Ọdaphan Luk

6 Ḍiniin aḍio ophooghian ọdi atelhe raten ozo ịizupha, kụ ạbumatuan phọ ọdi ọku ghan ikpo ịizupha phọ ophilhiphiil ọlhe ghan. 2 Kụ buniin ạbuo ạ Fạrisi phọ rọmhiin ịphen phọ kụ opuru mọ: “Uḍighi ika kụ nyinha reḍighi ghan bọ ịyaar dị ị́kpe oḍighi a Ḍio Ophooghian phọ?” 3 Kụ a Jizọs ạphagharanhaan bịdi mọ: “Nyinha kạ̋al ghan ịpe a Devid aḍighi bọ mem mọ ọkoony phọ asiph bọ nyọdi r’awe phọ ọdaph bọ nyọdi? 4 Ịpe ọdi aḍigh bọ otu phọ Ẹnhaan, kụ ọngo bọ nyọdi ạ brẹd phọ oseere bọ ghisigh Ẹnhaan, kụ ọdi alhe bọ ạḅilhe ạsighe iniin ạngo we phọ rọdaph bọ nyọdi, ị́kpeanhaan bọ dị ọnhon oye kale emuton bụpinyon rịkia phọ?” 5 Kụ ọdi ạḅenhi bịdi mọ: “Ọony phọ oye Uwo Ẹmhoogh a Ḍio Ophooghian phọ.”

6 Rẹteeny ḍịnhon aḍio ophooghian, kụ ọdi aḍigh obughotu phọ amhiigh ọtughemhi. Kụ oye dị ạḍighaagh elhiom mọ emhugh ạrol li sịphe phọ. 7 Kụ ạbutughemhia Olhogh phọ r’ạbuo ạ Fạrisi phọ ogbon Jizọs ọmhiin mụghumo kaakonhom ni oye Ḍio Ophooghian phọ, pịdi bịdi ọmiin ịyaar osiphom ọdi olhogh. 8 Kụolo ọdi alhegheri ni ịitughian phọ ạbidi kụ ạḅenhi oye phọ ạḍighaagh phọ emhugh bọ mọ: “Ḅetenhu aru ạmheera sịen ogbo phọ.” Kụ oye phọ aḅetenhu ạghi ạmheera. 9 Kụ a Jizọs ạḅenhi bịdi mọ: “Mị ipuru inyinha ịyaar we phọ, Ẹkpeanhaan oḍighi eeghe Ḍio Ophooghian phọ, oḍighi egey ịyaar ọbobo ẹkaraph ịyaar, ọphel aghuḍum* ọbobo ophiemhi?” 10 Ọdi rophogh oomo ạbidi, kụ ạḅenhi oye phọ mọ: “Gbụton ḍịghaagh phọ ạna.” Kụ oye phọ ạgbuton, kụ ạḍighaagh phọ ọdi emhoon. 11 Kụolo bịdi ụmhoogh ni ọghagh olhoghi dị ụ́moogh mạar oḍighinhom kụ omhiigh oopuruan sịphe igbo phọ ạbidi ịlo oḍighi a Jizọs.

12 Ḍiniin aḍio a Jizọs ạsiiny ni ạnyu ẹeḅaraph ọoḅereghi, kụ ạḅaanhaan Ẹnhaan esi ịiḅereghi oomo aḍughul phọ. 13 Rẹḅaal, kụ ọdi ạmhagh bụmatuan phọ ọdi kụ ạsaḅar 12 igbo ạbidi, kụ aghol bụen phọ mọ abutelhedom. 14 Kụ bụphe ọdi ạsaḅar bọ pọ ạ Sạịmọn ọpo ọdi aghol bọ mọ a Pita, r’ Ạndrụ umor phọ ọdi, ra Jems, rạ Jọn, ra Filip, rạ Bạtọlọmiu, 15 rạ Mạtiu, rạ Tọmọs, ra Jems ọony phọ Ạlfiọs, rạ Sạịmọn phọ rọmagh ghan bọ mọ “oye oophugh phọ,” 16 ra Judas ọony phọ a Jems, ra Judas Iskạrịọt, ọpo eekunha phọ aal bọ nyọdi.

17 Kụ ọdi r’ạbidi osoor, kụ ọdi ạmheera esi dị eeleeny, kụ aḍiboom aḍita ạbumatuan ọdi, r’aḍiboom aḍita awe dị ọḅua oomo a Judia ra Jeruselem r’arokool phọ ạ Tạyạ rạ Sạịdọn etuman bọ ọphiiny ạbazi phọ kụ oru, ụrol li sịphe phọ. Bịdi uru ọnhaghan ịtughemhi phọ ọdi r’ọmhoogh eekonhom esi ạreezegh ạbidi. 18 Ghạlhamo r’awe dị ịkaraph aruwaloor rẹeḅaghamhi bịn ọdi aakonhom ni. 19 Kụ oomo aḍita awe phọ ọwa ghan ọḅogh ọdi, loor esi dị tọrobo amem dị ọḅogh nyọdi ịikpo ịḅua ghan loor ọdi eekonhom bịdi.

