Ukuziphatha Okukhazimulisa UNkulunkulu
1. Kungani oFakazi BakaJehova bebonakala uma beya emihlanganweni yesigodi?
1 Uma sisemihlanganweni yesigodi, sivele sibonakale. Emadolobheni amaningi omhlangano, imithombo yezindaba iyawutshela lowo mphakathi ngokuba khona kwethu. Amahhotela nezindawo okudliwa kuzo ngovamile agcwala abeze emhlanganweni, kanti nabantu bakuleyo ndawo bayaziphawula lezi zivakashi ezifake amabheji omhlangano. Ngezansi, kunezikhumbuzo ezizosisiza sikhazimulise uNkulunkulu ngokuziphatha kwethu okuhle lapho sisedolobheni elinomhlangano.—1 Pet. 2:12.
2. Singamkhazimulisa kanjani uNkulunkulu ngokugqoka ngesizotha lapho sisedolobheni elinomhlangano?
2 Ukugqoka Ngesizotha: Ukugqoka kwethu ngendlela ehloniphekile lapho siya emhlanganweni ngokuvamile kubahlaba umxhwele abasibukayo. Kodwa, indlela esigqoka ngayo ngezinye izikhathi—njengalapho sifika ehhotela, siya ezindaweni okudliwa kuzo, siyothenga njalonjalo—ingase ibe nomthelela omkhulu kubantu abasibukayo. Nakuba singadingi ukugqoka izingubo zikanokusho uma senza lezi ezinye izinto, noma yini esiyigqokayo kufanele ibe nesizotha, ihlonipheke, singabi abanganaki. Abantu abasibonayo kufanele bakwazi ukubona umehluko phakathi kwethu kanye nabantu abangakholwa. (Roma 12:2) Ngaphezu kwalokho, kufanele sifake amabheji ethu omhlangano, ngoba lokho kuyowumemezela umhlangano, kuvule amathuba okufakaza futhi kwenze nabanye abeze emhlanganweni basibone.
3. Singasibonisa kanjani isineke nenhlonipho?
3 Isineke Nokuziphatha Ngenhlonipho: Ngesikhathi lapho abantu abaningi ezweni benake izifiso zabo kuphela futhi bengabangabongiyo, yeka ukuthi ukuba kwethu nesineke nenhlonipho kungabaqabula kanjani abasibukayo, njengezisebenzi zasemahhotela nasezitolo zokudlela! (2 Thim. 3:1-5) Lapho sigcinela abathile izihlalo noma sisemgqeni wezincwadi ezikhululwe emhlanganweni, akufanele sizicabangele thina kuphela, kodwa kufanele sicabangele nabanye. (1 Kor. 10:23, 24) Ngemva kokuya kwayo okokuqala emhlanganweni, enye indoda ethakazelayo yathi: “Ayikho inkulumo engisayikhumbula kwezazinikezwa ngalolo suku, kodwa ukuziphatha koFakazi kwagxila kimi.”
4. Kungani kufanele sikucabangele ukusebenza ngokuzithandela emhlanganweni uma izimo zethu zisivumela?
4 Izisebenzi Zokuzithandela: Umoya wokusebenza ngokuzithandela uwuphawu lwamaKristu eqiniso. (IHu. 110:3) Ingabe ungazenza utholakale ukuze usize emhlanganweni? Kwenye indawo eyayizoba nomhlangano, abazalwane nodade abangu-600, bahamba bayohlanza ngaphambi komhlangano. Izisebenzi zalapho zaphawula: “Siyaqala ngqa ukubona into enje! Kunzima ukukholwa ukuthi bonke laba bantu ngeke baholelwe.” Sibheke phambili emhlanganweni wesigodi ka-2013 nethuba esizoba nalo, hhayi nje lokulalela futhi sifundiswe uNkulunkulu kuphela kodwa futhi nelokumkhazimulisa.
[Ibhokisi emakhasini 3-6]
Esikukhunjuzwa NgoMhlangano Wesigodi Ka-2013
◼ Izikhathi Zesimiso: Umculo owandulela ukuqala kwesimiso uyoqala ngo-9:00 ekuseni ngazo zontathu izinsuku. Ngaleso sikhathi, sonke kufanele sihlale phansi ukuze isimiso siqale ngendlela ehloniphekile. Ingoma nomthandazo wokuphetha kuyokwethulwa ngo-4:30 ntambama ngoLwesihlanu nangoMgqibelo kanti ngeSonto kuyoba ngo-3:15 ntambama.
◼ Indawo Yokupaka: Kuzo zonke izindawo zomhlangano esinelungelo lokupaka kuzo, indawo yokupaka iyotholakala mahhala kunoma ubani ofike kuqala. Ngenxa yokuthi ngokuvamile indawo yokupaka ilinganiselwe, kufanele sizame ukugcwalisa izimoto.
