Ọdaphan Ịpe ạ Mạk Ạge Bọ

5 Bịdi ụḅeeny ni ọphiiny ạbazi phọ osi ekool awe phọ ạ Gẹrạsạ. 2 A Jizọs ạḍua sịphe oghuugh phọ rasoor bịn, oye dị ọkaraph uwaloor rạaḅaghamhi amite esi dị roḍiighi ghan we aru ạteeny nyọdi. 3 Ọdi agbor ghan ạrol ẹpe iiḍi phọ edi bọ. Kụ egbi bọ ọteeny aḍio phọ ạḍiphe phọ, oye kőrue ghan ọphaḍi nyọdi dị ụ́ḍua, ghạlhamo ạphaḍiom izime. 4 Ụ́gba ghan mem ọlhogh ọdi olhool r’ọphaḍiom izime, kụolo ọdi arunyi ghan ni izime phọ ạḅilhe awunhughi olhool phọ, kụ oye ọ́rol dị ạmhoogh ịnyaam ọphamhaghan ọdi. 5 Kụ ḍughul r’ootaany ọdi ạlooghi ghan ni ẹpe iiḍi phọ r’ẹpe ạraaḅaraph phọ, kụ ạgonyiom ghan loor ọdi sighiigh. 6 Kụolo ọdi rọmhiin Jizọs k’egher, kụ aghiil ạghi akpuḍian ghisigh ọdi. 7 Kụ ạlo mọ: “Jizọs, Ọony Ẹnhaan phọ Apelheghiom bọ, nạ rụwa ghan ịmhi eeghe? Kunya ghisigh Ẹnhaan mọ nạ ịmhi kụ́mhiinhe?” 8 Ịdi eḍighi bọ a Jizọs ạḅenhi ghan mọ: “Mite loor oye phọ ạḍua, nạ ọkaraph uwaloor.” 9 Kụ a Jizọs apuru nyọdi mọ: “Ḍien ạna ughol ika?” Kụ ọdi ạphagharanhaan mọ: “Ḍien ạmhi ughol mọ Ọolhoogh, loor esi dị ịbadi ayoor kụ odi ni.” 10 Kụ ọkaraph uwaloor phọ ạaḅereghian ghan Jizọs mọ kúporogh bụno umiteom sịphe eelhe phọ.

11 Mem mọ ọpo phọ aḍita arophoropo ịrol li ạnyu ẹeḅaraph ẹḅal ghan ịḅal. 12 Esi ịduon phọ ịkaraph aruwaloor phọ ịiḅereghian nyọdi mọ: “Meera yoor uḍigh olhoghi arophoropo phọ.” 13 Kụ ọdi amheera. Kụ ịkaraph aruwaloor phọ emiteghu ẹghi eḍigh loor arophoropo phọ, kụ aḍita arophoropo phọ rẹki bọ ni ọmhan 2,000 eghiil ẹghi ẹpe iigbom ẹeḅaraph phọ, bịn esumughu ẹpe ọphiiny ạbazi phọ emhuughu. 14 Kụ abupoghom rophoropo phọ oghiil ọghi ẹpe ẹmha phọ r’ẹpe ạsiraaghanha phọ, ọḅenhi we ịphen phọ, kụ awe oru ọmhiin ịpe emite bọ. 15 Kụ bịdi oru ọteeny Jizọs kụ ọmhiin oye phọ ọoloogh ịkaraph aruwaloor phọ ẹrol ghan bọ loor phọ, dị mamhoon, kụ aanmenian ạrol ude, kụ eḍigh ḍiigu esi ạbidi. 16 Kụ bụphe ọmhiin aani bọ ọghaaph ọḅenhi bịdi ịpe emitenhaan bọ oye phọ ịkaraph aruwaloor phọ ẹrol bọ loor phọ r’arophoropo phọ. 17 Kụ bịdi omhiigh ọoḅereghian a Jizọs mọ ạḍua ẹmha ạbuno.

18 Ọdi roḍigh oghuugh, kụ oye phọ ịkaraph aruwaloor phọ ẹrol bọ loor phọ ạaḅereghian ghan ọdaph aani ọdi. 19 Kụolo a Jizọs ómheera, kpạripe ghụn ạḅenhi nyọdi mọ: “Kịa olhoghi otu ạteeny siya ạna, kụ ạḅenhi bịdi oomo ịpe a Jehova* maḍighinhaan bọ nyịnha r’ọnma ighirigiir phọ ọdi maḍeenhaan bọ nyịnha.” 20 Oye phọ rọḅua kụ amhiigh ogbeelhom ẹpe Dikạpọlis* oomo ịpe a Jizọs maḍighinhaan bọ nyọdi, kụ eḍighi iikia esi oomo awe phọ.

21 A Jizọs roḍigh oghuugh ọḅilhe ọḅeeny ọphoripho ạga ọphiiny ạbazi phọ, kụ aḍiboom aḍita awe ookpomhoghan oru ọteeny nyọdi mem dị ọdi odi ni sịphe oogbom ọphiiny ạbazi phọ. 22 Oye dị oghol mọ a Jeirọs, oḍiemhiom sịphe obughotu phọ, aru aani ni sịphe phọ, kụ rọmhiin Jizọs kụ ạghi akpuḍian ghisigh ọdi. 23 Ọdi ạaḅereghian ni nyọdi iboom mọ: “Ọbam ọnyanhi ạmhi ramugh. Seseeny tue ạsighe rạghaagh ạna ạḅamham nyọdi pịdi ọdi amoon ạḅilhe ạmoogh ghuḍum.” 24 Esi ịduon phọ a Jizọs ạdaph ni nyọdi, kụ aḍiboom aḍita awe ọdaph aani ghan Jizọs ọḅilhe onyuughian ghan ọtiir nyọdi.

