ИОАНН АКТӘИ ИСАЛАМШӘҞӘЫ

1 Аханатә иҟаз, ҳаззыӡырҩуаз, ҳаблақәа рыла иаҳбоз, зусқәа ҳбоз, ҳазлакьысуаз, аԥсҭазаара узҭо ажәа ҳзаазгаз изкны ишәзаҳаҩуеит. 2 Ҳара Ҳаб иҳаиҭо наӡаӡатәи аԥсҭазаара аӡбахә ҳаҳаит, иагьеилаҳкааит, шәаргьы уи аӡбахә шәзеиҭаҳҳәоит. 3 Ҳара иаҳбаз, иҳаҳаз атәы шәзеиҭаҳҳәоит, шәареи ҳареи аӡәк иеиԥш ҳаҟазарц азы, Ҳаби Иисус Христоси аӡәк иеиԥш ишыҟоу еиԥш. 4 Ҳара уи аӡбахә шәзаҳаҩуеит, ҳгәы еиҳагьы гәырӷьарала иҭәырц азы.

5 Абар ҳара Иисус иҟынтә иҳаҳаз, шәаргьы ишәылаҳҳәо ажәабжь: Анцәа длашароуп, иара зынӡа алашьцара илаӡам. 6 Ҳара иаҳҳәозар иареи ҳареи аӡәк иеиԥш ҳаҟоуп ҳәа, аха алашьцараҿы ҳныҟәозар, амц ҳҳәоит, аҵабырг иаҳәогьы ҳақәныҟәаӡом. 7 Аха иара алашараҿы дшыҟоу еиԥш алашараҿы ҳныҟәалар, ҳара зегьы аӡәк иеиԥш ҳҟалоит, Иԥа, Иисус, ишьагьы ҳагәнаҳақәа зегь рҟынтә ҳарыцқьоит.

8 Агәнаҳа ҳалаӡам ҳәа ҳҳәозар, ҳхы ҳжьоит, аҵабырггьы агәра ҳгаӡом. 9 Агәнаҳа шыҟаҳҵаз аартны иаҳҳәозар, Анцәа иҳанаижьуеит, ҳагьирыцқьоит, избанзар иара диашоуп, уиқәгәыӷыртә дыҟоуп. 10 Агәнаҳа ҟаҳамҵаӡеит ҳәа ҳҳәозар, Анцәа дымцҳәаҩушәа ааҳарԥшуеит, иажәақәагьы рыгәра ҳгаӡом.

2 Бзиа избо схәыҷқәа, ари зышәзысыҩуа агәнаҳа ҟашәымҵарц азоуп. Аха аӡәы агәнаҳа ҟаиҵаргьы, Ҳаб иҿы иҟоу, иара иҿаԥхьа аус бзиақәа ҟазҵо ацхырааҩ дҳамоуп — уи Иисус Христос иоуп. 2 Иара ҳагәнаҳақәа рҟынтә ҳҿызхуа, Анцәеи ҳареи ҳаинзыршәо кәырбануп. Уи ҳагәнаҳақәа рзы мацара акәым, адунеи зегь иқәынхо ауаа рыгәнаҳақәа рзгьы дкәырбануп. 3 Христос иԥҟарақәа наҳагӡозар, дшаҳдыруа ааҳарԥшуеит. 4 Сара уи дыздыруеит ҳәа зҳәо, аха иԥҟарақәа назмыгӡо дымцҳәаҩуп, аиашара илам. 5 Иажәа назыгӡо иакәзар, Анцәа бзиа дшибаҵәҟьо ааирԥшуеит. Ҳаргьы уи наҳагӡозар, иареи ҳареи аӡәк иеиԥш ҳшыҟоу ааҳарԥшуеит. 6 Иареи сареи аӡәк иеиԥш ҳаҟоуп ҳәа зҳәо, Иисус иеиԥш дынхалароуп.

7 Бзиа избо схәыҷқәа, сара ишәзысыҩуа иҿыцу ԥҟараӡам, аханатә аахыс ижәдыруа жәытә ԥҟароуп. Ари ажәытә ԥҟара шәара ишәаҳахьеит. 8 Аха уеизгьы ишәзысыҩуа аԥҟара — ҿыцуп. Уи Христос инаигӡоз, шәаргьы инашәыгӡо ԥҟароуп. Уажәшьҭа алашьцара ҳхыҵуеит, уажәнатә алашара каххаа иаҳхаԥхоит.

