Ọdaphan Jọn

4 Uwo Ẹmhoogh phọ rolhegheri mọ ạbuo ạ Fạrisi phọ mọnhaghan mọ ạbumatuan phọ ọdi* rạmoogh bọ kạḅilhe aḍiinye mụum mopu bụphe ạ Jọn 2 (kụolo a Jizọs r’aloor kụ óḍiinye ghan we mụum mọ, ạbumatuan phọ ọdi kụ uḍiinye ghan), 3 kụ ọdi ạḅua Judia ạḅilhe anyeenhe Gạlili. 4 Kụolo ịwa mọ ọdi aago Sạmeria kụ ạghi. 5 Kụ ọdi aru asi ẹmha ạ Sạmeria dị oghol mọ ạ Sạịkạ, dị etuman de phọ a Jekọb ạngo bọ Josẹf ọony phọ ọdi. 6 Ọkar ọghaaph, aghuḍia a Jekọb ạrol li sịphe phọ. Kụ a Jizọs ạrol atuman ghuḍia phọ, ịdi eḍighi bọ aloor ọdi medugh loor erelhe phọ. Mem mọ ọpo phọ iḍighi omhunhenhiom odiiny ạwa* phọ.

7 Ạnhir ọlo ạ Sạmeria aru ni ọkpa ạmuum. Kụ a Jizọs ạḅenhi mọ: “Ụngo aani ịmhi mụum ọphughol.” 8 (Mem mọ ọpo phọ ạbumatuan phọ ọdi mọghi ogho eḍien ẹpe ẹmha phọ.) 9 Kụ ạnhir ọlo ạ Sạmeria phọ apuru nyọdi mọ: “Uḍighi ika kụ nạ ọlo a Ju phọ rụlhom bọ ịmhi mụum, ghạlhamo r’ịduon mị aḍighi bọ ạnhir ọlo ạ Sạmeria?” (Ạbuo a Ju phọ róoḍikuan ghan bụo ạ Sạmeria.) 10 Kụ a Jizọs ạphagharanhaan nyọdi mọ: “Mọ nạ ulhegheri ni inmo phọ Ẹnhaan rạngo ghan bọ oopho r’oye phọ rạḅenhi bọ nyịnha mọ, ‘Ụngo aani ịmhi mụum ọphughol,’ ọbo nạ mụlom ni nyọdi mụum, kụ ọdi mụngo ni nyịnha mụum aghuḍum.” 11 Kụ ạnhir phọ ạḅenhi nyọdi mọ: “Oye phọ, r’ịyaar ọkpaam ạmuum bịn nạ ọ́pham, kụ aghuḍia phọ ạkel kẹn. Nạ kạsighe ẹghen mụum aghuḍum mọ ạmuen phọ kụ ụngo ịmhi? 12 Nạ kụ upu Jekọb ọde phọ ayoor ụngo bọ iyoor ghuḍia phọ ọphon phọ ọdi r’ạnmuny phọ ọdi r’ịnham mọ ọdi ẹphughol ghan bọ mụum sịen?” 13 Kụ a Jizọs ạphagharanhaan nyọdi mọ: “Tọrobo oye lọ ạphughol mụum mọ ạmuen phọ ạmuum kạḅilhe ni ạpu. 14 Kụ tọrobo oye lọ ạphughol mụum mọ mị kạngo bọ, ạmuum kạ́pu mụn ni bịn, kụolo ạmuum mọ mị kạngo bọ kaḍighi ghuḍia pạ aloor phọ ọdi dị ạmuum dị rạngo ghan ghuḍum k’agee-pọ kụ amuza.” 15 Kụ ạnhir phọ ạḅenhi nyọdi mọ: “Oye phọ, ụngo ịmhi mụum mọ ạmuen phọ, ọbo ạmuum kạḅilhe ghan bọ ụphu ịmhi bịn mị ạḅilhe atu sịen ọkpa ạmuum.”

