Ọdaphan Ịpe ạ Mạk Ạge Bọ

6 Ọdi ạḅua ni ẹpe phọ ạghi ẹmha ọdi, kụ ạbumatuan phọ odị ọdaph nyọdi. 2 Rẹteeny Ḍio Ophooghian phọ, kụ ọdi amhiigh ọtughemhi ịsiphe obughotu phọ, kụ iḍighi ni iikia esi ogbogh opol ạbuphe ọnhaghan bọ ịtughemhi phọ ọdi kụ ọḅem ghan mọ: “Oye phọ ọphon phọ ạghi ẹghen kụ ạmhoogh bọ rạraar phọ ịphen phọ? Kụ uḍighi ika kụ ọngo bọ nyọdi ọdo ọsu olhoghi phọ ọphon phọ, r’ịikpo oḍighinhom ịiḍaany phọ ịphen phọ? 3 Ọphon phọ ọkaam ạmaka phọ, ọony phọ a Meri, umor phọ a Jems, ra Josef, ra Judas, rạ Sạịmọn, kị́dipho? Kụ oomo abumaranhi phọ ọdi odi ni ẹphen r’ayira, kị́dipho?” Kụ ịphen phọ iḍighi ni ịdi bịdi ụ́moogh omheeraam ụki esi ọdi.* 4 Kụolo a Jizọs ạḅenhi bịdi mọ: “Oyil rakuan ghan ni ịnhon arikpisi emuton sịphe ẹmha phọ ọdi r’igbo asiya ọdi r’ịsiphe olhoghi otu phọ ọdi.” 5 Esi ịduon phọ, ọdi óḍighi ịnhon ịiḍaany ẹpe phọ emuton ọḅamham ạraghaagh ịyal ikpo awe dị úmoon ookonhom ạbidi. 6 Ẹ́moogh omheeraam mọ ạbidi ịkar kụ eḍighi iikia esi ọdi. Kụ ọdi arelhe yogh ni rạmha phọ edi bọ ẹpe phọ, ạtughemhi ghan we phọ.

7 Ọdi aakpomhoghi ni Ḍioph r’ Ịyal phọ, adi bịdi ịyal yạl kụ arom mọ ọghi ogbeelhom dom mọ Ẹnhaan, kụ ạngo bịdi ịikpo ophoroghom ịkaraph aruwaloor. 8 Kụ ọdi ạḅilhe ạḅenhi bịdi mọ ọpham ịkpara bịn kụ ọghimhom erelhe phọ, mọ kụ́pam ạ brẹd, ọbobo okuru eḍien, ḅịlhe mọ kụ́logh ikpoki* sịphe okuru ikpoki phọ ạbidi. 9 Kụ ọdi ạḅenhi ni kẹn bịdi mọ ọlhogha ni rokoro kụolo kụ́kpolhoghian ịyal ạrusuoma.* 10 Kụ ọdi ạḅilhe ạḅenhi bịdi mọ: “Tọrobo ekpisi lọ nyinha ẹghi, ịtol otu lọ nyinha eḍigh tụtu nyinha ẹḍua ẹpe phọ. 11 Kụ tọrobo esi dị inyinha ị́sighe ọbobo ụ́naghan dom mọ anyinha, ịikpa ịisaar aruwol phọ anyinha mem dị nyinha emite, pịdi bịdi olegheri mọ mọphur ri bịdi rụru.” 12 Kụ bịdi ọghi ogbeelhom ghan mọ awe okiton, 13 kụ ophorogh ịbadi ịkaraph aruwaloor ọḅilhe ogbul elo ịbadi awe dị úmoon ookonhom yogh.

14 Uwo Ẹmha phọ Hẹrọd ạnhaghan ni ịphen phọ, loor esi dị aḍien a Jizọs meelheghaany, kụ awe rọḅem ghan mọ: “Moḅeton Jọn Oḍiinyeom Mụum mọ esi aḍuugh, pọ kụ ịyaar phọ ạmhoogh bọ ịikpo oḍighinhom ịiḍaany phọ ịphen phọ.” 15 Kụolo bụnhon ụḅem ghan mọ: “Ọdi Ẹlạịjạ.” Kụ buniin ọḅem ghan mọ: “Ọdi aḍighi aani oyil ịdipho ariil iḍiodi phọ.” 16 Kụolo ạ Hẹrọd ạnhaghan bọ ịphen phọ ạḅem mọ: “Ạ Jọn phọ mị asoph bọ ẹmhu phọ maḅetenhu esi aḍuugh.” 17 Ịdi eḍighi bọ ẹpe ọmhan, ạ Hẹrọd arom ni mọ osiph Jọn ọlhogh ikoli loor ạ Hẹrodiạs ạnhir phọ a Filip umor phọ ọdi. Loor esi dị ọdi aphin ạnhir phọ, 18 kụ ạ Jọn ạḅenhi ghan nyọdi mọ: “Ị́kpeanhaan dị nạ kapin ạnhir umor phọ ạna.” 19 Loor ịduon phọ ạ Hẹrodiạs ạghagham ni olhoghi Jọn kụ ạwa ghan oghiigh ọdi, kụolo órue. 20 Ạ Hẹrọd aghiilhaan ghan Jọn, loor esi dị alhegheri ni mọ oye elhiom eḍighinhom ịyaar r’oye aruukuan, kụ aghoph ghan nyọdi. Tọrobo amem dị ọdi ạnhaghan ịpe ạ Jọn rạkaaph bọ, ọdi ólhegheri ghan ịlo oḍighi, kụolo ạghiom ghan ni ghisigh ạnhaghan r’ọḅaal olhoghi.

