Uchungechunge Oluwusizo Enkonzweni Yethu
1. Ziyini izinjongo zochungechunge oluthi “Ingxoxo Nomakhelwane”?
1 Ngezikhathi ezithile INqabayokulinda yomphakathi iba nesihloko esiwuchungechunge esithi “Ingxoxo Nomakhelwane.” Lolu chungechunge lunezinjongo ezimbili—ukwethula izimfundiso zeBhayibheli ngendlela ekhangayo nokubonisa ukuthi singabonisana kanjani nomakhelwane bethu ngezindaba ezithile ngendlela engacunuli. (1 Pet. 3:15) Singazisebenzisa kanjani ngokuphumelelayo lezi zihloko?
2. Singalusebenzisa kanjani lolu chungechunge lwezihloko enkonzweni yethu?
2 Lusebenzise Enkonzweni: Ungazigcinela amakhophi engeziwe e-Nqabayokulinda enalolu chungechunge. Lapho umninikhaya, umuntu othakazelayo noma umuntu omfundelayo ebuza umbuzo noma ephakamisa impikiswano okukhulunywe ngayo kwesinye salezi zihloko, mnikeze ikhophi yaleso sihloko bese umcela ukuba nixoxe ngaso. Uma ungenayo ikhophi yalowo magazini, mhlawumbe ungayidawuniloda engosini yethu ethi jw.org.
3. Singaxoxa kanjani ngesinye salezi zihloko nomninikhaya?
3 Ungaxoxa kanjani nomuntu ngesinye salesi zihloko? Abanye baye bacela umuntu ukuba afunde ngokuzwakalayo amazwi kamakhelwane, bona bafunde amazwi kaFakazi. Le ndlela yokuyifunda phansi indaba iyaphumelela ngoba yenza umuntu ahlole izinkolelo zethu ngaphandle kokuzizwa sengathi uyahlaselwa.—Dut. 32:2.
4. Singazisebenzisa kanjani izihloko ezikulolu chungechunge ukuze siziqeqeshe?
4 Ziqeqeshe Wena Nabanye: Njengoba ufunda lezi zihloko, phawula imiBhalo, imifanekiso nezindlela esingabonisana ngazo nabantu. Phawula umuzwa wendaba bese uzama ukwethula indaba ngendlela efanayo. (IzAga 1:5; 9:9) Omunye udade wathi: “Ukufunda lezi zihloko kufana nokufunda kumuntu ophayona naye onekhono elimangalisayo—ohlale eyazi into okumelwe ayisho!”
5. Singabasiza kanjani esifunda nabo iBhayibheli ukuba balungiselele insimu?
5 Ungazisebenzisa nalezi zihloko ukuze usize obafundela iBhayibheli balungiselele insimu. Fundani ukwaziswa ndawonye, ofundelwayo adlale indima yommemezeli. Ngale ndlela, obafundelayo bangafunda ukwethula izinkolelo zabo ngendlela engacunuli. (Kol. 4:6) Ngempela, lezi zihloko zingezinye zezindlela eziningi uJehova asisiza ngazo ukuba ‘siyifeze ngokugcwele’ inkonzo yethu.—2 Thim. 4:5.