Ọdaphan Luk

2 Mem mọ ọpo phọ, a Siza Ọgọstọs ạto ni mọ ọgeeghi siḍien awe phọ odi bọ sịen oomo ade phọ. 2 (Ẹphen kụ ẹḅel amem dị ọgeeghi siḍien awe, kụ imite mem mọ ạ Kụirịnịọs kụ aḍighi bọ opoghom a Siria.) 3 Kụ oomo awe phọ ụghi ni rạmha ạbidi ọgeeghi asiḍien ạbidi. 4 Esi ịduon phọ, a Josẹf ạḅua aani ni ẹmha phọ ạ Nạzạrẹt ẹpe Gạlili ạghi ẹmha phọ a Devid, oghol bọ mọ ạ Bẹtẹlẹhẹm ẹpe Judia, loor ịduon ọdi aḍighi bọ ọnyo ẹemara ẹemara a Devid. 5 Ọdi ra Meri ạnhir phọ ọdi resiom bọ ọmhar kụ ụghi pịdi ọge aani siḍien ạbidi. 6 Bịdi odi ni ẹpe phọ kụ ẹteeny mem dị a Meri kạmar. 7 Kụ ọdi ạmhar ọony phọ ọdi, ọḅel ọbumoony phọ ọdi, kụ aphurughiom rukpe ạmhunheeny esi dị rọlogh ghan ịḅal ịnham, loor esi dị osoph ọ́rol dị bịdi kọminha sịphe otu abutenhenheen phọ.

8 Mem mọ ọpo phọ abupoghom iyool ịga ụrol li elhegheḍum ekool phọ ẹpe phọ ophogh ghan iyool ịga ạbidi ḍughul. 9 Kụ eginha amem bịn ọokpaany a Jehova* amitenhaan bịdi, kụ eghuan phọ a Jehova* ẹmhu ekitonhom bịdi ịdipho ạḍiḅaal, kụ bịdi ọmhoogh oboom oghiilhaan. 10 Kụolo ọokpaany phọ ạḅenhi bịdi mọ: “Kẹ́moogh oghiilhaan, ịmiin! mị uru ọḅenhi anyinha iiḅi ịinhaghan dị kẹngo oomo awe iboom ibo. 11 Rodon phọ, mịmharanhaan inyinha ẹpe ẹmha phọ a Devid ọpelia, ọdi kụ ạ Krạịst phọ, Uwo Ẹmhoogh phọ. 12 Ẹphen kụ ịyaar dị nyinha kẹsighe elegheriom nyọdi: Nyinha kẹmiin ni ọbumoony dị ophurughiom rukpe kụ ọmhunheeny esi dị rọlogh ghan ịḅal ịnham.” 13 Kụ ekperenhom bịn aḍita ạruukpaany oru oḍighan ọokpaany phọ kụ omhiigh oboom Ẹnhaan kụ ọḅem ghan mọ: 14 “Eghuan ẹrolhonhaan Ẹnhaan phọ odi bọ ẹpe k’ạke phọ, kụ sịen ade phọ ẹepho ẹrolhonhaan we phọ ạbuphe ọḅeraan bọ nyọdi.”

15 Ạruukpaany phọ rọwilhe bịdi roḅula k’ạke, kụ abupoghom mọ ọghaaph ghan sịphe igbo phọ ạbidi mọ: “Onyeenhe ẹpe Bẹtẹlẹhẹm ọmhiin ịpe memite bọ, ọdaphan ịphen a Jehova* mụḅenhi bọ iyira.” 16 Kụ bịdi oogborion ọghi kụ ọmhiin Meri ra Josẹf, r’ọbumoony phọ dị ọmhunheeny sịphe rọlogh ghan bọ ịḅal ịnham mọ. 17 Bịdi rọmhiin ịphen phọ, kụ ọḅenhi we phọ ịpe ạruukpaany phọ ọḅenhi bọ bịdi ịlo ọbumoony phọ. 18 Kụ iḍighi ni iikia esi oomo awe phọ ọnhaghan bọ ịpe abupoghom mọ ọḅenhi bọ bịdi, 19 kụolo a Meri amhiigh ni oseerean oomo ịphen phọ olhoghi ọdi, kụ agbiran ghan olhegheri ịpe ịphen phọ rẹma ghan bọ. 20 Kụ abupoghom mọ oḅula, oghuenhi ghan ọḅilhe oboom Ẹnhaan esi oomo ịpe bịdi mọnhaghan bọ ọḅilhe ọmhiin, ọdaphan ịpe ọḅenhi bọ bịdi.

