Ọdaphan Ịpe ạ Mạtiu Ạge Bọ
2 Rọmhar bọ Jizọs sịphe Bẹtẹlẹhẹm ẹpe Judia mem mọ ạ Hẹrọd* kụ aḍighi bọ uwo ẹmha phọ, bịn ạbuo idike dị ropogh ghan rạanhaan kọghaaph ịdi kemite ọḅua ẹpe erumuḍio phọ remite ghan bọ oru Jeruselem, 2 kụ opuru mọ: “Odi ẹghen ọony phọ ọmhar bọ oḍighi uwo ẹmha ạbuo a Ju phọ? Loor esi dị yoor ụmhiin ẹenhaan ọdi mem mọ yoor odi bọ ẹpe erumuḍio phọ remite ghan bọ, kụ yoor moru oghuenhi* ọdi.” 3 Kụ mem mọ uwo ẹmha phọ Hẹrọd r’oomo a Jeruselem ọnhaghan bọ ịphen phọ, ịghurughur ri iboom ekpom ạbidi. 4 Kụ ọdi aakpomhoghi oomo aruwo ẹmhu ạbupinyon rịkia phọ r’ạbutughemhia Olhogh phọ, kụ apuru ekpisi phọ kọmar bọ Krạịst* phọ. 5 Kụ bịdi ọḅenhi nyọdi mọ: “Sịphe Bẹtẹlẹhẹm ẹpe Judia, loor esi dị oyil phọ ạge mọ: 6 ‘Nạ ạ Bẹtẹlẹhẹm, ọpo ade phọ a Juda, oomo abupoghom mọ a Juda ụ́kpe ọmhiin ạna ịdipho ẹmha dị esoorom, loor esi dị esi ạna kụ ẹdi ọtooghia kạḍua atu, ọpo kapogh bọ we phọ ạmhi Izrẹl.’”
7 Kụ ạ Hẹrọd amitenhom ezue bụo idike phọ kụ apuru ọkar olhegheri amem mọ ẹenhaan phọ emite bọ. 8 Ratom bọ bịdi ọghi ạ Bẹtẹlẹhẹm, kụ ạḅem mọ: “Ịki emhiigha loor ẹwa ọbumoony phọ, nyinha rẹmhiin kụ eru ịḅenhi ịmhi pịdi mị ạghi aghuenhi aani nyọdi.” 9 Bịdi rọnhaghan ịpe uwo ẹmha phọ ạghaaph bọ kụ ọḅua. Kụ ẹenhaan phọ bịdi ọmhiin bọ mem mọ bịdi odi bọ ẹpe erumuḍio phọ remite ghan bọ, eḍiemhiom bịdi tụtu ẹghi ẹmheera ạnyu otu phọ ọbumoony phọ ạrol bọ. 10 Bịdi ọmhiin bọ ẹenhaan phọ, ụmhoogh ni iboom ibo. 11 Roḍigh olhoghi otu phọ, kụ ọmhiin ọbumoony phọ ra Meri onhiin phọ ọdi, kụ okpuḍian oghuenhi nyọdi. Kụ bịdi omiteom ruunmo a gol rạ frạnkinsẹns rạ mạạ ọngo nyọdi. 12 Kụolo loor esi ịphur ạruru dị Ẹnhaan ạngo bịdi ụmalha mọ kúḅula mụn ụteeny Hẹrọd, bịdi ukiton ẹnhon eten kụ oḅula ẹpe eelhe phọ ạbidi.
13 Bịdi rọḅua, bịn ọokpaany a Jehova* amitenhaan Josẹf ụmalha, kụ ạḅenhi mọ: “Ḅetenhu, ạsighe ọbumoony phọ r’onhiin phọ ọdi esuma ẹghi Ijipt, kụ ẹrol ẹpe phọ tụtu mị ạḅenhi nyịnha ịlo oḍighi, loor esi dị ạ Hẹrọd kạwa ni ọbumoony phọ oghiigh.” 14 Kụ a Josẹf aḅetenhu ạsighe ọbumoony phọ r’onhiin phọ ọdi ḍughul ạghimhom Ijipt. 15 Ọdi ạrol li ẹpe phọ tụtu ạ Hẹrọd amhugh. Kụ ịphen phọ imhunhenhi ịpe a Jehova* ạghaaph bọ dị eego esi oyil phọ ọdi mọ: “Mị ụmhagh ni ọony phọ ạmhi amiteom Ijipt.”
16 Mem mọ ạ Hẹrọd ạmhiin bọ mọ awe idike phọ mookelheghi nyọdi, ọdi ạghagh ni olhoghi iboom, kụ arom we mọ ọghi Bẹtẹlẹhẹm r’oomo ạramha phọ ekoom bọ ọze lephiri ạnmuny, emhiigh bụlo mọmhan ịyal ạsia kụ esoor ude. Ịphen phọ ịdaphan mem mọ ạbuo idike phọ ọḅenhi bọ nyọdi mọ bịdi ọmiin ẹenhaan phọ. 17 Ịpe phọ imhunhenhi ịpe oyil phọ Jerimạyạ ạghaaph bọ mọ: 18 “Ụnhaghan ni ẹḍogh ẹpe Remạ, dị remoghi r’iboom ịlooghi. A Resẹl kụ ramoghi ghan nmụny ọdi, kụ ómheera mọ ọodereghi nyịnho, loor esi dị bịdi úlo mụn.”
19 Ạ Hẹrọd romhugh, bịn ọokpaany a Jehova* amitenhaan Josẹf ụmalha ẹpe Ijipt 20 kụ ạḅem mọ: “Ḅetenhu, ạsighe ọbumoony phọ r’onhiin phọ eḅula ẹpe ade phọ Izrẹl, loor esi dị bụphe ọwa ghan bọ oghiigh ọbumoony phọ momhuughu.” 21 Kụ ọdi aḅetenhu ạsighe ọbumoony phọ r’onhiin phọ kụ bịdi oḅula ẹpe ade phọ Izrẹl. 22 Mem mọ ọdi ạnhaghan bọ mọ Ạkẹleyọs kụ rạtooghi esi ạ Hẹrọd ọde phọ ọdi ẹpe Judia, ọdi aghiilhaan ni ọghi ẹpe phọ, kụ loor ịduon Ẹnhaan ạphur bọ kẹn nyọdi rụru ụmalha, ọdi ạghi ghụn Gạlili. 23 Kụ ọdi arugh ẹmha dị oghol mọ ạ Nạzạrẹt, omhunhenhi ịpe ariil phọ ọghaaph bọ mọ: “Kọmagh ghan nyọdi mọ ọlo ạ Nạzạrẹt.”*