Ọdaphan Jọn

12 Odiiny aḍughul otu kụ egbi ọteeny Ẹyaal Ọphel Otenhe phọ, a Jizọs asi ni Bẹtạni, ẹmha ạbuo ạ Lạzạrọs, ọpo ọdi aḅeton bọ esi aḍuugh phọ. 2 Kụ bịdi uukolhobinhaan ni nyọdi eḍien adulhe ẹpe phọ. Ạ Mạtạ kụ ạḅamhaghinhaan ghan bịdi eḍien phọ, kụ ạ Lạzạrọs ạrol aani ni igbo ạbuphe rolean bọ r’ọdi. 3 Kụ a Meri ạsighe elo ịma eḍu dị keḍighi ni egbem a lita,* ọkar ogey ạ nạd dị ạmhan ḍighi, aaduom ruwol a Jizọs kụ ạsighe sịlhaal ọdi agbuuroghom. Kụ ịma eḍu elo phọ ẹghugh otu phọ. 4 Kụ a Judas Iskạrịọt, oniin ọnyo ạmatuan ọdi, ọpo rạwa bọ aal ọdi, ạḅem mọ: 5 “Uḍighi ika kụ úbool bọ elo ịma eḍu phọ ẹphen phọ 300 a dinerạị* ụsighe ikpoki phọ ụngo rukulhom mọ?” 6 Ọdi ọ́tuan ogbolhomaam dị ọdi ạmhoogh ạghi esi arukulhom mọ kụ ạghaaph bọ ịphen phọ, ạghaaph ịphen phọ loor esi dị ọdi ọḅa. Ọdi kụ ạpham ghan igbe ikpoki phọ kụ amhi ghan ikpoki dị ọlhogh sịphe phọ. 7 Kụ a Jizọs ạḅem mọ: “Kpọrion ạnhir phọ rạghaagh, pịdi ọdi aḍighi ịphen phọ aakolhobian loor phọ ạmhi kụ egbi ọteeny aḍio amaḍi phọ ạmhi. 8 Arukulhom mọ kọtol ghan ni r’anyinha oomo amem, kụolo mị kạ́tol r’anyinha oomo amem.”

9 Aḍiboom aḍita ạbuo a Ju phọ uru ni mem mọ ọnhaghan bọ mọ a Jizọs odi ẹpe phọ, kụolo útu ọmhiin a Jizọs bịn, uru ọmhiin aani ạ Lạzạrọs phọ ọdi aḅeton bọ esi aḍuugh phọ. 10 Kụ aruwo ẹmhu ạbupinyon rịkia phọ uupuruan ni oghiighom aani ạ Lạzạrọs, 11 loor ịduon ịbadi ạbuo a Ju phọ ọtuan ghan bọ nyọdi ọghi ẹpe phọ kụ ọmhoogh omheeraam ọghi esi a Jizọs.

12 Rẹteeny ḍio phọ etum bọ sịphe, kụ aḍita awe phọ oru aani bọ ẹyaal phọ ọnhaghan mọ a Jizọs ratu Jeruselem. 13 Kụ bịdi ọsigheogh sigo alhe omite ọghi ọteeny nyọdi, kụ omhiigh ọlo mọ: “Yoor rọoḅereghi ghan mọ pẹl nyọdi! Ạḍiseph kụ edianhaan ọpo ratumhom bọ ḍien phọ a Jehova,* Uwo Ẹmha phọ Izrẹl!” 14 A Jizọs rọmhiin ọony ẹnham adool kụ aḍigh, ịdipho ọge bọ sịphe Ịge Iigbia phọ mọ: 15 “Kákiilhaan, nyạnhi ạ Zạyọn. Mịin! Uwo ẹmha phọ ạna ratu, kụ aḍigh ọony ẹnham adool.” 16 Ạbumatuan phọ ọdi ụ́naghanhan ịphen phọ emhiighom mọ, kụolo mem mọ oghuenhi bọ Jizọs kụ ẹdi bịdi ọotughian mọ ọge ni ịphen phọ ịlo ọdi ḅịlhe mọ bụno uḍighinhaan ni nyọdi ịphen phọ.

