Ọdaphan Luk

7 A Jizọs rọghaaph rạraar phọ ọdi ạmhoogh bọ ọḅenhi awe phọ rọmhan, kụ aḍigh Kạpạnịọm. 2 Kụ uwo ẹmhu ạbuo ẹgham ạrol li ẹpe phọ dị ọony otu ọdi dị ọdi ạphomhoghian ạrol émoon dị ropogh ẹpughol ạmuum. 3 Ọdi rọnhaghan ịlo a Jizọs, kụ arom buniin ikumor awe ạbuo a Ju phọ mọ ọghi ọḅenhi nyọdi mọ aru aakonhom ọony otu phọ ọno. 4 Bịdi uru ni ọteeny Jizọs kụ omhiigh ọoḅereghian ọdi iboom mọ: “Ọdi ạkpeanhaan ni dị nạ kaḍighinhaan ịphen phọ, 5 ịdi eḍighi bọ ọdi ạpomoghian ni eelhe phọ ayira ḅịlhe ọdi kụ ạlhogh obughotu phọ ayoor.” 6 Kụ a Jizọs ạdaph ni bịdi. Kụolo mem dị bịdi ụ́kar mụn ụkelhan otu phọ, uwo ẹmhu ạbuo ẹgham mọ marom ni rịghiri ọdi mọ ọghi ọḅenhi nyọdi mọ: “Oye phọ, kạ́aḅaghamhian loor, mị ụ́kpeanhaan dị nạ katu k’ạmhi. 7 Kụ mị ụ́miin kẹn loor ạmhi ịdipho oye dị ạkpe oru ọteeny ạna. Kụolo ḅẹm ọnhu bịn ọony otu phọ ạmhi aḍum. 8 Loor esi dị mị odi aani ni ẹeḍian oye, kụ mị ạmoogh kẹn ni bụo ẹgham dị odi ẹeḍian ạmhi, kụ mị ạḅenhi nyoniin mọ, ‘Kịa!’ kạki ni, kụ mị ạḅenhi ọnhon mọ, ‘Tue!’ katu ni, kụ mị ạḅenhi ẹbenhe ạmhi mọ, ‘Ḍighi ịduon!’ kaḍighi ni.” 9 Iḍighi ni iikia esi a Jizọs mem mọ ạnhaghan bọ rạraar phọ ịphen phọ, kụ akiton asoman ḍita awe phọ rọdaph bọ nyọdi kụ ạḅem mọ: “Mị rịḅenhi ghan inyinha mọ, mị kọ̋mhiin oye ghạlhamo r’ịsien Izrẹl dị omheeraam alheeny ịduon.” 10 Kụ bụphe orom bọ dom mọ roḅula olhoghi otu, kụ ọmhiin dị ẹbenhe phọ mamhoon.

11 Íbia bịn ọdi ạghi ẹmha dị oghol mọ a Nein, kụ ạbumatuan phọ ọdi r’aḍiboom aḍita awe ụdaph ni nyọdi. 12 Ọdi ratuman ọnhu aḍibuo ẹmha phọ, kụ ạmhiin oye dị ọpham rọki oḍi, oginha ọony dị onhiin phọ ạmhar. Kụ ọnhiin phọ ekpukelhe ạnhir kẹn. Aḍita awe ẹmha phọ ụdaph aani ni ạnhir phọ. 13 Uwo Ẹmhoogh phọ ạmhiin bọ ạnhir phọ, ạmhoogh ni igbiririph ạghi esi ọdi, kụ ạḅenhi mọ: “Kámoghi mụn.” 14 Kụ ọdi arelhe ạghi ạḅogh ịyaar phọ ọmhunheeny bọ oye phọ, kụ bụphe ọpham bọ ọmheregha. Kụ ọdi ạḅem mọ: “Mọony phọ, mị rạḅenhi ghan nyịnha mọ, ḅetenhu!” 15 Kụ oye phọ amhugh bọ ạrol ude kụ amhiigh ọḅa, kụ a Jizọs ạḅogh nyọdi ạngo onhiin phọ. 16 Aruugu asiph ni oomo awe phọ, kụ omhiigh oghuenhi Ẹnhaan mọ: “Momiteom ogbogh oyil igbo ayira,” ḅịlhe mọ, “Ẹnhaan makiton apogh we phọ ọdi.” 17 Kụ ịinhaghan ịlo ịphen ọdi aḍighi bọ eelheghaany oomo a Judia r’oomo ạramha phọ ekoom bọ ẹpe phọ.

