ЕФЕСАА РАХЬ АСАЛАМШӘҞӘЫ

1 Анцәа иҭахны Христос Иисус иапостолс иалху сара, Павел, асаламшәҟәы сыҩуеит Ефес иҟоу гәыкала Анцәа имаҵ зуа, аӡәк иеиԥш Христос Иисус ицу иԥшьоу рахь.

2 Ҳаб Ҳанцәеи Иҳақәиҭу Иисус Христоси иаадырԥшуа ҳзыԥсам ақьиареи иҳарҭо аҭынчреи шәыгымзааит.

3 Аҽхәаԥхьыӡ игымзааит Ҳанцәа, Иҳақәиҭу Иисус Христос Иаб, избанзар Христос аӡәк иеиԥш ицу раҳасабала Анцәа ажәҩан аҿы еиуеиԥшым адоуҳатә ҳамҭақәа ҳаиҭеит. 4 Иара адунеи шьақәгылаанӡа* ҳалиххьан, Христоси ҳареи аӡәк иеиԥш ҳаҟазарц азы, насгьы абзиабара аарԥшуа, иара иҿаԥхьа ҳаԥшьаны, грак ҳамамкәа ҳаҟазарц азы. 5 Иара игәҭакы инақәыршәаны заа иӡбахьан Иисус Христос ила ԥацәас ҳшыҟаиҵо, 6 бзиа иибо Иԥа ила ҳара ҳахь иааирԥшыз ҳзыԥсам ақьиаразы аҽхәаԥхьыӡ иоуларц азы. 7 Иԥа ибзоурала ҳара ахақәиҭра ҳауит, избанзар иара ишьа каҭәаны ҳҿихит. Ааи, уи икеиҭәаз ашьа абзоурала Анцәа ҳзыԥсам ақьиара аарԥшны, ҳагәнаҳақәа ҳанаижьит.

8 Иара ҳзыԥсам ақьиара аарԥшны, аҟәыӷареи аилкаареи ҳаиҭеит, 9 игәҭакы иадҳәалоу иԥшьоу амаӡа ҳзааиртит. Игәҭакы иадҳәалоу иԥшьоу уи амаӡа инақәыршәаны иара игәы иҭеикит, 10 иазалихыз аамҭа анынҵәалак, аусқәа шынагӡалатәу иазкны иӡбаны имаз аиҿкаара аус аура иалаиргарц, Христос ила ажәҩан аҿы иҟоугьы адгьыл аҿы иҟоугьы аӡәк иеиԥш еидикыларц азы. Ааи, Христоси 11 ҳареи аӡәк иеиԥш ҳаҟоуп, иареи ҳареи Анцәа иҟынтә аҳамҭа шҳауа ҳақәыргәыӷын, избанзар иара игәы ишҭеикхьаз еиԥш заа ҳалиххьан. Иара зегьы игәы ишҭеикыз еиԥш иҟаиҵоит. 12 Анцәа ҳара — зегь раԥхьа Христос иқәгәыӷыз — ҳалихит, хьӡи-ԥшеи аҽхәаԥхьыӡи иаҳҭаларц азы. 13 Шәаргьы шәгәыӷра Христос идышәҳәалеит, аҵабырг ажәа — Анцәа шәшеиқәирхо шәеилзыркааз ажәабжь бзиа — аншәаҳа. Данхашәҵа ашьҭахь, Анцәа шәызқәыргәыӷыз иԥшьоу идоуҳа ихы иархәаны Христос ила амҳәыр шәааирхеит. 14 Иԥшьоу адоуҳа Анцәа ҳзықәиргәыӷыз шҳауа агәра ҳзырго адырга иаҩызоуп. Анцәа уи зыҟаиҵаз, ижәлар ахә рыхшәааны иахьҿихыз абзоурала ахақәиҭра риҭарц азоуп, уи хьӡи-ԥшеи аҽхәаԥхьыӡи изаанагарц азы.

