Ọdaphan Luk
15 Oomo ạbubonyiom iisogh phọ r’abuḍighinhom ịkaraph phọ ukoom ghan bịn nyọdi ọnhaghan ịpe ọdi rạkaaph bọ. 2 Kụ ạbuo ạ Fạrisi phọ r’ạbutughemhia Olhogh phọ ogumhogh ghan mọ: “Oye phọ ọphon phọ rakuraam ghan buḍighinhom ịkaraph, kalhean bịdi.” 3 Kụ ọdi ạngo bịdi ọghaaph ọmaanhiom mọ ọphon, mọ: 4 “Ọghen oye sịen igbo phọ anyinha dị ạpham 100 iyool ịga, kụ oniin aphe, kụ kạ́bilhe 99 phọ ẹpe ẹdala phọ ạki ạwa ọpo aphe bọ tụtu ạmhiin? 5 Ọdi rọmhiin, kụ ạsighe anyora ọpha ọdi kụ abo. 6 Ọdi rosi olhoghi otu, kụ aakpomhoghi rịghiri ọdi r’amatuman ọdi, kụ ạḅenhi mọ, ‘Iḍighan ịmhi ebo, loor esi dị mị mạmhiin oyool ọga phọ ạmhi aphe bọ.’ 7 Mị rịḅenhi ghan inyinha mọ, eniin phọ eten phọ kụ ẹdi ibo kẹtol k’ạke loor esi oniin oḍighinhom ịkaraph dị akiton epu 99 ạbuo elhiom eḍighinhom ịyaar dị úmoghi okiton.
8 “Ọbobo ọghen ạnhir dị ạmhoogh ḍioph ạ kọịn ạ drạkmạ,* kụ oniin ạ drạkmạ* aphe, kụ kạ́su ọtozi aḅeer otu phọ ọdi amiigha loor ạwa tụtu ạmhiin? 9 Ọdi rọmhiin, kụ aakpomhoghi rịghiri ọdi* r’amatuman ọdi ạḅenhi mọ, ‘Iḍighan ịmhi ebo, loor esi dị mị mạmhiin kọịn ạ drạkmạ* phọ ạmhi aphe bọ.’ 10 Mị rịḅenhi ghan inyinha mọ, eniin phọ eten phọ kụ ẹdi ibo rẹtol ghan igbo ạruukpaany phọ Ẹnhaan loor oniin oḍighinhom ịkaraph dị akiton.”
11 Ịpe reten kụ ọdi ạḅem mọ: “Oniin oye ạmhoogh ịyal ạnmuny. 12 Kụ ọbam mọ ạḅenhi ọde phọ mọ, ‘Ọde, di rạraar phọ nạ ạmhoogh bọ ụngo ịmhi bin ạmhi.’ Kụ ọde phọ adiemhi bịdi rạraar phọ ọdi ạmhoogh bọ. 13 Iphurukpu asiḍughul otu reten, kụ ọbam mọ aakoroghian oomo ạraraar ọdi ạghi eelhe dị ẹkel kụ ạrol ẹpe phọ ạwalhawalhamhi rạraar phọ ọdi ạmhoogh bọ, kụ ạrol ḍighiil ạdol. 14 Ọdi rolhiom oomo ikpoki phọ ọdi, kụ iboom ịgbakuro esoor oomo eelhe phọ ẹpe phọ, kụ ọkoony amhiigh osiph ọdi. 15 Kụ ọdi ạghi ni oḍighinhaan oḍighi oniin oye ọlo eelhe phọ ẹpe phọ, kụ oye phọ arom nyọdi mọ ạghi ozo ọdi aphogh ghan rophoropo. 16 Ọkoony asiph ni nyọdi dị tụtu ạwa ghan olhe eḍien phọ rọngo ghan bọ rophoropo phọ, kụolo oye ómheera ọngo nyọdi ịyaar.