18 Kụ ạbumatuan phọ ạ Jọn ụḅenhi ni Jọn oomo ịphen phọ. 19 Kụ ạ Jọn ạmhagh ịyal ạbumatuan ọdi arom mọ ọghi opuru Uwo Ẹmhoogh phọ mọ: “Nạ kụ Ọpo Ratu bọ ni, ọbobo ọnhon oye ratu ni?” 20 Kụ awe phọ oru bọ ọteeny nyọdi, ụḅem mọ: “Ạ Jọn Oḍiinyeom Mụum mọ urom iyoor oru opuru ạna mọ, ‘Nạ kụ Ọpo Ratu bọ ni, ọbobo ọnhon oye ratu ni?’” 21 Mem mọ ọpo phọ ọdi aakonhom ni ịbadi awe dị úmoon, r’ạbudi ọmhoogh ịgbagara ạreezegh, ạḅilhe aphorogh ịkaraph aruwaloor amiteom loor ịbadi awe, kụ aḍighi ịdi ịbadi ạbudi rọ́miin ghan eten kọmiin eten. 22 Kụ ọdi ạphagharanhaan bịdi mọ: “Ịki ẹḅenhi Jọn ịphen nyinha mẹmhiin bọ ẹḅilhe ẹnhaghan: Awe dị ụ́miin ghan eten rọmiin, ḅịlhe bụdi oḍiku rạagha rotelhe, ạbuo ẹzegh ọku ufe mọḅaal, ḅịlhe ạbuḅaaghaph ḅạaghaph rọnaghan, roḅerion bụdi omhuughu, ḅịlhe rọkaaph iiḅi ịinhaghan phọ kọḅenhi rukulhom mọ. 23 Ọḅaal olhoghi odianhaan ni ọpo ụ́miin bọ ịyaar oghol okpetaan esi ạmhi.”

24 Ạbumatuan phọ ạ Jọn rọḅua, kụ a Jizọs amhiigh ọghaaph ịlo ạ Jọn ọḅenhi aḍita awe phọ mọ: “Nyinha ịghi ẹpe ẹdala phọ ọmhiin eeghe? Ikpu dị ookugh rạpiphoghom ḍụghum? 25 Nyinha ịkar ẹghi ọmhiin eeghe? Oye dị ạkpolhoghian ịma* ạrusuoma ḍụghum? Kụari bụphe rọkpolhoghian ghan bọ ịma ạrusuoma phọ ḅịlhe odi bọ dọl igbogh awe otughogh ruutu aruwo ẹmha. 26 Ịkar ẹghaaph, nyinha ịghi ọmhiin eeghe? Oyil ḍụghum? Ii, ọdi oyil li, kụ apu kẹn ni riil phọ. 27 Ọphon kụ ọdi ọge bọ ịlo ọdi mọ: ‘Mịin! Mị ratom otelhedom ạmhi oḍiemhi ghan* oseleminhaan ạna eten phọ ạna.’ 28 Mị rịḅenhi ghan inyinha mọ, oye ólho dị mọmhar ghan dị apu Jọn Ọdiinyeom Mụum mọ, kụolo oye lọ aḍighi ọbam ẹpe Ọmhar phọ Ẹnhaan apu ni nyọdi.” 29 (Mem mọ oomo awe phọ r’ạbubonyiom iisogh phọ ọnhaghan bọ ịphen phọ, ụḅem ni mọ Ẹnhaan oye elhiom eḍighinhom ịyaar, ịdi eḍighi bọ ạ Jọn kụ aḍiinye bịdi mụum. 30 Kụolo ạbuo ạ Fạrisi phọ r’ạbuphe olhegheri bọ Olhogh phọ agey ughel li ịiḅakiom mọ* Ẹnhaan, loor ịduon bịdi ụ́ki bọ mọ ạ Jọn aḍiinye bịdi mụum.)

31 “Esi ịduon phọ, mị kạtomaam we oghiil phọ ọphon phọ bụo ạnhian, bịdi ọkigh bụo ạnhian? 32 Ọkigh ịbam ạnmuny dị ọrol ude ḍighi kụ oniin rạmagh ghan nyoniin kạḅenhi mọ: ‘Yoor iphulhanhaan ni inyinha eeḍue phọ, kụolo nyinha ị́ker ịḅa; yoor omhoghi yogh, kụolo nyinha iyoor íḍighan imoghi.’ 33 Eniin phọ eten phọ, ạ Jọn Oḍiinyeom Mụum mọ atu, kụ ólhe ọphughol ịdipho ạbunhon awe, kụolo nyinha rẹḅem ghan mọ: ‘Ọkaraph uwaloor kụ odi loor ọdi.’ 34 Kụ Ọony phọ oye maru ale rạpughol, kụ nyinha rẹḅem ghan mọ: ‘Ịmiin! Oye egbogh eḍien r’ọpughol miim, ọyaghiri ạbubonyiom iisogh r’abuḍighinhom ịkaraph!’ 35 Tọrobo ịpe ẹrol bọ, oye raḍeenhaan ghan mọ ọdi ạsu ni olhoghi* esi iiḍighi phọ ọdi.”