20 Kụ a Jizọs aphogh bụmatuan phọ ọdi kụ amhiigh ọḅem mọ:

“Ọḅaal olhoghi idianhaan ni inyinha arukulhom mọ, loor esi dị Ọmhar phọ Ẹnhaan ọlo anyinha.

21 “Ọḅaal olhoghi idianhaan ni inyinha phọ ọkoony phọ rasiph bọ nyịidipho, loor esi dị nyinha kele ni ẹper.

“Ọḅaal olhoghi idianhaan ni inyinha phọ remoghi bọ nyịidipho, loor esi dị nyinha kẹmilhogh ni.

22 “Ọḅaal olhoghi idianhaan ni inyinha mem dị awe ịlhogh inyinha ḍien, r’amem dị iphorogh inyinha ọḅilhe iituuny inyinha kụ ọphue siḍien anyinha esi ọḅem ghan mọ nyinha ạbukaraph awe, loor ẹmhu Ọony phọ oye. 23 Ibo ghan mem dị ịphen phọ emite ẹḅilhe ẹmhoogh ọḅaal olhoghi, loor esi dị ịikpia phọ anyinha ẹbugh ni ẹpe k’ạke, ịdi eḍighi bọ ịpe kụ ịdi ạburude ạburude phọ ạbidi oḍighi ghan ni riil phọ.

24 “Kụolo ịmhinhimhiin kụ kịrolhonhaan inyinha ạraalha phọ, loor esi dị kị́ngo mụn inyinha opuemhi ịphen nyinha ẹmhoogh bọ.

25 “Ịmhinhimhiin kụ kịrolhonhaan inyinha phọ melhe bọ ẹpher nyịidipho, loor esi dị ọkoony kisiph ni inyinha.

“Ịmhinhimhiin kụ kịrolhonhaan inyinha phọ rẹmilhogh bọ nyịidipho, loor esi dị nyinha kemeelhom ni ọto ẹḅilhe emoghi yogh.

26 “Ịmhinhimhiin kụ kịrolhonhaan inyinha mem dị oomo awe ọghaaph ghan ịma ịlo anyinha, loor esi dị ịpe kụ ịdi ạburude ạburude phọ ạbidi oḍighi ghan riil ọkpe phọ.

27 “Kụ mị rịḅenhi ghan inyinha phọ rẹnaghan bọ mọ: Ịpomoghian ghan bụmulhogh ḍien anyinha ẹḅilhe eḍighi ghan iiḅi bụphe ịlhogh bọ inyinha ḍien, 28 ẹseph ghan bụphe risuughi ghan bọ inyinha ịnhu, ẹeḅereghinhaan ghan bụphe rịḅenhi yogh ghan bọ inyinha. 29 Oye aḅor oniin okpo ạna, ḅịlhe ạngo nyọoripho; kụ oye ạsighe ạsuoma ạnyu ạna, kákikima nyọdi ọsighenhom ọpo olhoghi phọ. 30 Ngọ ni oye dị ạlhom nyịnha ịyaar, kụ oye lọ ạsigheogh rạraar ạna ạḍuanham, kạ́ḅenhi mọ aḅulhemhi.

31 “Ḅịlhe kẹn, iḍighinhaan ghan we ịpe nyinha rẹwa bọ mọ bịdi iḍighinhaan inyinha.

32 “Eeghe ạsuo kụ ẹdi nyinha kẹmoogh eḍighi mạar dị nyinha ẹphomhoghian oginha ạbuphe ịphomhoghian bọ inyinha? Abuḍighinhom ịkaraph phọ bịn ọpomoghian ni bụphe ọphomhoghian bọ bịdi. 33 Kụ eeghe ạsuo kụ ẹdi nyinha kẹmoogh eḍighi mạar dị nyinha eḍighi ghan iiḅi oginha ạbuphe riḍighi ghan bọ inyinha iiḅi? Abuḍighinhom ịkaraph phọ bịn roḍighi aani ghan ni iginha phọ. 34 Ḅịlhe kẹn, eeghe ạsuo kụ ẹdi nyinha kẹmoogh eḍighi mạar dị nyinha etenhe ghan ọmhugh* oginha ạbuphe nyinha eḍuom bọ olhoghi mọ kịkpe ni inyinha? Abuḍighinhom ịkaraph bịn rotenhe ghan ni ọmhugh buḍighinhom ịkaraph pịdi bịdi ọḅilhe ọteeny ikpoki phọ ạbidi. 35 Kpạripe ghụn, ịpomoghian ghan bụmulhogh ḍien anyinha ẹḅilhe eḍighi ghan iiḅi, kụ etenhe ghan ịimhugh we dị nyinha íḍuom olhoghi mọ kịkpe ni inyinha; bịn ịikpia phọ anyinha kẹbugh ni, kụ nyinha eḍighi nmụny Ọpo Apelheghiom bọ, ịdi eḍighi bọ ọdi raḍighi ghan iiḅi bụphe úlegheri bọ iiḅi r’ạbukaraph phọ. 36 Ịnma ghan ighirigiir ịdipho Ọde phọ anyinha rạnma ghan bọ ighirigiir.