9 Алашараҿы сыҟоуп ҳәа зҳәо, аха зашьа дызцәымӷу, макьана алашьцара дыҵоуп. 10 Зашьа бзиа дызбо алашараҿы дыҟоуп, иара акгьы дахҟьашаӡом. 11 Аха зашьа дызцәымӷу алашьцара дыҵоуп, дахьныҟәогьы лашьцароуп. Иара дахьцо ибаӡом, избанзар алашьцара инарбаӡом.

12 Бзиа избо схәыҷқәа, ишәзысыҩуеит, избанзар Иисус иаҳаҭыразы шәыгәнаҳақәа шәанажьуп. 13 Ишәзысыҩуеит абацәа, избанзар шәара аханатә аахыс иҟоу дыжәдыруеит. Ишәзысыҩуеит аҿарацәа, избанзар Аҩсҭаа* шәииааит. Ишәзысыҩуеит ахәыҷқәа, избанзар шәара Ҳаб дыжәдыруеит. 14 Ишәзысыҩуеит абацәа, избанзар шәара аханатә аахыс иҟоу дыжәдыруеит. Ишәзысыҩуеит аҿарацәа, избанзар шәара шәыӷәӷәоуп, Анцәа иажәа агәра жәгоит, Аҩсҭаагьы* шәииааит.

15 Ари адунеи бзиа ишәымбан, уи иатәугьы акгьы бзиа ишәымбан. Ари адунеи бзиа избо, Ҳаб бзиа дибаӡом, 16 избанзар ари адунеи аҿы иҟоу зегьы — ацәеижь агәаҳәарақәа, аблақәа ирҭаху, амал алаҽхәара — Ҳаб итәӡам, ари адунеи ауп изтәу. 17 Ари адунеи агәаҳәарақәеи иареи ииасуеит, Анцәа игәы иақәшәо ҟазҵо — наӡаӡа дынхалоит.

18 Схәыҷқәа, ари аҵыхәтәантәи асааҭ ауп. Шәара ишәаҳахьеит антихрист даараны дшыҟоу, уажәы антихристцәа рацәахеит. Убри алагьы иаҳдыруеит ари аҵыхәтәантәи асааҭ шакәу. 19 Урҭ ҳара иҳаиуаз ракәын, аха иҳалҵит, избанзар ҳара иҳаиԥшӡамызт. Ҳара иҳаиԥшызҭгьы, ҳабжьара иаанхон, аха иҳалҵит, ҳара ишҳаиԥшым убарҭахарц азы. 20 Шәара Иԥшьоу ила шәалхуп*, шәара зегьы адырра шәымоуп. 21 Ари зышәзысыҩуа аҵабырг ахьышәзымдыруа азы акәӡам, иахьыжәдыруа азоуп, насгьы аҵабырг амц ахьахылымҿиаауа азоуп.

22 Иисус — Христос иакәӡам ҳәа зҳәо дымцҳәаҩӡами? Уи дантихриступ, Абгьы Аԥагьы рыгәра игаӡом. 23 Аԥа дхазымҵо Абгьы димаӡам, Аԥа дхазҵо Абгьы димоуп. 24 Шәара аханатә ишәаҳахьаз ҟашәҵала. Аханатә ишәаҳаз ҟашәҵалар, Аԥеи шәареи аӡәк иеиԥш шәҟалоит, иара убас Аби шәареи аӡәк иеиԥш шәҟалоит. 25 Иара наӡаӡатәи аԥсҭазаара ҳақәиргәыӷит.

26 Абри зышәзысыҩуа шьоукы шәыржьарц иахьашьҭоу азоуп. 27 Шәара Анцәа иԥшьоу идоуҳала шәалихит*. Шәара уи адоуҳа шәымоуп, убри аҟынтә шәырҵара аҭахӡам. Анцәа аҵара шәирҵоит, избанзар иара шәалихит, ҵабыргыҵәҟьаны шәалихит. Иара ишышәирҵаз еиԥш, иареи шәареи аӡәк иеиԥш шәыҟаз. 28 Схәыҷқәа, иареи шәареи аӡәк иеиԥш шәыҟаз, имчра анааирԥшлак, ҳамшәакәа иҿаԥхьа ҳгыланы ҳцәажәаларц, насгьы ҳаԥхашьаны ҳҽаҳамҵәахырц азы. 29 Иара дышиашоу жәдыруазар, ииашаны зхы мҩаԥызго зегьы Анцәа иҟынтә ишизгьы жәдыруеит.

