Ọdaphan Luk

1 Ịbadi awe mọlhogh ni ẹmhu ookpomhoghi r’ọge oomo ạraraar phọ ịphen yira ọkar bọ omheeraam aani, 2 ịdipho bụphe ọmhiin bọ rạraar phọ ịphen phọ k’emhiighom mọ ḅịlhe ogbeelhom ghan bọ dom mọ Ẹnhaan ụḅenhi bọ iyira. 3 Esi ịduon phọ, mị masopha ọge aani ịyaar etum ịyaar ịlo ịphen phọ oruom ạna, uwo ẹmhoogh phọ Tiọfịlọs, loor esi dị mị mamhiigha loor ạwaaghi k’emhiighom mọ rạraar dị eru ịne, 4 pịdi nạ alegheri akuphom owol mọ ạraraar phọ ịpe ọsighe bọ ọnhu ọtughemhiom nyịnha ịne ni.

5 Mem mọ ạ Hẹrọd,* uwo ẹmha phọ a Judia, ọpinyon rịkia ạrol li dị oghol mọ ạ Zẹkạrạyạ, ọlo ẹkpigh ạbupinyon rịkia dị oghol mọ Ạbạịjạ. Ạnhir phọ ọdi aḍighi ọlo eghun Erọn, kụ ughol mọ Elizạbẹt. 6 Ịyal phọ ạbidi uḍighi we elhiom eḍighinhom ịyaar ghisigh Ẹnhaan, dị ooko ghan oomo iilhogh phọ a Jehova* ọḅilhe ghan oḍighi tọrobo ịyaar lọ ọdi ạḅem. 7 Kụolo bịdi mọony ụ́moogh, loor esi dị Elizạbẹt ạrol ẹ́mar, kụ ạsia phọ ạbidi mẹghi ni iboom.

8 Ịdipho ọdi rakumuan bọ ịdipho ọpinyon rịkia ghisigh Ẹnhaan sịphe ẹkpigh phọ ạbidi, 9 isi ni nyọdi oḍigh esi iigbia phọ a Jehova* ọsu insẹns, ọdaphan eḍighinhom ịyaar ạbupinyon rịkia phọ. 10 Kụ oomo aḍita awe phọ ụrol li erugh ọoḅereghi ghan mem mọ rọsu ghan bọ insẹns phọ. 11 Ọokpaany a Jehova* amitenhaan ni nyọdi, kụ ạmheera ḍịghaagh elhiom ẹkpan insẹns phọ. 12 Kụ ịiḅaghamhi ni ạ Zẹkạrạyạ mem mọ ạmhiin bọ ịphen phọ kụ ạmhoogh oboom oghiilhaan. 13 Kụolo ọokpaany phọ ạḅenhi nyọdi mọ: “Kạ́moogh oghiilhaan Zẹkạrạyạ, loor esi dị Ẹnhaan mạnhaghan ịiḅereghi phọ nạ rạaḅereghi ghan bọ r’oomo ekpom, kụ Elizạbẹt ạnhir phọ ạna kạmharanhaan ni nyịnha olhephiri ọony, kụ nạ kakol nyọdi mọ ạ Jọn. 14 Nạ kạmoogh ni ibo r’oboom ọḅaal olhoghi, kụ ịbadi kobo ni mem dị ọmhar nyọdi, 15 ịdi eḍighi bọ ọdi kạman ni mạar ghisigh a Jehova.* Kụolo ọdi kụ́pughol rọphughol mụgbagara amiim, kụ uwaloor iigbia phọ kamuza ni loor ọdi k’amem dị odi ọkuruḅaka, 16 kụ ọdi kaḍighi ni ịdi ịbadi ạnmuny phọ Izrẹl koḅula esi a Jehova* Ẹnhaan phọ ạbidi. 17 Ḅịlhe kẹn, ọdi kaḍia ghisigh Ẹnhaan r’ọdo uwaloor phọ r’ịikpo phọ Ẹlạija, okiton arokpom ạburude otenhe ịlo ịbam ạnmuny r’oḍighi ịdi bụphe rọḅaar ghan bọ ẹmhu kọzo r’ọsu olhoghi ịdipho ạbuo elhiom eḍighinhom ịyaar phọ, pịdi ọdi aḍighi bịdi we dị mookolhobian okumu a Jehova.”*

