Ọdaphan Luk

19 Ọdi aḍigh Jeriko kụ arelhe raten ẹmha phọ. 2 Kụ oye dị oghol mọ ạ Zạkiọs ạrol li ẹpe phọ; ọdi uwo ẹmhu ạbubonyiom iisogh, kụ ạmhoogh ẹela kẹn. 3 Ọdi ạkparagha ghan ọmhiin aani a Jizọs, kụolo loor esi aḍita awe phọ órue ọmhiin, loor ịduon ọdi akper bọ. 4 Kụ ọdi aghiil aḍia ghisigh ạsiiny oreeny asikạmọ pịdi ạmiin Jizọs, loor esi dị mọony amem katen ni eten phọ ẹpe phọ. 5 A Jizọs rosi esi phọ, kụ aphogh ạnyu ạḅenhi nyọdi mọ: “Zạkiọs, gboogborion asoor, ịdi eḍighi bọ rodon phọ mị kạtol k’ạna.” 6 Kụ ọdi aagborion asoor kụ r’ibo ạpham nyọdi ạghimhom k’ọdi. 7 Awe phọ ọmhiin bọ ịphen phọ, oomo ạbidi ugum ghan mọ: “Ọdi ạki iiruen k’oḍighinhom ịkaraph.” 8 Kụolo ạ Zạkiọs aḅetenhu ni kụ ạḅenhi Uwo Ẹmhoogh phọ mọ: “Uwo Ẹmhoogh! Mịin, mị kạngo ni egbem ạraraar phọ mị ạmhoogh bọ rukulhom mọ, kụ tọrobo ịyaar dị mị aziton* oye mị kaḅulhemhi ni inya amem apelhe.” 9 Kụ a Jizọs ạḅem mọ: “Rodon phọ ạpelieeny mạteeny otu phọ ọphon phọ loor esi dị ọdi phọ kẹn ọony Ebrạhạm. 10 Ịdi eḍighi bọ Ọony phọ oye aru ọwa r’ọphel ạbuphe mophe bọ.”

11 Bịdi odi ni rọnaghan rạraar phọ ịphen phọ, kụ ọdi ạngo bịdi ọnhon ọghaaph ọmaanhiom, loor esi dị bịdi ụutughian ghan mọ bịdi osi Jeruselem Ọmhar phọ Ẹnhaan katu mem mem mọ. 12 Ọdi ạḅem mọ: “Oye dị ọmhar otu ạbutooghia ạghi ni ekpisi dị ẹkel ọsighe ịikpo oḍighi uwo ẹmha kụ oḅula. 13 Tụtu kạki bọ, ạmhagh ḍioph ạrebenhe ọdi kụ ạngo ḍioph ạ mạịnạ* kụ ạḅenhi mọ, ‘Ịsighe emhuulhom ghan ḍighi tụtu mị arigheel.’ 14 Kụolo ạbuo eelhe phọ ọdi ụlhogh ni nyọdi ḍien kụ orom bụmeera enye mọ ọdaph nyọdi ọḅem mọ, ‘Yoor ụ́wa mọ oye phọ ọphon phọ aḍighi uwo ẹmha ayoor.’