3 Шәахәаԥш Ҳаб ибзиабара ҳара ҳахь шаҟа иӷәӷәоу — иара ихәыҷқәа ҳакәны ҳҟалартә алшара ҳаиҭеит. Ҳара ихәыҷқәа ҳакәҵәҟьоуп. Ари адунеи иара даздырӡом, убри азоуп ҳаргьы ҳзазымдыруа. 2 Бзиа избо сашьцәеи саҳәшьцәеи, ҳара Анцәа ихәыҷқәа ҳауп, аха макьана ҳзеиԥшрахо ҳаздырӡом. Иаҳдыруа, имчра анааирԥшлак, иара ҳашиеиԥшхо ауп, избанзар дзеиԥшраҵәҟьоу ҳбоит. 3 Иара ибзоурала уи агәыӷра змоу дарбанзаалак иҽирыцқьоит, иара дшыцқьоу еиԥш.

4 Агәнаҳа ҟазҵо дарбанзаалак азакәан еилеигоит. Агәнаҳа аҟаҵара иаанаго азакәан аилагара ауп. 5 Шәара иара убас ижәдыруеит, Иисус ҳагәнаҳақәа рҟынтә ҳҿихырц азы дшааз. Иара гәнаҳара илам. 6 Иареи шәареи аӡәк иеиԥш шәыҟазар, агәнаҳа ҟашәҵалаӡом. Агәнаҳа ҟазҵо уи димбаӡацт, дагьиздырӡом. 7 Бзиа избо схәыҷқәа, аӡәгьы шәимжьааит. Ииашаны зхы мҩаԥызго диашоуп, Иисус дышиашоу еиԥш. 8 Агәнаҳа ҟазҵо Аџьныш иусқәа роуп иҟаиҵо, избанзар Аџьныш аханатә аахыс агәнаҳаҟаҵара даҿуп. Анцәа Иԥа дзааз Аџьныш иусқәа хирбгаларц азоуп.

9 Анцәа иҟынтә ииз агәнаҳа ҟаиҵаӡом, избанзар иара Анцәа идоуҳа имоуп. Убри аҟынтә иара агәнаҳа изыҟаҵаӡом, избанзар Анцәа иҟынтә диит. 10 Абар Анцәа ихәыҷқәеи Аџьныш ихәыҷқәеи злоудыруа: ииашаны зхы мҩаԥызымго Анцәа дитәым, зашьагьы бзиа дзымбо Анцәа дитәым. 11 Абар аханатә аахыс ишәаҳахьаз аԥҟара: ҳара бзиа ҳаибабалароуп. 12 Ҳара Аҩсҭаа* иитәыз, зашьа дызшьыз Каин ҳиеиԥшымзароуп. Избан иашьа дзишьыз? Избанзар иара иусқәа цәгьан, иашьа иусқәа бзиан.

13 Сашьцәа, ари адунеи шәахьацәымӷу џьашәымшьан. 14 Ҳара иаҳдыруеит аԥсра аҟынтә аԥсҭазаарахь ҳшиасыз, избанзар ҳашьцәа бзиа иаҳбоит. Зашьцәа бзиа изымбо дшыԥсу даанхоит. 15 Зашьа дызцәымӷу дарбанзаалак, ауаҩы дызшьыз диҩызоуп. Шәара ижәдыруеит, ауаҩы дызшьуа наӡаӡатәи аԥсҭазаара шимоуа. 16 Иисус Христос иԥсы* ахьҳахҭниҵаз абзоурала, ҳара абзиабара шаарԥшлатәу еилаҳкааит. Убри аҟынтә ҳаргьы ҳашьцәа ҳаԥсы* рыхҭынҵара ҳазхиазароуп. 17 Аӡәы ихы ныҟәигарц азы иаҭаху зегь имазар, аха измам иашьа дрыцҳашьаны димыцхраауазар, Анцәа бзиа дызбоит ҳәа злеиҳәои? 18 Схәыҷқәа, ҳара абзиабара ажәала акәымкәа, усла иааҳарԥшлароуп.

19 Убри ала ҳара аҵабырг ҳшатәу еилаҳкаауеит, Анцәа бзиа ҳшибогьы ҳгәы агәра аҳаргоит, 20 уи ҳақәыӡбозаргьы, избанзар Анцәа ҳгәы аасҭа деиҳауп, иара зегь идыруеит. 21 Бзиа избо сашьцәеи саҳәшьцәеи, ҳгәы ҳақәмыӡбозар, ҳамшәакәа Анцәа ҳиҳәалар ҳалшоит. 22 Ҳара иԥҟарақәа наҳагӡоит, дзыргәырӷьо аусқәагьы ҟаҳҵоит, убри азы ҳзызиҳәозаалакгьы ҳаиҭоит. 23 Абар иара иԥҟара: ҳара Иԥа, Иисус Христос, дхаҳҵалароуп, насгьы, иара ишҳадиҵаз еиԥш, бзиа ҳаибабалароуп. 24 Иԥҟарақәа назыгӡои иареи аӡәк иеиԥш иҟоуп. Ҳаргьы идоуҳа ахьҳаиҭаз абзоурала иареи ҳареи аӡәк иеиԥш ҳшыҟоу еилаҳкаауеит.