15 Убри азы Иҳақәиҭу Иисус иахь ишәымоу ахаҵареи иԥшьоу рахь иаашәырԥшуа абзиабареи рыӡбахә ансаҳа инаркны, 16 Сааҟәымҵӡакәа Анцәа шәара шәзы иҭабуп ҳәа иасҳәоит, еснагь шәара шәзы Анцәа сиҳәоит. 17 Иҳақәиҭу Иисус Христос Инцәа, хьӡи-ԥшеи змоу Ҳаб, аҟәыӷареи иааиртуа аилкаареи шәиҭарц сиҳәоит, иара изку ииашоу, иҵаулоу адыррақәа шәырҳарц азы. 18 Иара шәыгәқәа* ааиртит, изакә гәыӷроу ишәиҭаз еилышәкаарц азы, иара убас еилышәкаарц иԥшьоу рзы изакә мазара дуу ирхианы имоу, 19 еилышәкаарц ҳара, ахаҵара змоу, иҟаҳҵо ҳзырҟаҵо имч шаҟа иӷәӷәоу. Анцәа имч шаҟа иӷәӷәоу ааԥшит, 20 Христос иԥсы анҭеиҵа, насгьы ажәҩан аҿы иарӷьараҿы даниртәа. 21 Анцәа уи ҳәынҭқаррас, мчрас, мчыс, напхгарас иҟоу зегь раасҭа дҳареикит, аӡәгьы имам ахьӡ даԥсеитәит, иахьа* мацара акәымкәа, ҳаԥхьаҟагьы ус дыҟазарц азы. 22 Анцәа уи ишьапаҿы зегь шьҭеиҵеит, аизарагьы дахаиргылеит, 23 уи иара ицәеижь ауп, иҟазшьақәа рылагьы иҭәуп. Иара иоуп зегь рыла зегь хазырҭәаауа.

2 Шәыгәнаҳақәа ирыхҟьаны шәара аԥсцәа шәырҩызан, аха Анцәа шәыԥсы ҭеиҵеит. 2 Усҟан шәара ари адунеи* иатәу ауаа шынхо еиԥш шәынхон, аҳауа иақәиҭу анапхгаҩы — Анцәа изымӡырҩуа ауаа иаадырԥшуа адоуҳа иақәиҭу анапхгаҩы — шәизыӡырҩуан. 3 Уаанӡа ҳаргьы урҭ ауаа реиԥш ҳаҟан, игәнаҳау ҳгәаҳәарақәеи ҳхәыцрақәеи иҳаҵарҳәоз ҟаҳҵон. Зегь реиԥш, ҳаниз инаркны, Анцәа игәыԥжәара зхигараны иҟоу ҳреиԥшын. 4 Аха рыцҳашьарала иҭәу, абзиабара ду злоу Анцәа бзиа ҳбаны, 5 Христос иԥсы анҭеиҵоз, ҳаргьы ҳаԥсы ҭеиҵан, Христоси ҳареи аӡәк иеиԥш ҳҟаиҵеит, ҳагәнаҳақәа ирыхҟьаны аԥсцәа ҳшырҩызазгьы. Уи иааирԥшыз ҳзыԥсам ақьиара абзоурала шәара шәеиқәхеит. 6 Ҳаԥсы аҭаҵара адагьы, иара Христос Иисус ишьҭа ихыланы ицо раҳасабала ажәҩан аҿы уи ҳиваиртәеит, 7 ҳаԥхьаҟа* ҳара, аӡәк иеиԥш Христос Иисус ицу, абзиарақәа анҳзыҟаиҵо, зеиԥшыҟам, уаҩ иимбац ақьиара ааирԥшырц азы.

8 Шәара, ахаҵара змоу, Анцәа иааирԥшуа ҳзыԥсам ақьиара абзоурала шәеиқәырхан. Уи Анцәа иҳамҭа ауп, шәара ишәыбзоуроу ак акәӡам. 9 Шәара шәзеиқәырхаз шәус бзиақәа рзы акәӡам, убри аҟынтә аӡәымзар-аӡәгьы аҽхәаразы амзыз имаӡам. 10 Ҳара Анцәа ишамҭақәа ҳауп, иара Христос Иисус аӡәк иеиԥш ицу ҳзишаз заа иаҳзиӡбахьаз аус бзиақәа наҳагӡаларц азоуп.