16 Kụ ọdi ạḅenhi ạnhir phọ mọ: “Kịa, ạmhagh olom ạna arumom.” 17 Kụ ạnhir phọ ạḅem mọ: “Mị ụ́moogh olom.” Kụ a Jizọs ạḅenhi mọ: “Nạ ạgba ni agey ọḅem mọ, ‘Mị ụ́moogh olom.’ 18 Nạ mạal bọ oogh ilhom, kụ oye phọ r’ạna edianhaan bọ nyịidipho kólom ạna. Esi ịduon phọ ịphen nạ ạghaaph bọ ịne ni.” 19 Kụ ạnhir phọ ạḅenhi nyọdi mọ: “Oye phọ, ẹkigh mụdi nạ oyil. 20 Ạburude ạburude phọ ayoor ụuḅereghi ghan Ẹnhaan sịen ẹeḅaraph phọ ẹphen phọ, kụolo nyinha rẹḅem ghan mọ a Jeruselem kụ esi dị ẹkpe ọrol ọoḅereghi Ẹnhaan.” 21 Kụ a Jizọs ạḅenhi nyọdi mọ: “Nhịr phọ, mị ạkar rạḅenhi ghan nyịnha mọ, amem retu ni dị nyinha kẹ́tol mụn sịen ẹeḅaraph phọ ẹphen phọ ọbobo ẹpe Jeruselem kụ ẹeḅereghi Ọde phọ. 22 Nyịnha rẹeḅereghi ghan rạraar dị nyinha ílegheri; kụolo yoor rọoḅereghi ghan ọpo yoor olhegheri bọ, loor esi dị ạpelieeny amhiighom bụo a Ju phọ. 23 Tọrobo ịpe ẹrol bọ, amem retu ni, kụ mụen kụ amem mọ bụphe ọkar bọ rọoḅereghi Ẹnhaan kọoḅereghiom bọ Nyọdi* uwaloor r’igey. Ọkar agey, Ọde phọ rạwa ghan we dị ọrol ịduon phọ ọoḅereghi ọdi. 24 Ẹnhaan aḍighi Uwaloor, kụ bụphe rọoḅereghi bọ nyọdi ọmoogh ọoḅereghiom ọdi uwaloor r’igey.” 25 Kụ ạnhir phọ ạḅenhi nyọdi mọ: “Mị alegheri mọ a Mesạyạ ratu ni, ọpo oghol bọ mọ ạ Krạịst. Kụ tọrobo amem lọ ọpo phọ aru, kạgba ni ẹmhu oomo ạraraar ụḅenhi iyoor.” 26 Kụ a Jizọs ạḅenhi nyọdi mọ: “Mị phọ rạḅaanhaan bọ nyịnha kụ ọdi phọ.”

27 Ạbumatuan phọ ọdi uru ni mem mọ ọpo phọ, kụ eḍighi iikia esi ạbidi ọmhiin mọ ọdi rạḅaanhaan ghan ạnhir ephoph. Kụolo, oye ópuru mọ: “Nạ rạwa ghan eeghe?” ọbobo mọ “Uḍighi ika kụ nạ rạḅaanhaan bọ ạnhir phọ?” 28 Kụ ạnhir phọ ạwilhe oko ạmuum mọ ọdi kụ ạghi ẹpe ẹmha phọ ạḅenhi ghan we mọ: 29 “Itu ẹghi ẹmhiin oye dị ụḅenhi ịmhi oomo ạraraar dị mị maḍighi ghan. Ọphon kụ kạ́ Krạịst phọ nụun?” 30 Kụ bịdi ọḅua ẹpe ẹmha phọ onyeenhe oru ọteeny a Jizọs.

31 Mem mọ ọpo phọ, ạbumatuan phọ ọdi ụuḅereghian ghan nyọdi mọ: “Rạbạị, le ịyaar.” 32 Kụolo ọdi ạphagharanhaan bịdi mọ: “Mị ạmoogh ni eḍien olhe dị nyinha ílegheri.” 33 Kụ ạbumatuan phọ oopuruan ghan sịphe igbo phọ ạbidi mọ: “Oye aru ni ạngo nyọdi ịyaar olhe ḍụghum?” 34 Kụ a Jizọs ạḅenhi bịdi mọ: “Eḍien ạmhi pọ oḍighi ogbi ọpo urom bọ ịmhi r’ọmhan oḍighi phọ ọdi. 35 Tọ nyinha rẹḅem ghan mọ inya ụnwanyu kụ isugha ọteeny amem ibugha phọ? Kụolo ịmiin! mị rịḅenhi ghan inyinha mọ: Ipogh ozo phọ bịn nyinha kẹmiin ni mọ mạnhighe obugha. Ịduon rọkaaph bọ 36 momhiigh rọkpe obughaam ibugha phọ, kụ ọdi raakpomhoghi ni iimhumha aghuḍum k’agee-pọ, pịdi oḅephom ozo phọ r’obughaam ibugha phọ ọḅophoghan obo. 37 Ọdaphan ịphen phọ, ịpe rọḅem ghan bọ ịne ni, mọ: Oniin oḅephom ozo phọ kụ ọphoripho obughaam ibugha phọ. 38 Mị irom inyinha ọghi obugha ozo dị nyinha íḍighi aani. Ạbunhon mokumuan ni, kụ nyinha meru rẹkelhom oḍighi phọ bịdi oḍighi bọ.”

