Ọdaphan Jọn
2 Omhunhenhiom ịraar aḍughul otu phọ amale apinien ạrol li Kenạ ẹpe Gạlili, kụ onhiin phọ a Jizọs ạrol aani ni sịphe phọ. 2 Kụ ụmhagh aani ni Jizọs r’ạbumatuan phọ ọdi pinien phọ.
3 Kụ mem dị amiim mọ ramunheen, onhiin phọ a Jizọs ạghi ni ạḅenhi nyọdi mọ: “Bịdi ụ́moogh mụn miim.” 4 Kụolo a Jizọs ạḅenhi nyọdi mọ: “Nhịr phọ, ịpe phọ ịmhooghom nyịnha r’ạmhi ika?* Amem mọ ạmhi kẹ̋teeny.” 5 Kụ onhiin phọ ọdi ạḅenhi rẹbenhe phọ mọ: “Iḍighi tọrobo ịlo ọdi ịḅenhi inyinha.” 6 Odiiny aroko ạrana dị rọlogh ghan mụum ịrol li sịphe phọ ọdaphan olhogh ạbuo a Ju phọ, pịdi awe ootolha ghan rạghaagh. Tọrobo oko phọ kotue ni ọlogh 44 ọbobo 66 a lita ạmuum.* 7 Kụ a Jizọs ạḅenhi bịdi mọ: “Imuzeḍi mụum roko phọ.” Kụ bịdi omuzeḍi k’ọnhu. 8 Kụ ọdi ạḅenhi bịdi mọ: “Iḍu ẹghi ẹngo ọtolhom ạgada apinien phọ.” Kụ bịdi oḍu ọghiom. 9 Ọtolhom ạgada apinien phọ ạnham ni mụum mọ motenhe bọ miim mọ, kụ ólhegheri ekpisi phọ ọsighe bọ (kụolo ạrebenhe phọ oḍu bọ mụum mọ ulhegheri ni). Kụ ọtolhom ạgada apinien phọ ạmhagh oye phọ rapin bọ ạnhir phọ 10 kụ ạḅenhi mọ: “Ạbunhon awe rọpur ghan komiteom mugey amiim mọ, awe phọ rọphughol rakiigh, kụ ogbi omiteom ạmulo ụ́kar ụdugh. Kụolo ẹlo ạna, nyịidipho kụ ẹdi nạ amiteom mugey amiim mọ .” 11 A Jizọs aḍighi ịphen phọ ẹmha a Kenạ ẹpe Gạlili kụ ịphen phọ kụ emhiighom ịiḍaany phọ ọdi, ọdi aḍighi ịdi awe ọmhiin eghuan phọ ọdi, kụ ạbumatuan phọ ọdi ọmhoogh omheeraam ọghi esi ọdi.
12 Ịphen phọ reten kụ ọdi r’onhiin phọ ọdi r’abumor phọ ọdi r’ạbumatuan phọ ọdi ọghi Kạpạnịọm, kụolo ụrol ẹpe phọ ịyal ikpo aḍughul otu bịn.
13 Mem mọ ọpo phọ Ẹyaal Ọphel Otenhe phọ ạbuo a Ju phọ role ghan bọ mẹkpul, kụ a Jizọs ạghi Jeruselem. 14 Ọdi roḍigh sịphe otu ịiḅereghi phọ kụ ạmhiin bụphe robolhoghi bọ sịnam r’iyool ịga r’arukuru ghọzo, r’ạbuphe ronmeeghi ghan bọ ikpoki phọ dị ọrolhoghu ude. 15 Ọdi rọsighe iḍigh roḍighi ịkpara, kụ aphoroghom bụphe robool bọ iyool ịga phọ r’ạsinam mọ sịphe otu ịiḅereghi phọ, kụ azu sị kọịn ạbuphe ronmeeghi ghan bọ ikpoki phọ ạḅilhe anyuughi alhereghi ịdaabili phọ ạbidi. 16 Kụ ọdi ạḅenhi bụphe robolhoghi bọ rukuru ghọzo phọ mọ: “Ịsigheogh rạraar phọ ịphen phọ ẹḍuanham sịen! Kéḍighi mụn otu Ọde phọ ạmhi esi omhuul aḍighi!” 17 Kụ ạbumatuan phọ ọdi ọotughian mọ ọge ni sịphe Ịge Iigbia phọ mọ: “Oophugh phọ mị ạmhoogh bọ ịlo otu phọ ạna kamuza ni loor ạmhi.”
18 Esi ịduon phọ, ạbuo a Ju phọ upuru ni nyọdi mọ: “Ẹghen eḍeenhaan kụ ẹdi nạ kaḍighi, pịdi ẹma emiteom mọ nạ ạmoogh ni elhiom oḍighi ạraraar phọ ịphen phọ?” 19 Kụ a Jizọs ạphagharanhaan bịdi mọ: “Ilereghi otu ịiḅereghi phọ ọphon phọ, mị kạḅilhe ạlogh esi ịraar aḍughul otu.” 20 Kụ ạbuo a Ju phọ ọḅem mọ: “Otu ịiḅereghi phọ ọphon phọ ọsighe bọ 46 ạsia kụ ọlhoghom kụ ẹdi nạ kạsighe ịraar aḍughul otu ạloghom?” 21 Kụolo aloor phọ ọdi kụ otu ịiḅereghi phọ ọdi ạghaaph bọ aghol. 22 Kụ mem mọ oḅeton bọ nyọdi esi aḍuugh phọ, ạbumatuan phọ ọdi ụutughian ni mọ ọdi ạghaaph ghan ni ịphen phọ, kụ omheeraam ịge iigbia phọ r’ịpe a Jizọs mạghaaph bọ.
23 Tọrobo ịpe ẹrol bọ, mem mọ a Jizọs ạrol bọ ẹpe Jeruselem olhe Ẹyaal Ọphel Otenhe phọ, ịbadi awe ụmhoogh ni omheeraam ọghi esi aḍien phọ ọdi mem mọ ọmhiin bọ ịiḍaany phọ ọdi raḍighi yogh bọ. 24 Kụolo ọdi ọ́kar oḍuom bịdi olhoghi loor esi dị ọdi alhegheri ni bụdo awe phọ oomo ạbidi oru bọ, 25 kụ ọdi ómhoghi mọ ọnhon oye kụ ạḅenhi nyọdi ịlo oye, ịdi eḍighi bọ ọdi alegheri ni ịpe edi bọ ekpom mọ oye.