11 Убри аҟынтә шәара, хылҵшьҭрала иауриам, ишәхашәмыршҭлан ауаа рнапала заԥхьатә хсаз ауаа заԥхьатә хсам ҳәа шышәзырҳәоз. 12 Усҟан шәара Христос дшәыздырӡомызт, израильтәи ажәлар рзы шәтәымуаан, Анцәа ижәлар сшәықәныҳәалоит ҳәа ажәа рыҭаны, иареи дареи рыбжьара ибжьеиҵаз аиқәшаҳаҭрақәа шәрыҵанакӡомызт, агәыӷра шәымамызт, Анцәа ида адунеи шәықәын. 13 Аха уажәшьҭа Христос Иисуси шәареи аӡәк иеиԥш шәыҟоуп, уаанӡа шәара Анцәа шәицәыхаран, аха уажәшьҭа Христос ишьа абзоурала шәизааигәахеит. 14 Христос аҭынчра ҳзааигеит, иара ҩ-гәыԥк гәыԥкны еидикылеит, ирыбжьагылаз аҭӡамц ықәигеит. 15 Иара аԥҟарақәа рыла ишьақәгылаз азакәан ицәеижь ала иаԥыхны, аиӷара аҵыхәтәа ԥиҵәеит. Иара уи зыҟаиҵаз аӡәк иеиԥш ицу ҩ-гәыԥк рҟынтә иҿыцу гәыԥк ҟаиҵарц, насгьы урҭ аҭынчра риҭарц азоуп. 16 Ашьаҟаҿы дахьыԥсыз абзоурала иара аиӷара аҵыхәтәа ԥиҵәеит, аҩгәыԥк жәларыкны* еидикылеит, Анцәеи дареи еиниршәеит. 17 Иара дааны, шәара, Анцәа дыззымдыруаз, аҭынчра иазку ажәабжь бзиа шәылеиҳәеит, Анцәа дыздыруазгьы ирылеиҳәеит. 18 Уи иԥсы ахьҳахҭниҵаз абзоурала аҩгәыԥк ирыҵанакуа зегьы Ҳаб ҳиҳәалар ҳалшоит, избанзар иҳауз иԥшьоу доуҳак ауп.

19 Убри аҟынтә уажәшьҭа шәара шәтәымуааӡам, атәым дгьыл шәатәӡам, шәара иԥшьоу ауаа зтәу атәыла шәатәуп, Анцәа иҭаацәара шәахәҭакуп. 20 Шәара ашьаҭаҿы шәыргылан, шьаҭас ишәымоу апостолцәеи аԥааимбарцәеи роуп, Христос Иисус иакәзар, уи ҵаҟатәи акәакь аҿы ишьҭарҵо ахаҳә иоуп. 21 Уи аҩны ргылоуп, ахәҭақәагьы ибзиаӡаны еиҿартәоуп, Христоси уи аҩни аӡәк иеиԥш иахьыҟоу абзоурала уи аҩны аизҳара иаҿуп, Иегова* изы ныҳәарҭас иҟаларц азы. 22 Шәаргьы Христоси шәареи аӡәк иеиԥш шәыҟоуп азы, Анцәа дахьыҟоу, идоуҳа ахьыҟоу, аҩны шәахәҭакхоит.

3 Убри аҟынтә сара, Христос Иисус игәра ахьызго азы, иара убас шәара, иауриам, шәаҳаҭыразы иҭаку Павел... 2 Шәара, ҳәарада, ишәаҳахьеит сара сшәыцхраарц азы сшалхыз, Анцәа иааирԥшуа ҳзыԥсам ақьиара ахәарҭа шәзаанагарц азы, 3 ишәаҳахьеит Анцәа иԥшьоу имаӡа шысзааиртыз, уи аӡбахә иааркьаҿны ишәзысыҩхьан. 4 Убри аҟынтә ари шәанаԥхьалак ижәбоит Христос изку иԥшьоу амаӡа аҵакы шеилыскаауа. 5 Уи амаӡа уажәы иԥшьоу адоуҳа ала иԥшьоу апостолцәеи аԥааимбарцәеи ишырзаату еиԥш ииасхьоу абиԥарақәа ирзаатӡамызт. 6 Иԥшьоу маӡас иҟоу абри ауп: ажәабжь бзиа ахьрыдыркыло абзоуралеи Христос Иисуси дареи аӡәк иеиԥш иахьыҟало абзоуралеи иауриамгьы Христос иоуа аҳамҭа аҩыза роуеит, дареи ҳареи цәеижьк ҳахәҭакхоит, даргьы Анцәа ҳара ҳзықәиргәыӷыз роуеит. 7 Анцәа иааирԥшыз сзыԥсам ақьиара абзоурала сара уи амаӡа маҵуҩыс сазыҟалеит. Иара уи аҳамҭа имч ду зныԥшуа ак еиԥш исиҭеит.

