Ọdaphan Ịpe ạ Mạtiu Ạge Bọ
7 “Kéegbonhaan ghan mụn bụnhon ịiruen ọbo kiigbonhaan aani ghan bọ inyinha ịiruen; 2 Loor esi dị ịiruen phọ nyinha eegbonhaan bọ bụnhon, kụ ịdi kiigbonhaan aani inyinha, ḅịlhe ọtoom mọ nyinha ẹtoom bọ ẹngo bụnhon kụ ẹdi kọtoom aani ịngo inyinha. 3 Esi ịduon phọ, uḍighi ika kụ nạ rapogh ghan bọ ẹpherepe ịyaar phọ edi bọ ekpeḍien umor phọ ạna kụ nạ ọ́mhiin bọ ekpo oreeny phọ edi bọ ekpeḍien phọ ạna? 4 Ọbobo uḍighi ika kụ nạ kạḅenhi bọ umor ạna mọ, ‘Kori mị ụsighe ẹpherepe ịyaar dị edi ekpeḍien ạna,’ mem dị ekpo oreeny kụ edi ekpeḍien ẹlo ạna? 5 Oye ịyal arisigh! Pụr ạsighenhaan ekpo oreeny phọ edi bọ ekpeḍien phọ ạna, bịn nạ mạkuamhi ạmiin ịlo ọsighe ẹpherepe ịyaar phọ edi bọ ekpeḍien umor phọ ạna.
6 “Kẹ́ngo suogh rạraar dị eḍighi ịlo iigbia ḅịlhe kẹ́ngo rophoropo ikpo ẹbe anyinha ọbo bịdi kẹezeghi ghan bọ ẹḅilhe ekitonhaan izuoghom inyinha.
7 “Ịlom ghan, bịn kịngo ni inyinha; ịwa ghan, bịn nyinha kẹmiin ni; ikar ghan, bịn kighughuronhaan ni inyinha; 8 Ịdi eḍighi bọ tọrobo oye lọ ạlhom ghan kọngo ni, kụ tọrobo oye lọ ạwa ghan kạmiin ni, ḅịlhe tọrobo oye lọ akar ghan kokughuronhaan ni. 9 Ọkar ọghaaph, ọghen ọnyo anyinha, kụ ẹdi ọony ọdi kạlom ạ brẹd kụ ạngo ḍighiigh? 10 Ọbobo kạlom ena kụ ạngo ẹkaraph ịyaar? 11 Esi ịduon phọ, eru mạar dị nyinha phọ eḍighi bọ bụkaraph awe rẹngo ghan ni nmụny anyinha igey ạraraar, pọ Ọde phọ anyinha odi bọ ẹpe k’ạke phọ kạngo ni igey ạraraar bụphe rọlom bọ nyọdi!
12 “Esi ịduon phọ, iḍighinhaan ghan we tọrobo ịyaar lọ nyinha rẹwa mọ bịdi iḍighinhaan inyinha. Ọkar agey, ẹphen kụ ẹmhu Olhogh phọ r’ịge Ariil phọ.
13 “Iten ọnhu aḍibuo phọ ọpo aghom bọ kụ eḍigh, loor esi dị ọnhu aḍibuo phọ ọpo ạbugh bọ kụ eten phọ ẹregh bọ etorori rẹkiom muphe, kụ ịbadi kụ rotelhe; 14 kụolo ọnhu aḍibuo phọ ọpo aghom bọ kụ eten phọ ẹkolholho bọ etorori rẹkiom ghuḍum, kụ iphurukpu awe kụ rọmiin.
15 “Igona loor anyinha esi ariil ọkpe phọ rotu ghan bọ esi anyinha kọzo mụdi bịdi iyool ịga ạnyu r’ạnyu, kụolo ẹpe olhoghi phọ bidị oḍighi reephe ạno dị ọkoony rasiph. 16 Esi iimhumha phọ ạbidi kụ ẹdi nyinha kelegheriom bịdi. Awe rọku ghan ni ḍịen grep ra fig esi oreeny dị ạmhoogh iitoor? 17 Iginha phọ kẹn, ogey oreeny ramuum ghan igey iimhumha, kụ ọḅoria oreeny ramuum ghan ịḅoria iimhumha. 18 Ogey oreeny kátue amuum ịḅoria iimhumha, kụ ọḅoria oreeny kátue amuum igey iimhumha. 19 Roler ghan ni tọrobo oreeny dị rámuum igey iimhumha koguom nịan. 20 Ọkar agey, esi iimhumha phọ ạbidi kụ ẹdi nyinha kelegheriom we phọ ạbuen phọ.
21 “Kóomo awe dị rụmhagh ghan ịmhi mọ, ‘Uwo Ẹmhoogh, Uwo Ẹmhoogh’ kụ koḍigh Ọmhar k’ạke phọ, kụolo oginha ọpo raḍighi ghan bọ ogbi Ọde phọ ạmhi odi bọ k’ạke kụ kaḍigh. 22 Ịbadi kụḅenhi ni ịmhi ḍio phọ ạḍiphe phọ mọ: ‘Uwo Ẹmhoogh, Uwo Ẹmhoogh’ yoor úkol ḍịen ḍien phọ ạna ụmiin ịmiin, ụ́ḅilhe ukol ḍien phọ ạna uporogh ịkaraph aruwaloor, ụ́ḅilhe ukol ḍien phọ ạna uḍighi ịbadi ịiḍaany? 23 Kụ mị kạḅenhi ni bịdi mọ: ‘Kekulha mị inyinha ki̋lhegheri ghan! Ịḍua sịen ghisigh ạmhi, busoroghuom iilhogh!’
24 “Esi ịduon phọ, tọrobo oye lọ ạnhaghan ikpo ọnhu phọ ạmhi ịphen phọ kụ ạdaph kạkigh oye ọsu olhoghi dị ạlhogh otu ọdi ạnyu aḍighiigh. 25 Kụ ọlophia ạlhoph, aḍigho eḍigh, ḅịlhe oghim aghim aphum otu phọ, kụolo ómheel ịdi eḍighi bọ opighi ạnyu aḍighiigh. 26 Ọḅaram ịsien, tọrobo oye lọ ạnhaghan ikpo ọnhu phọ ạmhi ịphen phọ kụ ụ́daph kạkigh uwo elologhi dị ạlhogh otu ọdi ạnyu ịisaar. 27 Kụ ọlophia ạlhoph, aḍigho eḍigh, ḅịlhe oghim aghim aphum otu phọ, bịn amhelheghu, kụ amuphe phọ ạbugh ni iboom.”
28 A Jizọs ạghaaph bọ ịphen phọ ạmhan, eten ịtughemhi phọ ọdi iḍighi ni iikia esi aḍita awe phọ, 29 loor esi dị ọdi ạtughemhi ghan bịdi ịdipho oye dị ạmhoogh ịikpo, kị́dipho ạbutughemhia Olhogh phọ ạbidi.