Ọdaphan Luk

5 Eniin aḍio dị a Jizọs ạmheera oogbom ọodu phọ ạ Gẹnẹsạrẹt,* aḍita awe phọ unyuughian ghan ni ọtiir nyọdi pịdi ọnaghan ekpo ọnhu phọ Ẹnhaan. 2 Kụ ọdi ạmhiin ịyal arughuugh dị edi oogbom ọodu phọ, kụolo ạbukoniom ạkoni phọ mọḅua pạ oghuugh phọ osoroghu rootol ghan ịzuguru ạbidi. 3 Kụ ọdi ạghi aḍigh oniin oghuugh phọ, ọpo ạ Sạịmọn, kụ ạḅenhi mọ ạzoghi ẹnum ạḍua sịphe oogbom ọodu phọ. Kụ ọdi ạrol ude pạ oghuugh phọ amhiigh ọtughemhi aḍita awe phọ. 4 Ọdi rọmhan ọḅaanhaan aḍita awe phọ kụ ạḅenhi Sạịmọn mọ: “Ịzoghi ọghi esi dị ạmuum mọ ạbugh kụ ezu ịzuguru phọ anyinha.” 5 Kụ ạ Sạịmọn ạphagharanhaan nyọdi mọ: “Ọtughemhia, yoor ụkoni ni oomo aḍughul phọ kụ yoor ụ́teeny ịyaar, kụolo nạ mạḅem bọ pọ mị kazu ni ịzuguru phọ.” 6 Kụ bịdi oḍighi bọ ịduon phọ, ụteeny ni iboom ina dị tụtu ịzuguru phọ ạbidi emhiigh ọphanyuan. 7 Kụ bịdi ọyapha bụphe r’ạbidi rọkoni bọ ạkoni phọ odi bọ ọphoripho oghuugh phọ mọ oru ọlhoghonhaan bụno ḍịghaagh, kụ bịdi oru bọ umuzeḍi ni ịyal phọ arughuugh phọ ina dị tụtu arughuugh phọ emhiigh oḅi. 8 Ạ Sạịmọn Pita rọmhiin ịphen phọ, kụ akpuḍian ghisigh a Jizọs kụ ạḅem mọ: “Imhị kútuman Uwo Ẹmhoogh, loor esi dị mị oḍighinhom ịkaraph.” 9 Ịdi eḍighi bọ iḍighi ni iikia iboom esi ọdi r’ạbuphe odi bọ r’ọdi ọmhiin ina phọ bịdi ọteeny bọ, 10 kụ ịpe kụ ịdi ẹrol aani esi a Jems rạ Jọn ạnmuny phọ ạ Zẹbẹdi, ạ Sạịmọn r’ạbidi ọḅoph ghan bọ okumuan. Kụolo a Jizọs ạḅenhi Sạịmọn mọ: “Kákiilhaan mụn. Emhiigh nyịidipho kụ rẹki nạ kạkoni ghan ạkoni awe.” 11 Kụ bịdi osul rughuugh phọ kụ ọwilhe oomo ạraraar phọ ọdaph nyọdi.

12 Ẹnhon aḍio dị a Jizọs odi eniin ẹmha, oye dị ẹzegh ọku ufe melheeny loor phọ ạrol li ẹpe phọ, kụ rọmhiin Jizọs kụ amheel aḅolholho ạaḅereghian mọ: “Uwo Ẹmhoogh, lọ nạ rạwa ni, pọ nạ katue ni aḍighi ịdi mị kạḅaal.” 13 Kụ a Jizọs ạgbuton ḍịghaagh ạḅogh nyọdi, kụ ạḅem mọ: “Mị rạwa ni! Ḅạal.” Mem mem mọ bịn ẹzegh ọku ufe phọ ẹḅua loor ọdi. 14 Kụ a Jizọs ạphur nyọdi rụru mọ kụ́ḅenhi oye. Kụolo ạḅenhi mọ: “Kịa aḍeenhaan loor ạna ọpinyon rịkia phọ ạḅilhe ạngo inmo phọ olhogh phọ a Mozis ạḅem bọ mọ oye dị ạmhoogh ghan ẹzegh ọku ufe kụ mạḅaal ạngo ghan, pịdi eḍeenhaan bịdi mọ nạ mamhoon.” 15 Kụ ịinhaghan ịlo ọdi eelheghaany ghan bịn, kụ aḍiboom aḍita awe ookpomhoghan ghan ọnhaghan ịtughemhi phọ ọdi r’ọmhoogh eekonhom esi ạreezegh ạbidi. 16 Ghạlhamo r’ịduon phọ ni bịn, ọdi agbor ghan ni ạghi rikpisi dị awe úlo ạaḅereghi.