8 Сара сахь, иԥшьоу рҟынтә зегь иреиҵоу иахь, Анцәа ҳзыԥсам ақьиара ааирԥшит, иауриам ажәларқәа ҵҩа змам Христос имал иазку ажәабжь бзиа рзеиҭасҳәаларц, 9 иара убас зегь зшаз Анцәа шәышықәсала иҵәахны имаз иԥшьоу амаӡа шааиртуа абара зегьы срыцхрааларц. 10 Уи зегь зыҟаиҵаз ажәҩан аҿы иҟоу аҳәынҭқаррақәеи амчрақәеи уажәшьҭа аизара ала ҵҩа змам Анцәа иҟәыӷара рзаатырц азоуп. 11 Уи Иҳақәиҭу Христос Иисус изкны Анцәа имоу наӡаӡатәи агәҭакы иақәшәоит. 12 Иара ибзоурала ҳара ҳамшәаӡакәа ҳцәажәалар, насгьы ҳамлакҩакуа Анцәа ҳиҳәалар ҳалшоит, избанзар Христос дхаҳҵоит. 13 Сшәыҳәоит, шәара шәзы исхызго агәаҟрақәа ирыхҟьаны шәгәы кашәмыжьлан, избанзар урҭ хьӡи-ԥшеи шәзааргоит.

14 Убри аҟынтә Ҳаб иҿаԥхьа сшьамхышгылоит, 15 иара ибзоуралоуп ажәҩан аҿгьы адгьыл аҿгьы аҭаацәарақәа злаҟоу. 16 Ахьӡ-аԥша ду змоу Анцәа сиҳәоит идоуҳамч ала шәирӷәӷәарц, 17 сиҳәоит шәхаҵара абзоурала Христос шәгәаҿы дыҟазарц, насгьы иӷәӷәаны бзиа дыжәбаларц. Аҵла адацқәа шыӷәӷәоу еиԥш шәыӷәӷәаз, аҩны ашьаҭа ӷәӷәа ишықәгылоу еиԥш шәыӷәӷәаӡа шәгылаз, 18 иԥшьоу реиԥш шәаргьы аҭбаареи, ауреи, аҳаракыреи, аҵаулареи ибзианы еилышәкаарц, 19 насгьы адыррақәа раасҭа ихадоу Христос ибзиабара жәдырырц азы. Усҟан Анцәа иҳаиҭо аҟазшьақәа зегь шәырҳауеит.

20 Анцәа иҟаҳҵо ҳзырҟаҵо имч ала иҟаиҵар илшо акырӡа еиҳауп, ҳара ҳзызиҳәо, мамзаргьы ҳхаҿы иааҳгар ҳалшо аасҭа. 21 Аизарақәа рылеи Христос Иисус илеи биԥарацыԥхьаӡа Анцәа наӡаӡа хьӡи-ԥшеи иоулааит. Амин.

4 Убри аҟынтә сара, Иҳақәиҭу игәра ахьызго азы иҭаку Павел, сшәыҳәоит Анцәа иааиԥхьаз ишрықәнагоу еиԥш шәхы мҩаԥыжәгаларц, 2 еснагь ахынраалара аашәырԥшла, шәҟәымшәышәыз, ачҳара шәылаз, абзиабара аарԥшуа ишәыгу-ишәыбзоу шәанеибажьла, 3 ҭынч шәеицынхала, иԥшьоу адоуҳа абзоурала ишәырҳаз акзаара шәыхьчарц азы ишәылшо зегь ҟашәҵала. 4 Цәеижьк ауп иҟоу, доуҳак ауп иҟоу, Анцәа ишәиҭазгьы гәыӷрак ауп, 5 Иҳақәиҭугьы аӡә иоуп, хаҵарак ауп иҟоу, ӡӡаахрак ауп иҟоу, 6 Нцәас иҟоугьы, зегьы Абыс ирымоугьы аӡә иоуп, иара иаасҭа еиҳау дыҟам, иара ҳара зегьы ихы ҳаирхәоит, имч иҟанамҵо ҳәа ак ыҟам.

