Ọdaphan Jọn
11 Mem mọ ạmuphe phọ oye ạrol li dị úmoon dị oghol mọ ạ Lạzạrọs; ọdi r’abumaranhi phọ ọdi, Meri rạ Mạtạ, ạbuo ạ Bẹtạni. 2 Ọphon kụ a Meri phọ aaduom bọ elo ịma eḍu Uwo Ẹmhoogh phọ, ạḅilhe ạsighe sịlhaal ọdi agbuuroghom ruwol phọ; kụ ạ Lạzạrọs umor phọ ọdi kụ odi bọ émoon phọ. 3 Kụ abumaranhi phọ ọdi orom dom ọghiom Uwo Ẹmhoogh phọ mọ: “Uwo Ẹmhoogh, ogbogh ọyaghiri phọ ạna ómhoon.” 4 Kụolo mem mọ a Jizọs ạnhaghan bọ dom mọ, ạḅem mọ: “Aḍuugh kụ kéḍighi eekunha émoon phọ ẹphen phọ, keḍighi ghụn ịdi kọngo rughuenhian Ẹnhaan, pịdi okuenhi Ọony phọ Ẹnhaan dị eego esi ịphen phọ.”
5 A Jizọs ạphomhoghian ni Mạtạ ra Meri rạ Lạzạrọs. 6 Tọrobo ịpe ẹrol bọ, ọdi ạnhaghan bọ mọ ạ Lạzạrọs ómhoon, ạḅilhe ni ạrol ẹpe ọdi odi bọ ịyal aḍughul otu. 7 Asiḍughul otu phọ ịpe phọ reten kụ ọdi ạḅenhi bụmatuan phọ ọdi mọ: “Ọḅilhe ọghi Judia.” 8 Kụ ạbumatuan phọ ọdi ọḅenhi nyọdi mọ: “Rạbạị, ke̋bia ạbuo a Judia ọwa bọ oroḅol ạna ikpo, kụ nạ rạwa ọḅilhe ọghi ẹpe phọ kẹn?” 9 Kụ a Jizọs ạphagharanhaan mọ: “Tọ a 12 ạwa kụ ẹdi ạḍiḅaal rẹtol ghan sịphe aḍio phọ? Kụ oye dị ratelhe mem dị ạḍiḅaal edi kákpetaan ịyaar loor esi dị rạmiin ni ḍịḅaal aḅirinhi phọ ọphon phọ. 10 Kụolo oye dị ratelhe esi ufiri kakpetaan ni loor esi dị ạḍiḅaal phọ ílo loor ọdi.”
11 Ọdi rọghaaph ịphen phọ kụ ạḅemhom mọ: “Ạ Lạzạrọs ọyaghiri phọ ayira rạnaanhi kụ mị rạki ọsumeeny ọdi.” 12 Kụ ạbumatuan phọ ọḅenhi nyọdi mọ: “Uwo Ẹmhoogh, eru mạar dị ọdi rạnaanhi, pọ kẹloghonhaan ni ḍịghaagh dị ọdi kamoon.” 13 A Jizọs ạghaaph ghan ịlo aḍuugh phọ ạ Lạzạrọs. Kụolo bịdi ụutughian mọ ọdi rạkaaph ghan ịlo ạralha. 14 Kụ a Jizọs ạghi onyen ạḅenhi bịdi mọ: “Ạ Lạzạrọs mamhugh, 15 kụ olhoghi ạmhi ạḅaal li ịduon mị ụ́tol bọ ẹpe, pịdi ịpe mị kaḍighi bọ ẹkparamhi omheeraam mọ anyinha. Ọghi ọmhiin nyọdi.” 16 Kụ ạ Tọmọs, ọpo ọmhagh ghan bọ mọ Didimọs, ạḅenhi bụeripho ạbumatuan phọ mọ: “Ọdaph nyọdi ọghi, pịdi yira omugh aani r’ọdi ẹpe phọ.”
