Ọdaphan Jọn
10 “Mị ạkar rịḅenhi ghan inyinha mọ, oye lọ úugo ọnhu aḍibuo, kụ akpogha ẹnhon esi aḍigh oghoony iyool ịga, pọ ọḅa r’uwo izironhaan. 2 Kụolo ọpo aago bọ ọnhu aḍibuo phọ kụ aḍigh kụ opoghom iyool ịga phọ. 3 Okoriom ọnhu aḍibuo phọ rakughuronhaan ghan ni opoghom mọ, kụ iyool ịga phọ ẹnaghan ẹḍogh ọdi. Ọdi rạmagh ghan siḍien iyool ịga phọ ọdi kụ atelheom bịdi amiteom. 4 Kụ ọdi romiteom oomo ịpe ọdi, kụ aḍia ghisigh, kụ iyool ịga phọ ẹdaph nyọdi, loor esi dị elegheri ni ẹḍogh phọ ọdi. 5 R’amem r’amem bịdi kẹ́daph ooruen, kekiil ghụn kụ esuma, loor esi dị ẹḍogh ooruen ílegheri.” 6 A Jizọs ạḅenhi bịdi ọghaaph ọmaanhiom mọ ọphon phọ, kụolo bịdi ụ́naghanhan ẹmhu ịpe ọdi rạḅenhi bọ bịdi.
7 Kụ a Jizọs ạḅilhe ạḅem mọ: “Mị ạkar rịḅenhi ghan inyinha mọ, mị kụ ọnhu aḍibuo phọ iyool ịga phọ reten ghan bọ. 8 Kụ oomo ạbuphe moru bọ oghophora mọ bụno ạmhi ạruḅa r’ạbuo izironhaan; kụ iyool ịga phọ ị́naghanhan bịdi. 9 Mị kụ ọnhu aḍibuo phọ; kụ kọpel li tọrobo ọlo aago esi ạmhi kụ aḍigh, kụ ọdi kaḍigh ghan ni ạḅilhe amite, ạmiin rọogho ọraal. 10 Ọḅa phọ rátu ghan oḍighi ẹnhon ịyaar emuton oru omhi, r’ọze r’ophiemhi. Mị uru mọ bịdi ọmhoogh ghuḍum, ghuḍum dị ạbalhabalha. 11 Mị kụ ogey opoghom mọ; kụ ogey opoghom mọ rạtuan ghan ni iyool ịga phọ kạngo ghuḍum ọdi. 12 Kụ oye dị ophir dị úḍighi opoghom ḅịlhe iyool ịga phọ íḍighi ịlo ọdi kụ ạmhiin dị eephe ạno retu, rạbilhe ghan ni iyool ịga phọ kasuma, kụ eephe ạno phọ ẹsighe iniin kụ ịphoriphọ ẹwalhalha, 13 loor esi dị ọdi oye dị ophir, kụ ọ́mhoogh ogbolhomaam iyool ịga phọ. 14 Mị kụ ogey opoghom mọ. Mị alegheri ni iyool ịga phọ ạmhi ḅịlhe iyool ịga phọ ạmhi ilhegheri ni ịmhi 15 ịdipho Ọde phọ ulhegheri bọ ịmhi ḅịlhe mị alhegheri bọ Ọde phọ. Kụ mị kạtuan ni iyool ịga phọ ạngo ghuḍum mọ ạmhi.*
16 Mị ạmoogh ni ịnhon iyool ịga dị ílo aani sịen oghoony phọ ọphon phọ; kụ mị kạsighe ni atu ạḅaram ịphen phọ, kụ ẹnaghan ghan ẹḍogh phọ ạmhi, kụ oomo ạbidi eḍighi eniin egu ẹḅilhe ẹmoogh oniin opoghom. 17 Ọde phọ ụphomhoghian ịmhi loor ịduon mị ạngo bọ ghuḍum mọ ạmhi pịdi mị ạḅilhe ạmoogh. 18 Oye kụ kạ́sighe ghuḍum mọ ạmhi, mị kụ kasopha kụ ạngo. Mị ạmoogh ni elhiom ọngo, r’elhiom ọḅilhe ọmhoogh. Ọde phọ ạmhi kụ ụngo ịmhi ịto ịlo ịphen phọ.”
19 Amadia ạḅilhe ni amite igbo ạbuo a Ju phọ loor ikpo ọnhu phọ ịphen phọ. 20 Kụ ịbadi ụḅem ghan mọ: “Ọkaraph uwaloor kụ odi loor ọdi kụ ẹmhu phọ kẹn rẹeḅaghamhi ni. Uḍighi ika kụ nyinha rẹnaghan ghan bọ ịlo ọdi rạkaaph?” 21 Kụ bụnhon mọ: “Ịphen kạ́raghaaph oye dị ọkaraph uwaloor odi loor. Ọkaraph uwaloor katue ni aḍighi ịdi awe dị rọ́miin ghan eten kọmiin eten ḍụghum?”