7 Анцәа ҳара зегь ҳахь ҳзыԥсам ақьиара ааирԥшит, дасу Христос ишҳаиҭаз еиԥш уи аҳамҭа ҳауит, 8 избанзар Аҩыраҿы иануп: «Аҳаракырахь дхалан, атҟәацәа игеит, иара урҭ ауаа ҳамҭаҵас иҳаиҭеит». 9 «Аҳаракырахь дхалан» иаанаго уаанӡа ҵаҟа, адгьыл ахь, дшылбаахьаз акәӡами? 10 Илбааз иоуп жәҩанс иҟоу зегьы ирхысны хыхь ихалаз, иара ила зегь харҭәаахарц азы.

11 Иара шьоукы апостолцәа реиԥш иҳаиҭеит, егьырҭ — аԥааимбарцәа реиԥш, даҽа шьоукы — ажәабжь бзиа зҳәо реиԥш, егьырҭ — ахьчацәеи арҵаҩцәеи реиԥш, 12 иԥшьоу ауаа ахшыҩ ддырҵаларц*, егьырҭ рымаҵ руларц, Христос ицәеижь дырӷәӷәаларц. 13 Дара уи ҟарҵалоит ҳара зегьы хаҵарак ала ҳаидкыланы ҳҟалаанӡа, Анцәа Иԥа изку ииашоу, иҵаулоу адыррақәа ҳарҳаанӡа, насгьы зегь рыла Христос иеиԥш ҳашәны ҳҟалаанӡа. 14 Убри аҟынтә амц зҳәо, насгьы ҩысҭаарала ауаа зжьо иахьырзыӡырҩуа иахҟьаны ацәқәырԥақәа зны анахь, зны арахь идыршәуа, еиуеиԥшым аҵарақәа рыԥшақәа ирыманы иқәу ахәыҷқәа уаҳа ҳреиԥшмыз. 15 Уи аҭыԥан аиаша ҳҳәалап, абзиабара ааҳарԥшлап, зегь рыла ҳхада, Христос, ҳиеиԥшны, доуҳала ҳашәны ҳҟаларц азы иҳалшо зегь ҟаҳҵалап. 16 Иара илоуп ацәеижь ахәҭақәа зегь шеибарку, ишеидҳәалоу, аҟәартәрақәа рыцхыраарала аус шеицыруа. Ацәеижь ахәҭақәа зегьы дасу рус анынарыгӡо, ацәеижь еизҳауеит, бзиабаралагьы иҭәуеит.

17 Убри аҟынтә Иҳақәиҭу иҿаԥхьа ишәасҳәоит: Анцәа дхазымҵо ауаа реиԥш уаҳа шәхы мҩаԥышәымгалан, избанзар дара акгьы иаԥсам рхәыцшьа ишрыҵанаҳәо еиԥш ауп ишынхо. 18 Рыхшыҩ алашьцара ахаԥаны иҟоуп, Анцәа иҳадигало аԥсҭазаарагьы иацәыхароуп, избанзар Анцәа дырдырыргьы рҭахӡам, ргәы хаҳәхеит. 19 Дара аламыс рцәыӡит, акы иацәыԥхашьо иҟам*, рыԥсы қымқымуа ргәаҳәара ҟьашьқәа рыҽрырҭоит.

20 Аха шәара еилышәкааит Христос ус дшыҟам, 21 ииҳәоз шәаҳаҵәҟьазар, ишәирҵоз шьҭышәкааҵәҟьазар, убасҟан ауп уи еилышәкааҵәҟьеит ҳәа шәҳәар аншәылшо, избанзар Иисус иҿы ауп аҵабырг ахьыҟоу. 22 Шәара ишәырҵан ажәытә цәаҩа шәшәышәхыр шакәу. Уи уаанӡатәи шәыԥсҭазаашьа ишәнаҭаз цәаҩоуп, шәызжьо шәгәаҳәарақәа ирыхҟьаны еиҳа-еиҳа абжьысрагьы иаҿуп. 23 Анаҩсгьы шәхәыцшьа шәырҿыцла, 24 ииашаҵәҟьоу аиашареи азиашареи зныԥшуа, Анцәа игәы иақәшәо цәаҩа ҿыцла шәҽеилашәҳәа.