17 “Ọdi rolhoghoma loor kụ ạḅem mọ, ‘Ọde ạmhi apir ri ịbadi awe kụ oomo ạbidi role ghan ni eḍien* kẹpher, kụ mị odi ẹphen ramugh ọkoony! 18 Mị kaḅula ạki ạteeny ọde phọ ạmhi kụ ạḅenhi mọ: “Ọde, mị mạpioman ghisigh Ẹnhaan* r’aghisigh ạna. 19 Mị ụ́kpeanhaan mụn dị kokol mọ ọony ạna. Ụsighe ịmhi ịdipho oye dị nạ aphir.”’ 20 Kụ ọdi anyeenhe ọghi ọteeny ọde phọ ọdi. Ọdi odi ni k’egher kụ ọde phọ ọdi ạmhiin nyọdi kụ ạmhoogh igbiririph ạghi esi ọdi, kụ aghiil ạghi aḅol* kụ amhiigha loor ạkpun nyọdi. 21 Kụ ọony phọ ạḅenhi nyọdi mọ, ‘Ọde, mị mạpioman ghisigh Ẹnhaan* r’aghisigh ạna. Mị ụ́kpeanhaan mụn dị kokol mọ ọony ạna.’ 22 Kụolo ọde phọ ạḅenhi rẹbenhe ọdi mọ, ‘Ụgua! imiteom ọgorogoro ạsuoma, ọpo ạkar bọ ạnhighe, ẹkpolhoghi nyọdi, kụ ẹlhogh gulu ḍụnhugh ọdi ẹḅilhe ẹlhogh nyọdi rokoro. 23 Ịsighe eru kẹn ọbunhabunha ọony ạnam mọ, eghiigh, olheom eḍien obo ibo, 24 ịdi eḍighi bọ ọony phọ ạmhi ọphon phọ amhugh ni kụ mạḅilhe ạmoogh ghuḍum; ọdi aphe ni kụ mọmhiin.’ Kụ bịdi omhiigh ọghelhom aloor.
25 “Mem mọ ạmuphe phọ ọkpanha ọony phọ ạrol ozo. Kụ rotuman olhoghi otu mem dị ratigheel, kụ ạnhaghan iitia r’ạroḍogh awe dị rọker ịḅa. 26 Kụ ọdi ạmhagh oniin ọony otu phọ apuru ịyaar phọ remite bọ. 27 Kụ ọony otu phọ ạḅenhi nyọdi mọ, ‘Umor phọ ạna marigheel, kụ ọde ạna akiigh ọbunhabunha ọony ạnam mọ loor ịduon arigheel bọ r’omhoon aloor.’ 28 Kụ iphin ni olhoghi ọdi bịn ómheera oḍigh olhoghi otu. Kụ ọde phọ ọdi amite amhiigh ọoḅereghian ọdi. 29 Kụ ọdi ạphagharanhaan ọde phọ ọdi mọ, ‘Mịin! Mị makumu ni nyịnha ịbadi ạsia kụ r’amem mị kọ́ḅaar ghan ẹmhu oru esi ạna, kụolo nạ ịmhi kụ̋ngo ghan ọbam ọga dị ạrighiri ạmhi r’ạmhi kọba ọkelhom. 30 Kụolo ịduon ọony phọ ạna ọphon ạwalhawalhamhi bọ rạraar phọ ạna r’ạrukunhakunha arigheel bọ, bịn nạ maghiighanhaan ọbunhabunha ọony ạnam mọ.’ 31 Kụ ọde phọ ạḅenhi nyọdi mọ, ‘Mọony ạmhi, nạ odi ghan ni r’ạmhi, kụ oomo ạraraar dị eḍighi ịlo ạmhi ịlo ạna. 32 Kụolo ẹwa ni mọ yoor obo ibo, loor esi dị umor phọ ạna amhugh ni kụ mạḅilhe ạmoogh ghuḍum; ọdi aphe ni kụ mọmhiin.’”