Ọdaphan Luk
4 Uwaloor iigbia phọ amuza ni loor a Jizọs, kụ ọdi ạḅua ẹpe Ọphiiny ạ Jọdạn, kụ uwaloor phọ arelheom ghan nyọdi ẹpe ẹdala phọ 2 esi 40 aḍughul otu, kụ Eru phọ ạdegh nyọdi aphogh. Kụ ọdi ólhe ghan ịyaar, esi ịduon phọ mem mọ asiḍughul otu phọ ịpe phọ esi bọ eekunha, ọkoony asiph ni nyọdi. 3 Kụ Eru phọ ạḅenhi nyọdi mọ: “Mọ nạ ọony Ẹnhaan ni, pọ ḅẹnhi ḍighiigh phọ ạḍien phọ mọ eten eeḅoghoḍi ạ brẹd.” 4 Kụ a Jizọs ạphagharanhaan nyọdi mọ: “Ọge ni sịphe Ịge Iigbia phọ mọ, ‘Eḍien* bịn kétue ẹngo oye ghuḍum.’”
5 Kụ Eru phọ ạsighe nyọdi ạsiinye ẹeḅaraph, kụ esi ekulha amem aḍeenhaan nyọdi oomo ịtooghi aḅirinhi phọ. 6 Kụ Eru phọ ạḅenhi nyọdi mọ: “Mị kạngo nyịnha oomo ịikpo phọ ịphen phọ r’igbogh phọ ạbidi, loor esi dị mọḅogh ụngo ịmhi, kụ tọrobo oye lọ mị rạwa ọngo kụ ẹdi mị rạngo ghan. 7 Esi ịduon phọ, eḍighi mạar dị nạ akpuḍian mem bịn uuseeny ịmhi, pọ oomo ịphen phọ keḍighi ịlo ạna.” 8 Kụ a Jizọs ạphagharanhaan nyọdi mọ: “Ọge ni sịphe Ịge Iigbia phọ mọ, ‘A Jehova* Ẹnhaan phọ ạna kụ ẹdi nạ kaaseeny, ọdi bịn kụ ẹdi nạ kakumuan ghan rukumuan iigbia ạngo.’”
9 Kụ Eru phọ ạsighe nyọdi ạghimhom Jeruselem, kụ ạmheremhi nyọdi ẹpe eekunha ạnyu otu ịiḅereghi phọ kụ ạḅenhi nyọdi mọ: “Mọ nạ ọony Ẹnhaan ni, pọ pel sịen phọ akuruph, 10 ịdi eḍighi bọ ọge ni sịphe Ịge Iigbia phọ mọ, ‘Ọdi kakol li ẹmhu ạna ạngo ịto rụukpaany phọ ọdi oghoph ạna,’ 11 ḅịlhe mọ, ‘Bịdi kokoph ni nyịnha, ọbo nạ kạgurom ghan bọ owol ạna ḍighiigh.’” 12 Kụ a Jizọs ạphagharanhaan nyọdi mọ: “Ọge ni mọ, ‘Kạ́degh a Jehova* Ẹnhaan phọ ạna apogh.’” 13 Kụ Eru phọ rọmhan ọdegh a Jizọs ophogh, kụ ạwilhe nyọdi ạḅua akoriom ghan ẹnhon eepoogh.
14 Kụ uwaloor iigbia phọ aḍighi ni ịdi a Jizọs aḅula ẹpe Gạlili. Kụ ịma ạraraar phọ ọdi aḍighi bọ eelheghaany oomo ạramha phọ ekoom bọ ẹpe phọ. 15 Ọdi amhiigh ni kẹn ọtughemhi ịsiphe arubughotu phọ ạbidi, kụ oomo awe phọ ọseph ghan nyọdi.
