Ọdaphan Luk
21 Ịduon ọdi aphogh bọ ẹpe arookoom ikpoki phọ edi bọ, ọdi ạmhiin ni dị ạraalha phọ rodoghoḍi inmo phọ ạbidi sịphe arookoom mọ. 2 Kụ ọdi ạmhiin uwo ekulhom ekpukelhe ạnhir dị ạlhogh ịyal ịbam ạ kọịn dị ị́kar ịman mạar,* 3 kụ ọdi ạḅem mọ: “Mị ạkar rịḅenhi ghan inyinha mọ uwo ekulhom ekpukelhe ạnhir phọ ọphon phọ kụ ạlhogh apuemhi oomo ạbueripho. 4 Ịdi eḍighi bọ oomo ạbuen phọ ụsighe sịphe ikpoki phọ ạbidi ịdi mepeel kụ ọlhogh ịdipho inmo, kụolo ghạlhamo r’ịduon ọdi aḍighi bọ uwo ekulhom, ạlogh oomo ịpe ọdi ạmhoogh bọ ọrolhom.”
5 Ịpe reten, mem dị abuniin awe rọkaaph ịlo ịpe ọsighe bọ ịma asighiigh r’ạraraar dị ọḅogh ọngo Ẹnhaan kụ ọlhoghom otu ịiḅereghi phọ, 6 ọdi ạḅem mọ: “Ịdi egbolhomaam rạraar phọ ịphen nyinha rẹmiin bọ nyịidipho, amem retu ni dị aḍighiigh kẹ́tol mụn ạnyu aḍighiigh dị kóler.” 7 Kụ bịdi opuru nyọdi mọ: “Ọtughemhia, ịphen phọ kemite pụr amem, kụ eeghe kụ keḍeenhaan bọ mọ mẹteeny dị ạraraar phọ ịphen phọ kemite?” 8 Kụ ọdi ạḅem mọ: “Igonha loor ọbo oye kiikelheghi ghan bọ inyinha, loor esi dị ịbadi kotumhom ghan ni ḍien phọ ạmhi kụ ọḅem ghan mọ, ‘Mị kụ ọdi phọ ni,’ ḅịlhe mọ, ‘Amem mọ metuman.’ Kẹ́daph bịdi. 9 Ọḅaram ịsien, mem dị nyinha ẹnhaghan ịlo ạraagham r’ịgbaragbara, oḅio anyinha kúkaph. Ịdi eḍighi bọ ịphen phọ kẹpur ri emite, kụolo eekunha phọ kétu mem mem mọ.”
10 Kụ ọdi ạḅenhi bịdi mọ: “Eelhe kozuom ni eelhe, ḅịlhe ọmhar azuom ọmhar. 11 Ade phọ kepiigha ni iboom, kụ ekuom eḍien r’ạreezegh kẹtol li rikpisi kịrokiro; kụ ạraraar aruugu kemiteghu ni, ḅịlhe awe kọmiin ni ịikia ạraraar ẹpe k’ạke phọ.
12 “Kụolo tụtu oomo ịphen phọ kemite, awe kisiphi ni inyinha ọgbiphoghom, ịsighe inyinha ẹki rubughotu r’aruutu ikoli. Bịdi kokol li ẹmhu aḍien phọ ạmhi ịmheremhi inyinha ghisigh aruwo ẹmha r’abupoghom. 13 Ịphen phọ kemiteom eepoogh dị nyinha kẹkaaph ịpe nyinha emheeraam bọ ẹḅenhi bịdi. 14 Esi ịduon phọ, isopha mọ nyinha kẹ́tuugha ịlo ọghaaph ọphelhaam ạrumhu anyinha kụ egbi ọteeny amem mọ, 15 ịdi eḍighi bọ mị kịngo ni inyinha ikpo ọnhu r’ọsu olhoghi dị ghạlhamo oomo ạbuphe risophoghom bọ inyinha kụ ụḅophoghan, kótue ọmerenyan ọbobo ọgbakian. 16 Ọḅaram ịsien, ạburude r’aburunhiin r’abumor r’ạrighiri r’asiya anyinha kịḅogh ni* inyinha ọngo buugboom ịiruen, kụ ọze buniin anyinha, 17 kụ oomo awe kokol li ẹmhu aḍien phọ ạmhi ịlhogh inyinha ḍien. 18 Kụolo ghạlhamo r’aḍiniin ạḍilhaal ẹmhu anyinha bịn képe. 19 Esi ọkparam mọ anyinha kụ ẹdi nyinha kẹpel ghuḍum mọ anyinha.