18 Kụ ạ Zẹkạrạyạ ạḅenhi ọokpaany phọ mọ: “Mị kameeraam bọ ika ịphen phọ? Mị maḍighi okumor oye, kụ ạsia ạnhir phọ ạmhi mẹghi kẹn iboom.” 19 Kụ ọokpaany phọ ạphagharanhaan nyọdi mọ: “Mị a Gebrịẹl, ọpo rạmeera ghan bọ ghisigh Ẹnhaan, kụ urom ịmhi oru ọḅaanhaan ạna r’ọḅenhi ạna iiḅi ịinhaghan phọ ịphen phọ. 20 Kụolo mịin! nạ kakpomoghan ni, kụ nạ kátue mụn ạḅa tụtu ẹteeny ḍio phọ ịphen phọ kemite bọ, loor esi dị nạ ómheeraam ikpo ọnhu phọ ạmhi ịphen kemunhughan bọ ni mem mọ ọmaanhaan bọ.” 21 Mem mọ ọpo phọ, awe phọ ụghiom ni ghisigh okori ghan ạ Zẹkạrạyạ, kụ ookia ghan ịyaar phọ eḍighi bọ kụ ọdi rabia bọ ẹpe esi iigbia phọ. 22 Ọdi amite bọ órue ọḅaanhaan bịdi, kụ bịdi olhegheri mọ ọdi mạmhiin uḍien ẹpe esi iigbia phọ. Ọdi ạmaaghian ghan bịn ịdi eḍighi bọ órue ọḅa. 23 Kụ mem mọ ariiḍio arukumuan iigbia phọ ọdi emhunhughan bọ, ọdi agheel li olhoghi otu.

24 Iphurukpu asiḍughul otu reten bịn Elizạbẹt ạnhir phọ ọdi asoph eghun, kụ ọ́ḍua olhoghi otu esi oogh ụnwanyu, kụ ạḅem ghan mọ: 25 “Ẹphen kụ ịyaar dị a Jehova* muḍighinhaan ịmhi nyịidipho. Ọdi maaghiraan usoman ịmhi, oḍighi ịdi umugholoor ịmhi kúsiph mụn igbo awe.”

26 Mem dị eghun phọ ọdi mẹmhan odiiny ụnwanyu, Ẹnhaan arom ni ọokpaany phọ Gebrịẹl mọ ạghi ẹmha dị oghol mọ ạ Nạzạrẹt ẹpe Gạlili, 27 ạteeny esinha ọnyanhi dị oye kọ̋rolhan ghan esi, dị oye dị oghol mọ a Josẹf sịphe otu phọ a Devid maguan ophin, kụ ḍien esinha ọnyanhi phọ ughol mọ a Meri. 28 Kụ ọokpaany phọ roru ọteeny nyọdi kụ ạḅenhi mọ: “Mị ạmagh ni o, nạ phọ ọpo mọseph bọ, a Jehova* odi ni r’ạna.” 29 Kụolo ikpo ọnhu ọokpaany phọ ịiḅaghamhi ni nyọdi iboom kụ ọdi ạkparagha ghan ọnhaghanhan ẹmhu ạḍimhagh phọ. 30 Esi ịduon phọ ọokpaany phọ ạḅenhi nyọdi mọ: “Kákiilhaan Meri, ịdi eḍighi bọ Ẹnhaan mạseph nyịnha. 31 Mịin! Nạ kaamor ri kụ ạmar olhephiri ọony, kụ nạ kakol nyọdi mọ a Jizọs. 32 Ọony phọ ọphon phọ kaḍighi ni oye dị ạmhan mạar, kụ kọmagh ghan nyọdi mọ Ọony Ọpo Apelheghiom bọ, kụ a Jehova* Ẹnhaan phọ kạngo ni nyọdi ạgada ịtooghi phọ a Devid ọde phọ ọdi, 33 kụ ọdi kạtooghi ịdipho Uwo Ẹmha sịphe otu phọ a Jekọb k’agee-pọ, kụ Ọmhar phọ ọdi kási eekunha.”

34 Kụolo a Meri apuru ọokpaany phọ mọ: “Mị r’olhephiri ọony kọ̋rolhan ghan bọ esi, ịphen phọ kemite bọ ika?” 35 Kụ ọokpaany phọ ạphagharanhaan nyọdi mọ: “Uwaloor iigbia phọ kasoorom ni nyịnha, kụ ịikpo Ọpo Apelheghiom bọ ẹrolhonhaan nyịnha. Esi ịduon phọ kọmagh ghan ọony phọ kọmar bọ mọ iigbia, Ọony Ẹnhaan. 36 Mịin! Elizạbẹt ọnyo asiya phọ ạna, ọpo awe ọmhagh ghan bọ mọ ẹ́mar, masoph aani eghun dị mẹmhan odiiny ụnwanyu, ghạlhamo r’ịduon ọdi mạkpo bọ ni, kụ kạmar olhephiri ọony; 37 loor esi dị ịyaar ílo dị Ẹnhaan mạghaaph kụ kátue aḍighi.” 38 Kụ a Meri ạḅem mọ: “Mịin! Mị ẹbenhe ọnyanhi a Jehova!* Ẹtuugh ịduon nạ mạghaaph bọ kụ imitenhaan ịmhi.” Kụ ọokpaany phọ ạḅua.