21 Rẹteeny omhunhenhiom ọphaanya aḍughul otu phọ, mem mọ koḍun bọ nyọdi kụ oghol nyọdi mọ a Jizọs, ḍien phọ ọokpaany phọ ạḅem bọ mọ oghol nyọdi mem mọ kősoph bọ eghun ọdi.

22 Ḅịlhe kẹn, ẹteeny bọ mem mọ kọḅaalhamhi bọ bịdi ghisigh Ẹnhaan ọdaphan Olhogh phọ a Mozis, bịdi ụpham ni nyọdi orumhom Jeruselem pịdi oḍeenhaan a Jehova,* 23 ọdaphan ịpe ọge bọ sịphe Olhogh phọ a Jehova* mọ: “Tọrobo ọḅel ọony* kaḍighi ọdi mọḅogh ọngo a Jehova.”* 24 Kụ bịdi ọngo ịyaar ọphighironhom ẹkia phọ ọdaphan Olhogh phọ a Jehova* ạḅem bọ mọ: “ịyal aruukumude ọbobo ịyal ịgaami arukuru ghọzo kụ ẹdi nyinha kẹngo.”

25 Oye ạrol li Jeruselem dị oghol mọ a Simiọn, dị aḍighi oye elhiom eḍighinhom ịyaar ạḅilhe ạaḅereghi ghan Ẹnhaan r’oomo ekpom. Ọdi akori ghan mem mọ kọodereghi bọ we phọ Izrẹl, kụ uwaloor iigbia phọ ạrol li loor ọdi. 26 Ọḅaram ịsien, dị eego esi uwaloor iigbia phọ, Ẹnhaan ạḅenhi ni nyọdi mọ ọdi kámugh tụtu ạmhiin Krạịst phọ, Ọpo a Jehova* Mạsaḅar bọ. 27 Kụ uwaloor iigbia phọ aḍighi ni ịdi ọdi aḍigh sịphe otu ịiḅereghi phọ, kụ ịduon ọde r’onhiin phọ a Jizọs ọpham bọ Jizọs orumhom pịdi oḍighinhaan ịpe Olhogh phọ ạḅem bọ, 28 ọdi ạar ri ọbumoony phọ aḅeton kụ aboom Ẹnhaan kụ ạḅem mọ: 29 “Uwo Ẹmhoogh Ịtooghi, nyịidipho nạ mamheera mọ ẹbenhe phọ ạna amhugh r’ẹepho ọdaphan ịpe nạ ạghaaph bọ, 30 ịdi eḍighi bọ ariḍien ạmhi mẹmhiin eten phọ ẹpe nạ kạsighe bọ ạpelhom we, 31 ẹpe nạ maakolhobian bọ pịdi oomo awe ọmiin. 32 Ạḍien kụ ạḍiḅaal phọ kẹsighe bọ ufiri phọ aakpereghiom bọ we areelhe phọ, kụ keḍighi kẹn eghuan awe phọ ạna Izrẹl.” 33 Kụ ạraraar phọ rọkaaph bọ ịlo ọony phọ iḍighi ni iikia esi ọde phọ r’onhiin phọ. 34 Kụ a Simiọn ạḅilhe ạseph bịdi kụ ạḅenhi Meri onhiin ọbumoony phọ mọ: “Mịin! Mọsaḅar ọbumoony phọ ọphon phọ oḍighi ịdi ịbadi sịen Izrẹl komeel ḅịlhe ịbadi kọḅilhe oḅerenhu, r’oḍighi ịdipho ịyaar dị awe kọgilaam ghan 35 (ii, kogim ni nyịnha ẹedoony elhool ẹgham), pịdi ịitughian ịbadi awe eganhanha.”

