Ọdaphan Luk
20 Ḍiniin aḍio dị ọdi odi rạtughemhi we phọ kạḅilhe agbeelhom iiḅi ịinhaghan phọ sịphe otu ịiḅereghi phọ, aruwo ẹmhu ạbupinyon rịkia phọ r’ạbutughemhia Olhogh phọ r’ikumor awe phọ uru ni ọteeny nyọdi, 2 kụ opuru mọ: “Ụḅenhi iyoor, ịghen ịikpo kụ ẹdi nạ ạsighe bọ raḍighinhom ghan rạraar phọ ịphen phọ? Kụ ạnhian kụ ạngo bọ nyịnha ịikpo phọ?” 3 Kụ ọdi ạḅenhi bịdi mọ: “Mị kipuru aani inyinha ḍiniin aḍipuru, kụ ịphagharanhaan ịmhi: 4 Ịikpo phọ ạ Jọn aḍiinyeom ghan bọ we mụum mọ ịḍua k’ạke kụ eru ọbobo esi awe?” 5 Kụ bịdi omhiigh oopuruan sịphe igbo phọ ạbidi mọ: “Eḍighi mạar dị yira ọḅem mọ, ‘Ịḅua k’ạke,’ pọ ọdi kạḅem mọ, ‘Eru ịdipho, uḍighi ika kụ nyinha ímeeraam bọ nyọdi?’ 6 Kụolo eḍighi mạar dị yira ọḅem mọ, ‘Ịḅua esi awe,’ oomo aḍita awe phọ kuroḅol li iyira ikpo, loor esi dị bịdi ụsighe Jọn ịdipho oyil.” 7 Kụ bịdi ọphagharanhaan mọ bụno úlegheri oye phọ ạngo bọ nyọdi ịikpo phọ. 8 Kụ a Jizọs ạḅenhi bịdi mọ: “Pọ mị kẹn inyinha rị́ḅenhi ịikpo phọ mị ạsighe bọ raḍighinhom ghan rạraar phọ ịphen phọ.”
9 Kụ ọdi amhiigh ọḅenhi ạbidi ọghaaph ọmaanhiom mọ ọphon, mọ: “Oye ạzuph ni ozo ạ vạịn, kụ ạngo ozo phọ buḅephom iizo mọ ophoghonhaan nyịnho kụ ạḅua ạghi ẹnhon eelhe kụ ạrol abia. 10 Rẹteeny mem mọ iimhumha phọ rẹḅaal ghan bọ, kụ arom ẹbenhe ọdi mọ ạghi ạteeny buḅephom iizo phọ pịdi ọngo nyọdi bin ọdi. Kụolo abuḅephom iizo phọ ukuphogh ni ẹbenhe phọ kụ ophorogh r’oopho ạraghaagh. 11 Ọdi ạḅilhe ni arom ọnhon ẹbenhe. Kụ bịdi okuphogh, oofolhomhi kụ ophorogh r’oopho ạraghaagh. 12 Kụ ọdi ạḅilhe arom omhunhenhiom ịraar; kụ bịdi okuphogh kẹn nyọon phọ kụ ophorogh omiteom pạ oghoony phọ. 13 Esi ịduon phọ, uwo ozo ạ vạịn phọ ạḅem ni mọ, ‘Mị kaḍighi eeghe nụun? Mị katom ọony phọ ạmhi ọphon mị ạphomhoghian bọ. Eeni sịen bịdi kọlogh ni nyọdi eegu.’ 14 Abuḅephom iizo phọ rọmhiin nyọdi kụ oopuruan sịphe igbo ạbidi mọ, ‘Ọphon kụ kale bọ erua ozo ạ vạịn phọ. Oghiigh nyọdi pịdi erua phọ ọdi eḍighi ẹlo ayira.’ 15 Kụ bịdi ọsighe nyọdi ọḍuanham sịphe ozo ạ vạịn phọ oghiigh. Esi ịduon phọ, uwo ozo ạ vạịn phọ kaḍighi eeghe? 16 Ọdi katu ni ạze buḅephom iizo phọ ạbuen phọ kụ ạḅogh ozo ạ vạịn phọ ạngo bụnhon awe.”
