Ажәабжьҳәаҩцәа рызҵаарақәа
◼ Шаҟа лассы-лассы дныҟәалар ихәҭоузеи иӡаахым ажәабжьҳәаҩ аизарақәа рахь, насгьы иҽшԥалаирхәлар акәзеи иара ажәабжьҳәара, аҽӡаахра азин ирҭаанӡа?
Аҽӡаахра — аԥсҭазаараҿ даара ихадоу шьаҿоуп. Убри аҟынтә, ауаҩы аҽӡаахра азин ирҭаанӡа, иара ибзиаӡаны еиликаауазароуп Анцәа иҭахрақәа. Уи адагьы, иубаратәы иҟазар ауп урҭ аҭахрақәа инарықәыршәаны анхара дшазхиоу.
Ақьырсианцәа ирыдҵоуп аиԥыларақәа аанырмыжьларц, убри аҟынтә иӡаахым ажәабжьҳәаҩ иҽазишәалароуп аизарақәа бжьеимыжьларц (Аур. 10:24, 25). Ишаԥу еиԥш, ибзиоуп иара аизараҿы аҭакқәа аиҭалар, насгьы Атеократиатә маҵзура ашкол дҭаҩзарц, уи ихымԥадатәиу аҭахра шакәымгьы.
Уи адагьы, ақьырсианцәа зегьы ажәабжь бзиа аиҭаҳәареи аҵаҩцәа разыҟаҵареи рыдуп аҟынтә, ажәабжьҳәаҩ иҽӡааихаанӡа иааиԥмырҟьаӡакәа амаҵзура иҽалаирхәуазар ауп (Матф. 24:14; 28:19, 20). Шаҟа мза ажәабжь иҳәалар акәзеи иара, аҽӡаахразы азин ирҭаанӡа? Ҟәышрахон убри аҟара аамҭа иҭазар, есымза активла, насгьы иааиԥмырҟьаӡакәа амаҵзура аҽалархәра дшазхиоу ааирԥшырц (Ԥс. 78:37). Аха ажәабжьҳәара даналагаз инаркны иҽӡааихаанӡа, хымԥада аамҭа рацәаны ииасыр акәӡам, зны-зынла мызқәакгьы азхоит. Шаҟа сааҭ ажәабжь иҳәалар ихәҭоузеи иара мызкахьы? Ара иҟаӡам ишьақәыргылоу аԥҟарақәа. Аизара аиҳабацәа азхәыцроуп ажәабжьҳәаҩцәа хаҭала рҭагылазаашьа, насгьы иаадырԥшыроуп аҟәыӷареи аҭышәынтәалареи (Лука 21:1—4).
Аизара аиҳабацәа (ма амаҵзуратә цхырааҩцәа, аизара аиҳабацәа азымхозар), аҽӡаахра зҭаху рҿы аиҿцәажәара мҩаԥызго иргәалашәозар ауп ауаа зегь шеиԥшым, насгьы иаадырԥшлароуп аҟәыӷара, иӡаахым ажәабжьҳәаҩ аӡаахразы аҭахрақәа дрықәшәоу-дрықәымшәоу анырыӡбо. Иубаратәы иҟазароуп иара ииашаҵәҟьаны Иегова Ишаҳаҭ иакәны дҟаларц шиҭаху, насгьы аизарақәа рҭаареи амаҵзура аҽалархәреи ҳаҭырқәҵараны ишиԥхьаӡо. Аизара аиҳабацәа, ҳәарада, еилыркаауеит уи ауаҩы аҵыхәтәанынӡа доуҳала дшымшәыц, насгьы иӡааху ажәабжьҳәаҩцәа ирымоу аԥышәа шимам. Аизара аиҳабацәа уи аҽӡаахра дазхиам ҳәа рыԥхьаӡозар, дара Абиблиа шьаҭас иҟаҵаны, рыӡбара мзызс иамоу иеилдыркаауеит, насгьы адоуҳатә цхыраара иоурц иеиҷаҳауеит.