39 Ịpe reten kụ a Meri aagborion ạghi ẹmha dị edi Juda ẹpe eelhe phọ ạraaḅaraph phọ edi bọ, 40 kụ aḍigh kạ Zẹkạrạyạ kụ ạmhagh Elizạbẹt. 41 Kụ ịduon Elizạbẹt ạnhaghan bọ ḍịmhagh phọ a Meri bịn ọbumoony phọ odi bọ ọkuruḅaka ọdi akuph, kụ uwaloor iigbia phọ amuza loor Elizạbẹt 42 kụ ạlo mọ: “Ạḍiseph kụ edianhaan nyịnha igbo ạnmariir, ḅịlhe ạḍiseph kụ edianhaan ọbumoony phọ odi bọ ọkuruḅaka ạna! 43 Mị phọ pọ ạnhian dị onhiin Uwo Ẹmhoogh phọ ạmhi kụ aru ophogh? 44 Mịin! Ịduon mị ạnhaghan bọ ḍịmhagh phọ ạna bịn ọbumoony phọ odi bọ ọkuruḅaka ạmhi akuph r’ibo. 45 Ọḅaal olhoghi kụ odianhaan kẹn ạnhir phọ ọpo amheeraam bọ, loor esi dị ạraraar phọ ịpe a Jehova* ạḅenhi bọ nyọdi kemunhughan ni ẹman.”

46 Kụ a Meri ạḅem mọ: “Mị* ragbeelhom ni igbogh phọ a Jehova,* 47 kụ ekpom ạmhi kẹ́bilhe ọmhoogh iboom ibo loor esi Ẹnhaan, Ọpelia phọ ạmhi, 48 ịdi eḍighi bọ ọdi makiton apogh dọl ẹbenhe ọnyanhi phọ ọdi esoorom bọ. Mịin! Emhiigh nyịidipho kụ rẹki, oomo arighiil kụmhagh ghan ịmhi mọ ọnyanhi dị ọseph, 49 loor esi dị Ọpo ạmhoogh bọ ịikpo phọ muḍighinhaan ịmhi ịikia ạraraar, kụ aḍien phọ ọdi eḍighi ḍịo iigbia, 50 kụ oghiil atum oghiil ọdi rạnma ghan ni ighirigiir bụphe rokiilhaan bọ nyọdi. 51 Ọdi aḍighinhom ịphen phọ ḍịghaagh iphelhegbe phọ ọdi; ọdi maḍighi ịdi bụphe ophoophe bọ loor sịphe arokpom mọ ạbidi ọwalhalha. 52 Ọdi magborion sịgada we phọ ạbuphe ọmhoogh bọ ịikpo phọ kụ apophe bụphe osoorom bọ; 53 ọdi mạkar kụ ạperemhiom igey ạraraar bụphe ọkoony rasiph bọ, kụ aporogh rạalha phọ r’oopho ạraghaagh. 54 Ọdi mạlhoghonhaan ḍịghaagh Izrẹl ẹbenhe phọ ọdi, oḍeenhaan mọ ọdi ạatughian ni oguan phọ ọdi ịlo ọnma ighirigiir 55 Ebrạhạm r’ạnmuny* phọ ọdi k’agee-pọ, ịdipho ọdi ạḅenhi bọ bụrude ạburude phọ ayira.” 56 A Meri ạrol li r’ Elizạbẹt dị rẹki ọmhan ịraar ụnwanyu kụ agbi ogheel k’ọdi.