17 Kụ aḍita awe phọ ọrol bọ r’ọdi mem mọ ọdi ạmhagh bọ Lạzạrọs sịphe oḍi phọ aḅeton esi aḍuugh ụghiom ni ghisigh ọḅenhi ghan bụnhon awe ịpe emite bọ. 18 Aḍita awe phọ ụtuan ni ịduon phọ kẹn kụ ọghi bọ ọteeny nyọdi, loor esi dị bịdi ụnhaghan ni ịlo ịiḍaany phọ ịphen phọ ọdi aḍighi bọ. 19 Kụ ạbuo ạ Fạrisi phọ ọghaaph ghan sịphe igbo phọ ạbidi mọ: “Nyinha ẹmiin ni mọ ịphen yira roḍighi bọ rẹ́moogh ẹmhu? Ịmiin! Oomo aḅirinhi phọ rọdaph nyọdi.”

20 Igbo ạbuphe ọghi bọ ooseeny Ẹnhaan mem ẹyaal phọ, buniin ạbuo a Gris ụrol aani ni. 21 Bịdi ụghi ni ọteeny Filip phọ aḍighi bọ ọlo ạ Bẹtseida phọ ạ Gạlili, kụ omhiigh ọoḅereghian ọdi mọ: “Oye phọ, yoor rọwa ọmhiin a Jizọs.” 22 Kụ a Filip aru ạḅenhi Ạndrụ. Kụ Ạndrụ ra Filip oru ọḅenhi Jizọs.

23 Kụ a Jizọs ạphagharanhaan bịdi mọ: “Mẹteeny mem mọ kokuenhi bọ Ọony phọ oye. 24 Mị ạkar rịḅenhi ghan inyinha mọ, emuton dị ekpo a wit emheel ude ẹḅor,* keḍighi ghan eniin ekpo bịn; kụolo mem lọ ẹḅor* kụ ẹdi kemuum iboom iimhumha. 25 Tọrobo oye lọ ạphomhoghian ghuḍum mọ ọdi kapiemhi ni, kụolo tọrobo oye lọ ạlhogh ḍien ghuḍum mọ ọdi sịen aḅirinhi phọ ọphon phọ kaako ni pịdi ạmoogh ghuḍum k’agee-pọ. 26 Oye lọ rạwa okumu ọngo ạmhi ụdaph ịmhi, kụ ekpisi phọ ẹpe mị odi bọ kụ ẹdi ọpo rakumu bọ kụngo ịmhi kạtol aani. Kụ Ọde phọ kakuenhi ni oye lọ rạwa okumu ọngo ạmhi. 27 Sịen mesi bọ, ịyaar rẹeḅaghamhi ni olhoghi ạmhi, kụ mị kạkar ạkaaph eeghe? Ọde, ụphel ịmhi ạsighe sịen amem mọ ạmuen phọ. Tọrobo ịpe ẹrol bọ, mị ụtuan ịduon kụ ạrol bọ ạteeny mem mọ ạmuen phọ. 28 Ọde, kuenhi ḍien phọ ạna.” Kụ ẹḍogh ẹḅa ẹpe k’ạke phọ mọ “Mị maghuenhi ni kụ mị kạḅilhe ni akuenhi.”

29 Kụ aḍita awe phọ ọmheregha bọ sịphe phọ ụnhaghan ni kụ omhiigh ọḅem mọ ọomhaany kụ ạraph. Kụ bụnhon mọ: “Ọokpaany kụ ạḅaanhaan nyọdi.” 30 Kụ a Jizọs ạḅem mọ: “Ẹḍogh phọ ẹphen phọ ịmhi ị́tuan kụ ẹḅa bọ, ịtuan inyinha. 31 Nyịidipho rosophonhaan ọoruen aḅirinhi phọ ọphon phọ; kụ koporogh ni ọtooghia aḅirinhi phọ ọphon phọ. 32 Kụolo mem mọ kuphoophe bọ ịmhi ọkimhom ạnyu,* mị kaḍur ri we kịrokiro atumeriom loor ạmhi.” 33 Ọdi ạghaaph ịphen phọ oḍeenhaan ọdo aḍuugh phọ ọdi kamugh bọ. 34 Kụ aḍita awe phọ opuru nyọdi mọ: “Olhogh phọ ạḅem mọ ạ Krạịst phọ kạtol k’agee-pọ. Uḍighi ika kụ nạ ạḅem bọ mọ kopoophe Ọony phọ oye ọkimhom ạnyu? Ạnhian nụun kụ Ọony phọ oye?” 35 Kụ a Jizọs ạḅenhi bịdi mọ: “Ạḍiḅaal phọ kẹḅilhe ẹtol r’anyinha ekulha amem bịn. Itelhe nyịidipho nyinha ẹmhoogh bọ ḍịḅaal phọ ọbo ufiri phọ kạkpar ghan bọ ipu inyinha; oye dị ratelhe esi ufiri rálegheri ghan ekpisi phọ ọdi rạki bọ. 36 Nyịidipho nyinha ẹmhoogh bọ ḍịḅaal phọ, ịmoogh omheeraam ẹghi esi ạḍiḅaal phọ, pịdi nyinha eḍighi nmụny ạḍiḅaal.”

