Ọdaphan Ịpe ạ Mạtiu Ạge Bọ
8 Ọdi rọḅua sịphe ẹeḅaraph phọ rosoor, kụ aḍiboom aḍita awe ọdaph nyọdi. 2 Bịn oye dị ẹzegh ọku ufe eḍighi aru akpuḍian ghisigh ọdi kụ ạḅem mọ: “Uwo Ẹmhoogh, lọ nạ rạwa ni, pọ nạ katue ni aḍighi ịdi mị kạḅaal.” 3 Kụ a Jizọs ạgbuton ḍịghaagh ạḅogh nyọdi, kụ ạḅem mọ: “Mị rạwa ni! Ḅạal.” Mem mem mọ bịn ẹzegh ọku ufe phọ ẹḅua bịn oye phọ ạḅaal. 4 Kụ a Jizọs ạḅenhi nyọdi mọ: “Mịin mọ nạ ọ́ḅenhi oye, kụolo kịa aḍeenhaan loor ạna ọpinyon rịkia phọ, ạḅilhe ạngo inmo phọ olhogh phọ a Mozis ạghaaph bọ, pịdi eḍeenhaan bịdi mọ nạ mamhoon.”
5 Ọdi roḍigh Kạpạnịọm, kụ uwo ẹmhu ạbuo ẹgham aru ạteeny nyọdi, ạaḅereghian ghan nyọdi 6 kụ ạḅem mọ: “Oye phọ, ọony otu ạmhi dị ariisi aloor phọ emhuughu ạmina ni ẹpe olhoghi otu, kụ rạmiinhom ni iboom.” 7 Kụ a Jizọs ạḅenhi oye phọ mọ: “Mị asi ẹpe mị kaakonhom ni nyọdi.” 8 Kụ uwo ẹmhu ạbuo ẹgham mọ ạphagharanhaan nyọdi mọ: “Oye phọ, mị ụ́kpeanhaan dị nạ katu k’ạmhi, kụolo ḅẹm ọnhu bịn, ọony otu phọ ạmhi kaḍum ni. 9 Loor esi dị mị odi aani ni ẹeḍian oye, kụ mị ạmoogh kẹn bụo ẹgham dị odi ẹeḍian ạmhi, kụ mị ạḅenhi nyoniin mọ, ‘Kịa!’ kạki ni, mị ạḅenhi ọnhon mọ, ‘Tue!’ katu ni, kụ mị ạḅenhi ọony otu ạmhi mọ, ‘Ḍighi ịduon!’ kaḍighi ni.” 10 Iḍighi ni iikia esi a Jizọs mem mọ ạnhaghan bọ ịphen phọ, kụ ạḅenhi bụphe rọdaph bọ nyọdi mọ: “Ọgba agey, mị kọ̋mhiin oye ọlo Izrẹl dị omheeraam alheeny ịduon. 11 Kụolo mị rịḅenhi ghan inyinha mọ ịbadi awe kọḍua ni ẹpe erumuḍio phọ remite ghan bọ r’ẹpe erumuḍio phọ remeel ghan bọ otu ọtol ịdaabili r’ Ebrạhạm r’ Ạịzik ra Jekọb sịphe Ọmhar k’ạke phọ; 12 kụolo koporogh ni nmụny Ọmhar phọ omiteom erugh ẹpe ufiri phọ. Kụ ẹpe phọ kụ ẹdi bịdi kọtol omoghi yogh ọḅilhe ọkirigha rạlhaal ạbidi.” 13 Kụ a Jizọs ạḅenhi uwo ẹmhu ạbuo ẹgham mọ, mọ: “Keel. Loor omheeraam mọ nạ maḍeenhaan bọ, ẹtuugh ịduon nạ rạwa bọ emite.” Bịn ọony otu phọ aḍum mem mem mọ.
14 Kụ a Jizọs rosi ka Pita, kụ ạmhiin onhiin ạnhir a Pita dị ạmhinha dị osipheeny odi loor. 15 Kụ ọdi ạḅogh ḍịghaagh ạnhir phọ, bịn osipheeny phọ ạḅua loor phọ, kụ ạnhir phọ aḅetenhu amhiigh oḍighinhaan ọdi rạraar. 16 Rẹteeny dulhe, kụ awe omhiigh ọsighe ịbadi ạbudi ịkaraph aruwaloor edi loor oruom ọdi; kụ ọdi ạghaaph ọnhu bịn ịkaraph aruwaloor phọ ẹḅua, kụ ạḅilhe aakonhom oomo ạbulo úmoonhogh. 17 Ịphen phọ imite omhunhenhi ịpe oyil phọ Ạịzạyạ ạghaaph bọ mọ: “Ọdi ạsighe émoon r’ạreezegh phọ ayira.”