25 Убри аҟынтә уажәшьҭа амцҳәара шәанаҟәыҵ, аиаша еибышәҳәала, избанзар зегьы цәеижьк ҳахәҭакуп. 26 Шәгәы аныԥжәо, агәнаҳа ҟашәымҵан, шәгәы ԥжәаны шәшыҟоу амра ҭамшәааит. 27 Аџьныш ацәгьара шәирҟаҵар шәымун. 28 Иӷьычуаз аӷьычра даҟәыҵны, иџьабаала ихы ныҟәигалааит, акы иаргәаҟуа ииҭаша имазарц азы. 29 Шәҿы жәа баакгьы ҭымҵааит, ауаа ргәы шьҭызхуа мацара шәҳәала — уи анаҭаху, ишәзыӡырҩуа ишәҳәо ахәарҭа рзаанагаларц азы. 30 Анцәа амҳәыр злашәааирхаз иԥшьоу идоуҳа шәмыргәаалан. Иара уи адоуҳала амҳәыр шәааирхеит, аиқәхара амш анааилак, шәахьҿыхыз абзоурала ахақәиҭра шәоурц азы.

31 Иааншәыжь агәеибакра, агәыԥжәара, аԥсахеибакра, аҳәҳәара, улазырҟәуа ажәақәа, убас цәгьарас иҟоу зегьы. 32 Ақьиара аашәырԥшла, шәрыцҳеибашьала, Христос ила Анцәа гәык-ԥсыкала шәыгәнаҳақәа шшәанаижьыз еиԥш, гәык-ԥсыкала аӡәи-аӡәи шәыгхақәа шәанеибажьла.

5 Анцәа шәиҿыԥшла, избанзар шәара бзиа иибо ихәыҷқәа шәоуп. 2 Анаҩсгьы Христос иеиԥш абзиабара аашәырԥшла. Иара бзиа ҳаибеит*, иԥсгьы ҳахҭниҵеит*, убасала Анцәа игәы иахәо афҩы зхылҵуа кәырбанс дҟалеит.

3 Асексуалтә ламысдареи*, иҟьашьу ахымҩаԥгашьеи, аԥсыцәгьареи зынӡаскгьы шәрыламцәажәалан, избанзар иԥшьоу ауаа уи алацәажәара рықәнагаӡам. 4 Иԥхоушьаша ахымҩаԥгашьеи, уаҩ хәарҭа изаазымго, ҵакы змам ацәажәарақәеи, алаф ҟьашьқәеи, изакәызаалак иҽеим акы шәыбжьара иҟамзароуп, уи аҭыԥан еснагь Анцәа иҭабуп ҳәа иашәҳәала. 5 Избанзар шәара ижәдыруеит, ибзиангьы еилышәкаауеит ламысдарала* зхы мҩаԥызго, ма угәы зырхынҳәуа аус ҟьашьқәа ҟазҵо, ма зыԥсы цәгьоу, даҽакала иуҳәозар, аидолқәа ирымҵахырхәо, Христоси Анцәеи Раҳра рбараны ишыҟам.

6 Ҵакы змам ажәақәа рыла аӡәгьы шәимжьааит, избанзар абри зегь азы Анцәа аҳәатәхамҵацәа рықәнага иақәиршәоит. 7 Убри аҟынтә сшәыҳәоит, урҭ иҟарҵо ҟашәымҵалан*. 8 Уаанӡа шәара шәлашьцаран, аха уажәшьҭа шәлашароуп, избанзар Иҳақәиҭу шәитәуп. Алашара иатәу ахәыҷқәа реиԥш шәхы мҩаԥыжәгала, 9 избанзар алашара абзиареи, аиашареи, аҵабырги ахылҿиаауеит. 10 Еснагь Иҳақәиҭу игәы иақәшәо аилкаара шәашьҭаз, 11 алашьцара иатәу, хәарҭа злам аусқәа уаҳа шәыҽрылашәмырхәлан, уи аҭыԥан урҭ шҽеим аашәырԥшла, 12 избанзар урҭ ауаа ицәыҵагәаны изҿу аусқәа уҿы иҭыгангьы иузҳәом. 13 Уажәшьҭа алашара иҽеим аусқәа ирықәыԥхоит, убасала урҭ аусқәа шҽеим аргама иубоит. 14 Убри аҟынтә иануп: «Уҿыха ицәоу, аԥсцәа рахьтә угыл, усҟан Христос илашара ухаирԥхоит».