17 A Jizọs asi bọ, ạ Lạzạrọs mạrol sịphe oḍi phọ inya aḍughul otu. 18 Kụ ọḍua a Jeruselem ọghi ạ Bẹtạni keḍighi ni ịyal ạ mạịl.* 19 Kụ ịbadi ạbuo a Ju phọ uru ni ọodereghi ạ Mạtạ ra Meri loor aḍuugh umor phọ ạbidi. 20 Kụ ạ Mạtạ ạnhaghan bọ mọ a Jizọs ratu, amite ni ọghi ọteeny ọdi; kụolo a Meri ạrol li olhoghi otu. 21 Kụ ạ Mạtạ ạḅenhi Jizọs mọ: “Uwo Ẹmhoogh, mọ nạ ụrol li sịen, ọbo umor phọ ạmhi múmugh. 22 Kụolo ghạlhamo r’ạnyiidipho bịn mị alegheri ni mọ tọrobo ịyaar dị nạ ạlhom Ẹnhaan, Ẹnhaan kạngo ni nyịnha.” 23 Kụ a Jizọs ạḅenhi nyọdi mọ: “Umor phọ ạna kaḅetenhu ni.” 24 Kụ ạ Mạtạ ạḅenhi nyọdi mọ: “Mị alegheri mọ ọdi kaḅetenhu ni esi aḍuugh ḍio phọ esughanham bọ ọmhan phọ.” 25 Kụ a Jizọs ạḅenhi nyọdi mọ: “Mị kụ raḅerion ghan bọ we esi aḍuugh ḅịlhe mị kụ rạngo ghan bọ bịdi ghuḍum. Kụ oye lọ ạmhoogh omheeraam aru esi ạmhi, ghạlhamo amhugh ni, kạḅilhe ni ạmoogh ghuḍum; 26 kụ tọrobo oye dị odi r’ighuḍum ḅịlhe ạmhoogh omheeraam aru esi ạmhi kámugh ni bịn. Nạ ameeraam ni ịphen phọ?” 27 Kụ ạ Mạta ạḅenhi nyọdi mọ: “Ii, Uwo Ẹmhoogh, mị ameeraam ni mọ nạ kụ ạ Krạịst phọ, Ọony phọ Ẹnhaan, ọpo ọḅem bọ mọ katu sịen aḅirinhi phọ.” 28 Ọdi rọghaaph ịphen phọ kụ ạḅua ạghi ạteeny Meri umaranhi phọ ọdi, kụ aapholha ạḅenhi mọ: “Ọtughemhia phọ masi kụ rạwa ọmhiin ạna.” 29 A Meri rọnhaghan ịphen phọ, kụ akem aḅetenhu ọghi ọteeny ọdi.
30 Mem mọ ọpo phọ a Jizọs kőḍigh ẹmha phọ, odi ni ẹpe ạ Mạtạ ạghi bọ ạteeny nyọdi. 31 Kụ ạbuo a Ju phọ ạbuphe oru bọ olhoghi otu ọodereghi a Meri ọmhiin bọ ịpe ọdi akem bọ aḅetenhu amite, ụdaph ni nyọdi, loor esi dị ụutughian ghan mọ ọdi rạki ẹpe oḍi phọ omhoghi yogh. 32 A Meri rọghi osi sịphe phọ rọmhiin Jizọs, kụ ạghi akpuḍian ghisigh ọdi ạḅenhi mọ: “Uwo Ẹmhoogh, mọ nạ ụrol li sịen, ọbo umor phọ ạmhi múmugh.” 33 Kụ a Jizọs ạmhiin bọ dị a Meri r’ạbuo a Ju phọ ọdaph bọ nyọdi oru romoghi, iroor ri nyọdi* ẹḅilhe ẹeḅaghamhi nyọdi. 34 Kụ ọdi apuru bịdi mọ: “Nyinha ẹlogh nyọdi ḍighen?” Kụ bịdi ọḅenhi nyọdi mọ: “Uwo Ẹmhoogh, tue ạghi ạmhiin.” 35 Kụ a Jizọs ạgharaghi izin. 36 Kụ ạbuo a Ju phọ omhiigh ọḅem mọ: “Ịmiin ịdi ọdi ạphomhoghian nyọdi!”* 37 Kụolo buniin ạbidi ụḅem ghan mọ: “Oye phọ ọphon phọ aḍighi bọ ni ịdi oye dị ụ́miin ghan eten ạmhiin ẹten, mútue uḍighi ịdi ạ Lạzạrọs mụ́bilhe umugh ḍụghum?”