37 “Ọḅaram ịsien, kéegbonhaan mụn bụnhon ịiruen, bịn inyinha kíigbonhaan ni bịn ịiruen; kẹ́ḍagha yogh mụn bụnhon, bịn inyinha kị́ḍagha ni bịn. Ịsar ghan ẹwilhenhaan bụnhon, bịn kọsar ri ịwilhenhaan inyinha. 38 Inmo ghan inmo, bịn awe kiinmo aani ni inyinha. Bịdi kọto ni ịma ẹtoom dị ọviilhom, ophighemhi, kụ rezuughian ooku sịphe ạrusuoma phọ anyinha. Ịdi eḍighi bọ ọtoom mọ nyinha ẹtoom bọ rẹngo bụnhon kụ ẹdi kọtoom aani ịngo inyinha.”

39 Ọdi ạngo ni kẹn bịdi ọghaaph ọmaanhiom, mọ: “Oye dị rạ́miin ghan eten katue ni aḍiemhiom ọnhon oye dị rạ́miin ghan eten ḍụghum? Ịyal phọ ạbidi komeel li osuma epogh, kị́dipho? 40 Oye dị rọtughemhi* rápu ghan ọtughemhia phọ, kụolo tọrobo ọlo ọkuamhi ọtughemhi kạkigh ni ọtughemhia phọ ọdi. 41 Esi ịduon phọ, uḍighi ika kụ nạ rapogh ghan bọ ẹpherepe ịyaar phọ edi bọ ekpeḍien umor phọ ạna kụ nạ ọ́mhiin bọ ekpo oreeny phọ edi bọ ekpeḍien phọ ạna? 42 Uḍighi ika kụ nạ kạḅenhi bọ umor ạna mọ, ‘Umor ạmhi, kori mị ụsighe ẹpherepe ịyaar dị edi ekpeḍien ạna,’ mem dị nạ phọ r’aloor ụ́miin ekpo oreeny phọ edi bọ ekpeḍien phọ ạna? Oye ịyal arisigh! Pụr ạsighenhaan ekpo oreeny phọ edi bọ ekpeḍien phọ ạna, bịn nạ mạkuamhi ạmiin ịlo ọsighe ẹpherepe ịyaar phọ edi bọ ekpeḍien umor phọ ạna.

43 “Ogey oreeny rámuum ghan ịḅoria iimhumha, kụ ọḅoria oreeny rámuum ghan igey iimhumha. 44 Rọsighe ghan iimhumha phọ kụ olegheriom ọdo oreeny phọ. Esi ọmaam, awe rọ́ku ghan fig esi iitoor, ḅịlhe kẹn rọ́ku ghan grep esi oreeny dị ạmhoogh iitoor. 45 Ogey oye ramiteom ghan igey ạraraar sịphe igey aruphua ekpom mọ ọdi, kụolo ọkaraph oye ramiteom ghan ịkaraph ạraraar sịphe ịkaraph aruphua phọ ọdi; loor esi dị ịpe emuza bọ ekpom mọ kụ ẹdi ọnhu phọ rạkaaph ghan kamiteom.

46 “Uḍighi ika kụ nyinha rịmhagh ghan bọ ịmhi mọ ‘Uwo Ẹmhoogh! Uwo Ẹmhoogh!’ kụolo nyinha réḍighi ghan bọ ịlo mị ạghaaph? 47 Mị kiḍeenhaan inyinha oye dị tọrobo ọlo aru ụteeny ịmhi, kụ ạnhaghan ikpo ọnhu phọ ạmhi ạḅilhe ạdaph ạghigh: 48 Ọdi ạkigh oye dị rạlogh otu kụ aguph ạghi ude aphighi otu phọ ạnyu aḍighiigh. Kụ mem dị ọphiiny amuza, kụ aḍigho eḍigh, ạmuum aphum ni otu phọ kụolo órue ophighemhi, loor esi dị ụmhaar kụ ọlhogh otu phọ. 49 Ḍịeripho ạḍighaagh phọ, ọpo rạnaghan ghan bọ ikpo ọnhu phọ ạmhi kụ rạ́daph ghan bọ ạkigh oye dị ạlhogh otu ọdi oopho ade bịn kụ ụ́maar upighi. Ạmuum ọphiiny phọ aphum ni otu phọ, bịn amhelheghu eginha amem, kụ amuphe phọ ạbugh ni iboom.”