4 Бзиа избо сашьцәеи саҳәшьцәеи, иаҳҳәо Анцәа иҟынтә ауп ҳәа шәазҳәо зегь рыгәра шәымгалан. Аха ишәарҳәо Анцәа иҟынтә акәу-акәму гәашәҭала, избанзар амцԥааимбарцәа рацәаҩхеит.

2 Абар ишәарҳәо Анцәа иҟынтә акәу-акәму злажәдыруа: Иисус Христос ауаҩ иеиԥш дааит ҳәа зҳәо ииҳәо Анцәа иҟынтә ауп. 3 Иисус ауаҩ иеиԥш дмааӡеит ҳәа зҳәо ииҳәо Анцәа иҟынтә акәӡам. Уи ишшәаҳахьоу еиԥш, ицәырҵраны иҟаз, иагьцәырҵыз антихристцәа рҵароуп.

4 Анцәа иитәу схәыҷқәа, шәара урҭ ауаа шәыриааит, избанзар шәара ишәыцу дара ирыцу иаасҭа деиҳауп. 5 Дара ари адунеи иатәуп, убри азоуп адунеи иатәу зырҳәо, ари адунеигьы урҭ ирҳәо изазыӡырҩуа. 6 Ҳара Анцәа ҳаитәуп. Анцәа иеилкаара иашьҭоу иаҳҳәо дазыӡырҩуеит, иашьҭам — даҳзыӡырҩӡом. Убасала, ҳара ииашоу аҵареи амцҵареи еиҩаҳдыраауеит.

7 Бзиа избо сашьцәеи саҳәшьцәеи, бзиа ҳаибабалап, избанзар абзиабара Анцәа иитәу акоуп. Абзиабара аазырԥшуа Анцәа иҟынтә диит, Анцәа дидыруеит. 8 Абзиабара аазмырԥшуа Анцәа диздырӡом, избанзар Анцәа дыбзиабароуп. 9 Анцәа Иԥазаҵә дааишьҭит, убри ила аԥсҭазаара ҳаурц азы. Убасала иара бзиа ҳшибо ааирԥшит. 10 Анцәа иареи ҳареи ҳаиниршәарц азы Иԥа кәырбанс дааишьҭит. Иара уи зыҟаиҵаз ҳара бзиа дахьаҳбаз азы акәӡам, иара бзиа ҳахьибаз азоуп.

11 Бзиа избо сашьцәеи саҳәшьцәеи, Анцәа абас бзиа ҳаибазар, ҳаргьы бзиа ҳаибабалароуп. 12 Анцәа дызбахьоу ҳәа аӡәгьы дыҟаӡам. Бзиа ҳаибабозар, Анцәа ҳара дҳацуп, абзиабарагьы нагӡаҵәҟьаны иааҳарԥшуеит. 13 Иара идоуҳа ҳаиҭеит. Убри ала иареи ҳареи аӡәк иеиԥш ҳшыҟоу еилаҳкаауеит. 14 Ҳара ҳхаҭа иаҳбеит, Ҳаб адунеи еиқәирхарц азы Иԥа дшааишьҭыз, уи шаҳаҭрагьы азаҳуеит. 15 Иисус Анцәа Иԥа шиакәу хазҵои Анцәеи аӡәк иеиԥш иҟоуп. 16 Ҳара Анцәа бзиа ҳшибо еилаҳкааит, уи ус шакәугьы агәра ҳгеит.

Анцәа дыбзиабароуп. Еснагь абзиабара аазырԥшуа ауаҩи Анцәеи аӡәк иеиԥш иҟоуп. 17 Убасала ҳара абзиабара инагӡаны аарԥшра ҳалагеит, аӡбара амш аҽны ҳамшәакәа ҳцәажәарц азы, избанзар ари адунеи аҿы ҳара Христос ҳаиҿыԥшуеит. 18 Абзиабара злоу ашәара илаӡам, инаӡоу абзиабара ашәара улнацоит. Ашәара ауаҩы дашьаҳауеит. Ишәо ауаҩы абзиабара нагӡаны изаарԥшӡом. 19 Ҳара Анцәа бзиа даҳбоит, избанзар иара иоуп раԥхьа бзиа ҳазбаз.