15 Шәхы шәацклаԥшла, аҟәышра ззымхо реиԥш акәымкәа, иҟәышу реиԥш шәхы мҩаԥыжәгала, 16 шәаамҭа еиҳа ихадоу иазышәкла*, избанзар аамҭа цәгьа ҳҭагылоуп. 17 Зеилкаара маҷу ауаа реиԥш шәхы мҩаԥышәымгалан, есымша Иегова* ииҭаху аилкаара шәашьҭаз. 18 Иҟашәҵо шәзымдыруа аҟынӡа аҩы шәҽашәмыршьлан, уи аҭыԥан иԥшьоу адоуҳала шәхы-шәгәы шәырҭәла. 19 Аԥсаломқәеи, Анцәа дҳаразкуа ашәақәеи, имҵахырхәара иазку ашәақәеи ҳәо шәгәы шьҭибахла*, гәыкала* Иегова ашәа изышәҳәала. 20 Иҳақәиҭу Иисус Христос ихьӡала Ҳаб Ҳанцәа есымша зегьы рзы иҭабуп ҳәа иашәҳәала.

21 Христос иаҳаҭыразы аӡәи-аӡәи шәҳәатәы хеибаҵала. 22 Аҳәса рхацәа рҳәатәы харҵалааит, Иҳақәиҭу иҳәатәы шхарҵо еиԥш, 23 избанзар ахаҵа аԥҳәыс лхада иоуп, Христос аизара хадас дшамоу еиԥш, иара уи ацәеижь* аиқәырхаҩ иоуп. 24 Аизара Христос иҳәатәы ишықәныҟәо еиԥш, аҳәсагьы еснагь рхацәа рҳәатәы иқәныҟәалароуп. 25 Ахацәа, Христос аизара бзиа ибаны ихы шақәиҵаз еиԥш, шәаргьы убас шәыҳәса бзиа ижәбала. 26 Иара уи ҟаиҵеит, аизара ӡыла иӡәӡәошәа Анцәа иажәа ала иӡәӡәаны иԥшьарц азы. 27 Иара уи ҟаиҵеит аизара иара иҿаԥхьа иԥшӡаӡа, шәытарак, кыҷырак, ԥхасҭак, грак амамкәа, иԥшьаны иҟаларц азы.

28 Убас еиԥш ахацәагьы рхы бзиа ишырбо еиԥш рыҳәса бзиа ирбалароуп. Зыԥҳәыс бзиа дызбо ахаҵа ихгьы бзиа ибоит. 29 Дыҟам зцәеижь зцәымӷу ауаҩы, зегьы рцәеижь иеиҷаҳауеит, иахӡыӡаауеит, Христос аизара дшахӡыӡаауа еиԥш, 30 избанзар ҳара ицәеижь ахәҭақәа ҳауп. 31 «Убри аҟынтә ахаҵа иани иаби ааныжьны, еснагь иԥҳәыс длыцынхалоит*, усҟан ҩыџьа аӡәыкны* иҟалоит». 32 Иԥшьоу ари амаӡа аҵак ду амоуп. Зыӡбахә сҳәо Христоси аизареи роуп. 33 Убасала, дасу ихы бзиа ишибо еиԥш иԥҳәыс бзиа дибалааит, аԥҳәыс лакәзар, лхаҵа гәыкала пату иқәылҵалааит.

6 Ахәыҷқәа, шәҭаацәа Иҳақәиҭу ишиҭаху еиԥш рҳәатәы хашәҵала, избанзар уи иашоуп. 2 «Уани уаби ҳаҭыр рықәҵала» — ари ақәыргәыӷра зцу раԥхьатәи ԥҟароуп. Уи ақәыргәыӷра абас аҳәоит: 3 «Аԥсҭазаара бзиа уоурц, насгьы адгьыл аҿы акыршықәса нуҵырц азы». 4 Абацәа, шәхәыҷқәа ргәы ԥышәымжәалан, уи аҭыԥан Иегова* ишиҭаху еиԥш шәрылабжьо, ахшыҩ дырҵо ишәааӡала.