21 Eepoogh ịrolhonhaan ni ạ Hẹrodiạs ḍio dị ạ Hẹrọd rale ẹyaal ạḍio phọ ọmhar bọ nyọdi kụ aakolhobian eḍien adulhe, ạamhaghagh we dị ọpham igbogh ariisi r’abuḍiemhiom ạbuo ẹgham r’igbogh awe phọ ạ Gạlili. 22 Kụ ọnyanhi ạ Hẹrodiạs aru aḍigh ạgher ịḅa, kụ ẹḅeraan Hẹrọd r’ạbuphe rolean bọ r’ọdi. Kụ uwo ẹmha phọ ạḅenhi ọnyanhi phọ mọ: “Ụḅenhi ịmhi tọrobo ịyaar lọ nạ rạwa bịn mị kạngo ni nyịnha.” 23 Ọdi aghunya kẹn ni mọ: “Tọrobo ịyaar dị nạ ụḅenhi ịmhi, mị kạngo ni nyịnha, ghạlhamo r’egbem ọmhar phọ ạmhi.” 24 Kụ ọdi amite ạghi apuru onhiin phọ ọdi mọ: “Mị ụḅenhi mọ ụngo ịmhi eeghe?” Kụ onhiin phọ mọ: “Ḅẹnhi mọ ạngo nyịnha ẹmhu ạ Jọn Oḍiinyeom Mụum mọ.” 25 Eginha amem bịn ọdi aagborion ạghi ạteeny uwo ẹmha phọ ạḅenhi ịyaar phọ ọdi rạwa bọ, mọ: “Mị rạwa mọ lọgh ẹmhu ạ Jọn Oḍiinyeom Mụum mọ ẹtelhelheeny ụngo ịmhi nyịidipho.” 26 Ghạlhamo r’ịduon ịphen phọ ị́ḅeraan bọ uwo ẹmha phọ, ọdi amheera ni oḍighi ịpe ọnyanhi phọ ạghaaph bọ, loor iikunya phọ ọdi aghunya bọ ghisigh aruuruen phọ ọdi.* 27 Mem mem mọ bịn uwo ẹmha phọ arom ni ọnyo ẹgham ọdi mọ ạghi ạsighe aru ẹmhu ạ Jọn. Kụ ọnyo ẹgham mọ ạghi ẹpe otu ikoli phọ asoph ẹmhu phọ 28 ạlhogh ẹtelhelheeny ạsighe aru. Kụ ạngo ọnyanhi phọ, kụ ọnyanhi phọ ạsighe ạghi ạngo onhiin phọ ọdi. 29 Ạbumatuan phọ ạ Jọn rọnhaghan ịphen phọ kụ oru ọsighe ḍizu phọ ọdi oghi oḍi.

30 Abutelhedom mọ uukpomhoghan ni kụ ọḅenhi Jizọs oomo ạraraar phọ bịdi oḍighi bọ ọḅilhe ọtughemhi. 31 Kụ ọdi ạḅenhi bịdi mọ: “Itu ọghi ekpisi dị awe úlo ephooghian ẹnum.” Loor esi dị mem mọ ọpo phọ buniin rotu buniin rokeel, kụ bịdi ụ́moogh r’amem olhe eḍien. 32 Esi ịduon phọ bịdi uḍigh ni oghuugh onyeenhe ekpisi dị awe úlo. 33 Kụolo awe ụmhiin ni dị bịdi rọki kụ ịbadi oru olhegheri, kụ ọḅua oomo ạramha phọ oogborion orelhe owol ade ọphur bịdi osi ẹpe phọ. 34 Ọdi rọḅua sịphe oghuugh phọ rosoor, kụ ạmhiin ḍiboom aḍita awe, kụ ạmhoogh igbiririph ạghi esi ạbidi, loor esi dị bịdi ụghigh iyool ịga dị opoghom úlo. Kụ ọdi amhiigh ọtughemhi ạbidi ịbadi ạraraar.

