Ọdaphan Luk
16 A Jizọs ạḅenhi ni kẹn bụmatuan phọ ọdi mọ: “Oniin ọolha ạrol li dị awe ọghi ọḅenhi mọ ọony otu phọ rapogh ghan bọ otu phọ ọdi rapiemhi ruphua phọ ọdi. 2 Kụ oye phọ ạmhagh ọony otu phọ kụ ạḅenhi mọ, ‘Ịphen mị rạnaghan bọ ịlo ạna ịghen? Kịa ạge uruom ịmhi ịpe nạ ạpham bọ rạraar phọ ạmhi, loor esi dị nạ kápogh mụn otu phọ.’ 3 Kụ ọony otu phọ ạḅem sịphe olhoghi ọdi mọ, ‘Mị kaḍighi ika nyịidipho ọde otu phọ ạmhi ụ́wa mụn bọ mọ mị upogh otu phọ? Mị ụ́moogh ịnyaam okumuan arukumuan ozo, kụ umugholoor odi ni ọghi ịlom. 4 Ịhii! Mị malhegheri ịdi mị kaḍighi pịdi mem dị uphorogh ịmhi oḍighi phọ awe ụsighe ịmhi ọlogh olhoghi otu ạbidi.’ 5 Kụ ọdi ạmhagh tọrobo oye dị alhe ọmhugh ọde otu phọ ọdi, kụ apuru ọḅel phọ mọ, ‘Ọmhugh ọde otu phọ ạmhi nạ alhe bọ ạman ika?’ 6 Kụ oye phọ ạphagharanhaan mọ, ‘Ạmunhum oliv dị ạmhan okuron ọtoom.’* Kụ ọdi ạḅenhi oye phọ mọ, ‘Tiin ḍịnya phọ nyinha ẹgeeghian bọ ạrol ude aagborion ạge 50.’ 7 Kụ ọdi apuru ọnhon mọ, ‘Ẹlo ạna ọmhugh phọ nạ alhe bọ ạman ika?’ Kụ oye phọ mọ, ‘A wit dị ạmhan okuron ogbogh ọtoom.’* Kụ ọdi ạḅenhi oye phọ mọ, ‘Tiin ḍịnya phọ nyinha ẹgeeghian bọ ạge 80.’ 8 Kụ ọde otu phọ ạseph ọony otu phọ, loor esi dị ạsighe ọsu olhoghi kụ aḍighinhom ịdi kẹngo loor ọdi sụo, ghạlhamo r’ịduon ọony otu phọ úḍighi bọ ni ịdi ẹnhighe; ịdi eḍighi bọ ạnmuny aḅirinhi phọ ọphon* phọ ọsu olhoghi ọwa ịlo ạsuo ạbidi opu nmụny ạḍiḅaal phọ mem dị roḍighi rạraar igbo ạbuo oghiil phọ ạbidi.
9 “Mị ạḅilhe rịḅenhi ghan inyinha mọ: Ịsighe ikpoki ọkaraph aḅirinhi phọ ọphon phọ ẹmhooghom rịghiri, pịdi mem dị ikpoki phọ emhunheen, bịdi ịsighe inyinha ẹlogh riisi phọ ịpe awe kọtol bọ k’agee-pọ. 10 Oye dị ạkpe oḍuom olhoghi esi ịbam ạraraar ạkpe ni kẹn oḍuom olhoghi esi igbogh ạraraar, kụ oye dị ráḍighi ghan ịdi ẹnhighe esi ịbam ạraraar káḍighi kẹn ịdi ẹnhighe esi igbogh ạraraar. 11 Esi ịduon phọ, eḍighi mạar dị nyinha kẹ̋sighe ikpoki ọkaraph aḅirinhi phọ ọphon phọ eḍighinhom rạraar dị eḍeenhaan mọ nyinha ẹkpe ni oḍuom olhoghi, ạnhian kụ kịngo bọ inyinha ịyaar dị ẹkar ẹmhan mạar? 12 Kụ eḍighi mạar dị nyinha ke̋ḍighi rạraar dị eḍeenhaan mọ nyinha ẹkpe ni oḍuom olhoghi esi ạraraar ạbunhon awe, ạnhian kụ kịngo bọ inyinha ịlo anyinha? 13 Ọony otu ólho dị katue akumu ịyal ạburude otu, loor esi dị ọdi kạlogh ni ḍien nyoniin kụ ạpomoghian nyọoripho, ọbobo ọdi kạḅar nyoniin kụ ạbilhe ọlhogh eegu nyọoripho. Nyinha kétue eḍighi rẹbenhe Ẹnhaan r’arẹbenhe ikpoki.”