36 Mem mọ ọpo phọ oniin oyil ạnhir ạrol li dị oghol mọ Ạnạ, ọnyanhi ạ Fạnuẹl, ọlo eghun Ạsạ. Ạsia ạnhir phọ ọphon phọ mẹghi ni, kụ ọdi ạal bọ ilhom* ạrol r’olom mọ oḍual ạsia, 37 kụ maḍighi nyịidipho ekpukelhe ạnhir dị mạmhan 84 ạsia. Ọdi ọ́wilhe ghan ọghi ịsiphe otu ịiḅereghi phọ okumuan ghan arukumuan iigbia ọngo Ẹnhaan ḍịroor r’adulhe esi ọkaagh ghan ẹḍogh r’ọoḅereghi ghan r’oomo ekpom. 38 Mem mọ ọpo phọ ọdi arelhe ni aru atuman bịdi, kụ amhiigh ọseph Ẹnhaan r’ọghaaph ịlo ọbumoony phọ ọḅenhi oomo ạbuphe rokori bọ pẹlieeny phọ a Jeruselem.

39 Bịdi rọmhan oḍighi oomo ịpe Olhogh phọ a Jehova* ạḅem bọ, kụ oḅula Nạzạrẹt ẹmha phọ ạbidi ẹpe Gạlili. 40 Kụ ọony phọ ạghiom ghisigh aḍum ghan ạḅilhe ạmhoogh ịnyaam r’oboom ọsu olhoghi ạḅilhe ạḅeraan Ẹnhaan.

41 Kụ iḍighi ni eḍighinhom ịyaar ọde r’onhiin phọ ọdi ọghi ghan a Jeruselem olhe Ẹyaal Ọphel Otenhe phọ lhạ etum lhạ. 42 Ọdi rọmhan 12 ạsia, kụ bịdi ọghi Jeruselem ịduon bịdi roḍighi ghan bọ mem ẹyaal phọ. 43 Bịdi rolhe ẹyaal phọ rọmhan kụ onyeenhe ogheel, kụolo a Jizọs ọ́daph aani bịdi, ạrol Jeruselem, kụ ọde r’onhiin phọ ọdi úseere olhoghi. 44 Loor ịduon bịdi ogbi bọ mọ ọdi odi aani ni igbo egu awe phọ rokeel bọ, bịdi urelhe ni oomo ẹmhu aḍio kụ ogbi omhiigh ọwa ọdi igbo asiya ạbidi r’awe dị bịdi olhegheri. 45 Kụolo bịdi ụ́miin nyọdi, kụ oḅula Jeruselem omhiigha loor ọwa nyọdi. 46 Rọwa nyọdi ịraar aḍughul otu kụ ọmhiin sịphe otu ịiḅereghi phọ, dị ạrol igbo ạbutughemhia phọ rạnaghan ghan ịpe bịdi rọkaaph bọ kạḅilhe apuru bịdi sipuru. 47 Kụ ọnhaghan ạḍughum mọ ọdi r’ọphanyanhaan phọ ọdi iḍighi ni iikia esi oomo ạbuphe rọnaghan bọ. 48 Kụ iḍighi ni iikia esi ọde phọ r’onhiin phọ ọdi mem mọ ọmhiin bọ nyọdi, kụ onhiin phọ ạḅenhi nyọdi mọ: “Mọony phọ, uḍighi ika kụ nạ uḍighi bọ iyoor ịduon phọ? Ọde phọ ạna r’ạmhi mọwa nyịnha bịn ịpher iyoor.” 49 Kụ ọdi ạḅenhi bịdi mọ: “Uḍighi ika kụ nyinha ịwa ghan bọ ịmhi? Nyinha ílegheri mọ mị ạmoogh ọrol ịsien otu ọde phọ ạmhi?” 50 Kụolo bịdi ụ́naghanhan ịpe ọdi ạḅenhi bọ bịdi.

51 Kụ ọdi ạdaph bịdi aḅula Nạzạrẹt, kụ ạghiom ghisigh ạnhaghanhan ghan bịdi. Kụ onhiin phọ ọdi aseerean ni olhoghi oomo ạraraar phọ ịphen phọ. 52 Kụ a Jizọs ạghiom ni ghisigh aḍum ghan kụ ọsu olhoghi phọ ọdi ạbugh ghan bịn, kụ ọdi ạḅeraan Ẹnhaan r’awe.