25 Kụ ạnhir dị ạmhoogh ẹzegh dị ịḅaal remite ghan loor phọ dị mẹrol li 12 ạsia ạrol aani ni sịphe phọ. 26 Ọdi mạmhiinhom ni iboom ḍịghaagh ịbadi ariil* ạḅilhe aliom oomo ikpoki ọdi ạmadan, kụ kpạripe rọnhighe, aloor phọ ịlhoghori ghan bịn. 27 Ọdi ạnhaghan ni ịdi awe rọkaaph ịlo a Jizọs, kụ ạḅua ọmhan sịphe aḍita awe phọ ạghi ạḅogh ạsuoma ạnyu phọ ọdi, 28 loor esi dị ọdi ạḅem ghan mọ: “Mị arue ni kụ ạḅogh ghạlhamo r’ạsuoma ạnyu phọ ọdi, bịn mị kamoon ni.” 29 Mem mem mọ bịn ịḅaal phọ esoph, kụ ọdi alhoghoma mọ ọno mamhoon esi ẹgbagara ẹzegh phọ.

30 Eginha amem bịn a Jizọs alhoghoma mọ ịikpo mẹḅua loor ọno, kụ aaghiraan aphogh ọmhan sịphe ogbo aḍita awe phọ kụ apuru mọ: “Ạnhian kụ ạḅogh ạsuoma ạnyu ạmhi?” 31 Kụ ạbumatuan phọ ọdi ọḅenhi nyọdi mọ: “Nạ ạmiin ni ḍita awe phọ ạbuen rọtiir bọ nyịnha ịduon, kụ nạ ạḅilhe rapuru ghan mọ, ‘Ạnhian kụ ụḅogh ịmhi?’” 32 Kụolo ọdi ạnmanaghian ghan ni ọmhiin oye phọ ạḅogh bọ nyọdi. 33 Kụ ạnhir phọ alhegheri bọ ni ịpe memitenhaan bọ nyọdi, aghiilhaan ni kụ aloor phọ emhiigh ophiigha. Kụ ọdi amite akpuḍian ghisigh a Jizọs, kụ ạḅenhi nyọdi oomo ịpe ẹkar bọ emite. 34 Kụ a Jizọs ạḅenhi nyọdi mọ: “Nyạnhi ạmhi, omheeraam mọ ạna maakonhom nyịnha. Keel r’ẹepho, kụ amhoon esi ẹgbagara ẹzegh phọ ạna.”

35 Ọdi odi ni rạkaaph, kụ awe ọḅua k’oḍiemhiom ịsiphe obughotu phọ oru ọḅem mọ: “Ọnyanhi phọ ạna mamhugh! Nạ ạḅilhe rạaḅaghamhi ghan Ọtughemhia phọ ịlo eeghe?” 36 Kụolo a Jizọs ạnhaghan ni ịpe bịdi ọghaaph bọ kụ ạḅenhi oḍiemhiom ịsiphe obughotu phọ mọ: “Kạ́moogh oghiilhaan,* mọogh omheeraam bịn.” 37 Kụ ọdi ómheera mọ ọnhon oye ạdaph nyọdi emuton Pita, ra Jems rạ Jọn umor phọ a Jems.

38 Kụ bịdi osi k’oḍiemhiom ịsiphe obughotu phọ, kụ ọdi ạmhiin we dị rọyugh r’ạbudi romoghi kọlooghi. 39 Kụ ọdi roḍigh olhoghi, kụ apuru bịdi mọ: “Uḍighi ika kụ nyinha remoghi bọ kẹḅilhe ẹyugh ịduon phọ? Ọbumoony phọ kőmhugh rạnaanhi ni.” 40 Bịdi rọnhaghan ịphen phọ kụ omhiigh ọmhilhogh r’ọgilaam ọdi. Kụolo a Jizọs rọḅenhi oomo ạbidi mọ omiteghu, kụ ạpham ọde r’onhiin ọbumoony phọ r’ạbuphe ọdaph bọ nyọdi aḍighom ẹpe ọbumoony phọ ạrol bọ. 41 Ọdi rọpham ḍịghaagh ọbumoony phọ, kụ ạḅenhi mọ: “Tạlịtạ kumi,” ẹmhu phọ pọ, “Bạm ọnyanhi, mị rạḅenhi ghan nyịnha mọ, ḅetenhu!” 42 Mem mem mọ bịn ọnyanhi phọ ạḅetenhu amhiigh orelhe. (Ọdi ạmhan bọ 12 ạsia.) Kụ bịdi ọmhiin bọ ịphen phọ ụmhoogh ni iboom ibo dị tụtu útue mụn ụpamaghan loor. 43 Kụolo ọdi ạphur ri bịdi rụru ịbadi amem* mọ kụ́ḅenhi oye ịphen phọ, kụ ạḅenhi mọ ọngo ọnyanhi phọ ịyaar dị kale.