Ọdaphan Luk

18 Kụ ọdi ạngo bịdi ọghaaph ọmaanhiom dị aḍeenhaan ịpe emhoghi bọ mọ bịdi ọoḅereghi ghan oomo amem ḅịlhe mọ bịdi kúdugh. 2 Ọdi ạḅem mọ: “Oogboom ịiruen dị ụ́moogh oghiilhaan Ẹnhaan ḅịlhe ụ́logh ghan eegu oye ạrol li eniin ẹmha. 3 Kụ ekpukelhe ạnhir ạrol aani ni kẹn ẹmha phọ ẹpe phọ dị ạghi ghan ạteeny nyọdi ạḅenhi mọ, ‘Mịin ni mọ nạ usophonhaan ịmhi ogey ọoruen esi ọphon r’ạmhi rọokonhoghian bọ.’ 4 Kụ ịsighe ni mem ọdi ómheera, kụolo ẹsighe rẹki kụ ạḅenhian loor ọdi mọ, ‘Ghạlhamo r’ịduon mị ụ́moogh bọ oghiilhaan Ẹnhaan kụ mị rạ́logh ghan bọ eegu oye, 5 loor ịduon ekpukelhe ạnhir phọ ọphon phọ ratu ghan bọ kụuḅaghamhi ịmhi, mị kạmiin ni mọ mị asophonhaan nyọdi ogey ọoruen ọbo ọdi kạkiom ghan bọ ghisigh atu ghan sịen ụnyagh ịmhi r’ịlom mọ ọdi.’” 6 Kụ Uwo Ẹmhoogh phọ ạḅem mọ: “Nyinha ẹnaghan ni ịphen oogboom ịiruen phọ ạghaaph bọ, ghạlhamo r’ịduon úḍighi bọ ni oye elhiom eḍighinhon ịyaar? 7 Esi ịduon phọ, nyinha regbi mọ Ẹnhaan kásophonhaan ogey ọoruen bụphe ọdi mạsaḅar bọ, romoghi ghan bọ kọmhagh nyọdi ḍịroor r’adulhe, ịduon ọdi ạkparam bọ ni rakori bịdi? 8 Mị rịḅenhi ghan inyinha mọ, ọdi kaagborion ni asophonhaan bịdi ogey ọoruen. Tọrobo ịpe ẹrol bọ, mem dị Ọony phọ oye aru, kạkar ri ạmiin omheeraam mọ ọphon phọ* sịen ade phọ ḍụghum?”

9 Ọdi ạngo ni kẹn ọnhon ọghaaph ọmaanhiom bụphe rọotughian ghan bọ mọ bụno awe elhiom eḍighinhom ịyaar ḅịlhe ọsighe bọ mọ ạbunhon awe ụ́man mạar, ạḅem mọ: 10 “Ịyal awe ụghi ni ẹpe otu ịiḅereghi phọ ọoḅereghi, oniin ọnyo ạ Fạrisi kụ ọphoripho ọbonyiom iisogh. 11 Kụ ọnyo ạ Fạrisi phọ ạmheera amhiigh ọoḅereghi sịphe olhoghi ọdi mọ, ‘Ẹnhaan, mị rạseph ni nyịnha ịduon mị ụ́tol aani bọ ịdipho ạbueripho awe phọ oḍighi bọ bụo izironhaan, bụo ekeeny eḍighinhom ịyaar, buleom ẹmha, ọbobo ghạlhamo r’ịduon ọbonyiom iisogh phọ ọphon phọ. 12 Mị rạkaagh ghan ni ẹḍogh ịyal amem wiki phọ; mị rạngo ghan ni bin esi aḍioph abin ạtorobo ịyaar dị mị ạmhoogh.’ 13 Kụolo ọbonyiom iisogh phọ ạmheera bọ ekpisi dị ẹkel ọ́wa ophogh ạnyu, kụolo ạgiphigha ghan ghụn ekpolhoghi ọdi, ạḅem ghan mọ, ‘Ẹnhaan, ụnma ịmhi ighirigiir, mị oḍighinhom ịkaraph.’ 14 Mị rịḅenhi ghan inyinha mọ mem mọ oye phọ ọphon phọ rakeel bọ, Ẹnhaan ạmhiin mọ ọdi aḍighi oye elhiom eḍighinhom ịyaar apu ọnyo ạ Fạrisi phọ. Ịdi eḍighi bọ tọrobo oye lọ aphophe loor ọdi kosooromhi ni, kụ oye lọ asooromhi loor ọdi kopophe ni.”

15 Mem mọ ọpo phọ, awe uruom ghan ni nyọdi ịbam ạnmuny ạbidi dị ọdi kạḅogh, kụ ạbumatuan phọ ọmhiin bọ ịphen phọ, umhiigh ni ọḅaam ạbidi. 16 Kụolo a Jizọs ạmhagh ni ịbam ạnmuny phọ mọ oru, kụ ạḅem mọ: “Imeera ịbam ạnmuny phọ oru ụteeny ịmhi, késophoghom bịdi, loor esi dị Ọmhar phọ Ẹnhaan ọlo ọdo phọ ạbuen phọ. 17 Mị ạkar rịḅenhi ghan inyinha mọ, tọrobo oye lọ ụ́sighe Ọmhar phọ Ẹnhaan ịdipho ọbumoony rạsighe ghan bọ ịyaar, káḍigh ni bịn Ọmhar phọ.”