16 Kụ ọdi ạghi Nạzạrẹt, ẹmha phọ ookonhom bọ nyọdi, kụ ịdipho eḍighi bọ eḍighinhom ịyaar ọdi Ḍio Ophooghian phọ, ọdi aḍigh ni obughotu phọ ạmheera pịdi ọdi ạbal Ịge Iigbia phọ. 17 Kụ ọngo nyọdi ḍikpooghinheen ạḍinya oyil phọ Ạịzạyạ, kụ ọdi ạatarion ạmhiin esi phọ ọge bọ mọ: 18 “Uwaloor phọ a Jehova* odi ni r’ạmhi, loor esi dị ọdi mụsaḅar ịmhi ogbeelhom iiḅi ịinhaghan phọ ọḅenhi arukulhom mọ. Ọdi urom ịmhi ọḅenhi ạbuphe osiphi bọ oḍighi rẹbenhe mọ kosereghi ni bịdi r’ọḅenhi ạbuphe rọ́miin ghan bọ eten mọ bịdi kọḅilhe ni ọmiin eten, r’ọtanyan ạbuphe rọkpuuroghom bọ, 19 r’ọḅenhi awe ịlo amem mọ bịdi kọḅilhe bọ ọmoogh ḍịseph a Jehova.”* 20 Kụ ọdi akpooghi ḍịnya phọ ạngo ọpo rapogh bọ obughotu phọ, kụ ạrol ude; kụ oomo awe phọ ọrol bọ sịphe obughotu phọ osomoghi nyọdi. 21 Kụ ọdi amhiigh ọḅenhi ạbidi mọ: “Rodon esi ịge iigbia phọ ẹphen phọ nyinha ẹnhaghan bọ memhunhughan.”
22 Kụ oomo ạbidi omhiigh ọghaaph igey ịlo ọdi, kụ ịma ikpo ọnhu phọ ẹḍua bọ ọnhu ọdi remite iḍighi ni iikia esi ạbidi, kụ opuru ghan mọ: “Ọphon phọ ọony a Josẹf, kị́dipho?” 23 Kụ ọdi ạḅenhi bịdi mọ: “Mị alegheri mọ nyinha kịḅenhi ni ịmhi mọ, ‘Oyil, kookonhomha loor ạna. Ḍighi aani sịen ẹmha phọ ạna rạraar phọ yoor rọnaghan ghan bọ mọ nạ raḍighi ghan ẹpe Kạpạnịọm.’” 24 Kụ ọdi ạḅem mọ: “Mị ạkar rịḅenhi ghan inyinha mọ oyil ólho dị rakuan ghan sịphe ẹmha phọ ọdi. 25 Esi ọmaam, mị ạkar rịḅenhi ghan inyinha ịdi eru ịne mọ: Ịbadi arukpukelhe ạnmariir ụrol li Izrẹl riiḍio phọ Ẹlạịjạ mem mọ ọlophia ụ́loph bọ esi ịraar ạsia r’odiiny ụnwanyu, kụ iboom ịgbakuro ẹrol bọ oomo ade phọ. 26 Kụolo Ẹnhaan órom Ẹlạịjạ ọghiom r’oniin ọnyo ạbuphe phọ, arom ghụn ạghiom ekpukelhe ạnhir ọlo ạ Zạrẹfạt ẹpe ade phọ ạ Sạịdọn. 27 Ḅịlhe kẹn, ịbadi awe dị ẹzegh ọku ufe eḍighi ụrol li Izrẹl mem oyil phọ Ẹlạịsạ; kụolo ọdi ọ́baalhamhi* r’oniin ọnyo ạbidi, ạḅaalhamhi ghụn Nemạn ọlo a Siria phọ.” 28 Kụ oomo ạbuphe ọrol bọ sịphe obughotu phọ ọnhaghan rạraar phọ ịphen phọ ụghagh ni ilhoghi iboom, 29 kụ bịdi oḅerenhu ọsighe nyọdi ọḍuanham sịphe ẹmha phọ, kụ ọsiinyom eekunha ạnyu ẹeḅaraph phọ ẹmha phọ ạbidi edi bọ, pịdi onyu nyọdi oler ude. 30 Kụolo ọdi arelhe ni ogbo ạbidi bịn ạḅua.