◼ Izindawo Zokulala: Amafomu e-Sicelo Sendawo Yokulala Sezidingo Ezikhethekile (CO-5) ayatholakala uma kunabamemezeli abawadingayo ukuze bafake isicelo sendawo yokulala. IKomiti Yenkonzo Yebandla kufanele icabangele izimfanelo zommemezeli, isebenzisa iziqondiso ezisefomini nasencwadini ka-December 14, 2010, eyayibhalelwe zonke izindikimba zabadala. Leli lungiselelo elabamemezeli abanokuma okuhle kuphela ebandleni, kanye nezingane zabo eziziphatha kahle.
◼ Ukugcina Izihlalo: Izihlalo ungazigcinela labo ohamba nabo ngemoto noma ohlala nabo ekhaya, kanye nalabo obafundela iBhayibheli. Indawo yokuhlala yasebekhulile nabanezinkinga zempilo ilinganiselwe, ngakho kungase kungenzeki ukuba wonke amalungu emikhaya yabo ahlale nabo. Sicela ukuba lezi zihlalo zishiyelwe asebekhulile, abanezinkinga zempilo nalabo ababanakekelayo.—1 Kor. 13:5.
◼ Ukudla Kwasemini: Sicela niziphathele ukudla kwasemini okulula kunokuba niphume ngesikhathi sekhefu niyokuthenga ngaphandle kwendawo yomhlangano. Ningawaphatha ama-cooler bag amancane angangena ngaphansi kwezihlalo. Ama-cooler bag amakhulu anjengawamapikiniki kufanele agcinwe ngokuvumelana neziqondiso zabalindi. Izitsha ezifayo nophuzo oludakayo akuvunyelwe endaweni yomhlangano.
◼ Iminikelo: Singabonisa ukwazisa ngamalungiselelo omhlangano ngokunikela ngokuzithandela emsebenzini womhlaba wonke emhlanganweni. Noma yimaphi amasheke kufanele abhalwe ukuthi “Christian Congregation of Jehovah’s Witnesses of South Africa.” Ezindaweni zemihlangano eziningana kuyoba nemishini onganikela kuyo usebenzisa ikhadi lasebhange noma lokuthenga ngesikweletu.
◼ Imithi: Uma kunemithi oyisebenzisayo, qiniseka ukuthi uphatha eyanele, ngoba ngeke itholakale emhlanganweni. Imijovo nezinaliti zalabo abanesifo sikashukela kufanele kulahlwe endaweni efanele yezinto eziyingozi hhayi emigqonyeni kadoti esendaweni yomhlangano noma esemahhotela.
◼ Izicathulo: Unyaka ngamunye abantu abaningi bayalimala ngenxa yezicathulo, ikakhulu ezinezithende eziphakeme. Kuhle ukukhetha izicathulo ezifanelekayo nezikulingana kahle oyokwazi ukuhamba ngazo ngokuphephile endaweni eyehlelayo, ezitebhisini, ezinsimbini ezinezikhala njalonjalo.
◼ Izinqola Zabantwana: Izinqola zabantwana akufanele zingeniswe endaweni okuhlala kuyo izilaleli. Nokho, izihlalo zabantwana zokuphepha ezilingana esihlalweni futhi ezingase ziboshelwe eceleni kwabazali zamukelekile.
◼ Amakha: Imihlangano eminingi yesigodi iqhutshelwa ezindaweni ezivalekile ezinemishini yeziphephetha-moya. Ngakho-ke, siyobe sibonisa uthando uma silinganisela ekusebenziseni amakha anamandla angase abaphathe kabi labo abanezinkinga zokuphefumula noma ezihlobene nakho.—1 Kor. 10:24.
◼ Amafomu Athi Siza Ulandele (S-43): Ifomu elithi Siza Ulandelele, kufanele lisetshenziselwe ukubhala imininingwane yanoma ubani obonisa isithakazelo lapho sishumayela ngokwethukela phakathi nomhlangano. Amafomu agcwalisiwe ningawayisa eNdaweni Yezincwadi noma niwanikeze unobhala webandla lakini lapho senibuyele emakhaya.
◼ Izitolo Zokudlela: Dumisa igama likaJehova ngokuziphatha kahle ezitolo zokudlela. Gqoka ngendlela efanele isikhonzi esingumKristu. Kuyinkambiso ukukhipha ithiphu engamaphesenti ayishumi kuya kwangu-15.
◼ Inkonzo Yokuzithandela: Bonke abafisa ukusiza kufanele baye eMnyango Wenkonzo Yokuzithandela emhlanganweni. Izingane ezineminyaka engaphansi kuka-16 nazo zingasiza kakhulu ngokusebenza nabazali noma abanye abantu abadala abagunyazwe abazali.