38 Ịḅilhe ni eroor Jizọs, kụ ọdi ạghi ẹpe oḍi phọ. Oḍi phọ aḍighi epogh dị edi olhoghi aḍighiigh, kụ ụsighe ḍighiigh kụ opukiom ọnhu oḍi phọ. 39 Kụ a Jizọs ạḅem mọ: “Iikilhemhi ḍighiigh phọ ẹsighe.” Kụ ạ Mạtạ, umaranhi oye phọ amhugh bọ, ạḅenhi nyọdi mọ: “Uwo Ẹmhoogh, mẹteeny bọ nyịidipho mamhiigh rapur, loor esi dị ọdi amhugh bọ mẹmhan inya aḍughul otu.” 40 Kụ a Jizọs ạḅenhi nyọdi mọ: “Mị nyịnha ụ́ḅenhi ḍịen mọ nạ amheeraam pọ nạ kạmiin ni eghuan phọ Ẹnhaan?” 41 Kụ bịdi ookilhemhi ḍighiigh phọ ọsighe. Kụ a Jizọs aphogh ẹpe k’ạke kụ ạḅem mọ: “Ọde, mị rạseph ni nyịnha ịduon nạ mạnhaghan bọ ịiḅereghi phọ ạmhi. 42 Mị alegheri ni mọ nạ rạnaghan ghan ni ịiḅereghi ạmhi oomo amem; kụolo mị ạtuan ḍita awe phọ ọmheregha bọ sịen phọ kụ rạkaaph bọ ịphen phọ, pịdi bịdi omeeraam mọ nạ kụ urom ni ịmhi.” 43 Ọdi rọghaaph ịphen phọ kụ ạlo mọ: “Lạzạrọs, mite!” 44 Kụ oye phọ amhugh bọ amite r’ạraghaagh r’aruwol dị ọphiinyom rukpe, kụ risigh phọ ọdi uphurughiom kẹn ukpe. Kụ a Jizọs ạḅenhi bịdi mọ: “Ịikpo nyọdi, ọdi agheel.”
45 Kụ ịbadi ạbuo a Ju phọ oru bọ ophogh a Meri kụ ọmhiin bọ ịphen a Jizọs aḍighi bọ, ụmhoogh ni omheeraam ọghi esi ọdi, 46 kụolo buniin ạbidi ụghi ọḅenhi bụo ạ Fạrisi phọ ịpe a Jizọs maḍighi bọ. 47 Kụ aruwo ẹmhu ạbupinyon rịkia phọ r’ạbuo ạ Fạrisi phọ ookpomhoghi we ạ Sạnhẹdrin phọ kụ ọḅem mọ: “Yira koḍighi ika ịduon phọ? Oye phọ ọphon phọ raḍighi yogh ni ịbadi ịiḍaany. 48 Yira ọwilhe nyọdi bịn, pọ oomo awe phọ kọmoogh ni omheeraam ọki esi ọdi, kụ ạbuo a Rom mọ otu ọsighe esi phọ ayira* r’eelhe phọ ayira.” 49 Kụolo oniin ọnyo ạbidi dị ọghol mọ a Keyạfạs, ọpo aḍighi bọ ogbogh ọpinyon rịkia lhạ phọ ạḍiphe phọ, ạḅenhi bịdi mọ: “Nyinha ílegheri r’iniin ịpe rẹki bọ, 50 ḅịlhe nyinha kẹ̋etughian kẹn mọ eḍighi ịlo ạsuo anyinha dị oniin oye kạtuan we phọ amugh, kpạripe dị kopiemhi oomo eelhe phọ.” 51 Ọdi kụ ọ́otughian ịphen phọ bịn ạghaaph, ọdi ạghaaph mọ a Jizọs kamughanhaan eelhe phọ loor ịduon ọdi kụ aḍighi bọ ogbogh ọpinyon rikia lhạ phọ ạḍiphe phọ. 52 Kụolo ómhughanhaan eelhe phọ bịn, ạtuan kẹn ookpomhoghi eniin esi nmụny phọ Ẹnhaan ọwalhalha bọ. 53 Kụ emhiigh ḍio phọ ạḍiphe phọ kụ rẹki bịdi ụwa ghan ni reten oghiigh ọdi.
54 Loor ịduon phọ, a Jizọs órelhe ghan mụn ekpisi dị ạbuo a Ju phọ kọmiin nyọdi, ạḅua ghụn ẹpe phọ ạghi ekool dị etuman ẹdala phọ, ẹmha dị oghol mọ Ifrem, kụ ọdi r’ạbumatuan phọ ọdi ọrol ẹpe phọ. 55 Mem mọ ạmuphe phọ Ẹyaal Ọphel Otenhe phọ ạbuo a Ju phọ role ghan bọ rẹteeny, kụ ịbadi awe ụḅuaghu ni ẹpe ạsiraaghanha phọ ọghi Jeruselem ọḅaalhamhi aloor ạbidi kụ egbi ọteeny ẹyaal phọ, ọdaphan ịpe Olhogh phọ ạḅem bọ. 56 Bịdi ụwa ghan ni Jizọs, kụ ịduon bịdi ọmheregha bọ sịphe otu ịiḅereghi phọ, oniin ạḅenhi ghan nyọniin mọ: “Eeni ọdi kátu r’oru ẹyaal phọ. Nạ ạatughian aani ika?” 57 Kụ mem mọ ọpo phọ, aruwo ẹmhu ạbupinyon rịkia phọ r’ạbuo ạ Fạrisi phọ mọngo ịto mọ oye lọ alhegheri ekpisi lọ a Jizọs odi ạghi ạḅenhi bụno pịdi bụno ọki osiph.