31 Kụ ọdi ạḅua ạghi Kạpạnịọm, ẹmha dị edi Gạlili. Kụ ọdi ạtughemhi ghan bịdi Ḍio Ophooghian phọ, 32 kụ eten ịtughemhi phọ ọdi iḍighi ni iikia esi ạbidi, loor esi dị ọdi ạghaaph ghan ịdipho oye dị ạmhoogh ịikpo. 33 Mem mọ ọpo phọ oye dị ọkaraph uwaloor rạaḅaghamhi ạrol aani ni sịphe obughotu phọ, kụ ạlo mọ: 34 “Ạh! Jizọs ọpo ạ Nạzạrẹt phọ, nạ rụwa ghan iyoor eeghe? Nạ uru ophiemhi ayoor ḍụghum? Mị alegheri ni ọkar oye phọ nạ aru bọ, nạ kụ Oye Iigbia phọ Ẹnhaan arom bọ!” 35 Kụolo a Jizọs ạḅaam ni ọkaraph uwaloor phọ, ọdi ạḅem mọ: “Kpomori ọnhu ạna, amite loor ọdi.” Kụ ọkaraph uwaloor phọ alher oye phọ sịphe igbo phọ ạbidi kụ amite bịn ịyaar oye phọ óḍighi. 36 Kụ ịphen phọ iḍighi ni iikia esi oomo awe phọ, kụ oniin ạḅenhi ghan nyoniin mọ: “Ịphen phọ ịghen ikpo ọnhu? R’ịikpo, ọdi rạngo ghan ni ịto ịkaraph aruwaloor phọ, kụ bịdi remite ghan ni kẹḍua!” 37 Kụ ịinhaghan ịlo ọdi eelheghaany ghan bịn oomo ạrughulhukul ạramha phọ ekoom bọ ẹpe phọ.
38 Ọdi rọḅua sịphe obughotu phọ, kụ ạghi kạ Sạịmọn. Mem mọ ọpo phọ osipheeny ạrol li loor onhiin ạnhir ạ Sạịmọn kụ aloor phọ ẹgholhoghol iboom, kụ bịdi ọḅenhi Jizọs mọ ạlhoghonhaan ḍịghaagh. 39 Kụ ọdi ạmheera pạ ạnhir phọ ạmhinha bọ, kụ aakonhom ạnhir phọ. Mem mem mọ bịn ạnhir phọ aḅetenhu amhiigh oḍighinhaan ạbidi rạraar.
40 Kụ mem dị erumhuḍio remeel ighool, oomo ạbudi ọmhoogh we dị ạreezegh kịrokiro rẹeḅaghamhi ụsighe ni oruom nyọdi. Kụ ọdi aakonhom bịdi esi ọbamham ạraghaagh ọdi tọrobo ọnyo ạbidi. 41 Kụ ịkaraph aruwaloor ịḅua ni kẹn loor ịbadi awe, kụ ẹlo ghan mọ: “Nạ kụ Ọony phọ Ẹnhaan.” Kụolo ọdi ạḅaam ghan ni bịdi, kụ ómheera ghan mọ bịdi ọghaaph ịyaar, loor esi dị bịdi ulhegheri ni mọ ọdi kụ ạ Krạịst phọ.
42 Tọrobo ịpe ẹrol bọ, eḅon ạḍiroor ọdi ạḅua ni ạghi ekpisi dị awe úlo. Kụolo aḍita awe phọ umhiigh ni ọwa ọdi tụtu oru osi sịphe ọdi ạrol bọ, kụ ọkparagha ghan oḍighi ịdi ọdi kạ́bilhe bịdi ạḍua. 43 Kụolo ọdi ạḅenhi bịdi mọ: “Mị ạmoogh ogbeelhom iiḅi ịinhaghan ịlo Ọmhar phọ Ẹnhaan ọḅenhi aani awe ịnhon ạramha, loor esi dị ụtuan ịduon kụ urom bọ ịmhi.” 44 Kụ ọdi ạghiom ghisigh agbeelhom ghan dom mọ Ẹnhaan ẹpe arubughotu phọ a Judia.