20 Аӡәы Анцәа бзиа дызбоит ҳәа иҳәозар, аха иашьа дицәымӷзар, амц иҳәоит. Иубо уашьа бзиа думбозар, иумбо Анцәа бзиа дызлоубои? 21 Абар иара иҳаиҭаз аԥҟара: Анцәа бзиа дызбо иашьагьы бзиа дибалароуп.

5 Иисус — Христос шиакәу агәра зго Анцәа ихәыҷ иоуп. Анцәа бзиа дызбо, Анцәа ихәыҷқәагьы бзиа ибоит. 2 Анцәа бзиа даҳбозар, иԥҟарақәагьы наҳагӡозар, Анцәа ихәыҷқәа бзиа ишаҳбо еилаҳкаауеит. 3 Анцәа бзиа ибара иаанаго иԥҟарақәа рықәныҟәара ауп, урҭ рықәныҟәарагьы цәгьаӡам, 4 избанзар Анцәа иҟынтә ииз зегьы адунеи иаиааиуеит. Ҳхаҵара абзоуралоуп адунеи ҳшаиааизгьы.

5 Иисус Анцәа Иԥа шиакәу агәра зго иакәӡами адунеи иаиааир зылшо? 6 Иисус Христос аӡи ашьеи рыла дааит. Аӡы мацарала акәымкәа, аӡи ашьеи рыла. Адоуҳагьы уи шьақәнарӷәӷәоит. Уи иаҳәо ҵабыргуп. 7 Иисус дызусҭоу аазырԥшуа аршаҳаҭгақәа хԥа ыҟоуп: 8 адоуҳа, аӡы, ашьа. Урҭ рыхԥагьы рышаҳаҭра еиқәшәоит.

9 Ауаа ирҳәо агәра ҳгозар, Анцәа ииҳәо еиҳагьы ихадоуп, избанзар уи зҳәо Анцәа иоуп. Иара ихаҭа Иԥа шаҳаҭра изиуеит. 10 Анцәа Иԥа дхазҵо Анцәа иҟынтә ашаҳаҭра идикылоит. Анцәа игәра зымго, уи дымцҳәаҩушәа дааирԥшуеит, избанзар Анцәа Иԥа изы иҟаиҵо ашаҳаҭра агәра игаӡом. 11 Абар уи шаҳаҭрас иҟаиҵо: иара Иԥа ила наӡаӡатәи аԥсҭазаара ҳаиҭеит. 12 Аԥа дыздызкыло наӡаӡатәи аԥсҭазаара имоуп, Анцәа Иԥа дыздызымкыло наӡаӡатәи аԥсҭазаара имаӡам.

13 Сара ари зышәзысыҩуа, шәара, Анцәа Иԥа дхазҵаз, наӡаӡатәи аԥсҭазаара шшәымоу жәдыруазарц азоуп. 14 Ҳара агәра ганы ҳаҟоуп Анцәа ҳаниҳәо, иаҳҳәо зегь шиаҳауа, иаҳҳәо игәы иақәшәозар. 15 Иаҳҳәо зегь шиаҳауа ҳдыруазар, ҳзызиҳәозаалакгьы шҳаиҭо ҳдыруеит, избанзар иара ҳиҳәеит.

16 Аӡәы ибар иашьа аԥсрахьы уназымго агәнаҳа шыҟаиҵо, уи изы Анцәа диҳәароуп, Анцәагьы уи аԥсҭазаара ииҭоит. Уи аԥсрахьы уназымго агәнаҳа ҟазҵо роуп изызку. Аха иҟоуп аԥсрахьы уназго агәнаҳа. Уи аҩыза агәнаҳа ҟазҵо изы Анцәа шәиҳәалароуп ҳәа сҳәаӡом. 17 Иарбан цәгьаразаалак — гәнаҳароуп. Аха иҟоуп аԥсрахьы уназымго агәнаҳа.

18 Ҳара иаҳдыруеит Анцәа иҟынтә ииз агәнаҳа шыҟаимҵо. Анцәа Иԥа уи дихылаԥшуеит, Аҩсҭаагьы* дзиԥырхагахом. 19 Ҳара Анцәа ҳшитәу ҳдыруеит, аха адунеи зегь Аҩсҭаа* инапаҿы иҟоуп. 20 Аха ҳара иаҳдыруеит Анцәа Иԥа дшааз, насгьы аилкаара шҳаиҭаз, Нцәас иҟаҵәҟьоу даҳдырырц азы. Иԥа, Иисус Христос, ибзоурала Анцәеи ҳареи аӡәк иеиԥш ҳаҟоуп. Иара иоуп Анцәаҵәҟьа, уи наӡаӡатәи аԥсҭазаара дахыҵхырҭоуп. 21 Схәыҷқәа, аидолқәа рымԥан шәықәымлан.