15 “Ọdi rọghi ọsighe ịikpo oḍighi uwo ẹmha phọ roḅula, kụ ạmhagh rẹbenhe phọ ọdi ạngo bọ ikpoki* phọ, olhegheri ạsuo phọ bịdi mọmhoogh bọ sịphe aḍighi phọ. 16 Kụ ọḅel phọ aru ạḅem mọ, ‘Uwo Ẹmhoogh, mị ạmooghom sụo aḍioph ạ mạịnạ oniin ạ mạịnạ phọ nạ ụngo bọ ịmhi.’ 17 Kụ oye phọ ạḅenhi nyọdi mọ, ‘Maḍighi, nạ ogey ẹbenhe! Loor ịduon nạ aḍeenhaan bọ mọ nạ ạkpe ni oḍuom olhoghi esi ạraraar dị eghom ni iboom, mị kạma nyịnha ophogh aḍioph ạramha.’ 18 Kụ omhunhenhiom ịyal phọ aru ạḅem mọ, ‘Uwo Ẹmhoogh, mị ạmooghom sụo oogh ạ mạịnạ oniin ạ mạịnạ phọ nạ ụngo bọ ịmhi.’ 19 Kụ ọdi ạḅenhi aani nyọon phọ mọ, ‘Mị kạma aani nyịnha ophogh oogh ạramha.’ 20 Kụ ọnhon aru ạḅem mọ, ‘Uwo Ẹmhoogh, pọrono ạ mạịnạ phọ ạna, mị ạaghi olhoghi ukpe. 21 Ịdi eḍighi bọ mị ụmhoogh ni oghiilhaan ạna, loor esi dị nạ ọgbagara oye; nạ rạsighe ghan ịyaar dị nạ kụ úseere, kabugha ịdi nạ úḅeph.’ 22 Kụ oye phọ ạḅenhi nyọdi mọ, ‘Ọkaraph ẹbenhe, mị ạsighe ịpe nạ ạghaaph bọ kụ rasophonhaan nyịnha ọoruen. Tọ nạ ụḅem mọ nạ alegheri ni mọ mị ọgbagara oye dị rạsighe ghan ịyaar dị mị kụ úseere, kạḅilhe abugha ịdi mị úḅeph? 23 Uḍighi ika kụ nạ ọ́sighe bọ ikpoki* phọ ạmhi ọlhogh bạnk? Bịn ọbo mị aḅula bọ mị mụteeny ni ikpoki phọ ạmhi r’ạsuo dị mụḅaram.’

24 “Kụ ọdi ạḅenhi bụphe ọmheregha bọ sịphe phọ mọ, ‘Ịboor nyọdi mạịnạ phọ ẹngo ọpo ạmhoogh bọ ḍioph ạ mạịnạ phọ.’ 25 Kụolo bịdi ụḅenhi oye phọ mọ, ‘Uwo Ẹmhoogh, ọdi ạmoogh ni ḍioph ạ mạịnạ!’ 26 Kụ ọdi mọ: ‘Mị rịḅenhi ghan inyinha mọ, ọlo ạmhoogh, kọngo ni ọbughe, kụolo ọpo ụ́moogh bọ, ghạlhamo r’ịpe ọdi ạmhoogh bọ bịn kọboor ri. 27 Ọḅaram ịsien, ịsighe bụmulhogh ḍien phọ ạmhi ụ́wa bọ mọ mị uḍighi uwo ẹmha ạbidi eru kụ ẹze bịdi sịen ghisigh ạmhi.’”

28 Ọdi rọghaaph rạraar phọ ịphen phọ, kụ ạghiom ghisigh erelhe phọ ọdi ọghi a Jeruselem. 29 Ọdi rotuman Bẹtfạji rạ Bẹtạni sịphe ẹeḅaraph phọ oghol bọ mọ Ẹeḅaraph Olivs, kụ arom ịyal ạbumatuan ọdi dom, 30 ọdi ạḅenhi bịdi mọ: “Iḍigh ẹmha phọ nyinha rẹmiin bọ, nyinha eḍigh nyinha kẹmiin ni ọony ẹnham adool dị ọkpo dị oye kọ̋rolhom ghan. Ịkatan ẹsighe eru sịen. 31 Kụ eru mạar dị oye ipuru inyinha mọ, ‘Uḍighi ika kụ nyinha rẹkatan bọ?’ ịḅenhi nyọdi mọ, ‘Uwo Ẹmhoogh phọ kụ ạḅem mọ ọsighe ọghiom nyịnho.’” 32 Kụ ịyal phọ ạbumatuan phọ ọghi kụ ọmhiin dị edi ọkar ịpe ọdi ạḅenhi bọ bịdi. 33 Kụolo bịdi odi rọkatan ọony ẹnham adool phọ, kụ bụphe ọmhoogh bọ opuru bịdi mọ: “Uḍighi ika kụ nyinha rẹkatan bọ ọony ẹnham adool phọ?” 34 Kụ bịdi ọḅem mọ: “Uwo Ẹmhoogh phọ kụ ạḅem mọ ọsighe ọghiom nyịnho.” 35 Kụ bịdi ọsighe oruom Jizọs, kụ onyoroghiom rụsuoma ạnyu ạbidi ọony ẹnham adool phọ kụ a Jizọs ạrolhom.