A Jizọs rọghaaph ịphen phọ kụ ạwilhe bịdi ạghi ạaghian. 37 Kụ ghạlhamo r’ịduon ọdi maḍighi bọ ni ịbadi ịiḍaany ghisigh ạbidi, bịdi ụ́moogh omheeraam ụki esi ọdi. 38 Kụ ịphen phọ imhunhenhi ịpe oyil phọ Ạịzạyạ ạghaaph bọ mọ: “Jehova,* ạnhian kụ mạmhoogh omheeraam ạki esi ịpe yoor mọghaaph bọ? Kụ ạnhian kụ ịdi a Jehova* maḍeenhaan ịikpo* phọ ọdi?” 39 Kụ ẹnhon ịyaar dị eḍighi bọ ịdi bịdi útue bọ umeeraam ịphen phọ pọ ịpe Ạịzạyạ ạḅilhe bọ ạghaaph mọ: 40 “Ọdi maḍighi ịdi bịdi rọ́miin eten ạḅilhe aḍighi ịdi arokpom mọ ạbidi ẹkpar ọbo bịdi kọmiinhom ghan bọ eten riḍien phọ ạbidi ọḅilhe ọnaghanhan sịphe ilhoghi phọ ạbidi, ooghiraan otu pịdi mị aakonhom bịdi.” 41 Ạịzạyạ ạghaaph ịphen phọ ịlo ạ Krạịst phọ, loor esi dị ạmhiin eghuan phọ ọdi. 42 Tọrobo ịpe ẹrol bọ, ịbadi ạbutooghia phọ bịn ụmhoogh ni omheeraam ọghi esi ọdi, kụolo ụ́kaaph umiteom loor oghiilhaan ạbuo ạ Fạrisi phọ, ọbo koporogh ghan bọ bịdi sịphe obughotu phọ; 43 loor esi dị bịdi ụphomhoghian eghuan dị awe kọngo bịdi kụ opuemhi ẹpe Ẹnhaan kạngo bọ bịdi.

44 Tọrobo ịpe ẹrol bọ, a Jizọs ạghaaph ni r’ẹḍogh dị ẹghi ạnyu mọ: “Tọrobo oye dị ạmhoogh omheeraam aru esi ạmhi, pọ ạmoogh omheeraam atu esi ạmhi r’ọpo urom bọ ịmhi; 45 kụ tọrobo oye lọ ụmhiin ịmhi, pọ mạmhiin kẹn Ọpo urom bọ ịmhi. 46 Mị maru ịdipho ạḍiḅaal sịen aḅirinhi phọ, pịdi tọrobo oye lọ ạmhoogh omheeraam aru esi ạmhi kạ́tol mụn esi ufiri. 47 Kụolo oye lọ ạnhaghan ịphen mị rạkaaph bọ kụ ụ́tuugh uḍighi, mị kásophonhaan ọoruen; loor esi dị mị útu osoph ọoruen ọngo aḅirinhi phọ, mị uru ọphel aḅirinhi phọ. 48 Ịyaar edi ni dị kesophonhaan ọoruen oye lọ ughel ịmhi ḅịlhe ụ́sighe ikpo ọnhu phọ ạmhi. Ạraraar phọ mị mạghaaph bọ kụ kesophonhaan nyọdi ọoruen ḍio phọ esughanham bọ ọmhan phọ. 49 Ịdi eḍighi bọ mị rạ́atughian ghan ịlo ạmhi bịn kạghaaph, Ọde phọ urom bọ ịmhi mụngo ịmhi ịto ịlo ạraraar phọ mị kạkaaph bọ r’ạraraar phọ mị kạtughemhi bọ. 50 Kụ mị alegheri ni mọ ọdaph ịto phọ ọdi rẹngo ghan ghuḍum k’agee-pọ. Esi ịduon phọ tọrobo ịdi Ọde phọ ụḅenhi ịmhi, kụ ẹdi mị rạkaaph ghan.”