18 Kụ oniin ọtooghia apuru nyọdi mọ: “Ogey Ọtughemhia, mị kaḍighi eeghe kụ ạmoogh ghuḍum k’agee-pọ?” 19 Kụ a Jizọs ạḅenhi nyọdi mọ: “Uḍighi ika kụ nạ ụmhagh bọ ịmhi mọ ogey? Ọnhon oye ólho dị aḍighi ogey emuton Ẹnhaan. 20 Nạ alegheri ni iilhogh phọ ẹḅem bọ mọ: ‘Kále ẹmha, kạ́ko enu, kámi imhi, kạ́gbaanhaan oye ịkaraph ạsiagba, lọgh eegu ọde r’onhiin ạna.’” 21 Kụ oye phọ ạḅem mọ: “Mị raako ghan ni oomo ịphen phọ k’ẹghoroghor ạmhi.” 22 A Jizọs rọnhaghan ịphen phọ kụ ạḅenhi nyọdi mọ, “Eniin ịyaar esugha ni dị nạ kaḍighi: Bolhoghi oomo ạraraar phọ nạ ạmhoogh bọ kụ ạngo ikpoki phọ rukulhom mọ, bịn nạ kạmoogh ni ephua ẹpe k’ạke; kụ aru aḍighi ọnyo ạmatuan ạmhi.” 23 Ọdi ạnhaghan bọ ịphen phọ akururu ni iboom, loor esi dị ọdi ạmhoogh eboom ẹela.

24 Kụ a Jizọs aphogh nyọdi kụ ạḅem mọ: “Kẹkpar ri dị bụphe ọmhoogh bọ ikpoki koḍigh Ọmhar phọ Ẹnhaan! 25 Ọkar agey, edugh ghụn dị ạ kạmẹl kạbol epogh ạlaga ịkol epu dị ọolha kaḍigh Ọmhar phọ Ẹnhaan.” 26 Bụphe ọnhaghan bọ ịphen phọ ụḅem mọ: “Ạnhian nụun kụ ẹdi kọkar bọ ọpel?” 27 Kụ ọdi ạḅem mọ: “Ẹnhaan katue ni aḍighi rạraar phọ ịpe ẹghigh bọ esi awe mụdi kétue emite.” 28 Kụolo a Pita ạḅem mọ: “Yoor mọwilhe rạraar phọ yoor ọmhoogh bọ ọdaph nyịnha.” 29 Kụ ọdi ạḅenhi bịdi mọ: “Mị ạkar rịḅenhi ghan inyinha mọ, oye ólho dị mạwilhe otu ọbobo ạnhir ọbobo bumor ọbobo ọde r’onhiin ọbobo nmụny loor ẹmhu Ọmhar phọ Ẹnhaan, 30 dị kạ́moogh nyịidipho ịbadi amem apuemhi ịpe ọdi ạmhoogh ghan bọ, kụ ẹpe aḅirinhi phọ ratu bọ* ạmoogh ghuḍum k’agee-pọ.”

31 Kụ ọdi ạmhagh Ḍioph r’ Ịyal phọ atenhom ọgbal kụ ạḅenhi mọ: “Ịmiin! Yira rọki Jeruselem, kụ oomo ạraraar phọ ariil phọ ọge bọ ịlo Ọony phọ oye kemunughan ni. 32 Esi ọmaam, kọḅogh ni nyọdi ọngo we areelhe phọ kụ ọgilaam, oofolhomhi ọḅilhe ọsinhoghom ịghor. 33 Rọgurogh nyọdi, kụ okiigh, kụ ọdi aḅetenhu esi aḍuugh omhunhenhiom ịraar aḍughul otu phọ.” 34 Kụolo bịdi ụ́naghanhan r’ẹmhu eniin ịyaar esi ạraraar phọ ịphen phọ, loor esi dị ạaghinhaan ni bịdi ikpo ọnhu phọ ịphen phọ, kụ bịdi ụ́naghanhan rạraar phọ ọdi ạghaaph bọ.

35 Ịduon a Jizọs ratuman bọ Jeriko, oye dị rạ́miin ghan eten ạrol li sịphe ọgbal eten phọ ạlhomhian ghan. 36 Kụ oye phọ ạnhaghan bọ rọḍogh aḍita awe dị roten, amhiigh ni opuru ịyaar phọ remite bọ. 37 Kụ bịdi ọḅenhi nyọdi mọ: “A Jizọs ọpo ạ Nạzạrẹt phọ kụ raten!” 38 Kụ ọdi ạlo mọ: “Jizọs, Ọony a Devid, ụnma ịmhi ighirigiir!” 39 Kụ bụphe ọrol bọ ghisigh phọ omhiigh oobophoghi ọdi, kụ ọḅenhi ghan mọ aḅoorian, kụolo ọdi ạkuamhi ghan bịn ạlo mọ: “Ọony a Devid, ụnma ịmhi ighirigiir!” 40 Kụ a Jizọs ạmheera kụ ạḅem mọ ọsighe oye phọ oruom nyịnho. Oye phọ rotuman nyọdi, kụ a Jizọs apuru mọ: 41 “Nạ rạwa mọ mị uḍighinhaan nyịnha eeghe?” Kụ oye phọ ạḅem mọ: “Uwo Ẹmhoogh, ḍighi ịdi mị kạmiin eten.” 42 Kụ a Jizọs ạḅenhi nyọdi mọ: “Miigh ọmhiin eten; omheeraam mọ ạna maakonhom nyịnha.” 43 Bịn mem mem mọ ọdi amhiigh ọmhiin eten, kụ amhiigh ọdaph a Jizọs, kụ aghuenhi ghan Ẹnhaan. Kụ oomo phọ awe phọ ọmhiin bọ ịphen phọ, uboom aani ni Ẹnhaan.