18 A Jizọs rọmhiin ḍita awe dị okoom nyọdi, kụ ạḅenhi bụmatuan phọ ọdi mọ ọdaph nyịnho ọḅeeny ọphoripho ạga ọphiiny ạbazi phọ. 19 Kụ oniin ọtughemhia Olhogh phọ aru ạteeny nyọdi kụ ạḅem mọ: “Ọtughemhia, mị kạdaph aani nyịnha ạki tọrobo ekpisi lọ nạ rạki.” 20 Kụ a Jizọs mọ: “Ạruukpa ako ẹmoogh ni ropogh ḅịlhe ịnhun ẹmoogh ni ruutu, kụolo Ọony phọ oye ọ́mhoogh esi ẹlo ọdi dị kạminha.” 21 Kụ ọnhon ạmatuan ọdi ạḅem mọ: “Uwo Ẹmhoogh, meera mị ụpur ụki uḍi ọde ạmhi.” 22 Kụ a Jizọs ạḅenhi nyọdi mọ: “Kịom ghisigh ụdaph ịmhi, kụ ạwilhe bụphe momhuughu bọ oḍiighi iḍim ạbidi.”
23 Kụ a Jizọs r’ạbumatuan phọ ọdi ọghi oḍiku oghuugh. 24 Kụ ọgbagara oghim ạkom ịdi oolhogh amite sịphe ọphiiny ạbazi phọ, dị tụtu ạwa oḅiemhi oghuugh phọ; kụolo a Jizọs ạnhaanhi ghan ni. 25 Kụ bịdi oru ọsumeeny nyọdi, kụ ọḅem mọ: “Uwo Ẹmhoogh ụphel iyoor, yoor rope o!” 26 Kụolo ọdi ạḅenhi bịdi mọ: “Nyinha ẹkar rekiilhaan ghan eeghe, nyinha awe dị omheeraam aghom?” Kụ ọdi aḅetenhu kụ amhooghaam oghim mọ r’ọphiiny ạbazi phọ, kụ ẹpho bịn nam. 27 Ịphen phọ iḍighi ni iikia esi awe phọ kụ ọḅem mọ: “Ọphon phọ ọghen ọdo oye? Ghạlhamo r’oghim mọ r’ọphiiny ạbazi phọ bịn rẹnaghanhan ni nyọdi.”
28 Ọdi rọḅeeny ọphiiny ạbazi phọ rosi ekool awe phọ ạ Gạdạrạ, kụ ịyal awe dị ịkaraph aruwaloor edi loor omite esi dị roḍiighi ghan we oru ọteeny nyọdi. Bịdi ụgam ghan agey, esi ịduon phọ oye ọ́moogh ghan oḅio oten eten phọ ẹpe phọ. 29 Kụ bịdi omhiigh ọlooghi mọ: “Ọony Ẹnhaan, nạ rụwa ghan iyoor eeghe? Nạ uru ẹphen phọ ọmhiinhe ayoor kụ egbi ọteeny amem mọ ọmaanhaan bọ ḍụghum?” 30 Bịdi ụmhiin ni ḍita arophoropo dị rẹḅal ịḅal esi dị ẹkelhan sịphe bịdi odi bọ. 31 Kụ ịkaraph aruwaloor phọ emhiigh ọoḅereghian ọdi mọ: “Nạ uphorogh iyoor, pọ uphorogh iyoor ạlhogh olhoghi arophoropo phọ.” 32 Kụ ọdi ạḅenhi bịdi mọ: “Ịki!” Kụ bịdi emiteghu ẹghi eḍigh loor arophoropo phọ, bịn aḍita arophoropo phọ eghiil ẹghi iigbom ẹeḅaraph phọ kụ esumughu ẹpe ọphiiny ạbazi phọ emhuughu. 33 Kụ abupoghom rophoropo phọ oghiil ọghi ẹpe ẹmha phọ ọḅenhi we oomo ịphen phọ, r’ịpe emitenhaan bọ we phọ ịkaraph aruwaloor phọ ẹrol bọ loor phọ. 34 Bịn oomo awe ẹmha phọ onyeenhe ọghi ọteeny a Jizọs, rọmhiin nyọdi, kụ ọlhom mọ ạḍua ẹmha ạbuno.