36 Oniin ọnyo ạ Fạrisi ạḅenhi ghan ni Jizọs mọ aru k’ọno alhe eḍien. Kụ ọdi aḍigh ni k’ọnyo ạ Fạrisi phọ ạrol ịdaabili olhe eḍien phọ. 37 Kụ ạnhir dị olhegheri sịphe ẹmha phọ mọ oḍighinhom ịkaraph ạnhaghan ni mọ ọdi odi k’ọnyo ạ Fạrisi phọ rale ghan eḍien, kụ aru r’eeku ạlạbạstạ* dị elo ịma eḍu kụ edi. 38 Ạnhir phọ ạghi ọmhan a Jizọs ẹpe aruwol phọ ọdi edi bọ, kụ amhoghi ghan ạḅoreom ruwol a Jizọs izin phọ ọdi, kụ ạsighe sịlhaal ẹmhu phọ ọdi agbuuroghom. Ọdi amhiigha ni loor kẹn ạkpun ruwol phọ a Jizọs kụ ạsighe elo ịma eḍu phọ aaduom. 39 Ọnyo ạ Fạrisi phọ ạmhagh bọ nyọdi rọmhiin ịphen phọ kụ ạḅenhian loor mọ: “Mọ oye phọ ọphon phọ oyil li, ọbo mulegheri ni ọdo oye dị ạnhir phọ ọphon rạḅogh bọ nyọdi aru, mulegheri ni mọ oḍighinhom ịkaraph.” 40 Kụolo a Jizọs ạḅenhi nyọdi mọ: “Sạịmọn, ẹmoogh ni ịyaar dị mị rạwa ọḅenhi ạna.” Kụ ọdi mọ: “Ọtughemhia, kạaph!”

41 “Ịyal awe ulhe ni ọmhugh oniin otenheghiom ịimhugh; oniin alhe ọmhugh 500 a dinerạị,* kụ ọphoripho alhe ọmhugh 50 a dinerạị. 42 Kụ ịyal phọ ạbidi ụ́moogh ịyaar ọkpeom oye phọ, kụ oye phọ ạsar ạwilhenhaan bịdi oopho. Sịphe ịyal phọ ạbidi, ạnhian kụ kạpomoghian oye phọ apu?” 43 Kụ ạ Sạịmọn ạphagharanhaan mọ: “Mị ragbi mọ ọpo alhe bọ ogbogh ọmhugh phọ.” Kụ a Jizọs ạḅenhi nyọdi mọ: “Nạ ạpagharanhaan ni agey.” 44 Kụ ọdi akiton asoman ạnhir phọ kụ ạḅenhi Sạịmọn mọ: “Nạ ạmiin ni ạnhir phọ ọphon phọ? Mị aḍigh bọ k’ạna; nạ ịmhi ụ́ngo mụum ootolha aruwol ạmhi. Kụolo ạnhir phọ ọphon phọ ạḅoreom ruwol ạmhi izin ọdi kụ ạsighe sịlhaal ọdi agbuuroghom. 45 Nạ ịmhi ụ́kpun, kụolo k’amem mọ mị aḍigh bọ sịen, ạnhir phọ ọphon phọ ọ́wilhe omhiigha aloor ọkpun ghan aruwol phọ ạmhi. 46 Nạ óoduom ẹmhu ạmhi elo, kụolo ạnhir phọ ọphon phọ aaduom ruwol ạmhi elo ịma eḍu. 47 Esi ịduon phọ, mị rạḅenhi ghan nyịnha mọ ghạlhamo r’ịduon ịkaraph phọ ọdi ẹbugh bọ ni, mọsar ọbilhenhaan nyọdi, loor esi dị ọdi aḍeenhaan eboom ẹphomhoghian. Kụolo ọpo ọsar bọ ọwilhenhaan ịbam, raḍeenhaan ghan ẹeny ẹphomhoghian.” 48 Kụ ọdi ạḅenhi ạnhir phọ mọ: “Mọsar ịkaraph ạna ọwilhenhaan nyịnha.” 49 Kụ bụphe r’ọdi rolean bọ omhiigh ọghaaph sịphe igbo phọ ạbidi mọ: “Ọphon phọ ọghen ọdo oye dị ạsar ịkaraph awe rạbilhenhaan ghan kẹn?” 50 Kụolo ọdi ạḅenhi ạnhir phọ mọ: “Omheeraam mọ ạna mạphel nyịnha; keel r’ẹepho.”