14 Kụ ạbuo ạ Fạrisi phọ, oḍighi bọ we dị ọphomhoghian ikpoki, ụnhaghan ghan ni oomo ịphen phọ kụ omhiigh ọgilaam ọdi. 15 Kụ ọdi ạḅenhi bịdi mọ: “Nyinha rẹkaaph ghan ghisigh awe mọ nyinha awe elhiom eḍighinhom ịyaar, kụolo Ẹnhaan alegheri ni rokpom mọ anyinha. Ịdi eḍighi bọ ịyaar dị ẹmhan mạar esi awe eḍighi ịyaar ạḅaphanya esi Ẹnhaan.
16 “Olhogh phọ r’ịge Ariil phọ ịrol li tụtu ẹteeny mem mọ ạ Jọn. Kụ emhiigh mem mọ ọpo phọ kụ rẹki, rogbeelhom ni Ọmhar phọ Ẹnhaan ịdipho iiḅi ịinhaghan, kụ awe kịrokiro rọkparagha ni oḍigh aani. 17 Ọkar agey, edugh ghụn epu dị ạke phọ r’ade phọ kepe dị r’oniin ạpakiri ekpo ịge dị edi sịphe Olhogh phọ kẹbilhe ímunhughan.
18 “Tọrobo oye dị aseere ạnhir ọdi ạghi aphin ọnhon pọ malhe ẹmha, kụ oye lọ aphin ạnhir dị olom aseere pọ malhe ẹmha.
19 “Oniin ọolha ạrol li dị ạkpolhoghian ghan oodor r’oodugha ạsuoma, kụ ạghelhom ghan ịma ạraraar ḍio etum ḍio. 20 Useere ghan ni sịphe ọnhu aḍibuo phọ ọdi ọlom le dị ạmhoogh rọko loor phọ, dị oghol mọ ạ Lạzạrọs, 21 kụ ạwa ghan ni olhe ạraraar dị ẹḅua ịdaabili ọolha phọ emhelheghu. Kụ asuogh ịghi ghan ni ẹlhaay riisi phọ ọdi. 22 Ẹsighe rẹki bịn ọlom le phọ amhugh, kụ ạruukpaany ọsighe ọghi oseere ọogaany Ebrạhạm.*
“Ọolha phọ amhugh aani ni, kụ oḍi. 23 Ọdi odi ni sịphe Oḍi phọ* rạmiinhom, kụ aphogh ạnyu ạmhiin Ebrạhạm ekpisi dị ẹkel rạ Lạzạrọs dị odi ọogaany ọdi.* 24 Kụ ạmhagh ạḅem mọ, ‘Ebrạhạm ọde ạmhi, ụnma ịmhi ighirigiir, arom ạ Lạzạrọs ạsighe ḍụnhugh ọdi atiom mụum atepheriom nem ạmhi, ịdi eḍighi bọ mị rạmiinhom ni iboom sịen aḍiboom ạnian phọ ạḍien phọ.’ 25 Kụ Ebrạhạm ạḅem mọ, ‘Mọony ạmhi, kábulha mọ nạ ụghelhom ghan ni ịbadi igey ạraraar mem mọ nạ kőmhugh bọ, kụ ạ Lạzạrọs ạmhiinhom ghan. Kụ nyịidipho, rọodereghi nyọdi ẹphen, kụolo nạ rạmiinhom. 26 Epel oomo ịphen phọ kẹn, eboom eḍiiny isophom ni iyoor r’anyinha, dị bụlo rọwa ọḍua ẹphen oru ẹpe nyinha edi bọ kótue, ḅịlhe awe dị rọwa ọḍua ẹpe oru ẹphen yoor odi bọ kótue.’ 27 Kụ ọdi mọ, ‘Ọde, eru ịdipho pọ seseeny tom ọdi ạghi ẹpe k’ọde phọ ạmhi, 28 ịdi eḍighi bọ mị ạmoogh oogh abumor, pịdi ọdi ạkuamhi ạpur bịdi rụru ọbo kotu aani ghan bọ esi ịmhinhimhiin phọ ẹphen phọ.’ 29 Kụolo Ebrạhạm ạḅem mọ, ‘Ịge phọ a Mozis r’ịpe Ariil phọ edi ni r’ạbidi; bịdi ọnhaghan ịpe phọ.’ 30 Kụ ọdi mọ, ‘Eeye, Ebrạhạm ọde ạmhi, bịdi kọ́naghan, kụolo eḍighi mạar dị oye ạḍua igbo ạbuen momhuughu bọ ạghi ạteeny bịdi, kokiton ni.’ 31 Kụ Ebrạhạm ạḅenhi nyọdi mọ, ‘Eḍighi mạar dị bịdi ụ́naghan ịpe ịge phọ a Mozis r’ịpe Ariil phọ ẹghaaph bọ, pọ kọ́naghan ni ghạlhamo oye aḅetenhu ni esi aḍuugh kụ ạghi ạteeny bịdi.’”