39 Ịbadi ạbuo ạ Sạmeria dị oḍighi bụo ẹmha phọ ẹpe phọ ụmhoogh ni omheeraam ọghi esi ọdi loor ịpe ạnhir phọ ạḅenhi bọ bịdi mọ: “Ọdi ụḅenhi ịmhi oomo ạraraar dị mị maḍighi ghan.” 40 Awe ạ Sạmeria phọ oru bọ ọteeny nyọdi, ụlhom ni nyọdi mọ ạrol r’ạbuno, kụ ọdi ạrol r’ạbidi ịyal aḍughul otu. 41 Kụ ịbadi ạbunhon umheeraam ni, loor ạraraar phọ ọdi ạghaaph bọ. 42 Kụ bịdi ọḅenhi ạnhir phọ mọ: “Yoor ụ́tuan mụn ịpe nạ ạghaaph bọ bịn kụ omeeraam bọ; ịdi eḍighi bọ yoor mọnhaghan aani ịpe ọdi ạghaaph bọ, kụ yoor olegheri mọ ọkar agey oye phọ ọphon phọ kụ ọpelia aḅirinhi phọ ni.”

43 Ịyal phọ aḍughul otu phọ reten, kụ ạḅua ẹpe phọ anyeenhe Gạlili. 44 A Jizọs r’aloor ạghaaph ni mọ, oyil rákuan ghan sịphe ẹmha phọ ọdi. 45 Kụ ọdi asi bọ Gạlili, awe phọ ạ Gạlili ughuraam ni nyọdi, loor esi dị bịdi ụmhiin ni oomo ạraraar phọ ọdi aḍighi bọ ẹpe Jeruselem mem ẹyaal phọ, ịdi eḍighi bọ bịdi ụghi aani ni ẹyaal phọ.

46 Ọdi ạḅilhe ni ạghi Kenạ ẹpe Gạlili, ẹpe ọdi atenhe bọ mụum mọ miim. Kụ ẹpe Kạpạnịọm oniin oye dị rakumuanhaan ghan uwo ẹmha ạrol li dị ọony ọdi ạrol émoon. 47 Oye phọ ọphon phọ ạnhaghan bọ mọ a Jizọs mạḅua ẹpe Judia atu Gạlili, ạghi ni ạteeny nyọdi kụ ạlhom mọ ạdaph nyịnho ạghi aakonhom ọony ọno, ịdi eḍighi bọ ropogh ẹpughol ạmuum. 48 Kụolo a Jizọs ạḅenhi nyọdi mọ: “Emuton dị nyinha ẹmhiin ịiḍaany, nyinha kétue ni bịn emeeraam.” 49 Kụ oye phọ rakumuanhaan ghan bọ uwo ẹmha phọ ạḅenhi nyọdi mọ: “Uwo Ẹmhoogh, tue kụ ọbumoony phọ ạmhi agbi omhugh.” 50 Kụ a Jizọs ạḅenhi nyọdi mọ: “Keel; ọony phọ ạna mamhoon.”* Kụ oye phọ amheeraam ịpe a Jizọs ạḅenhi bọ nyọdi, kụ anyeenhe ogheel. 51 Kụolo ọdi odi ni eten, kụ ạrebenhe ọdi ozuan nyọdi kụ ọḅenhi mọ ọony phọ ọdi mamhoon.* 52 Kụ ọdi apuru bịdi mem mọ ọony phọ amhoon bọ. Kụ bịdi ọphagharanhaan nyọdi mọ: “Osipheeny phọ ạḅua loor ọdi omhunhenhiom oḍual ạwa* phọ, iḅue phọ eten bọ.” 53 Kụ ọde phọ alhegheri mọ ọpo kụ ọkar ạwa phọ a Jizọs ạḅenhi bọ nyọdi mọ: “Ọony phọ ạna mamhoon.” Esi ịduon phọ ọdi r’oomo ạbuo eghun otu phọ ọdi umheeraam ni. 54 Ịphen kụ omhunhenhiom ịyal ịiḍaany dị a Jizọs aḍighi mem mọ ạḅua bọ Judia ạghi Gạlili.