5 Амаҵуцәа, Христос иҳәатәы шәшықәныҟәо еиԥш, шәыԥшәмацәа гәыкала ҳаҭыр рықәҵо, ирҳәо ҟашәҵала. 6 Ауаа ргәы ҟаҳҵандаз ҳәа акәымкәа, шәанырымбогьы ирҳәо ҟашәҵала, гәык-ԥсыкала Анцәа ииҭаху ҟазҵо Христос имаҵуцәа реиԥш шәыԥшәмацәа гәык-ԥсыкала шәырзыӡырҩла. 7 Дара рзы иҟашәҵо ауаа рзы акәымкәа, Иегова изы иҟашәҵошәа гәыкала рымаҵ жәула. 8 Ишыжәдыруа еиԥш, Иегова дасу иҟаиҵо аус бзиақәа рзы дизылԥхоит, уи дмаҵуҩызаргьы, ихы дақәиҭызаргьы. 9 Шәаргьы, аԥшәмацәа, шәмаҵуцәа убасҵәҟьа шәырзыҟаз, ишәмыршәалан, шәырмықәмақарлан, избанзар ижәдыруеит даргьы шәаргьы ажәҩан аҿы аԥшәма дышшәымоу, насгьы уи ауаа шеилимхуа.

10 Аҵыхәтәан ишәасҳәоит, анаҩсгьы Иҳақәиҭу илеи имч ӷәӷәа алеи шәыҽшәырӷәӷәала. 11 Анцәа бџьармаҭәас ишәиҭо зегь шәшәышәҵа, Аџьныш ишьацҳәақәа шәырҿамшәарц азы. 12 Избанзар ҳара ҳазҿагыланы ҳақәԥо ауаа* ракәӡам, ҳазҿагыланы ҳақәԥо аҳәынҭқаррақәеи, амчрақәеи, алашьцара зхаԥаны иҟоу адунеи анапхгаҩцәеи, ажәҩан аҿы иҟоу адоуҳа цәгьақәеи роуп. 13 Убри аҟынтә Анцәа бџьармаҭәас ишәиҭо зегь шәшәышәҵа, аӷа даншәықәло амш аҽны шәиҿагыларц азы. Зегь рыла шәҽырхианы шәҟалар, аиааира жәгоит.

14 Убасала, шәаӷа шәиҿагыларц азы аҵабырг амаҟа шәымӷашәҵа, аиашара агәышԥыхьчага шәшәышәҵа, 15 аҭынчра иазку ажәабжь бзиа аҳәара шәазхиазарц азы аимаа шәышьашәҵа, 16 иара убас ахаҵара аԥырак ду шьҭышәх, Аҩсҭаа* идәықәиҵо амца зку ахыцқәа шәырцәарц азы. 17 Уи адагьы, аиқәырхагатә хыхьчага шәхы иахашәҵа, иара убасгьы ишьҭышәх иԥшьоу адоуҳа аҳәа, даҽакала иуҳәозар, Анцәа иажәа. 18 Алшара шаашәоулак, адоуҳа ишшәыҵанаҳәо еиԥш Анцәа шәиҳәала, шәӷьаҵәыӷьаҵәуагьы шәиҳәала. Уи шәхашәмыршҭларц азы еснагь шәхы шәацклаԥшла, есымша иԥшьоу зегьы рзы гәык-ԥсыкала Анцәа шәиҳәала. 19 Сара сызгьы Анцәа шәиҳәала, санцәажәало Анцәа иахәҭоу ажәақәа сҿаиршәарц, насгьы сымшәаӡакәа ауаа ажәабжь бзиа иаҵоу иԥшьоу амаӡа рзеиҭасҳәаларц. 20 Уи ажәабжь сҳәаларц азоуп Анцәа цҳаражәҳәаҩыс сзыҟаиҵаз, уи ажәабжь азоуп зынџьырлагьы* сызҿаҳәоу. Анцәа шәиҳәала, ишсыхәҭоу еиԥш, сымшәа-смырҳа уи ажәабжь аҳәара сылшарц азы.

21 Егьыс, сусқәа шцо, сызҿу атәы бзиа иаҳбо, гәык-ԥсыкала Иҳақәиҭу имаҵ зуа ҳашьа Ти́хик ишәзеиҭеиҳәоит. 22 Сара уи дышәзынасышьҭуеит, ҳусқәа шцо шәзеиҭеиҳәарц, шәыгәгьы шьҭихырц азы.

23 Аишьцәа Ҳаб Ҳанцәеи Иҳақәиҭу Иисус Христоси иҳарҭо аҭынчреи ахаҵара зцу абзиабареи рыгымзааит. 24 Иҳақәиҭу Иисус Христос наӡаӡатәи бзиабарала бзиа дызбо зегьы Анцәа иааирԥшуа ҳзыԥсам ақьиара рыгымзааит.