17 Eniin aḍio dị ọdi odi rạtughemhi, ạbuo ạ Fạrisi r’ạbutughemhia Olhogh phọ dị ọḅua oomo ạramha phọ ạ Gạlili ra Judia ra Jeruselem kụ oru ụrol aani ni sịphe phọ; kụ a Jehova* ạngo ni nyọdi ịikpo ookonhomhom awe. 18 Kụ awe ụpham ni oye dị ariisi aloor emhuughu dị ọmhunheeny ẹmhinha orumhom, kụ ọkparagha ghan oḍighom ọmhunheeny aghisigh a Jizọs. 19 Kụ loor ịduon bịdi ụ́miin bọ eepoogh oḍighom ọdi loor esi aḍita awe phọ, bịdi ụsiiny ni ạnyu otu phọ, ogbonyon eniin esi kụ omhiigha loor osoore ẹmhinha phọ oye phọ ạmhinha bọ sịphe igbo awe phọ ghisigh a Jizọs. 20 Ọdi rọmhiin omheeraam mọ ạbidi, kụ ạḅem mọ: “Oye phọ, mọsar ịkaraph ạna ọwilhenhaan nyịnha.” 21 Kụ ạbutughemhia Olhogh phọ r’ạbuo ạ Fạrisi phọ omhiigh ọotughian ịsiphe ilhoghi phọ ạbidi kụ ọḅem ghan mọ: “Ọphon rạapu bọ ḍien Ẹnhaan ịduon phọ ạnhian? Ạnhian kụ katue ạsar ịkaraph ạbilhenhaan emuton Ẹnhaan?” 22 Kụolo a Jizọs alhegheri ni ịpe bịdi rọotughian bọ, kụ apuru bịdi mọ: “Nyinha rẹetughian ghan eeghe sịphe ilhoghi phọ anyinha? 23 Sịen ọḅem mọ, ‘Mọsar ịkaraph ạna ọwilhenhaan nyịnha,’ r’ọḅem mọ, ‘Ḅetenhu arelhe,’ ẹghen kụ idugh epu? 24 Kụolo pịdi nyinha elhegheri mọ Ọony phọ oye ạmoogh ni ịikpo sịen ade phọ ọsar ọwilhenhaan ịkaraph—” kụ ọdi ạḅenhi oye phọ ariisi aloor phọ emhuughu bọ mọ: “Mị rạḅenhi ghan nyịnha mọ, Ḅetenhu, ạsighe ẹmhinha phọ ạna, agheel k’ạna.” 25 Kụ ọdi aḅetenhu ghisigh ạbidi, ạsighe ịyaar phọ ọdi ạmhinhanham ghan bọ, kụ agheel k’ọdi, aghuenhi ghan Ẹnhaan. 26 Ịphen phọ iḍighi ni iikia esi ạtorobo ọnyo ạbidi kụ omhiigh oghuenhi Ẹnhaan, kụ loor ịduon eḍigh bọ ḍiigu esi ạbidi, ụḅem ghan mọ: “Yira mọmhiin ịikia ạraraar rodon phọ!”

27 Ịphen phọ reten, kụ ọdi amite kụ ạmhiin ọbonyiom iisogh dị oghol mọ a Livạị dị ạrol ude sịphe otu oḍighi ạbubonyiom iisogh phọ, kụ ạḅenhi mọ: “Tue aḍighi ọnyo ạmatuan ạmhi.” 28 Kụ ọdi aḅetenhu ạwilhe oomo ạraraar phọ amhiigh ọdaph ọdi. 29 A Livạị aakolhobinhaan ni nyọdi mugbogh amale olhoghi otu ọdi, kụ aḍiboom aḍita ạbubonyiom iisogh r’ạbunhon awe ụrol li sịphe phọ olhean ghan bịdi. 30 Esi ịduon phọ ạbuo ạ Fạrisi phọ r’abuniin ạbuo ẹkpigh phọ ạbidi dị oḍighi bụtughemhia Olhogh phọ umhiigh ni ogum, kụ opuru bụmatuan phọ ọdi mọ: “Uḍighi ika kụ nyinha relean ghan bọ kẹḅilhe ẹphughol r’ạbubonyiom iisogh r’abuḍighinhom ịkaraph?” 31 Kụ a Jizọs ạḅenhi bịdi mọ: “Awe dị úmoon kụ umhoghi oyil, kạ́bulo omhoon. 32 Mị uru ọmhagh abuḍighinhom ịkaraph pịdi okiton, kạ́buo elhiom eḍighinhom ịyaar.”

33 Kụ bịdi ọḅenhi nyọdi mọ: “Ạbumatuan phọ ạ Jọn rogbor ghan ni kọkaagh ẹḍogh kọḅilhe ọoḅereghi r’oomo ekpom, kụ ịdipho kẹn kụ ịdi ạbumatuan ạ Fạrisi phọ roḍighi ghan, kụolo ạbuen ạna role ghan ni kọphughol.” 34 Kụ a Jizọs ạḅenhi bịdi mọ: “Nyinha ketue ni ẹḅenhi rịghiri oye dị rapin ạnhir mọ ọkaagh ẹḍogh mem dị oye phọ odi r’ạbidi ḍụghum? 35 Kụolo amem retu ni dị kọsighe oye phọ rapin bọ ạnhir phọ igbo ạbidi; pọ kụ amem dị bịdi kọkaagh ẹḍogh.”

36 Ọdi ạngo ni kẹn bịdi ọghaaph ọmaanhiom, mọ: “Oye ólho dị kasoph ọpherepe omhoom ukpe kụ ạkolhom ogbaany ukpe dị mạphaaru. Ọdi aḍighi ịduon phọ, pọ omhoom ukpe phọ kạpaaru ni ạḍua kụ ọpherepe omhoom ukpe phọ r’ogbaany ukpe phọ kéḍighi nyoniin. 37 Ḅịlhe kẹn, oye ólho dị kạsighe mumhoom amiim ạlogh ogbaany okuru amiim dị oḍighinhom ozu ẹnham. Ọdi aḍighi ịduon phọ, pọ amumhoom amiim mọ kạpaar ri okuru phọ kụ amiim mọ azuan, kụ okuru phọ kạ́moogh mụn mạar oḍighinhom. 38 Rọlogh ghan ghụn mumhoom amiim omhoom okuru amiim. 39 Oye ólho dị kạpughol mugbaany amiim kụ ạwa mumhoom, loor esi dị oye phọ rạḅem ghan mọ, ‘Amugbaany phọ ạnighe ni.’”