35 Ạbumatuan phọ ọdi uru ni ọteeny nyọdi mem dị amem mẹghi, kụ ọḅem mọ: “Awe úlo ẹphen phọ, kụ amem mẹghi kẹn. 36 Ḅẹnhi mọ bịdi oghelheghu, pịdi bịdi ọki ẹpe ạsiraaghanha phọ r’ạramha phọ etuman bọ sịen oko ịyaar ole.” 37 Kụ ọdi ạḅenhi bịdi mọ: “Ịngo bịdi ịyaar olhe.” Kụ bịdi opuru nyọdi mọ “Yoor ụki uko ạ brẹd 200 a dinerạị* ụngo awe phọ olhe ḍụghum?” 38 Kụ ọdi apuru bịdi mọ: “Ika iiḅoghoḍi ạ brẹd nyinha ẹpham bọ? Ịki ephogh!” Bịdi rọghi ophogh, kụ ọḅenhi nyọdi mọ: “Oogh ịne r’ịyal ina.” 39 Kụ ọdi ạḅenhi oomo awe phọ mọ ọrolhoghu ude rugu sịphe ạtugbiir ạroogho phọ. 40 Kụ bịdi ọrolhoghu ude rugu 100 r’arugu 50. 41 Kụ ọdi ạsighe oogh iiḅoghoḍi ạ brẹd phọ r’ịyal ina phọ, aphogh ẹpe k’ạke ạaḅereghi.* Kụ ọdi ạparion ạ brẹd phọ kụ ạḅogh ạngo bụmatuan phọ ọdi ọngo awe phọ, kụ ạḅilhe adi ina phọ oomo ạbidi. 42 Kụ oomo ạbidi olhe ẹpherogh, 43 kụ ạbumatuan phọ ọson ipoḍi phọ ịpe esugha bọ, kụ emuza 12 ạrigiel, dị ina phọ ụ́ḅaram. 44 Awe phọ olhe bọ ạ brẹd phọ ụmhan 5,000 alhephiri ạnmuny.

45 Ịpe reten, íbia bịn a Jizọs ạḅenhi bụmatuan phọ ọdi mọ oḍigh oghuugh oḍia ghan ọphoripho ạga ọphiiny ạbazi phọ atuman bọ Bẹtseidạ. Ịduon bịdi rọḍua bọ kụ ọdi ạḅenhi ḍita awe phọ mọ oghelheghu. 46 Ọdi rọḅenhi we phọ mọ ọmhaar ọrol, kụ ạsiiny ạnyu ẹeḅaraph ọoḅereghi. 47 Aḍughul reghul, mem dị oghuugh phọ odi ogbo ọphiiny ạbazi phọ, oginha ọdi kụ ạrol ạnyu ade. 48 Ọdi rọmhiin dị bịdi rọkparagha ọzoghi loor oghim mọ ạda bọ bịdi, kụ arelhe ạnyu ạmuum mọ aru ọteeny ạbidi eḅon ạḍiroor mem dị ke̋kpoghoronhu;* kụolo aḍighi mụdi ọdi rạḅeeny ni. 49 Kụ bịdi ọmhiin bọ dị ọdi ratelhe ạnyu ạmuum mọ, ụḅem mọ: “Ọphon phọ uwaloor!” Kụ bịdi ọlooghi. 50 Loor esi dị aruugu asiph ni oomo ạbidi mem mọ ọmhiin bọ nyọdi. Kụolo mem mem mọ bịn ọdi ạḅenhi ni bịdi mọ: “Ịkpo oḅio! Mị ni; kékiilhaan.” 51 Ọdi roḍigh aani sịphe oghuugh phọ, bịn oghim mọ ạpho. Ịphen phọ ịkar kụ eḍighi iikia esi ạbidi, 52 loor esi dị bịdi kọ̋nhaghanhan ịyaar phọ ạ brẹd phọ ọdi adi bọ rẹma ghan bọ, ịkparanhaan ni bịdi ọnhaghanhan sịphe ilhoghi phọ ạbidi.

53 Bịdi rọḅeeny ọphoripho ạga ọphiiny ạbazi phọ, kụ osul Gẹnẹsạrẹt ọkpo oghuugh phọ. 54 Kụ bịdi rọḅua sịphe oghuugh phọ rosoor bịn awe ọlhogh nyọdi elhegh. 55 Kụ awe phọ oghilhighuan oomo ạramha phọ ọsighe we dị úmoon ọmhunheeny rịmhinha oruom nyọdi ẹpe bịdi ọnhaghan bọ mọ ọdi odi. 56 Kụ tọrobo ekpisi lọ ọdi ạghi, mọ ẹbam ẹmha, mọ egbogh ẹmha, mọ ạraaghanha, awe ụsighe ghan ni bụlo úmoon ọghi ẹpe aḍighi phọ, kụ ọoḅereghian ghan nyọdi mọ bụno ọḅogh aani ịghelhe ạsuoma ạnyu phọ ọdi. Kụ oomo ạbuphe ọḅogh bọ omhoonhogh.