22 Mem mọ ạmuphe phọ, role Ẹyaal Ọḅogh Ọngo phọ ẹpe Jeruselem. Iḍighi mem ẹephoom, 23 kụ a Jizọs arelhe ghan ẹpe otu ịiḅereghi phọ, ẹpe oghol bọ mọ ạ Vạrạndạ ạ Sọlọmọn. 24 Kụ ạbuo a Ju phọ okoom nyọdi kụ omhiigh ọḅenhi ọdi mọ: “Yoor kokori ẹteeny kạpur amem kụ nạ agbi ọḅenhi ayoor ịyaar? Mọ nạ kụ ạ Krạịst phọ, pọ ụḅenhi iyoor onyen.” 25 Kụ a Jizọs ạphagharanhaan bịdi mọ: “Mị ịḅenhi ni inyinha, kụ nyinha ímeeraam. Iiḍighi phọ mị aghol bọ ḍien Ọde phọ ạmhi raḍighi kụ rẹkaaph ghan ịlo ạmhi. 26 Kụolo nyinha ímeeraam loor esi dị nyinha kíyool ịga ạmhi. 27 Iyool ịga phọ ạmhi rẹnaghan ghan ni ẹḍogh phọ ạmhi, kụ mị alegheri ni bịdi, kụ rịdaph ghan kẹn ịmhi. 28 Mị rạngo ghan bịdi ghuḍum k’agee-pọ, kụ kópiemhi ni bịdi bịn, ḅịlhe oye káziton kẹn bịdi ạsighe sịen ḍịghaagh ạmhi. 29 Bụphe Ọde phọ ạmhi mụngo bọ ịmhi ọman mạar opu ịnhon ạraraar, kụ oye kátue aziton bịdi ạsighe sịphe ḍịghaagh Ọde phọ. 30 Mị rạ Ọde phọ ạmhi oniin oye.”*
31 Ạbuo a Ju phọ ụḅilhe ni ọsigheogh ikpo oroḅol ọdi. 32 Kụ a Jizọs ạḅenhi bịdi mọ: “Mị mịḍeenhaan ni inyinha ịbadi ịma iiḍighi dị Ọde phọ ạḅem mọ mị uḍighi. Nyinha ẹtuan ịghen kụ rẹwa bọ oroḅol ạmhi ikpo phọ?” 33 Kụ ạbuo a Ju phọ ọphagharanhaan nyọdi mọ: “Yoor ụ́tuan ịma iiḍighi ạna kụ rọwa bọ oroḅol ạna ikpo phọ, yoor ụtuan ịduon nạ rạapu bọ ḍien Ẹnhaan; ịdi eḍighi bọ nạ oye, kụolo nạ akophora mọ nạ ẹmhugh.” 34 Kụ a Jizọs ạphagharanhaan bịdi mọ: “Ụ́ge ḍịen sịphe Olhogh phọ anyinha mọ, ‘Mị ụḅem mọ: “Nyinha ạrumhugh”’?* 35 Eru mạar dị Ẹnhaan ạmhagh ni bụphe ekpo ọnhu phọ ọdi eghel bọ mọ ‘ạrumhugh,’ kụ ịphen phọ íḍighi ịdi ịge iigbia phọ ị́man mụn mạar, 36 uḍighi ika kụ nyinha rịḅenhi bọ ịmhi phọ Ẹnhaan mạḅaalhamhi bọ ạḅilhe arom mọ aru siẹn ade phọ mọ ‘Nạ rạapu ḍien Ẹnhaan,’ loor esi dị mị ạḅem mọ, ‘Mị ọony Ẹnhaan’? 37 Eru mạar dị mị ráḍighi iiḍighi Ọde phọ ạmhi, pọ ịmhi kímheeraam. 38 Kụolo eru mạar dị mị raḍighi ni, ghạlhamo nyinha ịmhi ímheeraam, pọ ịtuan ni iiḍighi phọ emheeraam, pịdi nyinha elegheri kụ ẹkiom ghisigh emeeraam mọ Ọde phọ ạḅoph ni r’ạmhi ḅịlhe mọ mị ạḅoph ni rạ Ọde phọ.” 39 Kụ bịdi ụwa ni ọḅilhe osiph ọdi, kụolo ọdi akpetenhaan ni bịdi asuma.
40 Kụ ọdi ạḅilhe ạḅeeny Ọphiiny ạ Jọdạn ạghi ẹpe ạ Jọn ạphur ghan bọ ạrol aḍiinye we mụum mọ kụ ạrol. 41 Kụ ịbadi awe oru ọteeny nyọdi kụ ọḅem ghan sịphe igbo phọ ạbidi mọ: “Ạ Jọn óḍighi r’eniin ịiḍaany, kụolo oomo ạraraar phọ ạ Jọn ạghaaph bọ ịlo oye phọ ọphon phọ ịne ni.” 42 Kụ ịbadi awe ọmhoogh omheeraam ọghi esi ọdi ẹpe phọ.