20 “Tọrobo ịpe ẹrol bọ, mem dị nyinha ẹmhiin dị ạbuo ẹgham oko okitonhom Jeruselem, pọ ilegheri mọ amem mọ kopiemhi bọ nyọdi metuman. 21 Kụ bụphe odi bọ Judia omhiigh osumughu ọghi ẹpe ạraaḅaraph phọ, bụphe odi bọ sịphe ẹmha phọ ọḍuaghu, ḅịlhe bụphe odi bọ ẹpe ạraaghanha phọ kúḍigh ẹpe ẹmha phọ, 22 loor esi dị ịpe kụ ariiḍio phọ Ẹnhaan kaagbonhaan bọ ịiruen* we pịdi oomo ạraraar phọ ọge bọ emunughan. 23 Ịmhinhimhiin kụ kẹtolhonhaan nmạriir dị odi r’eghun r’ạbulo ọpham nmụny dị kőghinhe mạmaam mem mọ ọpo phọ! Ịdi eḍighi bọ iboom ịiḅaghamhi kẹtol li de phọ, kụ kọliom ni we ade phọ ạḍien phọ. 24 Kọzeom buniin ạbidi elhool ẹgham, kụ ọsighe bụnhon ọkimhom oomo areelhe phọ ịdipho ạrebenhe; kụ awe areelhe phọ kọozeghi ni Jeruselem tụtu amem mọ ọmaanhaan bọ we areelhe phọ emhunhughan.
25 “Ọḅaram ịsien, areḍeenhaan kẹtol li ẹpe erumhuḍio phọ r’ụnwanyu phọ r’ạraanhaan phọ, kụ aruugu kasiph ni we sịen ade phọ kụ kólegheri ịlo oḍighi loor esi oghur ọphiiny ạbazi phọ r’ọgbagara oolhogh phọ. 26 Kụ awe kọkanyanhu ni loor oghiilhaan r’aloor ạraraar phọ bịdi rogon bọ dị kemiteghu sịen ade phọ, ịdi eḍighi bọ ịikpo ạsike phọ kepiigha ni. 27 Kụ bịdi kọmiin ni Ọony phọ oye esi ọotu dị ạpham ịikpo r’eboom eghuan kụ ratumhom. 28 Kụolo mem dị ạraraar phọ ịphen phọ emhiigh omiteghu, ịmeera esel ẹmheremhi rụmhu anyinha, loor esi dị amem mọ kịphel bọ inyinha retuman.”
29 Ọdi rọghaaph ịphen phọ kụ ạngo bịdi ọghaạph ọmaanhiom, mọ: “Ịmaar ephogh oreeny a fig phọ r’oomo ịpheripho ireeny phọ. 30 Mem dị bịdi ẹraarogh, nyinha rẹmiin ghan ni bịn kelhegheri mọ aghozogh matuman. 31 Eniin phọ eten phọ, mem dị nyinha ẹmhiin dị ạraraar phọ ịphen phọ remiteghu, pọ ilegheri mọ Ọmhar phọ Ẹnhaan matuman. 32 Mị ạkar rịḅenhi ghan inyinha mọ oghiil phọ ọphon phọ káten ni bịn tụtu oomo ạraraar phọ emite ẹmhan. 33 Ạke phọ r’ade phọ kepe ni, kụolo ikpo ọnhu phọ ạmhi képe ni bịn.
34 “Igonha loor anyinha ọbo amuboom amale r’iboom ịpughol r’oboom ọoḅaghamhian aloor ịlo aghuḍum kẹemoromhi ghan bọ rokpom mọ anyinha, bịn aḍio phọ ạḍiphe phọ ịsighe inyinha ekperenhom 35 ịdipho aḍiphil. Ịdi eḍighi bọ aḍio phọ ạḍiphe phọ retuanhaan oomo awe phọ odi bọ sịen ade phọ. 36 Esi ịduon phọ, ịkiom ghisigh eemhanham, kụ ẹeḅereghi ghan r’oomo ekpom oomo amem pịdi nyinha etue ekpetenhaan oomo ạraraar phọ ịphen kemite bọ ni, ẹḅilhe ẹmeera ghisigh Ọony phọ oye.”
37 Kụ ḍịroor ọdi ạtughemhi ghan ni sịphe otu ịiḅereghi phọ, kụolo dulhe ọdi ạḍua ghan ni ạghi ẹeḅaraph phọ oghol bọ mọ Ẹeḅaraph Olivs ạrol. 38 Kụ oomo awe phọ uru ghan ni ọteeny nyọdi sịphe otu ịiḅereghi phọ eḅon ạḍiroor ọnhaghan ạraraar phọ ọdi kạkaaph bọ.