9, 10) Uma singakhululekile ngendlela esibukeka ngayo, siyoba manqikanqika ukufakaza. Ngokuphambene nalokho, indlela ehlanzekile necocekile esibukeka ngayo ingase ivuse isithakazelo kwabanye. Ngokwesibonelo, umbhangqwana ongoFakazi owawugqoke kahle wawuya endaweni ethile, wabe usuhlala eduze kwendoda eyiSulumane. Iphawula indlela owawubukeka ngayo lo mbhangqwana, le ndoda yabuza ukuthi ungamaKristu yini. Lokhu kwaholela engxoxweni yeBhayibheli eyathatha amahora amathathu.
3. Ulandela isibonelo sikaJesu, uyiqale kanjani ingxoxo?
3 Ukuqala Izingxoxo: Lapho uJesu ehlangana nowesifazane ongumSamariya emthonjeni kaJakobe, waqala ingxoxo ngokucela ukuba amphuzise amanzi. Ngokufanayo, singase sikwazi ukuqala ingxoxo ngokusho amazwi ambalwa noma ngokubuza umbuzo olula. Nakuba ngezinye izikhathi singase sibe manqikanqika, singakwazi ‘ukuqunga isibindi’ sokuqala ingxoxo ngokwethembela osizweni lukaJehova.—1 Thes. 2:2.
4. Singakulungela kanjani ukufakaza ngokwethukela?
4 Ukuvula Amathuba: Abamemezeli abaningi bathole izindlela zokufakaza ngokwethukela. Hlola izimo zakho, ucabange ngabantu ongase uhlangane nabo nsuku zonke. Phatha izincwadi ezifanele neBhayibheli elincane. Qapha, futhi ube nesithakazelo kubantu abakuzungezile. Uma usucabangisisile ngamathuba angase akuvulekele phakathi nosuku, uyokulungela kangcono ukunikeza ubufakazi obuhle.—Fil. 1:12-14; 1 Pet. 3:15.
5. Kungani ukufakaza ngokwethukela kungafanele kube yinto ethuka yenzeka?
5 Sinezizathu ezimbili zokusebenzisa amathuba ukuze sifakaze ngokwethukela—uthando ngoNkulunkulu nangomakhelwane. (Math. 22:37-39) Njengoba sibona ukuphuthuma komsebenzi wokushumayela, ukufakaza ngokwethukela akufanele kube yinto ethuka yenzeka. Kufanele sikulungele ukusebenzisa ithuba ngalinye elifanele ukuze sishumayele ngezindaba ezinhle zoMbuso kwabanye njengoba isikhathi sisavuma.—Roma 10:13, 14; 2 Thim. 4:2.