Bịdi rọnhaghan ịphen phọ kụ ọḅem mọ: “Ugbi ni!” 17 Kụolo a Jizọs aphogh bịdi akiririom kụ ạḅem mọ: “Eeghe kụ ẹmhu ịpe ọge bọ mọ: ‘Aḍighiigh phọ ạbuloghom ruutu phọ oghel bọ meḍighi ḍighiigh dị ẹmhan mạar epu ịnhon’?* 18 Tọrobo oye lọ amheelhom ḍighiigh phọ ạḍiphe phọ kaatughuḍian ni. Kụ aḍighiigh phọ kẹegbi ni tọrobo ọlo emheelhom.”
19 Mem mọ ọpo phọ ạbutughemhia Olhogh phọ r’aruwo ẹmhu ạbupinyon rịkia phọ ụwa ghan eten osiph ọdi, loor esi dị ulhegheri ni mọ ạtuan bụno kụ ạngo bọ ọghaaph ọmaanhiom mọ ọphon phọ, kụolo ughiilhaan ni we phọ. 20 Bịdi ụwa ghan ni eepoogh oḍighi ịdi ọdi kạpioman, kụ orom we dị bịdi ọghi ọgbal ophir mọ opu oḍighi mụdi bịdi awe elhiom eḍighinhom ịyaar pịdi ọsighe ịyaar dị ọdi kạkaaph osiphom nyọdi kụ ọḅogh nyọdi ọngo bụo ịtooghi phọ r’opoghom mọ. 21 Kụ bịdi ọḅenhi nyọdi mọ, “Ọtughemhia, yoor olegheri mọ nạ rạkaaph ghan kạḅilhe ạtughemhi igey ḅịlhe mọ nạ rạ́aphelheghan ghan, kụolo nạ rạtughemhi ghan ịdi eru ịne ịlo Ẹnhaan: 22 Ẹnighe ni osogh iisogh ọngo a Siza ọbobo ị́nighe?” 23 Kụolo ọdi alhegheri ni ikeḍi phọ ạbidi kụ ạḅenhi bịdi mọ: 24 “Iḍeenhaan ịmhi oniin a dinerịọs.* Ọphon phọ arisigh ạnhian, kụ ạḍien phọ aḍien ạnhian?” Kụ bịdi mọ: “Ịlo a Siza.” 25 Kụ ọdi ạḅenhi bịdi mọ: “Esi ịduon phọ, ịmiin ni mọ nyinha ẹngo Siza ịpe eru bọ ịlo a Siza, kụ ẹngo Ẹnhaan ịpe Ẹnhaan.” 26 Bịdi útue ụsighe ịyaar dị ọdi ạghaaph usiphom nyọdi ghisigh awe phọ, kpạripe ghụn ọphagharanhaan phọ ọdi aḍighi ni iikia esi ạbidi, kụ oḅoroghian bịn.
27 Kụolo buniin ạbuo ạ Sạdusi phọ úmeeraam bọ mọ oḅetenhu esi aḍuugh odi ni, uru ni ọteeny nyọdi kụ opuru mọ: 28 “Ọtughemhia, a Mozis ạge mọ, ‘Eru mạar dị oye ụ́mạr mọony kụ ạwilhe ạnhir ọdi amhugh, pọ umor ọdi aphin ạnhir phọ amiteghomonhaan nmụny umor phọ ọdi mamhugh bọ.’ 29 Oḍual abumor ụrol li. Okumoor phọ aphin ạnhir kụ mọony ọ́mhar bịn ạmhugh. 30 Kụ omhunhenhiom ịyal phọ aphin ạnhir phọ kụolo amhugh aani ni 31 kụ iniin phọ kụ imitenhaan omhunhenhiom ịraar phọ. Kụ oomo oḍual phọ uphin ni ạnhir phọ; kụolo umhuughu ni dị nmụny ụ́mar. 32 Kụ eekunha phọ, ạnhir phọ amhugh aani. 33 Esi ịduon phọ, mem oḅetenhu esi aḍuugh phọ, ọdi kaḍighi ạnhir ạnhian? Sịen dị oḍual phọ ạbidi ophin bọ ni nyọdi.”