36 Kụ bịdi ụdeeghi ghan ni rụsuoma ạnyu phọ ạbidi sịphe eten phọ, ịduon ọdi aghiilhom bọ rạki. 37 Ọdi ratuman bọ eten phọ ẹḍua bọ Ẹeḅaraph phọ Olivs esoor, bịn oomo aḍita ạbumatuan phọ ọdi omhiigh obo r’oboom Ẹnhaan r’ạroḍogh dị ẹghi ạnyu loor esi oomo iiḍighi ịiḍaany phọ bịdi mọmhiin bọ, 38 kụ ọḅem ghan mọ: “Ạḍiseph kụ edianhaan ọpo ratu bọ ịdipho Uwo Ẹmha r’aḍien phọ a Jehova!* Ẹepho ẹrol ẹpe k’ạke, kụ eghuan ẹrolhonhaan nyịnha phọ odi bọ ẹpe k’ạke phọ!” 39 Kụolo, buniin ạbuo ạ Fạrisi phọ ọrol aani bọ igbo aḍita awe phọ ụḅenhi nyọdi mọ: “Ọtughemhia, ḅạam bụmatuan phọ ạna.” 40 Kụ ọdi ạphagharanhaan mọ: “Mị rịḅenhi ghan inyinha mọ, bụen phọ kụ oḅoroghian, asighiigh phọ kẹlo ni emiteom.”

41 Ọdi rotuman Jeruselem, kụ aphogh kụ amhoghinhaan, 42 kụ ạḅem mọ: “Ḅẹm loon mọ nạ ulhegheri ni rodon phọ rạraar phọ ịpe rẹngo ghan bọ ẹepho, kụolo nyịidipho mạaghinhaan nyịnha ọbo nạ kạmiinhom ghan bọ riḍien ạna. 43 Loor esi dị amem retu ni dị ạbumulhogh ḍien phọ ạna kogim ịsiosio ireeny ooghironhom nyịnha, kụ okoom nyịnha ọḅilhe ọḍua oomo ạrughulhukul otu ozuom* nyịnha. 44 Bịdi kophiemhi ni nyịnha r’ạnmuny phọ ạna, kụ bịdi kọ́bilhe ḍighiigh ạnyu aḍighiigh sịen phọ, loor esi dị nạ ọ́lhogh elhegh mem mọ oru bọ ọoḅeghion ạna ophogh.”

45 Kụ ọdi aḍigh otu ịiḅereghi phọ kụ amhiigh ophorogh yogh ạbuphe robolhoghi bọ rạraar sịphe phọ, 46 kụ ạḅenhi bịdi mọ: “Ọge ni sịphe Ịge Iigbia phọ mọ, ‘Otu phọ ạmhi kaḍighi otu ịiḅereghi,’ kụolo nyinha metenhe otu ạruḅa.”

47 Ọdi ạghiom ni ghisigh ạtughemhi ghan sịphe otu ịiḅereghi phọ tọrobo aḍio. Kụ aruwo ẹmhu ạbupinyon rịkia phọ r’ạbutughemhia Olhogh phọ r’ịkpanha awe phọ ụwa ghan ni reten oghiigh ọdi; 48 kụolo bịdi ụ́miin eten oḍighi ịduon phọ, ịdi eḍighi bọ oomo awe phọ ughiom ni ghisigh okoom nyọdi ọnhaghan ghan ịpe ọdi rạkaaph bọ.