57 Rẹteeny mem dị Elizạbẹt kạmar, kụ ạmhar olhephiri ọony. 58 Kụ amatuman r’asiya ọdi ọnhaghan mọ a Jehova* maḍeenhaan nyọdi oboom ọnma ighirigiir, kụ obo r’ọdi. 59 Rẹteeny omhunhenhiom ọphaanya aḍughul otu phọ, kụ bịdi oru oḍun ọbumoony phọ, kụ ọwa oghol ọony phọ ḍien ọde phọ ọdi, Zẹkạrạyạ. 60 Kụolo onhiin phọ ạḅem mọ: “Eeye, kokol nyọdi mọ ạ Jọn.” 61 Kụ bịdi ọḅenhi nyọdi mọ: “R’ọnyo asiya ạna dị oghol ḍien phọ ạḍien ólho.” 62 Kụ bịdi ọmaaghian opuruom ọde phọ ḍien phọ ọdi rạwa bọ mọ oghol ọony phọ. 63 Kụ ọdi ạmaaghian ạḅem mọ ọngo nyịnho okpooghi, kụ ạge mọ: “Ạ Jọn kụ aḍien ọdi.” Kụ ịphen phọ iḍighi ni iikia esi oomo awe phọ. 64 Mem mem mọ bịn ọnhu phọ ọdi ạtagharanhu ḅịlhe anem mọ ephooph, kụ amhiigh ọḅa oboom Ẹnhaan. 65 Kụ oomo awe phọ orugh bọ otuman bịdi ụmhoogh ni oghiilhaan, kụ omhiigh ọghaaph ịlo oomo ạraraar phọ ịphen phọ olheenye oomo eelhe phọ a Judia ạraaḅaraph phọ edi bọ. 66 Kụ oomo ạbuphe ọnhaghan bọ useerian ni ịphen phọ olhoghi, kụ ọḅem ghan mọ: “Ọony phọ ọphon phọ kaḍighi eeghe oye nụun?” Loor esi dị ạḍighaagh a Jehova* ịkar kụ ẹrol r’ọdi.

67 Kụ uwaloor iigbia phọ amuza ni loor ạ Zẹkạrạyạ ọde phọ ọdi kụ amhiigh ogbeelhom adom Ẹnhaan mọ: 68 “Ạḍiseph ẹrolhonhaan a Jehova* Ẹnhaan phọ Izrẹl, loor esi dị ọdi makiton apogh we phọ ọdi kụ ạpel bịdi. 69 Kụ ọdi mamiteom ọphaal ạpelieeny* sịphe otu phọ a Devid ẹbenhe phọ ọdi ụngo iyira, 70 ịdipho ọdi mạghaaph bọ dị eego esi ariil aruukuan phọ ọdi iḍiodi phọ, 71 ịlo ọphel ayira ọsighe ḍịghaagh ẹ́pomoghian phọ ayira r’ạbuphe ụlhogh bọ iyira ḍien. 72 Kụ ọdi kụnma ni iyira ighirigiir ịdipho ọdi aguan bọ bụrude ạburude phọ ayira kụ ạḅilhe ạatughian ịyo iigbia phọ ọdi, 73 ịpe ọdi aghiran bọ r’ Ebrạhạm ọde phọ ayira, 74 mọ mem dị ọdi mụtagharan iyira ḍịghaagh ẹ́pomoghian phọ, ọdi kameera ni mọ yira okumuan ghan rukumuan iigbia ọngo nyọdi dị oghiilhaan ụ́ḅaram 75 ọḅilhe ọḅar nyọdi kụ ọrol dọl elhiom eḍighinhom ịyaar ghisigh ọdi oomo aghuḍum mọ ayira. 76 Kụolo nạ mọony ạmhi, awe kọmhagh ghan nyịnha mọ oyil Ọpo Apelheghiom bọ, loor esi dị nạ kaḍia ghisigh a Jehova* ookolhobian areten phọ ọdi, 77 oḍighi ịdi awe phọ ọdi kolegheri mọ ọdi kạpel bịdi dị eego esi ọsar ọwilhenhaan ịkaraph phọ ạbidi, 78 loor esi iboom igbiririph phọ ọdi. Kụ igbiririph phọ ịphen phọ keḍighi ịdi ạḍiḅaal kẹmu ẹpe k’ạke phọ isoorom iyira ịdipho amem dị ạḍiroor mẹḅaal, 79 ọngo ạḍiḅaal bụphe odi bọ esi ufiri r’arokool dị oogho aḍuugh apuki r’oḍeenhaan ayira ịlo orelhe ịsiphe eten ẹepho phọ.”

80 Kụ ọbumoony phọ aphoph ạmhanham ạḅilhe aḍighi agey dị eego esi uwaloor phọ Ẹnhaan* kụ ạrol ghan ẹpe ẹdala phọ tụtu ẹteeny ḍio phọ aḍeenhaan bọ loor ọdi we phọ Izrẹl.