34 Kụ a Jizọs ạḅenhi bịdi mọ: “Ạnmuny aḅirinhi phọ ọphon phọ* ropin ghan ni nmạriir ḅịlhe awe rọnughenyan ghan ni nmạnyaan ạbidi, 35 kụolo bụphe mogbiom bọ mọ ọkpeanhaan ni ọrol aḅirinhi phọ ọpo ratu bọ r’oḅetenhu esi aḍuugh kópin ghan nmạriir kụ kọ́nughenyan ghan nmạnyaan. 36 Ọkar ọghaaph, bịdi kómugh ghan mụn kẹn, ịdi eḍighi bọ bịdi kọtol ịdipho ạruukpaany phọ, kụ bịdi koḍighi nmụny Ẹnhaan loor esi dị koḅerion ni bịdi esi aḍuugh. 37 Sịphe ẹghaaph bọ ịlo ekpu eḍum mọ ạnian phọ eemor ghan bọ, a Mozis bịn ạghaaph ni aganhanhamhi mọ koḅerion ni bụphe momhuughu bọ mem mọ ọdi ạmhagh bọ a Jehova* mọ ‘Ẹnhaan Ebrạhạm r’ Ẹnhaan Ạịzik r’ Ẹnhaan a Jekọb.’ 38 Ọdi Ẹnhaan ạbuen ọdi bọ, k Ẹ́nhaan ạbuphe momhuughu bọ, ịdi eḍighi bọ esi ọdi oomo ạbidi odi ni r’ighuḍum.” 39 Kụ buniin ạbutughemhia Olhogh phọ ọḅenhi nyọdi mọ: “Ọtughemhia, nạ ạpagharanhaan ni agey.” 40 Kụ bịdi ụ́moogh mụn oḅio ọḅilhe opuru ọdi r’aḍiniin aḍipuru.
41 Kụ ọdi apuru aani bịdi mọ: “Uḍighi ika kụ rọḅem ghan bọ mọ ạ Krạịst phọ ọony a Devid? 42 A Devid r’aloor ạḅem ni sịphe ạḍinya Ạsuor phọ mọ, ‘A Jehova* ạḅenhi Uwo Ẹmhoogh phọ ạmhi mọ: “Tọl ḍịghaagh elhiom ạmhi 43 tụtu mị aḍighi bụmulhogh ḍien phọ ạna ịkasi ọkpasaghiom aruwol.”’ 44 A Devid ạmhagh nyọdi mọ Uwo Ẹmhoogh; esi ịduon phọ ika kụ ịdi ọdi aḍighi bọ ọony ọdi?”
45 Kụ ịduon oomo awe phọ rọnaghan bọ ni, kụ ọdi ạḅenhi bụmatuan phọ ọdi mọ: 46 “Igonha loor esi ạbutughemhia Olhogh phọ rẹḅeraan ghan bọ ọkpolhoghian ịgorogoro ạrusuoma kụ orelheom, ḅịlhe rẹḅeraan ghan bọ dị awe kọmagh ghan bịdi r’eghuan ẹpe aḍighi phọ, kụ rẹḅeraan ghan bọ kẹn ọrolhom ạsigada aghisigh* ẹpe arubughotu phọ r’ọrolhoghu ariisi dị ẹnhighe epu ịnhon mem amale adulhe. 47 Bịdi rọsigheogh ghan rạraar* arukpukelhe ạnmariir, kụ rọoḅereghi ghan ịidoony ịiḅereghi pịdi awe ọmiin bịdi. Ọoruen phọ kosophonhaan bọ bịdi kạgbagara ni* apu ịlo ạbunhon.”